Tag Archives: Prensa

Mundu, Kòrsou i Su Libertat Di Prensa

4 May

Korant Vigilante di 3 di mei 2014 ta pone ku leternan grandi, kubriendo e mitar pagina abou: “PLAN PA DETENE DOS EKS MINISTER I UN KOMERSIANTE”. Na momentu ku e lesado saka FL1,50 pa sasia su kuriosidat e ta ripara ku te na pagina 12 e artikulo ta aparese konsistiendo di tres frase chikitu miserabel ku bo ta kaba di lesa den menos ku 20 sekonde. Un triki barata a keda di komete pa manipula atenshon di e konsumido pa gasta su sen aportando na e garantia ku periodismo di sensashonalismo ta keda na bida pa un tempu largu.

E kaso no ta unu normal sin mas pasobra pa prome e doño di e korant ta Merril ‘Lilo’ Sulvaran fundado di Curacao Media Organization(CMO) ku ta para pa hisa kalidat di periodismo en general atrabes di e organisashon i na di dos luga tres di mei ta dia internashonal di libertat di prensa un dia ankra den artikulo 19 di derechinan humano universal ku ta para ketu na libertat di kada hende pa opina i ekspresa sin keda stroba i pa buska, hana i parti informashon via media sin frontera.
E vishon ta ku libertat di media i e akseso na informashon ta yuda desaroya e meta pa empodera pueblo ku medionan di komunikashon serio ku ta alimenta pueblo ku sufisiente material informativo pa por opina i partisipa den tur proseso di su komunidat pe por ta doño di su mes destino usando e informashon i konesementu di kalidat haltu.

Ironia di bida ta ku aña pasa na mei CMO huntu ku UNESCO di Korsou a hana e oportunidat pa organisa un konferensia Karibense di tres dia den kuadro di Dia Mundial di Libertat di Prensa. Notisia360 ta raporta: ” Lilo Sulvaran tambe di CMO, a reiterá e importansha pa prensa traha
riba kalidat, esaki pa mitigá e krítikanan ku sa tin riba prensa lokal. Ta importante pa hisa nivel di
nos komunikadonan, tantu na radio, televishon komo korant. E vishon di Unesco i CMO ta pa tin un kontinuidat den konsientisashon dje komunikado i sigui ku e proseso di kalidat.”
Presidente di CMO Stanley Ignacio i trahado pa Extra i miembro ko-organisado dje konferensia na 2013 Valeska Diaz komo hefe redaktor na korant Extra huntu ku Sulvaran na Vigilante den nan korantnan di djasabra 3 di mei no a duna ni un artikulo chikirititu di sikiera dos frase na e dia speshal ku ta salbaguardia e derechinan di nan mes fishi di komunikashon.

—Prensa ku no ta papia, analisa riba nan mes dia di libertat di ekspreshon den media ta mane obispo Secco ku enbes di duna predikashi den katedral di Pietermaai ta bai bishita Campo riba un djadumingu.—

Mariano Heyden aña pasa a deklara ku e si no ta interesa pa konekta ku su koleganan Karibense i no mester bai na e konferensia regional di prensa organisa pa CMO den Renaissance hotel pasobra ta “tin nada ku nan por a sine einan” ku e ya sa kaba.
Un testimonio di ignoransia lokal di marka mayo ku a haña su reperkushon 2 di mei riba un djabierne ora e periodista ku mas di 30piku ana di eksperiensia a invita den su programa Perspektiva na Z86
reportero/periodista Yves Cooper huntu ku Reina Joe eks periodista kaminda na a elabora den un forma desorganisa riba dia di libertat di prensa i a ekspresa un prekupashon kolektivo pa e forma kon medionan di komunikashon ta den un estado di degenerashon.
Heyden i Cooper a laga nan bosnan kritiko resona den e studio radial den kurason di Otrobanda, e problema si ta ku ora bo pretende di ta un outoridat den mundu di periodismo i konstantemente tin algu di bisa riba bo koleganan i medionan di komunikashon ku nan ta representa ta yega un dia ku nan tin ku manifesta nan outoridat. E skuma tin ku komberti den chukulati. Heyden, Joe, Cooper tur tres tin akseso na tur doñonan di media i nan finansiadonan i un publiko ku ta adora e tera ku nan ta kana ariba. Prensa a kai hopi, e kalidat ta bai atras dia pa dia pa años kaba pero kada bes ora un dia manera 3 di mei of 1 di september Dia di Prensa presenta no tin niun esfuerso for di na skina pa organisa un konferensia, un debate, un foro transmiti na radio/televishon huntu ku tur miembronan i doñonan di media pa analisa, diskuti e problemanan den mundu di medionan di komunikashon i ofrese solushonnan huntu ku e representantenan di komunidat ku a profundisa den e materia di prensa.

E wikent aki tambe e notisia a yega den Amigoe (djabierne) ku TeleCuracao i TeleCuracaoFM lo separa for di nan kompania mama UTS i lo kai bou di gobiernu representa via komesarionan. E desishon a kai fin di mart pero a keda skondi ya un luna kaba pa publiko pa e propio TeleCuracao te dia di awe. E relato den e korant hulandes ta bisa ku e desishon a kai pa preveni ku influensia politiko (opositor) por (sigi) domina na e planta nashonal.
Si di berdat Korsou tin un prensa liber pero a prefera di tapa e notisia aki e ora ei e siman ku ta bin e liderasgo den prensa mester revindika su mes i mustra publiko kiko ta e origen di e kaso na TeleCuracao ku a kaba na un futuro separashon ku UTS.
E mesun koleganan ku aña pasa a partisipa for di Jamaica den e konferensia di UNESCO i CMO rondo e tema Libertat di Prensa ta tuma e dia hopi na serio i a kana un marcha dia 3 di mei den kayanan di Kingston pa laga sa ku nan tin un kompromiso ku e lucha pa ta i keda ku un grado haltu di libertat di prensa.
Reporters Without Borders a publika ku 2014 Jamaica ta okupa posishon 17 den e indise pa paisnan ku libertat di prensa. Hulanda ta na 4, Merka ta na luga 46, Haiti na 47. Ki luga Korsou tin, ken tin e liderato pa hasi un investigashon sientifiko den e espasionan di medionan di komunikashon pa hana sa na unda nos ta situa ku nos derechinan di buska, parti i risibi informashon di kalidat?

Telecuracao FM: Kon Ta Horta Plaka di Pueblo

1 Feb

Definishon di un estafa mediatiko ta na momentu ku plaka di pueblo di un kompania ku ta kai bou di gobiernu ta lanta loko riba un dia kumpra un emisora ku e meta pa ofrese un alternativa komersial den e zona kaotiko radial di 28 radio. Den un forma diktorial sin aviso e gerensia ku Paul de Geus na kabes a kwe fondonan deriva di e kompania publiko di telekomunikashon UTS i gasta esaki na kompra di radio TOP FM 93.3 sin niun outorisashon gobernamental, sin niun aprobashon moral popular of logika komersial permiti pa un kompania publiko di tin.

Asina 31 di yanuari 2011 un beibi bochornoso a mira lus di dia hanjando e nomber di TCFM (Telecuracao FM) despues di e boutismo di e pastornan di plaka i poder komunikativo.
E bendishon ku saserdote Simon a sprengu riba e deseo kumpli di Telecuracao di hopi dekada pa hanja un ruman radial tabata e komienso di un programashon ku segun gerensia lo mester ta kontenido informativo kortiku pero potente di un durashon
di mei ora. Esaki tur presenta den e studio teknologikamente mas avansa di Karibe segun direktor di UTS sr. De Geus.

Maluso di e tesoro publiko di un kompania di pueblo sin metanan figo pa kontrubui na eleva of fasilita kalidat di bida pa pueblo ta un akto kriminal. Lansamentu di un emisora ku plaka di pueblo mester ta serio. Niun sorto di programashon ku TCFM ta ofrese ta duna realse na respeta e publiko pagado di impuesto. Lanta skucha mainta tempran 6.30 mei ora lesamentu di titularnan di korant durante e programa ‘Moru Bon Dia’ di Telecuracao pa despues 7′or sigi un ora ku Glen Thomas ku su kontenido di notisia i entrevista. Su tras te ku 12′or ta muzik ku papiamentu.
Merdia notisia 1′or ta sigi ku muzik i animashon di lokutor te ku anochi pa notisia di 8′or dal aden un ratu sigi ku muzik, 5 dia pa siman, 2 anja largu e mesun programashon mediokre finansia ku sen di suidadanonan di Korsou.

Nunka por a tilda Telecuracao FM ku na kabes Hugo Lew Yen Tai i Renny Oehlers di dispidimentu di plaka si
ta tin un programashon ku ta nutri
un pueblo promoviendo balornan edukativo, informativo ku sierto
grado di entrenamentu na nivel.
Pero den e situashon aki debidamente por papia di tres estafadornan den difushon radial.

Riba nivel legislativo te ainda despues di dekadanan no ta eksisti un konsenshi parlamentario fuerte ku por kibra e miedu i instrui komesarionan di tur partido pa implementa un programashon na radio ku ta ofrese: Notisia lokal, regional di Karibe i
Latina Amerika, Merka. NL, Oropa, Afrika, Asia. Politika, Komersio, Arte, Teknologia, Edukashon, Siensia, Muzik, Kultura, Deporte, Salud.

Telecuracao tin un kantidat di programa kaminda por piki kompila
i pase na su radio ruman TCFM pa publiko por skucha. Tambe e ta duna respet na bo komunidat ku tin retonan ku bista pa nan tambe por disfruta di un programashon ku temanan mas diverso i interesante.

TCFM komo radio komersial tin niun derechi di eksisti ku 28 otro emisoranan komersial. Lokwal ta pasando awoki na 93.3 FM ta hortamentu di plaka di pueblo pa paga tokado di disku ku lokutornan
ku komentarista nan onderstant tur luna. Dia ta introdusi un programashon ku ta kuadra ku kriterianan internashonal pa un radio keda paga ku fondonan publiko e ora ei por hustifika e eksistensia di Telecuracao FM.
Pa awoki e tipo di radio fantasma aki ta yerba di kabes di Kristu mes e tin ku bai kome. Pabien.

Dia di Prensa, Un Karnaval di Komunikashon Sosial Mediokre

12 Sep
Carnaval, John Baselmans

Carnaval, John Baselmans

Normalmente prome di september pa dekadanan kaba ta un fecha kaminda ta selebra dia di prensa. E fishi kaminda bo ta buska, kola, plama informashon. E fishi kaminda periodistanan tin ku skibi, papia, filma e berdat pa su publiko. Un dia speshal ku delastu anjanan su nifikashon i reflekshon pa e distribushon di e berdatnan di nos sosiedat a dirti i bira un aventura komersial kaminda plaka, poder i politika ta determina ki sorto di kalidat di media e pueblo ta hanja.

E anja aki dia di prensa, un novum a mira lus di dia ora ku Curaçao Media Organization (CMO) a disidi pa skuif e selebrashon di 1 di september na 7 di september pa motibu ku net e wikent di 30, 31 di ougustus Curaçao North Sea Jazz Festival lo a stroba e miembronan di prensa pa asisti e sigiente djadumingu 1 di september.

Un selebrashon sosial deportivo Vigilante ta meldu: “Miembronan di prensa lo partisipá na diferente enkuentro deportivo manera basketbòl, dominó, vòlibòl, futbòl, Airsoft, bulamentu den saku i landamentu. E parti sosial lo konsistí di entre otro karoake pa premio, kompetensia di ‘cupcake’, zumba, siña makiyahe.
E selebrashon di Dia di Prensa ta sera anochi ku un sena, kontamentu di chiste i animashon musikal. Lo tin diferente premio manera entre otro baiskel, biahe, estadia den hotèl, komementu den restorant. E premio grandi e aña aki tambe ta un outo: un Chevrolet Sonic 2013 ku AutoCity ta pone disponibel.
E dia sosial deportivo pa trahadónan den prensa ta tuma lugá na Rust & Burgh for di 12’or di mèrdia te ku 12’or di anochi.”

Yves Cooper e uniko reportero/periodista ku tabata den media kontinuamente sakando su frustrashon riba e kalidat abou di prensa a demonstra ku for di un legion di miembronan di prensa un persona so tin e fakultat, e moral pa kwestiona, kritika e rol mediokre ku prensa ta hunga na Korsou. E linja kora den su analise konosiendo e aparato mediatiko pa 13 anja tabata ku: “Prensa ta e okashonado di problema mas grandi”. Sensashon ta e plato favorito ku donjonan di media ta sirbi nan publiko. Donjonan di media di kwa mayoria a kuminsa den e ramo aki pa motibunan komersial i no ta interesa pa eleva konsenshi, karakter di un pueblo via nan plataforma di media na prome luga.

Konklushon ku por keda saka –despues di mira niun debate na tv, radio, niun artikulo den korant– ta ku ’99%’ den e mundu di prensa no ta sinti e nesesidat pa reforma nan area di profeshon na un manera ku lo yuda nan mes i e pueblo en general. Prueba di esaki ta ku karaoke i ganamentu di un outo ta bal mas selebrando nan Dia di Prensa ku diskushonnan riba e nivel di nos media i kon e por keda restruktura via poder popular demokratiko. Probablemente e raisnan di miedu ta duru pega den e trupa di periodistanan, reporteronan ku nan no ta wori ku nan salario ta abou, e chens pa studia no tei, kondishonnan laboral ta laga hopi di desea.

Transparency International ku a hanja e enkargo di e eks gabinete Schotte pa investiga e grado di integridat den nan komunikado di prensa a saka un pida riba prensa tambe ku te dia di awe a bai den e lachi famoso di olvido: “E estudio ta ilustrá hopi prekupashon pa sierto sektor ku lo mester promové integridat. Un ehèmpel di esaki ta e medionan di komunikashon. Miéntras ku e kuadro legal ta suministrá un ambiente favorabel pa desaroyá medionan masha diversifiká, realidat ta ku tin un skarsedat di periodista bon entrená, spesialmente periodistanan pa hasi trabou investigativo. Tin be kontenido di relatonan den medionan di komunikashon ta influensiá pa e echo ku hopi medionan di komunikashon ta dependé grandemente di finansiadó privá i di e merkado di aviso pa nan entradanan. Kondishonnan pa garantisá integridat di e empleadonan di medionan di komunikashon ta skars. Esaki ta mina e posishon independiente i responsabilisashon di e medionan di komunikashon.”
Tanten nos lidernan i donjonan di media no ke debati, diskuti e problematikanan ku ta stroba prensa pa desaroya na un nivel mas haltu e mundu di komunikashon sosial lo keda un kanser ku ta kome mente di hende.

Amigoe i Antilliaans Dagblad ku semper ta respira ku un aire di arogansia periodistiko te ainda no por a asumi e responsabilidat i kuminsa un dialogo kritiko ku nan partnernan den media pa bin ku solushonnan konkreto pa mehora e estado mediokre. Tesei ta e pampel ku media na ulandes mester hunga si nan sigi insisti ku nan si ta praktika periodismo responsabel. E ta konta tambe pa Z86 ku na radio a pretende ku nan te miho den difushon radial pa responsabilisa nan koleganan den media riba FM. Tin un skondementu pa tene bo mes bro ku sisnan responsabel. Komentario riba politika i tur otro sorto di kos den nos komunidat pero nan koleganan i nan mes semper ta hanja un skapatorio.

E fantasia ku por a kuminsa un pais nobo 10-10-10 sin restruktura e prensa putri bjeew ta bibu bibu ainda. Un prensa debil ta krea un pueblo ku ta depende di dje den mesun malchi debil, pensando debil, aktuando debil.

+
+
+
+
+
+
+
-> Stanley Ignacio i Lilo Sulvaran ta hanja ku 8 korant, 28 radio no ta di mas. Tin un merkado pa tur hende.
Un vishon di plaka riba prinsipio di periodismo?

-> Nos prensa sa e diferensia entre informashon, notisia i redu?

-> Telecuracao ku su direktor nobo (sr. Oehlers) ku den pasado tabata asina kritiko riba prensa no por organisa un debate riba Dia di Prensa? Podise e Jazz festival a dol kos na tv tambe?

-> CBA ku su direktor Germaine Hart-De Jongh no por a organisa un foro di diskushon riba Dia di prensa ku tur donjonan di media?

-> Kwantu sensura tin na Korsou eherse pa periodistanan mes?

-> Niun editorial di niun korant riba Dia di Prensa?

-> Prensa ta konfirmando nan mes ku interesnan finansiero tin nan choka, difikultando nan trabao pa bisa e berdat pio ku un diktatura gobernamental?

-> Stanley Ignacio presidente di CMO a bisa ku tin entre 4 pa 10 periodista ku karakter koruptivo. Kiko lo bai pasa ku nan? 4 pa 10 periodista korupto por keda traha ganja un pueblo numa?

Godd*mn Broke

20 Sep

12.15, 1st of the month plenty old pensioned souls happy,
some already stone cold drunk
machete in a plastic bag
Polar bottle in his left hand
Milagros took all of his money
He don’t give a cot damn
The last time he did fret
was when they shot
Papa Godett in the back.
Nuka don’t care about
that Tula flick made by
Dutch white privileged filmmakers. She visualizing them hair and nail salon paper$.
No time for outrage against foreign vampire investors
Back to Banda Bou voyages reclaiming our ancestors acres.

When you G*ddamn broke
You don’t worry bout 2 parliamentary seat stick up kids. You wanna come home praying the land lord didn’t change the door lock.
Shit
No fuck given for PAR fundraiser and neocolonialactic Balkenende’s keynote speech to his Dutch house slaves on Curacao soil.
More inspired seeing
Rasta Bals toil truthfully
at Biesheuvel intersection.
That’s word to Papa Legba and nuff respect ma for waking up at 3am to pray for your little youths.

When you down and out
Jacob gelt Dekker, Husang Ansary and Gregory Elias be multimillionaire devils with masqueraded hearts.
No time for court of justice
malpractices, kingdom consensus laws
Beef in Bonaire
Duped in Saba, Statia
Demands for a new constitutional referendum.
No Ma’m
We want improved labor conditions for everyone at Centrum.
And all the other supermarkets.
A loan, a car, a mortgage.

When you G*ddamn broke,
No tears for Miss Curacao robbed at the Cinema’s or Kick Schotte out off office campaign slander.
Dont care bout Hugo Chavez or Capriles Redonski, Sambil.
To hell with crumb throwing service clubs Rotary, Lions, Food bank and the rest of the philanthropic parasites. Too scared to fight the poverty inventors that dwell within their own social elite circle.

Slum life engineers and
Sado-sociological experiments
Old economic robot regiments got replaced by a new and improved.
So your life is smooth?
Project developers get tax holidays million dollars tax cuts while we the people get our ass crushed.

Class cleansing
Dump us in housing projects

Court stints
Identity war jinx

Dutch real estate companies are latifundistas with private armies shoot to kill if you squat land they stole that rightfully belongs to the us.

When you G*oddamn broke.

Not bickering about Queen bitch Beatrix riding in her golden slave painting coach. Need to eat first.
No time for political tribal warfare talkshows.

You aint stressing Dutch intervention,
Cft, Parliamentary coup coons or October 19 elections.

Girobank, Banco di Caribe, Maduro & Curiel bank, SFT, Orco be like a konjo bo mama financial consortium conspiracy.

And Movementu Futuro Korsou Pueblo Soberano, MAN resemble CDA, VVD PAR in their infancy
When you G*ddamn broke.

Elekshon Nobo 19 di Oktober e Misedukashon di Artikulo 53. Bochincha of Bendishon?

3 Aug

Sin eleva e konsenshi politiko, kultural e resultado di 19 di oktober lo mantene e mesun ambiente di Si i NO. Awe gobernado a firma e dekreto pa desolve Staten i kanta elekshon nobo den e penultimo luna di un anja 2012 konfliktivo.

Siman pasa dos disidente, unu di MAN i e otro di MFK pa motibunan segun nan prinsipionan a tuma e desishon pa kita e sosten pa redirigi e rumbo di gobiernu i trese trankilidat pa e pais aki.

Gabinete Schotte unanimamente a para tras dje desishon pa konvoka elekshon nobo i no duna dos hende ku huntu a hanja no mas ku 500 piku voto kambia destino di un nashon.

Un momentu un grupo ta den jubilo un pari ora despues e otro ta di fiesta hungando e movida di usa e ya infamoso artikulo 53 di Statut. Konfushon ta lanta, eks ministernan manera Pourier, Ys, Liberia-Peters purbando di remeskla mente di hende via media di oposishon kreando un opinion ku artikulo 53 lo no ta algu ku gobernado Goedgedrag lo firma sin bai Staten prome. Gritunan di violashon, atentado di demokrasia ta skeiru pero dirti atardi ora e dekreto wordu ofisialisa for di palasio di gobernado. No opstante e realidat aki emisoranan manera Z86 i Deltha a sigi desgrasia konfiansa di nan skuchado i laga nan kere ku gobernado no a firma e dekreto te ora un minister mester a yama den nan programashon di distorshon pa ofrese nan e pampel pa nan mes wak e. Dap Orlando Cuales ansha ta bisa Cooper, un ratiko, diripiente e fax for di ofisina di gobernado a drenta. Tasina ta media responsabel supuestamente integro.

Pa bo manipula un pueblo via media ta un akto masha fasil durante un situashon kaminda bo tin ku husga si aplikashon di un artikulo den Statut ta permiti si of no. Sigur ora bo lidernan politiko, edukativo, sektor priva, religioso pa mas ku 50 anja no por a produsi mas ku 2/3 ekspertonan di derechi estatal. Ni tampoko programanan pa eduka bo pueblo riba politika. Tur manka asinaki a drenta negashonan ku gobiernu ulandes tambe pero esei ta un otro kapitulo. Si no tabata pa Rufus MacWilliam, Gibi Cijntje, Helmin Wiels, Ricardo Isebia, Eldon ‘Peppie’ Sulveran e opinion publiko lo a sufri bou di man di media manipulado.

Si bo ke gana un bataya politiko bo no por tilda e grupo ku ta sinta riba e stuhl gobernamental di ta hunga falsu, diktorial anto abo mes ku ke duna e aperensia di ta limpi, lusio drechi ta usando e mesun trikinan deshonesto ku bo ta akusa e grupo ei di ta usa.

E interes ta grandi pa media den su totalidat eleva su grado di seriedat e tres lunanan aki i no komete e fayonan di tur elekshonnan dje delasternan 7 anjanan. Mester kuminsa prepara pueblo di vota konsiente, a base di informashon veridiko duna riba tur kartera di gobernashon. Debatenan riba tur topikonan sin niun eksepshon ku moderadornan imparsial. Debatenan entre hobennan, studiantenan, klase trahado, klase medio, suidadano mayor i tur otro grupo ku pa anjos ta wordu neglisia.

Tur dos banda dje panorama politiko i media riba su mes tin e tarea di figa un posishon madura pa gia e elektorado na un nivel mas haltu ku outomatikamente lo perkura pa un gobernashon un sosiedat mas trankil mas uni, union kompletu ta un fantasia pero intento pa logra mas aserkamentu di pensamentu i akshon mester wordu hasi. Si esaki no pasa nos mes ta bira un bes mas viktima i no tin Ulanda pa kulpa pero nos mes i niun otro hende.

Yves Cooper otro siman tei kuminsa su korant nobo di atardi. Un vespertino ku ke buta konfiansa bek na e negoshi di notisia. Benefisio di duda pa Sr. Cooper aunke e nomber dje korant ‘Independiente’ no ta refleha e karakter komersial ku e tin. Periodismo via aviso semper lo depende di plaka, interes pero un intento pa trese notisia balansa bek den nos komunidat ta semper di aploudi.

=•= Dikon eks wes, eks gobernado Saleh a hanja asina tantu atenshon e siman aki? Te so tin sabiduria den su balinja?

=•= Unda e vurwerk a keda ora disidente a fuga ku asiento?

=•= Skibido di Tambu lo tin skriftnan yen skibi awe

=•= Ki dia lo bin un grupo di preshon pa kontrola responsabilisa media ora nan ta riba hungada beerput?

=•= Schotte awoki lo kompronde ku pa tur asuntu ku ta impakta pueblo mester informa konsulta pueblo?

=•= Tin hende den MAN, MFK ku ta dokumenta henter e historia di e tofermentu ku asiento?

=•= Konta ku e petroli i gas, leinan lo wordu pasa durante e 3 lunanan aki?

=•= E kurashi tei pa propone pa kambia reforma media despues di elekshonnan?

=•= Wiels, Kenepa i sobra tur a hinka Dios i Beibel den nan boka, piki a piki versikulonan ku ta kai net bon den nan hanchi pa manipula

Telecuracao nos planta nashonal 52 anja, un motibu pa selebra?

2 Aug

Un gritu di alegria pa Telecuracao, ehm no.. Pero pabien pa su lucha di transmiti su senjalnan den kas di pueblo for di Seri Ararat pa 52 anja.

Si riba un dia lo bin un enkuesta nashonal riba kanal 8 e resultado lo no ta favorabel. Ta berdat ku tin bon programa pero realidat ta ku mayoria bja e programashon ta laga hopi di desea. E ekskus ku pa motibu di plaka no por krea programa na nivel ta koi kens. Meskos ku politiko ta faya pa bin pueblo i konsulta kiko nan deseo ta e gerensia di Telecuracao tin ku bai serka su televidente ku ta page pe trese un bon servisio. Bo por tin ekipo nobo, sistema digital pero bo programashon ta ketu bai pega den anjanan 80/90.

Ki sorti programa pueblo ke? Nan ke mira un Trai Merdia tur merdia ku boshi propaganda di prop? Nan ke mira Sra Looman tur mainta den Moru Bon Dia of nan ke pa Sra Looman bira man krea un programa ala 60 minutes, periodismo invesrigativo pa spierta konsientisa pueblo riba topikonan di interes?

Komo planta nashonal bo modelo ekonomiko no mester ta depende di sektor priva. Fayo grandi. Telecuracao mester figa un posishon i adapta su programashon na e nesesidat dje pueblo. E no por permiti su mes pa ta un kanal komersial ku ta neglisia e tarea edukativo, informativo, un planta pa uni pueblo den pensamentu i akshon emansipativo. Telecuracao mester tei pa forma e Yu Di Korsou nobo. Tur ora. Tur dia. 52 anja sigi bai.

E manego ei mester kuminsa profila mas, pueblo lo sostene nan kanal finansieramente si e vishon di kambio tei. Ser un katibu di kompanianan priva na final di dia ta bira un protekshon paga i e kontrol di media outomatikamente ta kai afo perhudikando e mesun suidadano ku ta kere ku su planta nashonal ta vigila sosiedat ku wowo hanchu habri.

Rekomendashon pa notisia di kanal 8 ta pa praktika periodismo serio. No mester di intervenshon di ministernan ku drenta pantaya di hende ku un litania sin balor ekstra. No mester di dos hende presenta notisia. Mester tin notisia di Aruba, Boneiru, Sint Maarten, no solamente ora di sensashon. Buska un koresponsal figo na Venezuela, Merka, Karibe i sigur Ulanda despues di un mitar siglo no por ta posibel ku nos ta depende di prensa Ulandes pa notisianan ku ta toka nos den reino ulandes.

||- Ki dia ta bin notisia di salud, ekonomia, Spiritual?

||- Notisia di bario, of bario tv?

||- Programa di Stanley Ignacio, Ayoransa na tv?

||- Dokumentario?

||- Debate riba tur topiko???

||- Unda Yo Yo Tin ta? Dikon no tin un Poentje Castro di Korsou?

||- Konta ku sifras pa check kada siman kwantu hende ta wak tal programa, notisia?

||- Kwentanan anual publika?

Mea Culpa Di Mundu Sindikal i Media Mas Na Tinu. 1969 Rebiba ku Madures.

3 Jun

Batajon di pregunta ta skeiru ora 30 di Mei yega. Manera tur anjanan anterior e dia pa parti di media no tin masha antenshon aunke e slanan emoshonal tei ketu bai. Horecaf ta reklama ku donjonan makamba ta kansa trahado pero VBC ta keda smoel. Sektor di salubridat, konstrukshon, pakus, supermerkado, vigilansia ta pasa diariamente den abuso laboral. Departamentu di labor no ta parse di hanja e memo ku 10-10-10 mester a trese un renobashon di hendel ku kehonan di trahado pa nan dunado di trabao. Minister di labor Sr. Koeiman ta papia nechi pero su forsa ta kai chiki kontra e kapital ku tin skrement di tur e leinan laboral.

Sindikatonan konfuso no sa di respeta i homenahia e lidernan ku tabata tei prome ku nan di nan mes sindikato. Falta e vishon, seriedat pa kuminsa ku programanan di informa e klase trahado struktura via korant, televishon, radio i internet riba nan derechinan laboral. No tin linjanan habri di komunikashon pa krese un konsenshi laboral, no tin un punto sentral moderno pa hanja konseho laboral kaminda tur trahado na Korsou mesora por sinja konhuntamente kiko por hasi kon por solushona tal drama laboral.

30 di Mei 1969 solamente ta wordu konmemora pa FOL pero ‘niun’ sindikato ta organisa un foro, un debate riba e historia dje rebolishi di ’69. Tin manera un fuku pega den nan alma pa inisia un diskushon riba e progreso di sindikalismo, e bida sosial ku nos ta den. No ke bin ku sifras dilanti, no ke hasi investigashon, ku sifrasnan sientifiko pa kombati e malinformashon ku na final lo kumbini nan lucha mas ora bo ta arma ku dokumentashon laboral.

Media su rol te ainda tambe ta fofo i no por of no ta ke buska un modelo di informashon manera Vito di antes. E kreadornan di Vito ku tabata buta kos move den anjanan 60 tampoko no a mira e importansia di gia eduka lidernan nobo pa e spiritu di konsientisa, senjala, denunsia tur sorti drama riba e baranka aki. Plaka nunka por tabata e motibu ku un sistema di informashon a kai i disparse. Sigur den e mundu nobo di komunikashon ta stranjo ku te ainda niun hende ta hasi uso di media sosial kombina ku radio, korant, tv pa trese kambio real pe trahado.

Kos a mehora berdat pero asuntu ta keda ku kosmetika ta dunabu e ilushon ku nos ta riba ‘un bon kaminda’ i VBC na ’69 a perde 40 miyon pa e mentalidat malagradesi. Tur kos ta keda meskos te dia nos intelegensia spiritual kuminsa rasona. Tanten nos ta drei asinaki manera Mgr. Dr. Amado Romer a bedei: “Tur kos ta parse dirigí riba un pais desaroyá. No ta fomentá sentido di solidaridat den pueblo, no tin e atenshon pa formashon sosial. Tur kos ta bai na kon por sigurá un entrada pa mañan, ta kompetensha ta manda i no sistema di kooperashon ku otro pa huntu yega na algu. Un enseñansa liberal pues, ku ta kria hende egoista, individualista, pará riba su mes pero totalmente los for di tur otro.”

Follow

Get every new post delivered to your Inbox.

Join 2,027 other followers