80 anja Curom, Z86, Periodismo di Plantashi

Un tersio yama Martien Verstraaten feu Ulanda titula su mes paragnostiko ku afinidat religion Afro-Brasilero Candomble a yega Kòrsou konkel mente di hende di klase haltu bisando ku e por yuda nan vibra mas haltu. Rondona ku misterio barata ela laga sa ku e si sa unda Nataly Haloway ta dera na Aruba i yen kos mas pa bende su kredibilidat serka e akademikonan hambra pa un pida bolo eksotiko di esoterika Afrikano. Na kwa emisora e chatiger spiritual a wordu risibi ku brasa habri? Aya na Otrobanda, Z86.

E parse un kuenta di fantasia pero ta kos ku a yega di pasa ne emisora pionero ku a ranka sali den anjanan 70/80 progresivo pero na kaminda a para bira un pantomina di prensa.
Z86 unda propagandistanan di e podernan finansiero, edukashonal tin nan sede antes e bastion politiko mediatiko dje 16 anjanan di partido neoliberal kristian PAR. Awe Z86-Mi-95fm, 88Rockorsou ku ta kai bou kompania mama Curom (Curaçaose Omroep Maatschapij) a hasi 80 anja. Motibu pa selebra podise pero mas un momentu pa analisa e balor ekstra di Z86 komo radio di notisia i programashon.

Durante 2009 e gera di opinion pa gana almanan pa bai di akuerdo ku rekolonisashon ulandes den e referendum a ‘hur’ dos studiantenan di Harvard ku riba ordu di e multi-miyonario Jacob Geltdekker i bufete di abogado VanEps Kunneman VanDoorne a skibi un raport pa grupo Si. Ta na Z86 prome por a skucha nan. Asina semper a purba di opera. For djariba ta harma un trampa mediatiko trata di planta opinionnan den kabes dje skuchado ku lo skohe e banda dje elite ekonomiko.

E radio di Lio ‘Paps’ Capriles ku a
usa e emisora pa santifika su reinado na banko Maduro ku maneho wisewas sosial neoliberal pero tambe di Leo Floridas e rei di yoga ku semper a bringa pa trese un balansa mas sosial den aire. Floridas tabata e soldat solitario na Otrobanda ku pa ya algu anja a taha Orlando Cuales diplomatikamente ku Z86 ta bezig di tene su skuchado bobo i ta boikotia e bos dje pueblo empobresa, e disidente politiko, e movementunan sosial progresivo anti-elite.

Orlando Cuales antes eks komesario pa Banko Sentral perdiendo tur integridat komo direktor di un emisora i pa periodismo en general. Sintando den Banko Sentral i manehando un radio ta deskwalifikabu di por kwestiona e sektor finansiero ku ta e ardu mayo pa ekonomia drei.
Ora hende basha nan litania kon presidente di Venezuela Hugo Chavez ta sinta pa 14 anja niun no ta puntra nan mes kombin na Banko Sentral tin un direktor ku ta fasilitado di labado di plaka i bon wardado di tur instituto elite finansiero ya sinta pa mas ku 20 anja. Z86 sigur nunka por a lanta kritika.

Gonzalo Cuales bosero di VBC (Verenigd Bedrijfsleven Curacao) i trahando komo moderado dje prome talkshow di Korsou: 21-21 mainta i periodista, lesado di notisia merdia. Otro imposibilidat ku un hende ku a studia periodismo den Karibe ku sa kiko ta su etika, por ta asina astuto di tog serbi un organisashon di elite komersial i na otro banda hungando su rol komo vigilado di sosiedat via prensa. Serbishi di dos dios na mesun momentu a komberti e rumannan Cuales den un duo den media ku ta super-inkonfiabel i no ta laga di duda kon nan a perfekshona e arte di ta un maton mediatiko. Tur esaki sin niun protesta, kritika ofishal di nan koleganan den media.

Z86 e skol pa Yves Cooper kaminda ela hanja su lesnan di reportero serka otro mago di media manipulashon Mariano Heyden i Orlando Cuales.
E luga unda Cooper mester a kita pasobra ela ninga di enganja pueblo, demonisa Anthony Godett lider di Frente Obrero Liberashon 30 di mei dia ku FOL tabata e menasa politiko pa PAR. Esnan ku no a rebeldia kontra mandato di Z86 despues a promove komo relashonista publiko of a kaba den sektor priva of gobiernu.

Durante e santu sakrefisio awemainta pastor Curtis Meris a trese dilanti ku un medio di komunikashon mester karga vishon pero mas importante amor. Bosnan karga ku kritika lo puntra nan mes kombin Z86 a bira den pasado e radio eskohi pa e notorio Pare de Sufrir e iglesia brasilero ku a mafia sen di hende? Ta sa delanta ku ta gengster religioso nan ta pero esei no tabata importa Orlando Cuales. Te plaka e ta wak hende lo konklui. Mas asombro tin pe hecho ku un emisora di trayektoria largu ku supuestamente a hasi asina tantu kos bon pa komunidat i tur anja un pastor katoliko ta trata di bendishone no tin ni un programashon religioso kristian pa anjos? Kosnan ku ni e hipokrita mas grandi na mundu por skapa di kontesta.

E emisora ku a keda riba frekwensia AM su bon ta ku bo sa ora e diosnan chiki finansiero of di kalke otro sektor ta papia einan bo ta hanja e chens di skucha kon nan ta pensa di desaroyonan di nan isla.
Un moda perfekto pa midi kon e nivel di odio pa bo mes identidat, kolonialismo nobo, klasismo, rasismo, seksismo, nivel di spiritualidat i tur otro asuntunan den sosiedat ta subi baha.

Tanten Z86 te sanktuario pa defende sistema kapitalismo sin mustra ku bo a arepenti di bo manipulashon struktural na gran eskala e lo keda chambuka den e zona di muribundu. E debilidat di wanta pueblo den ignoransia i purba di laganan alaba kapitalismo sin ke modifike ta desastroso. Proklamando bo mes komo e pionero den radio difushon. Ungi bo mes komo e profetanan di periodismo, e mesia di media sin
por a hiba e mundu di media dilanti hisando su kalidat pero si keda batie fini, yame kaotiko mal bruha ta lokwal nan mes a sembra, tesei ta nan herensia.

E anja aki den 150 anja di sklabitut i kolonialismo ulandes ta e periodo ku nos mester gara tur oportunidat pa kambio ku dos man. 3 di mei UNESCO e parti Karibense ku su sede na Jamaica a skohe Korsou pa ta amfetrion dje asina yama konferensia pa Dia Mundial di Libertat di Prensa (World Press Freedom Day). Un grasia brinda pa nos komunikadonan di media esnan ku tin kurashi saka poko karpachi for di nan kashi kuminsa ku outo-kritika i kana e ruta di skibi, papia, visualisa e berdat pe pueblo sin miedu. Neglishando esei nan lo wordu keda tipifika komo periodismo di plantashon. Hasi lokwal donjonan di kapital bisabu pa pueblo kere den dje. Zethesda den boki pueblo, un wega di palabra dje kas di kuido Bethesda pa hende grandi. Tin por hasta bai un tiki mas leew i premia nan ku e nomber Zatanas-86, ta na nan awo pa di berdat demostra manera Pastor Curtis awe a bedei den basilika Santa Ana: “Komunika ku amor pa komunidat kambia realmente”.




•••

••


–» Tin un lista di tur e lidernan ku kurason sosial ku Z86 a ridikulisa, boikotia pa laga papia?

–» Kiko ta e kriteria pa pueblo por evalua kon malu, bon, manipulativo Z86 ta durante e ultimo 25 anja?

–» Ki dia lo bin periodistanan nobo na Z86? Ta miedu nan tin pa traha pa Z86? E pos di periodistanan nobo a seka?

–» Dikon no tin un asosashon di donjonan di media?

–» Unda e organisashon di periodistanan ta? Ken ta kontrola kalidat di notisia i periodismo?

–» Lo yega un dia ku Mariano Heyden lo disidi kiko presis e ke ta? Un hefe di redakshon, un periodista serio ku prinsipio of un hasido di redu tras di un mikrofono na Z86?

Kuaresma i Iglesia Katoliko Sklabisa pa Kapitalismo Krioyo

Karnaval a kaba e festin di lusimentu di disfras, trahe, karosa bunita, bailamentu den un union di goso riba ritmo di Tumba e anja aki dedika na Romeo Heye un senjor kantor. Heroudini a sende e mecha i Momo a kima 12or, mainta trempan shinishi riba frenta di hende kompanja ku bientu duru a anunsia e temporada nobo di Kuaresma: Renoba bo spiritu, refleha, yuna, pensa un strategia pa hiba un bida mas profundu ku Dios.

Of tog no?
Durante e periodo di Karnaval, kada tv, emisora, korant tabatatin boshi programa dedika speshal na e fiesta di pueblo. Ta invita i laga opina rei di Tumba, areglista, kompositor, reina Karnaval, prins i pancho, grupo musikal, organisashon di gruponan di karnaval, kosedo i esnan kanti kaya. Tur hende enbolbi ku e bembem grandi. Awo si den un pais kaminda 85-90-95% ta katoliko i nan ta bisa ku Dios ta bin na prome luga ta kombin anto ku ora Kuaresma dal aden ‘niun’ media no ta duna masha atenshon na amplia, e retiro spiritual di 40 dia?

Unda tur e programanan na radio, tv, e artikulonan den korant a keda? No tin boletin speshal di Kuaresma na CBA television? Telecuracao no ta hanje dje importante pa organisa, transmiti programashon speshal ku ta alimenta e spiritualidat kolektivo di un nashon ku supuestemente mester ta den un ‘krisis’. Esaki ta tekstualmente palabranan di mayoria hende den prensa. E entidatnan di media aki nan a konstata ku tin un krisis grandi na Korsou. Medidanan finansiero mester wordu tuma. 1000 pa 1500 retiro lo kai pe subida di OB na 9% segun minister di finansas pero tog niun hende den media i mas importante e lidernan religioso dje fe katoliko romano no ta buska manera pa intensiva un manera pa yega mas serka den gara di Dios pasobra ta nan mes ta bisa ku kos lo bira fastioso i mester hala faha mara duru.

Unda e logika religioso a bai perdi?
Ki kurashi nos tin di pretende di ta katoliko pero tur nos energia pa Karnaval nos ta hinka 250% den dje i ora ta toka e festival di fe pa keda den bista di Dios nos ta ni aster i duna podise un miserabel 40%.

Dikon nos no tin miedu pa analisa i kuestiona fuertemente henter e organisashon di festival di Tumba i Karnaval pero ora ta toka Kuaresma no ta tribi di kwestiona i evalua e liderasgo di iglesia katoliko? Obispu Luis Secco for di 2000 e a resulta pa Korsou? Secco i su pastornan, ki sifra nos lo duna nan? Si nos ta den krisis, no ta falta djesun ku ta na kabes? Si for di 2000 bo no ta hanja kasi pastornan nobo YDK, e sanger fresku ta asina abou ta nifika ku tin kos robes. Ta un muestra ku bo liderasgo no tin e kapasidat di hasi bo pueblo mas fuerte para den e fe kristian katoliko romano.

Hende ke sa si e kantidat di miembronan di iglesia katoliko a baha for di 2000 te ku 2011 of a keda mas o menos meskos of ela subi. Kwantu persona a akudi serka pastor i kwantu hende a hanja un ayudo satisfecho?
Pe ‘Plan Pastoral Diosesano’ dje delaster anjanan, kiko a wordu logra, kiko no? Unda e dialogo habri ta pa diskuti e puntonan aki?

E desishon pa no bira un disipulo di Dios ta na moda. Kiko obispu Secco ta hasiendo pa koregi esaki? Ta kuminsa grita ‘mea culpa’ ta falta di iglesia of ta kulpa e sistema kapitalista ku iglesia mes konsientemente a yuda laga bira un monster ku no ta brinda pueblo un chens pa konsidera entrega bida na Dios pa bira un saserdote. Iglesia katoliko tin e forsa spiritual pa trese kambio den e realidat aki kaminda kapitalismo su balornan i frutanan ta impreshona hende mas?

Sakrefisio sin orashon ta fe frakasa.
Pakiko no tin les na tv, radio, den korant kon ta hasi orashon den poder? Unda e pretenshon ta ku un pais den ‘krisis’ pa dekadanan largu tog ta kere ku su forsa di orashon ta grandi? E no por ta, e orashon ta debil, i si fielnan no fortifika nan poder di orashon e krisis lo sigi asota.

Papa Benedikto 16 lo baha na fin di februari. Un akto simboliko feu Vatikano pa ront mundu kompronde: Un era di purifikashon a bati na porta i Korsou tambe mester laga lidernan kabei shinishi kai. Den sentido fisiko i spiritual. E fe fofo no ta yuda nos supera nos opstakulonan.

Si no iglesia katoliko ku na kabes obispu Secco lo keda wordu kalifika mane e dicho nobo boutisa di 2013: “Mas Karnaval ku Kuaresma”

||
||
||
||
||
||

||- Despues di Kuaresma Telecuracao i sobra media lo bai analisa Kuaresma 4 ora largu manera Glen Thomas a hasi ku Karnaval 2013?

||- Lo invita pastornan i obispu pa analisa 4 ora largu Kuaresma?

||- Lo laga fielnan partisipa via Facebook i Twitter pa duna nan opinion riba e temporada di Kuaresma?

||- Of ta paso Kuaresma ta gorda ekonomia menos ku Karnaval no mester di evaluashon na final? Dia Kuaresma ta koi hasi negoshi kune por hanja atenshon di media?

||- Kon Kuaresma por hanja un ‘spin off’ ekonomiko mas grandi?

||- Turismo spiritual e ora ei?

Dialogo riba Reparashon i Mobilisashon di un Pueblo den Sobrebensia Ekonomiko

Demanda pa reparashon den ViaVia di Freddy Antersyn

Demanda pa reparashon den ViaVia di Freddy Antersyn

Rosea di pueblo no por tin astma. Alanan ku un poblashon tin pa bula kune no por dirti pe rayonan di solo dilanti nan popchi wowo. Si fin di luna bo ta bai kas ku 600 florin den man i despues di hur ku awa i lus ba sobra un pari kiriwichi di plaka kesh bo ta pertenese ne grupo grandi ku ta sobrebibi sam sam kubo awendia.

Tin un strea nort si, ku ta nabega duna direkshon, uniko kos un pueblo fada no mester hasi ta kai pa piropo politiko i korporativo, religioso. Sobra ta un kana riba awa mane Hesus pretu den kapitulo Kenepa, Ser’i Niger versikulo 44-77.

Ansestronan ku ta banja, landa den bo ardunan mayo ta testigu kon nos ta predestina pa buta rebolishi pero solamente ora nos sinti ku nos ta lomba kontra muruya. Awenochi na MAS99 eks prome minister Schotte awo parlementario lider di frakshon pa su partido MFK a kuminsa un programa nobo: “Prohibi pa lubida”. Eiden e ta purba di yongota un vibrashon di rebolishi mei mei di su sigidornan. Algu ku e no a hasi e 18 lunanan e tabata na kabes di su gabinete. A neglisha mobilisashon di votado. No a traha riba liderasgo den tur area. No a informa, plama kos na chiki chiki manera si su kontrekante Wiels a hasi. No a mira e importansia di edukashon popular supversivo (adapta na e neo-kapitalismo sosial di MFK). Einan su fayo ta sinta i awoki ta di wak si e strategia nobo kopia lo duna fruta riba termino kortiko. Si Schotte i hasta Charles Cooper lo a kuminsa ku e kampanja di konsientisa nan lo no tabata den nan situashon di politika miseria. Pero tin bja e oreanan di arogansia, fe falsu ku bo ta e kerubim di Korsou ta desostra bo mes futuro pa un ratu.

Den tur esei awe tambe e grato notisia a yega ku na Martinique e alkade di Sainte-Anne, Garcin Malsa i alabes fundado di e movementu internashonal pa reparashonnan tabata na Francia, Paris e a hasi moveshonnan pa demanda e gobiernu franses pa sklabitut i kolonialismo pa un suma di €240 miyart. Martinique ta djoin e lista di paisnan di Karibe ku ta analisando i akshonando riba e tereno di reparashon. Anja pasa Jamaica a reinstala su komishon di reparashon i despues Barbados tambe no a para ketu i ta organisando un konferensia regional. Antigua i Barbuda lo tei, St. Vincent and Grenadines lo tei. US Virgin islands lo tei. Awo hende ke sa Korsou lo lora?

Gabinete Hodge/Wiels a gestiona pa ratu kaba ku independensia i henter e matris di sklabitut i kolonialismo ta buta riba banki ta kria neshi aranja.
A wordu bisa ku lo lanta un komishon pa reparashon pero pregunta lansa ta ki mishibu awoki ta lante si den e 2 anja bo ta tin tur akseso, fondo, konekshon internashonal pa lante mesora na september 2010. E elemento di hasi kenshi politiko ku sentimentu di pueblo ta un preis karu pa paga. Ni ku bon di Enca, Polonius bo’n por pag’e koi.

Akademiko den nan galeksia tabata sa miho ku tur dje konmemorashon di 150 anja di abolishon di sklabitut ta na kaminda. Kiko te motibu ku nan a bira presu di nan inabilidat pa no lanta un komishon pa reparashon riba nan mes kurpa sin gobiernu? Krea un diskushon, laga pueblo ronka su bos i bisa kiko e ke despues di dune tur informashon i kalibra si pueblo ta sufisiente informa pa hasi un eskoho rekete vital riba e pregunta si nan ke rebuzak Ulanda ku un demanda pa reparashon di sklabitut i kolonialismo. Lo ta net bon pa ora Beatrix donder abou feu su trono e hanja un kinipi di kurason. Pero esaki mester a wordu prepara for di 2 anja pasa. Ta indiskutibel ku gobiernu di MFK, Pueblo Soberano, MAN a kampanja ku un merkadeo di trauma di sklabitut ora nan a yega na poder na 2010. Nan ta riba wega, wak pa wega no bai rondu i ansestronan kuminsa monta, yongota den bosnan venunan.

A kaso bosnan perde e tinu kon ta rementa un diskushon riba reparashon den reino ulandes akibou ta un ehempel klasiko perfekto pe situashon. E karta aki ta skibi pe ilustre suidadano Freddy Ignacio Antersyn fecha 30-07-2012 den ViaVia. Ta di lamenta ku niun media ku tei pa spierta pueblo, partido politiko of movementu, fundashon, akademikonan a kwe tene brasa e proklamashon di Sr. Freddy Antersyn i eleva su meta pa penetra den alma di hende kousando un diskushon publiko.

“Spanjonan, juni 1499 te ku 29 juli 2012; Korsow 29 juli 1634 te ku 29 juli 2012 pa makambanan.

E usurpashon di spanjonan a dura 134 anja ku 1 luna. E usurpashon di makambanan a dura 377 anja.

Nos ta pidi un KOMPENSASHON pe periodo ei. Nos formula pa kalkula e kompensashon ta 100.000 hoben di 21 anja na balor di un pago di 1.000,- euro pa luna, durante e periodo di okupashon. E kompensashon di Spanja ta bira 100.000x12000x134 anja + 1 luna= 160,9 bion Euro.
E kompensashon di Ulanda ta bira 1,2 bion euro x 377= 452,4 bion Euro.

Fecha entrante dje debe: 29 juli 2012 – Despues di un luna sin areglo i sin pago e debe ta subi ku 0,1 bion euro i despues di 1 anja sin areglo i sin pago ku 1,2 bion Euro.

Na nomber di Korsow SOBERANO ta firma atentamente Freddy Ignacio Antersijn, Willemstad- Korsow soberano

Entrega na kantoor di Hulanda na Korsow ku e petishon kortes pa tur e informashonnan jega serka:
I La Reina di reino Ulandes
II Gobiernu di Reino Ulandes
III Prome kamber di staten-general
IV Di dos kamber di staten-general
V Pueblo di Ulanda, mediante tur medionan sosial di komunikashon ku e pueblo normalmente ta mira, lesa i skucha.

E informashonnan aki meste bira konosi na hinter Ulanda e siman aki mes, esta entre 30 di juli 2012 i 07 di ougustus 2012.

Freddy Ignacio Antersyn 30-07-2012

Dialogo riba Reparashon i Mobilisashon di un Pueblo den Sobrebensia Ekonomiko

Demanda pa reparashon den ViaVia di Freddy Antersyn

Demanda pa reparashon den ViaVia di Freddy Antersyn

Rosea di pueblo no por tin astma. Alanan ku un poblashon tin pa bula kune no por dirti pe rayonan di solo dilanti nan popchi wowo. Si fin di luna bo ta bai kas ku 600 florin den man i despues di hur ku awa i lus ba sobra un pari kiriwichi di plaka kesh bo ta pertenese ne grupo grandi ku ta sobrebibi sam sam kubo awendia.

Tin un strea nort si, ku ta nabega duna direkshon, uniko kos un pueblo fada no mester hasi ta kai pa piropo politiko i korporativo, religioso. Sobra ta un kana riba awa mane Hesus pretu den kapitulo Kenepa, Ser’i Niger versikulo 44-77.

Ansestronan ku ta banja, landa den bo ardunan mayo ta testigu kon nos ta predestina pa buta rebolishi pero solamente ora nos sinti ku nos ta lomba kontra muruya. Awenochi na MAS99 eks prome minister Schotte awo parlementario lider di frakshon pa su partido MFK a kuminsa un programa nobo: “Prohibi pa lubida”. Eiden e ta purba di yongota un vibrashon di rebolishi mei mei di su sigidornan. Algu ku e no a hasi e 18 lunanan e tabata na kabes di su gabinet. A neglisha mobilisashon di votado. No a traha riba liderasgo den tur area. No a informa, plama kos na chiki chiki manera si su kontrekante Wiels a hasi. No a mira e importansia di edukashon popular supversivo (adapta na e neo-kapitalismo sosial di MFK). Einan su fayo ta sinta i awoki ta di wak si e strategia nobo kopia lo duna fruta riba termino kortiko. Si Schotte i hasta Charles Cooper lo a kuminsa ku e kampanja di konsientisa nan lo no tabata den nan situashon di politika miseria. Pero tin bja e oreanan di arogansia, fe falsu ku bo ta e kerubim di Korsou ta desostra bo mes futuro pa un ratu.

Den tur esei awe tambe e grato notisia a yega ku na Martinique e alkade di Sainte-Anne, Garcin Malsa i alabes fundado di e movementu internashonal pa reparashonnan tabata na Francia, Paris e a hasi moveshonnan pa demanda e gobiernu franses pa sklabitut i kolonialismo pa un suma di €240 miyart. Martinique ta djoin e lista di paisnan di Karibe ku ta analisando i akshonando riba e tereno di reparashon. Anja pasa Jamaica a reinstala su komishon di reparashon i despues Barbados tambe no a para ketu i ta organisando un konferensia regional. Antigua i Barbuda lo tei, St. Vincent and Grenadines lo tei. US Virgin islands lo tei. Awo hende ke sa Korsou lo lora?

Gabinete Hodge/Wiels a gestiona pa ratu kaba ku independensia i henter e matris di sklabitut i kolonialismo ta buta riba banki ta kria neshi aranja.
A wordu bisa ku lo lanta un komishon pa reparashon pero pregunta lansa ta ki mishibu awoki ta lante si den e 2 anja bo ta tin tur akseso, fondo, konekshon internashonal pa lante mesora na september 2010. E elemento di hasi kenshi politiko ku sentimentu di pueblo ta un preis karu pa paga. Ni ku bon di Enca, Polonius bo’n por pag’e koi.

Akademiko den nan galeksia tabata sa miho ku tur dje konmemorashon di 150 anja di abolishon di sklabitut ta na kaminda. Kiko te motibu ku nan a bira presu di nan inabilidat pa no lanta un komishon pa reparashon riba nan mes kurpa sin gobiernu? Krea un diskushon, laga pueblo ronka su bos i bisa kiko e ke despues di dune tur informashon i kalibra si pueblo ta sufisiente informa pa hasi un eskoho rekete vital riba e pregunta si nan ke rebuzak Ulanda ku un demanda pa reparashon di sklabitut i kolonialismo. Lo ta net bon pa ora Beatrix donder abou feu su trono e hanja un kinipi di kurason. Pero esaki mester a wordu prepara for di 2 anja pasa. Ta indiskutibel ku gobiernu di MFK, Pueblo Soberano, MAN a kampanja ku un merkadeo di trauma di sklabitut ora nan a yega na poder na 2010. Nan ta riba wega, wak pa wega no bai rondu i ansestronan kuminsa monta, yongota den bosnan venunan.

A kaso bosnan perde e tinu kon ta rementa un diskushon riba reparashon den reino ulandes akibou ta un ehempel klasiko perfekto pe situashon. E karta aki ta skibi pe ilustre suidadano Freddy Ignacio Antersyn fecha 30-07-2012 den ViaVia. Ta di lamenta ku niun media ku tei pa spierta pueblo, partido politiko of movementu, fundashon, akademikonan a kwe tene brasa e proklamashon di Sr. Freddy Antersyn i eleva su meta pa penetra den alma di hende kousando un diskushon publiko.

“Spanjonan, juni 1499 te ku 29 juli 2012; Korsow 29 juli 1634 te ku 29 juli 2012 pa makambanan.

E usurpashon di spanjonan a dura 134 anja ku 1 luna. E usurpashon di makambanan a dura 377 anja.

Nos ta pidi un KOMPENSASHON pe periodo ei. Nos formula pa kalkula e kompensashon ta 100.000 hoben di 21 anja na balor di un pago di 1.000,- euro pa luna, durante e periodo di okupashon. E kompensashon di Spanja ta bira 100.000x12000x134 anja + 1 luna= 160,9 bion Euro.
E kompensashon di Ulanda ta bira 1,2 bion euro x 377= 452,4 bion Euro.

Fecha entrante dje debe: 29 juli 2012 – Despues di un luna sin areglo i sin pago e debe ta subi ku 0,1 bion euro i despues di 1 anja sin areglo i sin pago ku 1,2 bion Euro.

Na nomber di Korsow SOBERANO ta firma atentamente Freddy Ignacio Antersijn, Willemstad- Korsow soberano

Entrega na kantoor di Hulanda na Korsow ku e petishon kortes pa tur e informashonnan jega serka:
I La Reina di reino Ulandes
II Gobiernu di Reino Ulandes
III Prome kamber di staten-general
IV Di dos kamber di staten-general
V Pueblo di Ulanda, mediante tur medionan sosial di komunikashon ku e pueblo normalmente ta mira, lesa i skucha.

E informashonnan aki meste bira konosi na hinter Ulanda e siman aki mes, esta entre 30 di juli 2012 i 07 di ougustus 2012.

Freddy Ignacio Antersyn 30-07-2012

Kumbulandia 2013, un entrevista ku prome minister Hodge

Kumbu– Un spiritu di lus ku ta dwalu

Un entrevista ku prome minister Daniel Hodge tene pa Jermain Ostiana 2 di liberuari 2013.

J.O: Kapitan di un barku pa 6 luna riba laman brutu, e ta fasil, bo ta kreyente bo ta kere den un San Miguel manera e Saminero na Boka Sami ku por yudabu hasta salba e nabegado den kalamidat? Kon a bai e prome luna, satisfecho?

D.H.: Trabaonan ta hopi pero mi tin un tim ku ta yudami huntu nos tarea ta pa buta e fundeshi pa despues Kòrsou por prospera. Si mi ta kere den Dios, sigur ora mi mira kon yanuari no tabata fasil.

J.O.: Kon asina?

D.H.: Un luna di prueba di kandela.

J.O.: Manera San Juan, bula kandela purba di hanja un bendishon sin wordu kima?

D.H.: Si, si algu asina, e tabata e luna kaminda nos a pasa dos leinan di medida. Unu di seguro general i e otro di oumento OB 9% sperando ku Karnaval lo a laga pueblo kabisha i no wori muchu ku e konsekwensianan ferfelu dje medidanan.

J.O.: Malastusia grandinan lo a bisa, politika di burdugu. Ta parse ku bosnan a logra si. IMF sigur lo duna bosnan un prenchi. Bosnan no tin miedu ku ora Kuaresma dal aden pueblo ta bin bei i lo buska bosnan pa ‘mata’ ora dunado di trabao kuminsa retira trahado na boshi?

D.H.: Tog no, nos pueblo ta unu ku ta lubida lihe sigur ora bo dune pan i sirko pe lubida. Pero tur kasnan di minister ta bou di vigilansia si.

J.O.: Speedy Security?

D.H.: No (hariendo)

J.O: Pueblo kritiko aki’fo ta puntra su mes: Ta unda a sali ku partidonan politiko a asigna asina yama eksperto ku supuestamente no tin afiliashon politiko pa bira minister. Hendenan a-politiko ku ta wordu kalifika komo mana gobernamental ku a kai for dje shelu politiko i a bin pa salba e pais Kòrsou?

D.H.: Mi ta kere nos komo profeshonal den sektor priva por tuma mas distansia for di e tumamentu di desishon krusial sin muchu influensia di politika di partido. Tesei ta nos forsa.

J.O.: Pero bo ta nombra pa Pueblo Soberano anto den mesun rosea bo ta miembro di PAR, hasta par’i anja pasa riba lista elektoral di PAR e enemigu mortal di PS. Parsemi un enganjo gigante i sobadje e filosofia di PS ta kontrali di PAR e sinku luna ku a sobra lo bira un tutu di hasimentu pueblo chambon. Of no?

D.H.: Bo sa tin puntonan ku tur dos partido ta di akuerdo riba dje i e enkargo ku mi a hanja mi ta kere ta sluit bon aan riba mi vishon personal pa pone pais bek riba pia.

J.O.: E fundeshi kon e ta, e ta mane e laag di asfalt ku nan ta buta riba kaminda di 3 cm ora e mester ta 9 cm awendia? Kon e votado por tene Sr. Hodge responsabel si kos sali robes pa drechi? Ku kwa herment nos por midi si despues di seis luna e trabao ta bon of tur skuins malu?

D.H.: (ketu)… Elekshon semper te ultimo remedi, e partido ku ami a representa tambe tin su responsabilidat di karga ora mi no tei mas.

J.O.: Bon, malu malu pueblo por kita su sosten pa PSB bank, lagabu sufri mane bosnan a planea pa nos sufri. Mi orea a fangu un kos chistoso. Ta wordu bisa ku e tour di pobresa ku prome minister i parlamentario Wiels a duna den Wishi-Martina na minister di asuntunan di reino sr. Plasterk a gana e premio di ‘Politikonan Chikitous’.

Kwantu hende ta biba na Wishi-Marchena? Apenas 1000? Un prome minister of un eks prome minister Etienne Ys, of Caryl Monte hombunan prominente nunka por a drecha e bario kaminda nan lanta?
Bosnan den tur e anjanan no ta tin e inteligensia pa buska un areglo finansiero ku instituto, instansianan lokal of internashonal i duna tur hoben un tablet of un iPad?
Sikiera por buta trahado sosial, ofisina abogado ku preisnan redusi i dianan gratis, yudansa edukativo. Of no? Of bosnan a lubida bosnan rais?

Anto registra e bario komo un entidat huridiko asina bo tin derechi di outor i por eksigi plaka brutu di CBA TeleCuracao i otro media ora nan transmiti marcha di karnaval i seu.
Bosnan tin boshi amigu ku ta hurista, Ys mes ta un, Monte tambe. Abo a studia sosiologia, ta ki falta bo anto?
Si bosnan tres no por ni drecha laga bo mes bario briya ta kon bosnan ta pretende di ta angelnan salbado di un pais?

D.H.: Mi a yuda mi no por papia pa e dos otro nan si pero aki aya mi ta duna un man.

J.O.: Un man of un dede chiki? Berguensa si bo mira e estado di Wishi-Marchena. Ta e edukashon na Tilburg a hasibu asina? Ba yega Ulanda berde berde, mira gainan ku a studia ekonomia finansiero a sali bon, kas nechi, bon outo, salario pe saku hundu. Bo di hey legumai e estudio sosial ba kwe e rumbo ekonomiko. Tasina e diabel di kapitalismo ta komberti hende pa su ehersito?

D.H.: Diaboliko sigur e no ta.

J.O.: Ahwel un akto di Dios tampoko n’ta. Ora ba bin bek ba bai traha pa Kodela, Giro, MCB. Nunka ku bo maleta sosial, e koto yena ku konesementu sosial no a yega na un momento iluminoso di trata di konvense bo rumannan den sektor finansiero pa restruktura e manego bankario desastroso ku ta parasita masakra pueblo su alma? Nunka a pense?

D.H.: Mundu finansiero por general ta habri pa kalke bon idea einan no tin ningun duda. Lio Capriles tambe a bise hopi bja : “Lokwal ta bon pa mi pueblo ta bon pa banko”.

J.O.: Si e te awe Paps no a move ni un milimeter ku su konferensianan di pobresa. E tambe ta stima la reina mane abo ta stime, berdat? Bo deklarashonnan no ta laga niun espasio pa pensa ku den bo bida anterior bo tabata traha den palasio pa rei Wilmu I of II. Of ta strategia e ta pabo chupa, lembe hopi, ganja ku reina Beatrix a hasi un bon trabao i ku abo i Korsou ta orguyoso di dje i ku e ta un gran honor di ta presente ne koronashon di su yu Wilmu-Lè 30 di aprel? Asina sigurando ku e sektor di servisio finansiero por hanja mesun derechi di bira un paraiso finansiero pa kompanianan multi-nashonal bin establese akinan manera te kaso na Ulanda ganando miyardes di euro?

D.H.: Nos ta den reino i si tur partnernan ta wordu konsidera komo igual nos tin derechi di aplika e mesun areglonan fiskal pa atrae invershon.

J.O.: Ku otro palabra, bosnan a palabra den partido ku e gritu di independensia ta keda silensia pa duna sektor finansiero oportunidat di hendel e asuntu di areglo fiskal den reino. Helmin Wiels lo bai huntu kubo Ulanda 30 di april pe koronashon? Of e ta konsistente i lo hunga mansu pa no danja e bonansa finansiero ku lo ta e rekompensa pa bai skonde manera ela hasi dia reina Beatrix a bin na 2011?

D.H.: Esei lo bo tin ku puntre bo mes pero pa loke ta independensia esei no ta un prioridat awoki. Den reino ulandes nos futuro ta bon seya.

J.O.: Hende mester ta burda, plega ku esnan ba maldishona, chercha awo bo mes a bai brasa kapitalistanan, ta den nan mes bo ta. Kon e por krea un konfiansa bek serka e pueblo ku a bai lage ta un misterio. Berdat si ta para mane un baranka di Nortkant ku si Wiels sigi enganja, manipula awa lo pasa harinja. Un pueblo tin su limite i resistensia popular lo strobabu di finalisa bo mishon.

Ta masogista politiko bosnan tur ta anto pasobra trempan of lat mane e gran laboriana di rasa Shon Cola a kanta “Niki Pabo” boso tur lo hanja.

Sr. Hodge danki pa tuma tempu pa splika 2,3 kos pa e pueblo por klara i mira e maskarada kai prome ku Karnaval kaba, habriendo Kuaresma ku un fe vital pa kos por kana menos zagzeilu.

D.H.: Danki, un plaser pasa un felis dia.

J.O.: Angh anto otro bja ora nan puntrabu dikon bankonan no por kobra un ‘liscence fee’ di 1,2% no bira bira ganja ku esei no por, djis bisa ku bosnan no ke i stima burduga, chika e pueblo su saku. Felis dia mi ruman stima.