Visualisando, Kaida di Kapitalismo Krioyo

E prome djadumingu den luna di mei.
Un matansa na Marie Pompoen unda
sanger a sprengu manchando e kapitalismo krioyo. Un boutismo spiritual di Helmin Wiels pa inougura e komienso di un era nobo sin e sistema kapitalista, un ekonomia di wisi-was abusivo i diktadura finansiero kaminda ta ekploita, chupa bo plaka i en kambio bo no tin niun donder di bisa.
Un elite blanku i pretu ku ya pa un siglo i mei a primi, bati den kabes di hende -ku nan ta mira komo katibu ekonomiko- e sonjo di pega pa plaka te kos pa yag riba. E mentalidat di ‘Campo’: “Mi ta chinga ki ora mi ke, ku ken ku mi kier, mi no mester di amor, mi tin sen.” E hipnose di ritmo kombina, comeback, trap, house, bachata, bebiendo, baliando e baila di ‘Chinina Kome Lubida’.

Den e regimen kapitalista no tin espasio pa hende manera Wiels ku ta desea di mira su hende organisa, para pa su derechinan, habri nan boka, i prospera subiendo e trapi sosial den bida. Den edukashon un studiante tin ku keda mitar bobo un zumbi den banki skol sigiendo ordu di su dosentenan i direktiva di skol. E mes no por stur i influensia e direkshon di dunamentu les i kontenido, ki sorto di buki e ke. Kontra su boluntat e ta wordu eduka pa pensa i aktua sumiso, un marioneta ku tin ku obedese ne orden i pedidu di ekonomia enbes di krea i kana un ruta ekonomiko nobo ku ta drei riba dignidat di hende.
Esaki ta e kambionan pa 2013 ku ta nesesario pa Korsou krea otro tipo di hende. Sin un otro malchi di personanan nos ta kai den mesun trampa i sklabisando nos mes.

E kapitalismo krioyo meskla ku un sneif diki di ulandes no ta permiti e klase trahado pa inventa un otro forma di ekonomia ku ta yuda e hende sali for di e sirkulo visioso di salario minimo, hopi trabao pero tiki paga ku violashon di labor na ordu di dia tur santu dia.

E sistema mester di su popchinan e momentu ku e ta keda kwestiona e ta skupi bo afo, herida bo, hasi bofon di bo, laga bo komo un paria dilanti bo komunidat. E ta bube-fika ku perfekshon via korant, televishon, radio, internet ku mayoria bja e pueblo ta keda manzu, e por sulfura den prensa, hasi un protesta aki aya pero e kambionan grandi pa laga e sirkulashon di plaka den ekonomia i finansas traha na benefisio di e pueblo no ta sosode fasil. Kambio ta nifika kaida di nan imperionan. Un adapshon chiki lo a bendishona miles di hende pero e filosfia ku pueblo mester keda pober mane raton di kerki ta ketu bai vigente.

Ta tin periodonan ku bo tabata sintiendo un apertura, un buraku chikitu den e forti di fiserei finansiero a keda bora. E dede di Helmin Wiels a kuminsa primi, pusha buskando maneranan pa remodela e sistema kapitalista. Nan a korta su dede afo. Pero a sobra hopi dedenan mas i despues di un silensio di kwater luna nan tin ku kuminsa mustra riba e abusu i e agonia ku e sistema ta kousa. E dedenan tin ku kinipi e inventornan dje sistema kapitalista krioyo, e dedenan tin ku buta respet i hala e gai ku nan skopet spiritual.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s