Tula Lo Dekolonisa Sinematografia di Korsou

[Un tradukshon di e artikulo di 2011 ku a keda manda na programa di Juny Joseph na 2011 ougustus pero nunka a keda publika]

Kiko a pasa ku tur mi grandinan i nan prinsipionan di dekolonisashon?
Ta bosnan a boga ku nos tin ku para riba nos mes pia. “No laga otronan
bin hasi kos pa nos.” E lema ‘Nos Mes Por’ a kaduka? Ora yega banda di
of pasando 60 bosnan ta bira lali lali? Mi mester di mi grandinan ku
ketu bai ta sinta riba stuhlnan ku posishonnan klave i ku tin podernan
pa disidi pa nan ta F.U.E.R.T.E.

Bosnan no tribi di sigi bende nos, nos mester hende ku ta bebe Awa di
huramentu for di un kalbas yena ku Ashe. Mane Nashonnan Uni a deklara
2011 e anja pa hende di desensensia Afrikano kon den nomber di Dios ku
e konosementu ei bosnan por duna lus berde na un proyekto di 2 Ulandes
Oropeo ku ke traha un pelikula di nos resien proklama heroe nashonal e
luchado pa libertat Tula?
Huntu ku Warrington Hudlin i Chris Hawkins un sinematografo, aktivista
ku ta para pa un movimentu pretu independiente na Merka ku sa muchu
bon ku e no mester partisipa den eksplotashon di Tula.

Riba e website http://www.tulathemovie.nl nan ta papiando di:”un historia
representando siglonan di relashonnan den konflikto entre pretu ku blanku, e efektonan te dia djawe ta persigi nos.” I esei ta berdat ora e dos sinematografo Ulandes ku sanger friew of hopi inosente a intenta di kita e oportunidat dje Afro-Kurasolenjo of
sikiera e Yu di Korsou pa konta e historia di luchado pa libertat Tula.

E website http://www.tulalives.org dje komishon ‘Rehabilita Tula’ responsabel
pa nan rol determinante pa Kolegio Ehekutivo proklame komo heroe
nashonal na 2010 ta bisa e sigiente:
“Despues di e revolushon di 30 di mei 1969 hopi lider politiko,
intelektualnan i artista di Korsou tabata inspira dor di Tula den nan
buskeda pa nos identidat nashonal
Na 1971 un obra teatral a wordu presenta yama “Tula”…” Mi por
imaginami e werewere esaki lo a kousa si e obra aki lo wordu traha pa
solomente makamba i skibi pa un Afro-Merikano. Danki Dios e obra aki
tabata skibi pa kulturista, historiado Pacheco Domacasse i ko-dirigi
pa Tone Brulin un direktor sosiopolitiko progresivo di Vlamingen
Belgika. Pero esaki tabata dos anja despues di 30 di mei durante un
periode ku e Afro-Kurasolenjo tabata kumisando dunando balor bek na su
herensia Afrikano. Un pueblo na kaminda unda karnaval ta e forma di
selebrashon mas eleva di nos kultura no ta prekupa su mes dje tantu pa
e luchanan di pasado ku por stimula nos pa krea un mentalidat firme pa
realisa un pais ku por regi su propio destino.

E anunsio dje proyekto pa produsi un sine e tabata kla pa tur mira i
kompronde kiko a tuma luga? No, e tabata algu skondi pa pueblo. No
tabata tin niun transparensia dje komishon den aprobashon di e
produkshon ‘Tula The Revolt’. Niun hende sa e kriterianan, niun lei pa
un heroe nashonal a wordu publika si ta eksisti un lei asina anto.
Nos komo pueblo sigur no tabata tin partisipashon demokratiko den dje i
konsekwentemente niun hende por a skrutina pa wak si e proseduranan
korekto tabata hustu i si nan wordu usa te pa nan resulta den un
aprobashon.

Un par di frase for di nan resumen dje pelikula: “Dor ku hopi katibu
wordu transporta i bendi ront hafnan di transito den Karibe manera
esun den Korsou, e historia aki ta pertenese na nan i nan
desedientenan e merese di wordu konta paso e ta un parti importante di
historia, identidat i na final di nos sosiedat di awe.”
Kiermen nan ta kompronde bon bon ku e historia di Tula ta di nos pero
nan moral i respet pa nos kaminda emansipatorio ku nos komo
desidientenan tin ku kana ta disparse pa un atventura na Hollywood di
$25 miyon?
Bo tin ku sinta warda bo beurt te ora e desedientenan di sklabitut mes
a krea un infrastruktura solido kaminda nan mes prome por desaroya nan talento riba tereno di arte, musik, teatro, film. Bo no por bin kwe
fama riba nos historia anto hasi negoshi kune tambe sin bedei kiko lo
sosode ku e ganashi finansiero dje pelikula. 60% dje ganashi lo bai pa
un fondo pa yuda lanta un skol sinematografiko?
Den 2011 no tin un skol pa sine aki, si bo ke sinja sinematografia bo
tin ku bai studia afo. Solamente e klase medio i haltu of un laso ku
nan dos sin niun preshon di klase trahado ku ta traha pa sobrebibi tin
e privelegio pa skohe i mira e balor ekstra ku un estudio di sine aki
tin pa sosiedat. Bisami kwantu modelo ehemplar Afro-Kurasolenjo un
bario mane Kenepa tin ku a bai un skol di sine? E area kaminda e
lantamentu a kuminsa; Lagun, Santa Cruz, Soto, Barber, Sabaneta tin
sinematografo o modelo ehemplar ku por inspira hende pa kultiva un
interes pa produsi un sine? Si bo lanta den un bario di klase trahado
e chens ta hopi chiki ku bo ta bai para tras di un kamera produsi
pelikula ku por lanta balor propio di nos pueblo. Laga nos ta honesto
tin un gran skarsedat di ‘griotnan’ visual ku por sende un kandela den
nos kurason pa filma e pasado, presente i futuro di Korsou.
Lidernan vishonario ta krea un tera fertil pa demokratisa sine i media
en general. Esei ta nifika ku tur hende mester tin e oportunidat pa
konta su historia via sine, radio of korant. Korsou sufriendo di un
katarata epidemia sosiopolitiko- korporativo den un reino ulandes
kaminda su suidadanonan ta wordu trata komo terser klase te ainda no a
mira e lidernan ei lanta.

Un anja prome ku e desaparensia fisiko dje independista, Papiamentista
Jocelin Clemencia durante un lektura na Ulanda pa e komemorashon di
Tula dje lantamentu 1795 17 di ougustus e la buta emfasis ku na 2013 lo ta 150 anja despues ku a aboli sklabitut na 1863 i ku nos mester konta nos mes historia, dokumenta i reinterpreta nos mes historia.Anto einan nos mester yega. Nos tin un kaminda largu pa bai komo hopi Yunan di Korsou no ta pone Tula riba un pedestal manera un par di
hende ke pretende. E thesis di Natasha Maritza van der Dijs: The
Nature Of Ethnic Identity Among the People of Curacao (2011) ta trese
esaki hopi kla dilanti durante su investigashon: “un desediente
femenino Afrikano ku un grado akademiko den komersio di edat 19-35 ta korda kla kla kon un otro mucha pretu a yame ‘Tula’ dia e tabata na
skol di fundeshi e ta hasta korda ku e tabata sinti su mes mahos”
Mei mei e kambionan estatal, referendum i elekshonnan hopi bja nos oreanan i kurason a sangra ora e grupo ku tabata pro rekolonisashon
den un outonomo den reino ulandes gritando:”Tula no a hasi nada pa
nos, no wak patras, legumai rekorda hende riba historia di sklabitut”
Ironia di bida ta ku e mesun personanan ku a kontribui na hasi bofon di Tula awoki ta wordu paga via e legasia di Tula pa ta e maestro di
seremonia i ta ofrese nan restourant pa e evento di pre-produkshon di
Tula pa kolekta fondo pa e sine den un sirkulo elite leew for di e hende ku di berdat ta atmire. Un bufete di abogado mane Van Eps Kunneman Van Doorne, ku nunka a mustra interes den halsamentu dje
Afro-Kurasolenjo diripiente ta sponsor e produktornan di sine sperando
di mes riba un retorno di invershon.
Niun hende nunka a mira e sektor priva demostra amor of kalke sosten
finansiero pa dokumenta e historia di sklabitut of kalke otro periodo
di historia Afro-Kurasolenjo. Nos tur por korda hopi kla e diskushonnan kayente riba e kitamentu dje statua di Peter Stuyvesant na un skol publiko na desember 2010.
E potret dje studiante ku a skibi riba su barika ‘Tula bin (chupa)’ ku
un flecha ku direkshon na su organo seksual. Esei tabata un ehempel
klasiko kon reprochabel i sin skrement e hobennan di klase medio/altu
ta wordu kondishona pa nan pensa asina ignorante di Tula. Pero ne otro
banda nos tin e partidonan politiko ku a forma e gobiernu nobo ku ta
sinta awoki: e asina yama gobiernu ‘sosial, sustenibel, soberano’ ku a
usa e pasado di sklabitut pa nan benefisio elektoral. Un ambiente
anti-makamba spantando e pueblo ku makamba lo tuma e pais aki over
atrobe si nan no vota pa nan den elekshonnan i referendum. Na radio,
televishon i korant e grupo aki a pasa propaganda ku tabata bisa
indirekt i direkt ku nos ansestronan a drama sanger pa nos libertat i
a referi na sklabitut masha hopi bja menshonando Tula. 10 luna despues
tur e papiamentu di pro yu di Korsou, pro- Afro Kurasalenjo i sobra
retorika emansipatorio a dirti dilanti nos wowo. Nos no a tende nada
di nan kaminda tur ora tur dia nan tin komentario riba tur kos. Un
traishon kultural manera esaki lo tin su reperkushon. Dus pa bisa ku
tur hende ta stima Tula ta hipokrita
Na 2005 mi askibi e poema ‘F__k Tula’ pasobra opviamente meskos ku
awoki un grupo chikitu ta interesa pa alsa e karakter heroiko aki.
Kada anja na 17 ougustus niun media lo transmiti en bibu e komemorashon na Ulanda of Korsou. Niun korant lo buta un relato kompleto dje diskursonan. Un bergwensa pa tur gobiernu di turno i representante i donjonan di media pa neglisha e dia importante aki.
E no tin un prioridat kultural mes.
E prome monumento di Tula a wordu traha na 1963, e di dos na 1998 na Rif leew for di pueblo pero disgrasiadamente un heroe
venezolano Luis Brion si ta mei mei den pueblo na Awasa den kurason di
Otrabanda. Tristu pero berdat a tuma nos 48 anja pa surpasa un krisis
di identidat pa proklame komo heroe nashonal.

Un refleho di madures i komprenshon pa nos trayektoria di emansipashon
lo ta si e produktornan di sine Jeroen Leinders i Dolph van Stapele
keda trankil, laga e proyekto aki fria dunando respet lagando
sinematografia di Korsou florese pa e yu di Korsou mes duna realse na
e herensia di sklabitut ku na final lo wordu konta ora nan mes tin tur
herment i konfiansa pa konte.

Resklabisa Tula e luchado spiritual mas grandi di nos tempu pa gloria
komersial no solamenta ta un akto neo-kolonial pero e ta anti
emansipatorio e no ta edifika e yu di Korsou su imagen propio ku ta
desendiente direkt di ansestronan ku entre otro a pasa den e trouma
Trans Atlantiko. Si e rezjimen di pensadonan kritiko i aktivistanan
sigi drumi e frutanan marga lo mester wordu kome pa nan mes persona ku
a laga e inhustisia aki pasa mane nada no a pasa. Un yamada na nan pa
korigi nan fayo i honra nos ansestronan.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s