Djuku Kaiman, Abolishon Sklabitut 150 Anja

Moneda 150 anja abolishon sklabitut

Moneda 150 anja abolishon sklabitut

Raisnan di Sklabitut ta asina duru ankra ku ni maske e ta un siglo i mei pasa nos no ke papia riba dje. Ora ansestronan sklabisa a hanja nan libertat wisiwas ganja ganja e donjonan dje katibunan ku opresornan kolonial tabata morto spanta ku e hendenan lo a selebra nan libertat ku rum i sanger dje donjonan i representantenan dje sistema rasista.
Esaki ‘nunka’ a pasa na gran skala. Archivo no ta papia di dje pero ki donder nos ta interesa den dokumentalistanan kolonial ora ta toka historia di resistensia.

E fecha di 1 di yuli e anja aki a hanja hopi rekonesementu i atenshon. NAAM (www.naam.an) a organisa nan anochinan di diskushon tokante libertat, emansipashon. Universidat a bini ku un serie di lekturanan. Presensia di konesedonan dje historia a keda invita den varios programa na diferente emisora. Artikulonan aunke skars a keda publika den korantnan. Pero lokwal semper tabata hasi falta ta pa e mensahe yega ne klase trahado. Pe gran publiko un formula pa nan mira e importansia di e periodo di sklabitut i e proseso pa yega na libertat te ainda no a keda krea.

Stranjo ta kon diez anja pasa un buki manera ‘Emancipatie & acceptatie’ : Curaçao en Curaçaoënaars : beeldvorming en identiteit honderdveertig jaar na de slavernij, por a sali i na 2013 kaminda nos ta para ketu na 150 anja abolishon di sklabitut bou di imperio Ulandes ‘niun’ buki, dokumentashon oudio-visual a sali. Si bo wak kwantu kos a keda publika na Ulanda anto lo bo ripara kon e slanan di sklabitut i kolonialismo ta dal nos riba e tereno ei. Tirando falta riba finansas sigur no ta un fli ku por subi. Simplemente e boluntat di parti dje intelektual i akademikonan no tei pa desaroya un konsenshi kritiko. Makambanan ta bisabu stoi keda pega den pasado pero nan a saka 4 of ta 5 buki, 2 pelikula, 1 dokumentario, tantu ekposishon di arte, drama, hasta mesa rondo den Tweede Kamer tokante e topiko. Tasina un trauma historiko ta traha riba hende ku kier lubida nan pasado keda skonde pa no enfrenta un diskushon riba nivel nashonal.
Ni un reunion solemn den Parlamentu.

Ne momentunan aki ta Ulanda ta produsi mayoria material di konesementu riba Sklabitut i Abolishon 150 anja. For di kurso, simposium i konferensia. Abusado si ta ku kasi sigur niun dje grabashonnan lo yega Korsou pa nos tambe por saka konesementu for di dje. Tesei te sklabitut di hende sabi ku ta analisa riba bo historia i su efektonan pero no ta buska drechi ku esnan ku nan ta papia di dje. Enbes di saka man ta organisa yen fiesta intelektual pero strukturalmente yuda esnan ku ta eksperiensia e kaos dje sklabitut i kolonialismo ta keda boikotia. Wega sushi si bo’n mire sigi sera wowo pe numa pero mane Elis Juliana a skibi:
“ainda
e herida
ku kadena
di sklabitut
a laga na pia
di mi pueblo
ta saka pus”

E no a ganja pero su disaparishon fisiko den media Papiamentu i Ulandes no a bin fuerte dilanti kon Elis Juliana tabata tin pensamentunan hopi skerpi tokante sklabitut ehekuta pe opresor Ulandes. Un manipulashon pa no tormenta konsenshi dje elite krioyo i makamba riba e isla aki.

Ya na Ulanda 3 profesor kolonial makamba a risibi un supsidio di €700 mil piku pa investiga kiko lo tabata e ganashi ekonomiko dje negoshi di sklabitut. E estudio lo dura 5 anja, anto einan e rasismo ta sinta ku no tin koperashon, partimentu fondo pa Korsou i sobra islanan hasi nan investigashon. Opvio ta ku profesornan makamba no ta pidi supsidio pa investiga ki sorti desaster e gara di sklabitut i kolonialismo a laga atras riba e kolonianan den Karibe.

Un moneda speshal dedika ne abolishon di sklabitut lo keda saka pa Banko Sentral ku e statua di Tula, Sablika i Bazjan na rif riba e moneda ku lo kosta 50 euro. Dikon despues di 1 di yuli? Podise pa keda den style ku minister Bitorina ku a tarda 5 luna pa proklama 2013 anja di Tula? Tasina nos ta drei riba un mediokre kaminda moneda pa rei Welmu a keda traha prome ku 30 april. E muraya di palasio di gobernado a hanja un plakat gradisiendo Tula pa su lucha pa libertat. Di lamenta si ku e plakat fini di marmer inferior ta parse un pamfleta pega kompara ku e plakat masivo pa rei Welmu III. No pa bati mata pasobra tur elogio pe idea di resistensia pero e bista ta keda tiki humiyante ora bo ripara e diferensia dje plakatnan kaminda e balor pa Tula lo mester a lusi na grandi den e kalidat dje piedra i disenjo.

Lidernan politiko, prensa, religioso, sindikal, sektor priva a briya ku nan ousensia. Niun ta tin algu speshal pa bisa mane 90-95% no ta hende di kolo ku desendensia Afrikano. Mane nos ta un pueblo ku no konose un historial di sklabitut. Basta bergonsoso si bo tin lidernan asinaki ta pretende di por dirigi un pais sin balora un pasado di lucha. Pero no por kulpa nan paso mentenan kolonisa ta un droga hopi poderoso. Pueblo Soberano tempi Asjes tabata presidente di Parlamentu a papia kwenti Ulanda mester duna diskulpa, Alex Rosaria di PAIS mesun kos pero awoki ku nan ta riba e stuhl e papiamentu a boltu den biramentu di nan atras, bek mane kangreew sin Aya e bja aki. E tipiko politika ganganaso ei ta kansa kaya.

Elia Isenia den su programa ‘Den Adrei’ a bisa: “Sa historia, no laga ningun hende sklabisabu.” Ela sigi ku 70 anja pasa na pos di pia e kabritunan dje shon mester a hanja awa pa bebe prome ku tur hende. Refutando ku Rei Welmu III no a libera niun hende. Segun e ainda tin famnan ku tabata donjo di katibu, no por kulpa nan tur, pero wak e si, tene kwenta.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s