Helmin Wiels Den Gloria

Bo no por buta un homber bon abou….pa semper. [c]Ced Ride

Balanan skupi for di un skopet no por mata e lucha pa un Korsou mas hustu kaminda amor pa un pueblo den su esensia ta nifika ku klase i rasa no por determina bo destino. Sanger ku a drama riba playa di Marie Pampoen no por mancha e vishon pa emansipa mentalmente. Lagriman ku a kai pa Helmin Wiels no por hoga e boluntat pa bira un miho hende ku ta karga su responsabilitat mei mei di tur e retonan ku bida ta ofrese.

7 dia yena ku tur sorti spekulashon riba e asesinato di lider maksimo di pais kaminda bida a sigi normal. Riba e djadumingu atardi i anochi diferente emisora i tv despues di e anunsio fatal no a interesa nan mes pa adapta nan programashon. Obispu no a bin tv/radio trese kalmu den pueblo. Prome minister Hodge no a sa di tira un diskurso nashonal ni deklara un luto nashonal.

Hubilo sutil pa un lider karismatiko ku a sa di boltu e manera di hasi politika i kria un sed i hamber pa politika bou di e pueblo trahado pa 9 anja largu? Si su boka tabata brutu, onbeskop ta pasombra e inventornan di pobresa i inhustisia sosial ta onbeskop i brutu kamufla den un bachi i dashi of un shimis ku kadena di perla. Wiels a representa un mayoria ku ta produkto humano di un sistema ku no ta kwida esnan lubida. Esun ku ta bon of ta drei riba potmoni di esnan bon para semper lo bisabu: “Pero su style kiko kiko”. Lio Capriles den bista di hopi hende tabata un Dios bankero ku semper a papia desente, nechi pero tras dje maskara ei e tabata instrumental pa nunka demokratisa e sistema bankero kaminda pueblo pober tambe por a probecha di nan mes sen ku otro ta bin disidi ariba ki ora por fia pa kwantu interes. Anto despues traha bustu pe tambe na bida. Onbeskop. Bulgar.

Djabierne ultimo Pueblo Soberano a organisa un marcha di lus, saliendo for di katedral Pietermaai kaminda djadumingu lastu e tabata presensia te patras aya na un sirbishi lidera pa obispu Secco. Un ehempel kon kontrali hopi bja su boka por tabata si bo wak kon ela fustiga kontra iglesia katoliko i nan historial di hipokresia. Pero esei ta bida di politika i despues di 5 di mei tur su fayonan a wordu pordona manera pastor Curtis Meris mes a bisa den su predikashi kortiku: “Semper ela lucha ku un afang ku un forsa den su paden pa esun ku no tin un bos por a risibi un bos den su stem. Awe mi ta para komo simbolo di pordon i laga pas di Kristu biba den bo kurason, pa semper. Amen, amen, amen.” Esaki a chispa keinta kurason dje publiko presente na yegada di e marcha na Marie Pompoen pa despues pastor Tuitt sende na kandela kompletu bisando ku na 2010 ela bisa Helmin: “Senor a bisa abo lo ta e piedra ku a tira riba Goliath, pero bo dolo lo no ta Goliath pero e netwerk ku tabata patras di Goliath. Helmin no tei awe paso e netwerk a vense….temporalmente.” Tuitt a sigi bisa ku poko tabata e politikonan den historia ku a dedika di buta su pueblo dilanti manera Helmin Wiels. Bo por skrutina pero mayoria a bai bon paso pesei nan a bin. E no tei mas pero su legasia su herensia tei i esun ku ke por tume over.

Na final e rumanmuhe Marvelyne di Helmin Wiels a bedei e realidat for di profundidat di su alma bisando: “Mi ruman no tei mas su alma su spiritu su kousa ta na bida danki na kada un di boso ku ta akinan. Mi ruman tabata prepara ela bisa ami “Nan lo no por sera mi boka si nan tin ku matami nan matami numa pero mi ta papia.” Mi ke pa bosnan sa un kos tin un lei universal: Ora un malechor burdugu kobarde tuma bida di un yu di Hesus anto e kai abou boka abou, boka abou! No tin awa pa laba! Bo por kore bo por skonde bo por skonde pa belasting bo por skonde pa CIA pero no pa ira di Senor! Osea mi ruman ta wardabu! Hasi pura paso e ta wardabu! No lubida esei!

Palabranan di su ruman opviamente por wordu konsidera un tahamentu ofisial pa Robby Dos Santos, e elemento di CIA no a hanja aklarashon ainda. Remarkabel si ta ku prensa skibi niun a tribi di sita kompletu e hint di e rumanmuhe pa Dos Santos. Hopi a laga e pida ei afo of no a menshona mes ku tin un hende ku a skonde pa belasting i CIA. Sigur Vigilante ku ta titula su mes komo korant investigativo a neglisha e pida importante ei. Ni un artikulo tampoko na drechi e korant di Lilo Sulveran a traha tokante e marcha di lus, nan portada di djasabra tabata un kaso di hinkamentu ku sanger na Zuikertuintje. CBA si a pasa e deklarashon di Marvelyne Wiels pero hipokritamente Telecuracao a mustra un pida di pastor Curtis i nada mas. Media na momentunan krusial pa informa pueblo ta manipula i proteha nan interesnan finansiero.

Winnie Raveneau lo bira esun ku ta bai remplasa e asiento di Wiels den Parlamentu i su mensahe ta ku awo a bira tempu ku nos tin ku stoi skonde i sigi e trabao. Semper nos a para tras di Wiels, e ta trek e ta avansa e kambio sosial awoki ta nos burt pa sigi kune. Ela tuma sla pa nos di tur huki awoki nos tin ku demostra ku nos a kapta su mensahe.

Media na Korsou (ku algun eksepshon) i na Ulanda a drei e pelikula mediatiko mane ku Wiels tabata kombati kana ront ta kombati korupshon so. Ta bon si ku den e ultimo entrevista ku NRC ta tin kune ku a sali den Amigoe Napa di djasabra 11 di mei ela bedei ku emfasis korupshon di banko, accountant, desaroyado di proyekto tambe.
Pero bandi korupshon su merito mas grandi tabata e edukashon via su programanan di radio 9 anja largu.
Esaki ni lokal ni na Ulanda of prensa internashonal no a bin dilanti. E ta sa ku edukashon lo aselera e proseso di igualisa e oportunidatnan sosial. Kambio di un sistema inhustu ta rekeri un masa ku ta kapta bo vishon.

E dicho despues di su morto mi bunitesa a hanja un dimenshon nobo ora durante siman na sede Pueblo Soberano hende konosi i menos konosi for di tur skina a konta nan eksperiensia ku Helmin Wiels. Tur e kosnan aki ta tene e spiritu di lucha bibu danki na e vishon ku Wiels ta tin pa usa teknologia moderno pa yega te den kas di hende.

Gelt dekker rasista miyonario den un programa di NTR De Halve Maan a trese su vershon riba nubianan di mentira ku Wiels ta un rasista, fasista ku kier a komete purifikashon rasial na Korsou, net kontrali na Hans Vaders ku antes kasi semper a cherche pero den sekreto a atmire despues di 2012 ora tragikamente e lider Soberano a disidi di brasa un koalishon di neoliberalismo. E ta hasta den su kolumna den Amigoe di 11 mei ta sita Wiels na Papiamentu algu ku e no sa hasi mes. Impreshona pe ku e ta nombre e Leopold Senghor di Korsou.
Un remitido di Andres Casimiri ta romantisa e teoria ku Wiels lo ta di akuerdo ku kita Isla/PDVSA i buta na su luga e proyekto Greentown di un elite blanku. Wiels nunki su bida lo riska di laga trahado di refineria bira katibu laboral atrobe kaminda e oportunidat tei pa bira donjo di e luga kaminda nan ta traha, esei un emansipado ta hasi. Di mes oportunista mane Casimiri i grupo di Greentown ta ketu bai ta kere ku hende pretu ta bon pa tuma hasi kens, usanan pa ta kabai di trabao, e buriku di karga pa nan bagamunderia kapitalista. Sklabitut moderno bisti den un bachi berde.

Na e momentu historiko aki atrobe nos a hanja un oportunidat di oro pa kambia e sistema kapitalista ku a krea hende mane Wiels pa bringe. Si nos sigi baila bebe fiesta mane semper nos no ta bai yega leew. Wiels a laga un mapa atras, un konstitushon traha huntu ku otro hende manera Erich Zielinski, Mario Kleinmoedig ku si di berdat Pueblo Soberano kompronde e senjalnan universal mester tume e intelektual aktivista bek pa fortifika e partido.

Choria ku hende kanti playa na Marie pompoen si tur fin di siman of kalke kousa por bin huntu asina esei te les mayo ku nos mester sinja for di e suseso aki. E union ei di kompronde e sistema kapitalista ta krea inhustisia sosial ku asina so den un multitut manera djabierne so por bringe ku ko trese e kambio desea, e distribushon di bienestar di berde riba tur nivel. For di media, edukashon, merkado finansiero, manego di kultura, ekonomia i gobernashon. Pueblo Soberano tin e sosten elektoral pa hasi e kambionan realidat, e momentu di oro ta awoki no lage bai perdi.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s