Dialogo riba Reparashon i Mobilisashon di un Pueblo den Sobrebensia Ekonomiko

Demanda pa reparashon den ViaVia di Freddy Antersyn

Demanda pa reparashon den ViaVia di Freddy Antersyn

Rosea di pueblo no por tin astma. Alanan ku un poblashon tin pa bula kune no por dirti pe rayonan di solo dilanti nan popchi wowo. Si fin di luna bo ta bai kas ku 600 florin den man i despues di hur ku awa i lus ba sobra un pari kiriwichi di plaka kesh bo ta pertenese ne grupo grandi ku ta sobrebibi sam sam kubo awendia.

Tin un strea nort si, ku ta nabega duna direkshon, uniko kos un pueblo fada no mester hasi ta kai pa piropo politiko i korporativo, religioso. Sobra ta un kana riba awa mane Hesus pretu den kapitulo Kenepa, Ser’i Niger versikulo 44-77.

Ansestronan ku ta banja, landa den bo ardunan mayo ta testigu kon nos ta predestina pa buta rebolishi pero solamente ora nos sinti ku nos ta lomba kontra muruya. Awenochi na MAS99 eks prome minister Schotte awo parlementario lider di frakshon pa su partido MFK a kuminsa un programa nobo: “Prohibi pa lubida”. Eiden e ta purba di yongota un vibrashon di rebolishi mei mei di su sigidornan. Algu ku e no a hasi e 18 lunanan e tabata na kabes di su gabinete. A neglisha mobilisashon di votado. No a traha riba liderasgo den tur area. No a informa, plama kos na chiki chiki manera si su kontrekante Wiels a hasi. No a mira e importansia di edukashon popular supversivo (adapta na e neo-kapitalismo sosial di MFK). Einan su fayo ta sinta i awoki ta di wak si e strategia nobo kopia lo duna fruta riba termino kortiko. Si Schotte i hasta Charles Cooper lo a kuminsa ku e kampanja di konsientisa nan lo no tabata den nan situashon di politika miseria. Pero tin bja e oreanan di arogansia, fe falsu ku bo ta e kerubim di Korsou ta desostra bo mes futuro pa un ratu.

Den tur esei awe tambe e grato notisia a yega ku na Martinique e alkade di Sainte-Anne, Garcin Malsa i alabes fundado di e movementu internashonal pa reparashonnan tabata na Francia, Paris e a hasi moveshonnan pa demanda e gobiernu franses pa sklabitut i kolonialismo pa un suma di €240 miyart. Martinique ta djoin e lista di paisnan di Karibe ku ta analisando i akshonando riba e tereno di reparashon. Anja pasa Jamaica a reinstala su komishon di reparashon i despues Barbados tambe no a para ketu i ta organisando un konferensia regional. Antigua i Barbuda lo tei, St. Vincent and Grenadines lo tei. US Virgin islands lo tei. Awo hende ke sa Korsou lo lora?

Gabinete Hodge/Wiels a gestiona pa ratu kaba ku independensia i henter e matris di sklabitut i kolonialismo ta buta riba banki ta kria neshi aranja.
A wordu bisa ku lo lanta un komishon pa reparashon pero pregunta lansa ta ki mishibu awoki ta lante si den e 2 anja bo ta tin tur akseso, fondo, konekshon internashonal pa lante mesora na september 2010. E elemento di hasi kenshi politiko ku sentimentu di pueblo ta un preis karu pa paga. Ni ku bon di Enca, Polonius bo’n por pag’e koi.

Akademiko den nan galeksia tabata sa miho ku tur dje konmemorashon di 150 anja di abolishon di sklabitut ta na kaminda. Kiko te motibu ku nan a bira presu di nan inabilidat pa no lanta un komishon pa reparashon riba nan mes kurpa sin gobiernu? Krea un diskushon, laga pueblo ronka su bos i bisa kiko e ke despues di dune tur informashon i kalibra si pueblo ta sufisiente informa pa hasi un eskoho rekete vital riba e pregunta si nan ke rebuzak Ulanda ku un demanda pa reparashon di sklabitut i kolonialismo. Lo ta net bon pa ora Beatrix donder abou feu su trono e hanja un kinipi di kurason. Pero esaki mester a wordu prepara for di 2 anja pasa. Ta indiskutibel ku gobiernu di MFK, Pueblo Soberano, MAN a kampanja ku un merkadeo di trauma di sklabitut ora nan a yega na poder na 2010. Nan ta riba wega, wak pa wega no bai rondu i ansestronan kuminsa monta, yongota den bosnan venunan.

A kaso bosnan perde e tinu kon ta rementa un diskushon riba reparashon den reino ulandes akibou ta un ehempel klasiko perfekto pe situashon. E karta aki ta skibi pe ilustre suidadano Freddy Ignacio Antersyn fecha 30-07-2012 den ViaVia. Ta di lamenta ku niun media ku tei pa spierta pueblo, partido politiko of movementu, fundashon, akademikonan a kwe tene brasa e proklamashon di Sr. Freddy Antersyn i eleva su meta pa penetra den alma di hende kousando un diskushon publiko.

“Spanjonan, juni 1499 te ku 29 juli 2012; Korsow 29 juli 1634 te ku 29 juli 2012 pa makambanan.

E usurpashon di spanjonan a dura 134 anja ku 1 luna. E usurpashon di makambanan a dura 377 anja.

Nos ta pidi un KOMPENSASHON pe periodo ei. Nos formula pa kalkula e kompensashon ta 100.000 hoben di 21 anja na balor di un pago di 1.000,- euro pa luna, durante e periodo di okupashon. E kompensashon di Spanja ta bira 100.000x12000x134 anja + 1 luna= 160,9 bion Euro.
E kompensashon di Ulanda ta bira 1,2 bion euro x 377= 452,4 bion Euro.

Fecha entrante dje debe: 29 juli 2012 – Despues di un luna sin areglo i sin pago e debe ta subi ku 0,1 bion euro i despues di 1 anja sin areglo i sin pago ku 1,2 bion Euro.

Na nomber di Korsow SOBERANO ta firma atentamente Freddy Ignacio Antersijn, Willemstad- Korsow soberano

Entrega na kantoor di Hulanda na Korsow ku e petishon kortes pa tur e informashonnan jega serka:
I La Reina di reino Ulandes
II Gobiernu di Reino Ulandes
III Prome kamber di staten-general
IV Di dos kamber di staten-general
V Pueblo di Ulanda, mediante tur medionan sosial di komunikashon ku e pueblo normalmente ta mira, lesa i skucha.

E informashonnan aki meste bira konosi na hinter Ulanda e siman aki mes, esta entre 30 di juli 2012 i 07 di ougustus 2012.

Freddy Ignacio Antersyn 30-07-2012

5 thoughts on “Dialogo riba Reparashon i Mobilisashon di un Pueblo den Sobrebensia Ekonomiko

  1. Kaitano Sarah says:

    Henter i asuntu di reparashon ta unu mashá komplèks, unda bo ta kuminsá, ken ta hañ’é. Konkreto: Kada ken na bida aworakí tin su mes istoria i su mes tragedia personal ku por lenk bèk te na sklabitut. Inkluso ami. Inkluso abo. Pero si mi wak di mi mes, ta na Sùrnam, Guyana òf Barbados mi tin ku bai kleim e?! Of na Korsou kaminda mi a nase, lanta i biba? I asina tin tantu yunan di nos ku ansestronan rònt Karibe. Mare Karibe por a uni pa kleim Oropa hòrka nan. Mientras tantu mester hasi algu si. Plaka pa Papiamentu/Institutonan Krioyo/ tuma debe di studiantenan ofer/yuda pa talentonan hoben regresá Kòrsou/hooopiiii plaka pa dos/tres dékada kontra pobresa/ plaka pa kaba ku denque na Kòrsou, pa semper/Plaka pa kaba nunka mas…Legbá, e ko’ ku yama sklabitut ta stroba nos. Ainda. Dia den dia fo. Hopi plaka tin mester.

    • Jermain Ostiana says:

      Tin yen formula pa demanda reparashon. Pero prome tin ku sinja i uni ku paisnan den Karibe i investiga.
      Enbes di ‘duna’ montante pa kada persona por traha instituto, skol, sindikato, koperativa. Mane bo di, chek e debe i negosha ku studiantenan YDK no mester paga debe di estudio pa un kantidat di dekadanan. E danjo perhuisio mester bini bek den sistemanan ku por saka nos for di subdesaroyo pa tur nivel i tur klase hasta esnan elite. E ta un proseso hopi grandi e mester di madures. Mane kos ta awoki politika no tin e kai kai pa habri boka. Ta poder popular tin ku hasie.

      Kemen tanten nos ta sklabisa mentalmente e asuntu di reparashon por yuda nos komo hermen pa bres los for di e miedu ku nos tin pa eksigi egualdat. Anto ami no tin niun problema mane Chin ta bisa ‘bo tin baha bo nivel di bida’. Basikamente Korsou tin asina tantu sen no ‘mester’ eksigi reparashon. Pero e sikatris di pasado, un yaga basta fies mester wordu limpia. Kemen 2 miedu tin. 1 pa NL 2. Pa elite finansiero ku tambe tin ku duna reparashon. Kosnan ferfelu.

      • Kaitano Sarah says:

        Danki pa amplia, kompletamente di akuerdo ku bo. Otro angulo: Mi ta para stret bai pa Papiamenu, pero di un banda mi ta kere e ta stroba nos uni tambe ku poetanan (postkolonial)/artistanan konsiente den region, si bo mira kon nan ta mira nos: pais di abla ulandes, ainda. Aki mi ke korda Isoco di antes: ”ban mas agresivo”. Manera bo a skibi , polítika no tin e kai kai, pero si nan uni ku artistanan nos por papia pa nan…(e poko ku ta konsiente). Kai kai politiko ta nifika problema ku mamai….E miedu pa bahamentu di nivel di bida….manera bo di…lo stroba nos eternamente, si idealismo i un otro manera di demokrasia no haña chens pa sinta. Konsiensha. No ta por nada ku e úniko editoral postkolonial di e antias anterior ta na San Martin i no Kòrsou. Ta asuntu di ku SXM ta uza un idioma ku entre tantu tá postkolonial. Papiamentu: pa kuminsá Tambú mester bira hewon, kos pa tur dia, pa tur hende, di ariba te abou ( loke e por nifiká). Kon por kambia mente di un pueblo? Mas opreshon mi ta kere, anto mi no kiermen e kos akí robes. Kon integrá nos lugá kaminda e mester ta, den karibe? Mi ta lesa loke bo a skibi anto mi tambe ta skibi aworakí mientras mi mente ta kou: Legbá nos ta den un status quo!! Poko dia un brò di mi na Korsou a bisa mi pa mi sera mi boka bin biba na Kòrsou promé mi papia….esaki TAMBE ta un diferensha k’e otro lugánan ku a kuminsá pensa otro haña nan mes: tur nan ”boseronan” tabata huntu, esnan rònt mundu i esnan na kas. Huntu. Sin deskonfiansa den otro nan tabata /ta bringa p’e kousa, poetanan, outornan, pintornan, nombra nan…i no mundu farandulero so. Ferfelu, manera bo di, pero laga nos hasi loke nos por, por ta un/dos generashon mas i otronan lo pick up, mi no sa…KS

      • Jermain Ostiana says:

        Si berdat Papiamentu por stroba si den region pa hende ku ta skibi. Ba mira esaki: http://t.co/cjRJ9ChT djis un dje ehempelnan pa nos. Esaki tambe por uni nos mas ku region: Call for Contributors: Dictionary of Caribbean and Afro-Latin American Biography http://t.co/8YG3oj0F

        Parsemi ku mundu di arte, musika ets no ta hanja nan mes yama —-ainda— pa reskata nos mente i purba di rehabilite ku nan obranan. E ta mane e nesesidat no tei pa nan. Nan tur tin mente kritiko mi ta supone, pero pa spierta pueblo ku nan arte te ainda e miedu tei of nan no ke skupi den e tayo ku nan ta hanja di kome di dje.

        Bida na Korsou ta basta bon podise e artistanan no ta sinti nan mes oprimi i kuminsa rebeldia. Tur luna kos ta pasa. Pero pa bo wordu kanta den Tambu mester warda te fin di anja?
        Si Chin Behilia no tei mas ken lo bira nos griot kantado. Unda e troubador sanger fresku ta? Nos tin hopi kos di drecha i lo bo pensa den e 25 anja ku a pasa e hendenan ku a bai NL i bin bek den nan lo ta tin hende den arte, musik, akademia ets ku por traha un malchi di resistensia.

        Hoooopppi mas agresivo…

  2. Kaitano Sarah says:

    DANKI, JERMAIN. Ei e Karnaval di Trinidat ta ”something else”. Ayera mi tabata studia e kos ei atrobe. Anto mi di…ki dia mi Dios, nos tin asina tantu potensia. Kòrsou. Aparte di tur e kosnan ku ta stroba pa kos kristalisá sali kompletamente, bo no ta kere ta asuntu di eskala chikí tambe…kiko po funkshoná, kua tanki di pensamentu krítiko por ehekutá ideanan si nos poblashon ta chikí asina….Kon ku bai bin…Danki p’e tep(nan), tantu ko’i lesa…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s