Kòrsou 3.0 di Miguel Goede i e Siensia Elite Anti-Klase Trahado

E pensado mas grandi, e intelektual mas magnifiko na mundu por pasa den un trans di kome lubida mane Chinina. Esaki hustamente a pasa drs. Miguel Goede ora den un pasado resien ela deklara ku Korsou for di 10-10-10 ta den un estado di anti-intelektualismo krea na man dje gobiernu anterior di MFK, PS, MAN.

Henter e periodo di dos anja despues di e desmantalashon di Antias Ulandes bal un investigashon profundu hasi pa diferente hende pa saka un konklushon muchu mas ophetivo kiko presis a pasa ku entreotro skuifmentu di profeshonalnan riba varios tereno di gobernashon. Hecho si ta ku ora un orden politiko semi-nobo bini na poder ku apoyo popular di klase trahado neglisha fasilmente e poder bjeew elite por laga kere ku tin un ola di teror kontra intelektualnan di nan kolo politiko sin teniendo kwenta ku e pueblo abou na suela den bom si ta aproba e tangana publiko pa poder gobernamental sperando kambio sosial.

Un pueblo fada di ta eksploita tin un otro moral, un etika ku ta varia djesun di un trapi sosial mas haltu. Nan sistema di sinti inhustisia ta mas sensibel. Pa nan e portanan di santana semper ta habri, e lema ku nan ta drei riba ta ku majan no ta priminti. Na momentu ku tin lamento di un klima anti-intelektual e populashon ku ta riba un -•”krus ta abou, hinka man den saku saka sas” ya pa dekadanan largu ta eksperiensia un klima anti-klase trahado empobresa. Ta pasombra e klase medio,haltu no ta paga tinu riba tur e trosementu di wowo, kedando apstene nan mes na eduka i pasa konosementu pe klase abou nan ta hanja nan mes ta kome sla di un orden nobo vengativo.

Un dje viktimanan tabata drs. Miguel Goede eks rektor magnifikus di UNA. Su karera komo kabes di e instituto edukashonal maksimo di Kòrsou no a dura largu i segun su teoria e ta : “un sobra dje sosiedat di sklabitut di Kòrsou 1.0, hende ta keda husga pa loke nan ta i no pa loke nan sa i kontrubui. Su alegashon ta ku esnan ku e intelektualnan ku a sobra tabata oportunista i a bende nan alma ku populista” (gabinete Schotte). E ta sigui ku: “Esnan ku a bende a keda apunta den posishonan haltu i a hasi lokwal nan a wordu bisa. Otronan a skibi lokwal nan a keda bisa pa skibi.”

Papiando di bendementu, Miguel Goede na 2005 komo presidente dje komishon di referendum abiertamente a laga su mes komo intelektual wordu usa huntu ku dr. Douwe Boersema, mr. Keursly Concincion,mr. John Jacobs, mr. Roque Koeijers MA, drs. Leslie Roosberg i drs. sra. Nolda Römer -Kenepa. E komo presidente tabata para na kuna di un era di manipulashon i enganjo di parti di sektor priva, politika, religiosonan i media pa konvense elektorado di vota opshon A; Outonomo den reino. Un proseso ku no tabata transparente, kaminda e balides demokratiko partisipativa di un pueblo skohiendo su futuru status politiko no tabata presente. Manera Chin Behilia a yega di kanta: “laga e niger koba, lage niger traha, no sinjele nada, lage niger bobo sembra desunion den su kurason”. E troubadour dje pueblo aki e temporada ei a bedei ku ta un akto di falsedat di prepara un referendum durante lunanan di yanuari, februari, mart sigur un pueblo ku no ta sufisiente prepara riba historia politiko estatal. E persentahe di votado a demonstra esei kla tambe: 54% di 114500 a bai vota. 68.4% di nan a vota pa opshon A sin sa mes kiko lo bira e konsekwensianan sosio-politiko den e anjanan benidero.

Den enkuesta di Sentro di Doktor 71% tabata sa ku tin un referendum 8 aprel 2005 pero 37% so por a nombra e kwater opshonnan.

ABVO su presidente e tempu ei Ronald ‘Nacho’ Ignacio a lanta un komishon tres siman prome ku e referendum pa analisa i bin ku senarionan pa tur e 4 opshonnan.

Si diosnan haltu akademiko manera Goede si a kurti riba efektonan maligno di sklabitut i kolonialismo 1.0 nan mester a usa nan don visionario pa preveni pueblo di kai den e trampa ei durante e referendum di 8 aprel 2005 i postpone te ora ta tin konsenso ku gran mayoria a kompronde e impakto di un reforma estatal. Asina por a skapa hopi dolor di kabes ku a tormenta e pais te ku dia di awe mart 2013. Pero kontrali ne prinsipionan ku awoki ta supuestemente haltu den nan bandera e intelektualnan a keda zurdu, muda, siegu. Sumiso ne kapitalistanan, e poder finansiero ku ta hala kabuya, nan a laga un pueblo mal prepara wordu enganja peligrando nan pa hasi un eskoho responsabel.
Zona familiar no? Podise na 2005 shon Goede tambe tabata kadena ainda na un Kòrsou 1.0 tumando ordu di un elite populista?

|»|
|»|
|»|
|»|
|»|

|»| Kwa grupo di preshon lo entama un petishon pa un enkuesta nashonal na ministerio publiko riba e farse di e referendum 2005?

|»| Esun ku tin tur debate, diskushon na radio, tv graba di e temporada di 2005 i 2009 tin un mina di oro.

|»| Chin Behilia sintando den studio di Z86 na 2005 ta tin rason e referendum aki ta VDBF (Vota Despues Bai Flit)

|»| Tantu hende no tbt sa mes kiko ta un referendum, RTC rondetafelconferentie, raport Jesserun.
|»| Despues di pasku, anja nobo, karnaval, seu nan ta pusha un eskoho pa un status nobo den bo korokoro. Ta ki yama esei?

|»| Dikon niun hende a propone pa sam sam ku restrukturashon estatal restruktura manego bankario i media?

|»| E notulonan di e reunionnan dje komishon di referendum 2005 i 2009 lo keda publika e anja aki?

[•- Dicho di Gilbert ‘Gibi’ Doran den e propaganda di Joe Black]

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s