Alanan Ansestral

Riba Alanan Ansestral
mi ta bula bai laga:
Hende badabada
Dos lenga i kara
Trasteria di un elite askeroso
adorashon di bida luhoso
Mal maria pa fragansia
di un herensia sklabisa,
150 barionan marginalisa.
Mama ku yu ta drei riba
1200 florin, 600 pa flet,
despues di paga awa i lus
Ki sorti futuro nan tin?
Skolnan bati, lokalnan putri
Muchanan mainta mal nutri
Renkor i Rabia
Dikon pa malu bosnan
ta laga tantu sufri?

Alanan Ansestral ta lagami
subi bai alturanan leew for di
Boso santu deboshon di lidernan politiko, komersial, religioso.
Adorashon di gobernado, obispu
Opresornan ku titulonan deftu
Almasola te forlestu pe doktor, dokterandus, ingenieur, meester
in de rechten ku ta konspira
Kapitalismo salbahe ku no por
laga hende prospera.

Mi ta despidi riba Alanan Ansestral di
Wowonan ku ta yorando sanger
2 tio i 3 tanta ku kanser
Karago
Mamon FM ku donjo i periodista domferstan.
Emisoranan ta meskla mentira ku berdat.
Kapitalista den rei ta duna nan onderstant.
Bankeronan ku bo plaka tei disidi
na ken nan ta fia nos plaka i kwantu
Diktadornan finansiero riba rol di santu
Machu
Miho nan tur hala un kantu
Hoga den boutismo di nan bochorno
Huristanan ku por buta kos kambia pero ta riba un zurdu i siegu.

Riba Alanan Ansestral mi ta aleha for di bo 4500 hektare, 10% di Korsou na Oostpunt ku bo kiersa ku bo bise-bise-tawela a hanja segun un manera hustu i limpi na 1874, 9 anja despues di abolishon di sklabitut.
Bo dialogo nashonal
Paketenan pichiri di kuminda
Envidioso hambra pa mira otro frakasa
Bo alabansa di Zwarte Piet
Bokanan rasista ku ta lastra nan mes hende di kolo ku nan rasismo internalisa.

Bou di Alananan Ansestral
Nan ta
Proteha kontra
Lombrishi lembelansa ku ke choka horka pa niun bai dilanti
Sintando na hotel Avila, Ole Ole,
Bisa ku bo ke ‘Dune Un Chens’ Duna pobernan un chens. Ora nan yamabu bo ta bisa bo ta bashi komiendo lunch na St. Tropez

Alananan Ansestral nos ta monta pa fuga di nan
Alanan Ansestral ku no por sker kibra
Alanan Ansestral ku a duna nos bida
Alanan Ansestral bou di dje nos ta tapa.
Alanan Ansestral
Ban monta nan
Ban bula skapa for di e koi boezoelanga pa kaba…

Mi tin un pari pluma
Ban harma
Bo tin un pari pluma
Ban buta huntu i sali for
di e trampa.
Ban bula bai
No mishi ku salu
Ban bula bai
Riba Alananan Ansestral
Bai HALTU.

3 thoughts on “Alanan Ansestral

  1. Kaitano Sarah says:

    danki…..
    ni gana pa skibi…mi a kaba di dera mi tata blanku di desendensia sürnameo na Korsou, kaminda semper el a biba, mi tata ku semper tabata na lado di su úniko yu maron, ami,
    mi tata blanku ku nunka no tabata diskriminá ningun hende, i ku tur mi siertitut, tur mi kerensia ku ami si a resolvé mi problema di identidat, mi ta pèrdí awe, pasó, huntu ku mi tata mi a pèrdè mi mama maron klá na bida, pasó ainda mi pais krioyo no ta salú, mi ta realisá mi mes, ku mi ta só. Só sin famia, só sin tata, só sin mama, só sin ruman. I só na tera friu. Só sin Dios. Pero loke ta Dios ta leu e dianan aki, muchu leu, Dios ta leu i parse mi no por yeg’é. Bèk na tera friu, pensando, apenas lesando, mi a pone un cd di muzik Kandomblé di Afro Bahia toka, dal dos tres paso; “di unda bo ta….riu bunita chèrèrè, riu ta Señor, no keda tristu”….i mi a ”smile” pa promé biá den tres siman. Despues mi a kai sinta i mi e lesa bo poesia fuerte. Danki, masha danki…Kaitano

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s