No por tasina ku pa motibu di e instrukshon finansiero *neo-kolonial* di 13 di yuli di parti di reino Ulandes e gobiernu di MFK, MAN i PS ku tin e kartera di kultura no por a outorga supsidio na e organisashon plataforma di sklabitut pa e konmemorashon di e rebolishi di 1795 17 di ougustus lidera pa Tula. Un gobiernu ku a kampanja i ta purba di drei riba un vishon emansipatorio sigur mane un partido Pueblo Soberano a desapunta i mancha e momentu seremonial ku kada anja ta duna na e akto di rebeldia ku pa lei universal ta un manifestashon heroiko. Kruel tambe ta ku lidernan di opinion ku ta kontra e gobiernu ke forsa den mente di hende nan vershon meskla di odio pa nan desendensia of konekshon Afrikano ku Tula no mester wordu rekonose komo un heroe nashonal. Elekshon ta buta hopi hende saka nan unja pa ganashi politiko.
Barbulete ta bula ne pali lus te ora e ta kima su ala. 50 mil florin bon por lage nek, e koi mester tabata reserva for di 2 anja pasa reserva pa un gobiernu ku tin un kabes riba su skouru.
Mester dekreta un siman di liberashon pa e idea plama pega den mente di hende. Te gobiernu aki mes ku a adopta e lucha di 1795 pa keda viktorioso riba PAR mester tabata e aktor prinsipal determinante pa yuda gia e proseso di emansipa un pueblo aki, awo ku nan a faya e forsanan opositor ku no ta ni aster henter e asuntu di liberashon mental, spiritual ta use e momento pa kibre na werki. Ken tin ku gradisi p’esaki?
Un kondekorashon pa Helmin Wiels Beatrix mes personalmente? Lo no ta un mal idea mirando e barku di katibu ku Pueblo Soberano aki a pega den bahia di Santa Ana. Gran orguyo di PS por ta di berdat ku a nombra biblioteka nashonal na e gran baluarte eskritor Frank Martinus Arion pero e fayo ku a duna alimiento pa krea henter un anti-Tula ambiente si ta duru pa perdona.
Si bo yama PAR i otro partidonan i gruponan konekta ku nan style sosial-politiko katibunan di kas, esnan ku no ke tende mes di Tula, sklabitut i otro topikonan ku ta yuda alsa bo balor propio. Ta dikon no por a preveni e situashon? Hopi difisil pa no kalifika e koalishon di lidernan Schotte, Cooper i Helmin Wiels katibunan di kas pa motibu ku nan ta obedese mansu mansu e ordu di gobiernu Ulandes na Den Haag. Si a prepara manere debe ser nunka Ulanda por a bisa algu si a traha dam foi 10-10-10 warda awa ni maske ta tin 10 instrukshon finansiero. Esei ta konta pa un gobiernu emansipatorio ku ta papia di soberania, independensia i sigur pe organisashon tambe ku ta katibu na 50 mil pa drei un konmemorashon. Dia a kuminsa konmemora fin di anjanan 60 no ta tin miles di florin, ta hende uni den spiritu pa honra nos ansestronan tabata sufisiente. Palabra, deklamashon i kanto, kompanja ku kueru i heru pa invoka un homenahe spiritual.
•~
•~
•~ Di 6or pa 8or, dos ora pa konmemora e lucha di 1795, nos ta serio di berdat?
•~ Niun hende tin un generator, un koi toka disku, un mikrofono, dos speakers?
•~ Niun grupo di kultura por presenta pornada?
•~ Niun hende tin un kamera pa graba entrevista pase na Rif kon nan ta pensa di libertat?
•~ Niun hende sa mas kon ta organisa un debate riba Tula i e lucha di 1795 i su influensia na 2012?
•~ Niun hende a graba un kansion nobo anto pa tur e desaroyonan nobo anto?
•~ Ku 10 mil so bo ta organisa un bembem kultural edukativo di 6 te BAM…of no..?
•~ Niun hende por kuminsa un koperativa TULA pa krea nos mes fondo pa honra nos hende?
•~ 2013 nos lo hanja un luna di TULA den ougustus?
•~ Ba yegi tende un alma papia riba e pelikula….?
