Un Abraso Pa Rasismo Ulandes, Dokumentando Poder Blanku Riba Un Nashon Kolonisa

Prueba kuru ta difisil pa ninga si un pueblo ta un presu di su kolonisado e opresor ekonomiko, finansiero, politiko, kultural i edukativo ora for di Ulanda hende por bin traha un dokumentario na Korsou riba e komunidat Ulandes pensionado riku ku ta skupi opinionnan rasista sin kasi niun hende ta purba di responsabilisa e grupo di hende pa nan aktonan.

Den e dokumentario di NTR, Onderelkaar ‘Hollandse Maatjes’ e rasismo Ulandes ta sali asinaki riba pantaya ora nan ta papia mal maria bou di nan kelki di binja karu tras di murayanan haltu den nan mundu blanku privilegia: 1. “Hombunan Yu di Korsou e uniko kos ku nan gusta hasi ta sinta bou di un palu henter dia, chinga….i hunga domino. 2. Sklabitut? Ai tende’ki nan a bin aki, na unda nan mester a bai anto? Nan lo tabata na Afrika ku un balinja tapando nan penis ku un saya di yerba. Mi tata den anjanan 1900 (na Ulanda) tabata tin un bida hopi mas duru ku nan. E Yu di Korsou di edat ta hopi amikal, nan ta papia bon Ulandes tambe, te generashon hoben adikto na panjanan di marka i si nan no por hanje nan ta horte. Pa 400 florin nan ta tirabu! 3. Bo por hasi tur kos akinan: kore kabai, hunga hockey, ballet. Aki ta mane Ulanda ku bon wer. 4. Bo no mester papia Papiamentu akinan, kalke hende ku tiki inteligensia ta papia Ulandes of Ingles. 5. Oh sigur, nos tin hopi danki di paga ne invershonistanan Ulandes. 6. E historia di sklabitut tin ku stop, madura hombu e koi a pasa 300 anja pasa. Bai buska drecha pakiko kos ta bai robes riba bo isla. 7. Bo mester yama Dios danki riba bo rudia ku nos ansestronan a kuminsa trese katibunan akibou den siglo 17. Bo tin un miho bida awoki, si no tabata pa nan (Ulandesnan) lo bo tabata biba na uhm… Kosta Ivor ku wesunan bora den bo nanishi ku sayanan di yerba. Mire komo algu positivo.”

Rasismo di makambanan na Korsou ta un topiko taboe. Bo no mag di papie den espasionan publiko, den media ratu ratu ora e awa pasa harinja lo bo tende reklamo pero un analyse kritiko riba e komunidat di Ulandesnan i su impakto sosial-ekonomiko ta algu ku kasi nunka a sosode. Nan lo bisabu ku e no ta eksisti pesei e dokumentario ‘Curacao’ di 2011 i esun di NTR no a wordu pasa na Telecuracao pa pueblo por tuma nota dje registrashon di un rasismo Ulandes brutu den bo kara. Tin un publiko grandi ku no ta wori pa subi internet i wak e dokumentario pa forma un opinion. Te masa aki ta pasando den diferente forma di rasismo Ulandes pero media i organisashonan ku ta boga pa independensia, emansipashon no ta demostra un boluntat pa laga e masa aki sa dje dokumentarionan aki ku ta sirbi pa bon matrial di les.

Bo no por kwestiona e kolonia Ulandes elite ekonomiko. Bo no por tribi di midi nan poder riba diferente tereno riba e isla aki. Politikonan, akademikonan, intelektualnan, lidernan den opinion lo no sakrifika nan neshi di komfort. Niun profesor ku ta bula bin for di Ulanda a yega hasi un investigashon sientifiko riba e Ulandesnan na Korsou. Si nan sa kon ta koba den nos Archivo Nashonal skibi kon sklabitut kompara ku otro kolonisado no tabata dje teribel ei. Pero sientifikamente kontribui pa nos akibou progresa riba tereno di emansipashon ta masha tiki si no nada.

Komunidat Ulandes su reakshon riba e dokumentario i e ekspreshonnan rasista tabata unu ku bo por kalifika komo furia barata. Nan ta pretende ku ta solamente un grupo masha chikitu mes ta asina rasista i ku nos no mester prekupa ku nan. Remetidonan skibi ku a sali den korant Amigoe (13) i komentarionan riba Versgeperst sigur no ta sufisiente pa buta un spil dilanti e karanan rasista di nan mes miembronan di komunidat Ulandes. Berdat ta ku mayoria makamba no ta ekplito rasista manera den e dokumentario pero echo si ta ku un mayoria grandi ta sostone i mantene e sistema fini rasista poder Ulandes.
Bo no mester papia palabranan malu rasista pa bo ta un rasista, konsientemente i inkonsientemente nan ta konfirma tur lokwal a wordu bisa den e dokumentario. E absensia di un akshon organisa pa rechasa e rasismo ekspresa di parti di komunidat Ulandes of miho ainda un esfuerso pa kita, mengua e poder Ulandes of sikiera denunsia, kritika e sistema rasista dje poder Ulandes ta bisa tur kos. Realidat marga ta ku tin un ningamentu sistematiko di parti e Ulandesnan ku ta pretende di stima Yu di Korsou pa desmantela e sistema pesta ku rasismo Ulandes galvanisa den podernan ekonomiko, finansiero.
E rasismo Ulandes ta pertenese na un spiritu kolektivo ku ta wak pa nan mes hendenan prome, nan mes klase. Apsolutamente nan no ta tei aki pa yuda emansipa, yuda dekolonisa e podernan ekonomiko, finansiero. Pa nan parti e sikatrisnan mental spiritual di sklabitut i kolonialismo por keda te den siglo di siglonan.

E grupo aki huntu ku e elite kriyoyo i klase medio no ta interesa pa finansa proyektonan sosial-kultural ku ta oumenta e konsenshi dje Yu di Korsou di desendensia Afrikano pa nan kompronde e matris di poder kiko ta nifika di ta pretu na Korsou ku un historia di sklabitut i kolonialismo Ulandes. Di mes nan lo hinka plaka den un pelikula manera Tula the Revolt pero esei nunka ku e meta pa lanta e konsenshi, poder kultural pretu ku outomatikamente lo krea un poder ekonomiko dje Yu di Korsou pretu. Tanten e makamba ta ‘bendishona’ nos ekonomia ku €uros i ta gorda nos Produkto Bruto Interno e rasismo Ulandes ta mira komo un regalo di Dios.

Joceline Clemencia na 1999 a skibi un dokumento pa UNESCO yama: ‘Papiamentu ta mas ku un lenga’ eiden e ta bedei presis e estado ku nos ta biba aden ketu bai 13 anja despues: “Den nos ignorante inosensia of inosensia ignorante nos a bula e echo ku historikamenta nan tabata i ta esnan ku ta reina i nos tesnan ku nan ta reina riba. Poder nunka ta wordu duna e mester wordu konkista si no pe spada e ora ei ku mente. Nos no a studia nos reinadonan bon, si no nos lo tabata sa ku nos ta programa pa pensa ku nos no ta programa; ku si nos drei nos kara pa tempu largu nos i ninga eksistensia di kolonialismo elo disaparese outomatikamente. Nos a lubida ku nos a wordu entrena pa no mira kolonialismo komo kolonialismo.”

E antifas kolonial ta poderoso, difisil pa sosiedat desmakare i komo Joceline Clemencia a bisa: “Nos pais a lubida di krea fakultatnan di humanidatnan pa sinja nos su historia i nos historia, geografia, antropologia, sosiologia, lenguage i nos mes lenga. E diskushon pa kuminsa un fakultat di lenguage ta sigi sin niun resultado pa mas ku un dekada. Ningando kolonialismo nos no solamente a hanja sikatrisnan pero ela penetra hundu den nos kweru den nos ser i den un forma sivilisa a kultiva nos skolnan, akademianan i universidat. Nos ta pase over pa nos yunan ku balor propio abou, falta di konfiansa propio, un kompleho di inferioridat, malkonfia, miedu di responsabilidat, falta di kreatividat i initiativa, i pensamentu no-sientifiko.”

Si te ainda tin almanan ku no ke mira e wega di poder ku mas profundidat e ora ei Trudi Martinus-Guda kasa di skibido Frank Martinus Arion ta blas hende su peluka ku goyanan glorioso despues di un siman di remetido hipokrita den korant Amigoe den un stilo uniko di ‘Pal’i Muhe’: “Hipokresia tradishonal aktando mane sobra dje pueblo no ta wordu diskrimina. E falta di boluntat di rekonose ku esaki ta origina for di patronchinan di pensamentu ekspresa pa hendenan Ulandes naievo: e rejekshon i abominashon total di Afrika i su habitantenan pretu, komo eksusa di hustifika sklabitut, kolonisashon i diskriminisashon. Esaki tambe ta nifika rejekshon di religionnan Afrikano, kulturanan, i karakteristikanan fisiko asumiendo prehuisonan kontra nan abilidat humano i tambe di nan desendientenan en general. I tur esaki pari siglonan largu, hasta mas largu ku 200 anja reino Ulandes. I no solamente dor di hende Ulandes pero tambe pa imigrantenan i Yu di Korsou. Esei te asuntu prinsipal. E deklarashonnan ekstremo ta djis un asuntu den banda!”

Un kolektivo kritiko tin ku balora e responsabilidat di traha dokumentarionan oudio-visual riba poder, rasa, klase, genero, i e efektonan di sklabitut i kolonialismo i e berdadero nifikashon di 150 anja komemorashon abolishon di 1863-2013. E bandera Ulandes ta wapa, un djis un rei nobo lo subi trono i kon nos posishon mester ta por wordu diskuti, i hanja un forma mas visibel ora nos mes krea un espasio pe enbes di laga forsanan djafo bin disidi kon nos tin ku pensa papia aktua. A yega e ora pa kita e tjupon emansipativo ei pa semper.

1] Kees Tukker
2] Coby Jansen
3] Marja Tukker
4] Kees Tukker
5] Joost Pronk
6] Kees Tukker
7] Joost Pronk






|- Helmin Wiels tabata e uniko lider politiko ku a bosifera su opion i a yama un boikot fofo riba negoshi di Joost Pronk. Tiki reakshon, hende no a bai entrega nan Audi of Seat. Logiko.

|- Respet pe dama makamba ku ta bende haring e si ta bedei kon e ta sinti kon makamba ta hasi mane nan ta superior ku e YDK. E si ta biba mei mei nan i ta kompronde nan kultura.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s