Pourier Arkangel di PAR

Skapando florin antiyano, salba nos ekonomia anto tog mas ku 20.000 hende segun Banko Sentral di 1997-2001 a hui bai Ulanda komo refugiado ekonomiko, un meskla di suidadano ku menos diploma i esnan bon eduka ta un dje herensianan ku hopi lo korda di Miguel Arcangel Pourier eks prome minister di Antias ku ayera nochi a pasa pa un otro skina den universo.

Na Matancia Pourier tabata biba den un resort tras di muraya haltu, djis krusa kaya bo ta riba Comancheweg, Kwartier kaminda nan tabata drei riba e wegi droga. Ehempel klasiko kon lidernan di nos nashon a biba den un mundu di ignoransia, no enbolbi nan mes den mehora e bario kaminda nan mes ta biba. Klaro ku probablemente ela yuda hopi hende pero bo prome prioridat komo eks mandatario mester ta ku kaminda bo biba einan niun hende mester tira den bo kara: “kon por ta posibel ku ora djis trai bo lomba bo bisinjanan ta biba den kasnan deplorabel, hende ku ta pasa hamber, un lucha pa sobrebibi?” Un lider politiko, un miembro prominente di un partido ku mester a bin pa ‘Ruime op de boel’ ta obliga pa tira un rondu kaminda e ta biba i dokumenta tur kasonan penibel i yudanan na optene oportunidatnan pa un miho bida.

Liderasgo di e sirkulo elite tambe ta nifika ku pasombra bo ta e ‘preti wowo’ dje poder finansiero bo mester laga nan kompronde ku nan tin e obligashon di baha nan bida di ‘barika yen’ i inberti hopi mas den e barionan ku nan mes a yuda margina. Esaki sea no a pasa ku tur bo SOFNA i Reda Sosial strategianan pa blendu pueblo of sigur no sufisiente ku bo ta ripara un kambio den e kultura dje klase haltu ku no ke rekonose ku nan ta e origen di manteniendo pobresa na bida.

Pourier den e buki di Colet van der Ven ‘Slagschaduwen’ a bisa ku den sklabitut (e shon tabata) pensa pabo. Despues Shell a bini i atrobe nan tabata pensa pabo. Awoki nos mes mester pensa pero echo ta ku un gran parti di nos poblashon no ta biba plania. Nan ta mira un outo bunita i e ora ei nan kier e i si posibel mesora.

E tentashon di ke kos, kumpra kos ku nos no mester ta resaltudo di e grupo elite ku a bira riku di inventa un ekonomia fantasma kaminda e tabata miembro di dje. Nan a kria un YDK ku ta biba pa kumpra, materialismo a droga nan mundu i durante su gobernashon no a para ketu di drei e tendensia destruktivo ei bek. PAR i Pourier a aspira pa restruktura Antias di 5 sin por a restruktura e modelo kapitalista ku a hinka Antias den e debe di miyardes. E kurashi, e vishon pa reforma e strukturanan ekonomiko i finansiero no tabata presente nunka. Som final ta ku ni maske bo masakra pueblo ku formulan di strangula via SAP (programa adaptashon struktural), IMF (Fondo Monetario Internashonal), World Bank medida purba di baha gastu e lo no deja pasobra bo sistema ekonomiko, finansiero ta putri i disenja pa kai bek den debe.

Si na Korsou 20% mas riku tin un entrada 10 bja ku esun ku ta 20% mas pober i esei ta kasi dobel di esun na Ulanda ta kon bon un lider tabata si nos wak e situashon awoki despues ora Pourier a baha na 2002? Kos a kambia despues? Te grupo chikitu tin poder pero politikamente durante reinado di PAR no tin niun prueba sientifikamente ku e distribushon di kapital a drei den un sirkulo mas grandi. Ta einan bo ta midi kon magnifiko bo lidernan politiko tabata di berdat. Si e nivel di integridat ta asina haltu di PAR i Pourier ta na unda e Outoridat pa Merkadonan Finansiero a keda? Bou di PAR a Ulandisa masha tantu manego di kontrol, kombin bankonan, seguronan i otro institutonan finansiero a skapa di wordu skrutina?

Kalifika Pourier komo un homber grandi tin su riesgonan, e lidernan di PAR ku a sigi despues Sr. Etienne Ys i Sra. Emily de Jongh-Elhage no por a hiba Korsou na un nivel di hasi politika mas na serio. Pourier mes varios a bja a laga sa ku PAR mester di sanger nobo. PNP, MAN praktikamente tin mesun problema Maria Liberia-Peters i Don Martina tampoko nunka por a produsi lidernan nobo ku vishon avansa.

Komo lider di un pais den desaroyo ku ta den bataya ku sikatrisnan di sklabitut i kolonialismo mester prepara lidernan ku ta kompronde tur e problemanan kompleho i retonan, i por krea un hamber den e pueblo pa bira mas kritiko i eksigi un miho forma di gobernashon. Esaki bou di warda di Pourier nunka a pasa. No a demokratisa prensa, politika i sirkulashon di kapital.

Ora Frank Martinus Arion a yama Miguel un chocho pasombra kada chin chang kos e tabata riba stupi di Den Haag rogando sen enbes di eksigi plaka di reparashon di e gobiernu Ulandes ela kontesta ku Arion tabata den PAR antes pero ela bula fo paso su ideanan tabata muchu romantiko pa e partido. Reparashonnan pa Pourier ta un kos atrasa, nos no mester duna hende falta mas pero nos mes tin ku solushona nos drama.

Un dje kosnan ku komo prome minister e mester por a trese un kambio aden ta media. Anja pasa e tabata kla i raspa bisando ku e no ta kasi sigi media mas. Natural su radio favorito Z86 i Amigoe, AD pero sobra no masha. Liderasgo ta ensera ku sea komo lider of awoki komo eks lider por a buska formanan pa influensia un mehoransa, restrukturashon di prensa mediokre. Esaki tampoko no a pasa.

Mientrastantu un lider politiko a transishona, bida a sigi normal pa hopi hende sin muchu interupshon. Grupo Komper, Hobennan na Timon kompanjando Kantado Mayo 2013 Furgill Wijngaarde tabata den tremendo ambiente di Seu pe fundraising di grupo Kosecha di Koko den Club Union Boneriano. Ora hende sigi fiesta, bebe, kome, baila sabiendo ku un ‘gran homber’ a muri bo tin ku puntra bo mes kiko a bai robes ku un masa grandi no ta komparti e momentunan di luto ku PAR.

Media tambe tin un tarea pa kuminsa dokumenta bida di personanan importante na drechi. No por tasina ku hende mane Nelson Monte, Pourier ta muri i ta djis papia 5 minut riba dje na televishon lagando un impreshon fofo, wazu si niun esfuerso real pa laga konta den profundidat dos banda dje medaya i eduka esnan hoben i otro ku nunka a buska pa sa kiko e historia ta dje figura publiko ku sea pa bon of malu a influensia sosiedat di Korsou.

E prome lider di PAR tabata tin e deseo pa saka un buki di tur su pensamentu i eksperiensianan. Ta di lamenta ku esaki no a kristalisa. Un kos no ta diskutibel i esei ta ku ayera nos a perde un gran memoria di politika di Antias ku por a sinja hopi kiko ta nifika drei un partido den anjanan kan kan ku drama politiko, sosial, ekonomiko-finansiero. Laga e vishon ta di tur partido ku den futuro nan lo kwida i dokumenta e historia balioso prome e disparse i no tei mas.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s