Sabi-Bobo Elitarismo den Media

Forsa i fe publiko nan tras a permiti pa e grupo dominante ta eksitoso den politika i sektor priva. Asina a yega na posishonnan ehekutivo ku por a yuda determina futuro di e pais aki. Elektorado di masa a bai buzon deposita nan konfiansa den e politiko. Konsumido di produkto i servisio a identifika ku e kompania pa tin un relashon di kompras kontinuo. Den kampaña elektoral politikonan a traha propaganda speshalmente dirihi riba e klase abou, usando e lenga popular ku nan ta papia pa gana nan simpatia i pa manipula nan pa yega na voto. Kompanianan semper ta den un guera di elekshon i nan ta kwe kalke kantante popular ku of sin kantika ku ta hit di e momentu, kalke frase ku ta hopi usa den kaya pa sedusi pueblo pa bin gasta plaka serka nan negoshi.

E fiansa di kultura popular di e YDK pa ganashi politiko i komersial en realidat hopi bes no ta bini bek ora e oportunidat yega pa eduka e pueblo. Kasonan politiko i di sektor priva di importansia grandi ku ta den media no ta keda splika manera nan ta hasi durante nan propaganda ku ta pasa tur dia. Por ehempel, e bankarota di hotel Kura Hulanda, e supervishon di Banko Sentral riba Girobank, leinan i tratadonan internashonal, desaroyonan lokal, regional, internashonal politiko, komersial.

Tur esakinan ta keda kubri ku un asbest di arogansia ku niun den media por of ke mishi kune. E fenomeno ta ku kapitannan di industria, ministernan, minister-presidentnan, bankeronan, eks mandatarionan i otro personanan ku tin of tabata tin funkshonnan publiko i priva haltu ta konspira pa mantene e konsenshi politiko i komersial mas abou posibel. Esaki ta sosode strukturalmente ora e grupo chiki aki ta prefera di bishita di baina dos, tres medio di komunikashon spesifiko di nan preferensia kaminda nan por hunga nan rol di e rei ku panja bisti. Esei kemen ku tin lembemente bai gol, ounke nan ta robes (sunu, sin panja) e miembro di prensa lo no hiba un interegashon di oposishon kune. Papiando den nan hanchi pa e entrevista semper sali na nan fabor.

Profeshonalismo ta nifika ku bo tin ku hasi preguntanan skerpi ku por laga e invitado den studio soda un ratu. E ta manda un senjal pe skuchado, lesado ku prensa ta tuma su trabou di investigado sosial na serio. Di otro banda e representantenan elitario ta radia un konfiansa pa e hendenan pafo ku e no tin miedu di enfrenta sierto berdatnan ku mester keda publika.

E outonomia atkeri for di 1954 no a kria un kultura di edukashon politiko i komersial permanente di nivel haltu via media. Realidatnan marga ta ku por ehempel un Etienne Ys. (eks-prome minister), un Jaime Saleh (eks wes, gobernado di Antias), Lio Capriles (eks-bankero) konsientemente ta skohe pa papia na Z-86 so riba kasonan di aktualidat ku nan eksperiensia vasto por eleva un debate publiko. E eskoho aki ta konsidera komo un bofta den demokrasia informativo. E aktonan denigrante aki ta hiba e vra bek ora na momentunan klave e pueblo mester di datonan, historianan mas balansa pa partisipa den e debate publiko.

Un eks bankero komo Ron Gomes-Casseres of eks prome minister Suzy Camelia-Romer ta prefera di duna su opinion amplio detaya den un korant na ulandes Algemene Dagblad of na Z-86 enbes di bai serka pueblo na laga bisa korant Extra of radio Deltha. E mente elite ni maske kwanta nivel universitario e tin no por rekonsilia ku e vishon di bedei asuntunan importante di ekonomia, politika, finansas riba plataformanan popularmente skucha, lesa pa e pueblo di klase abou, trahado.

E grupo elite aki ku ta representa mundu bankario, aseguro, turismo, finansiero, diplomatiko i yen kos mas tur por yuda hisa e konsenshi nashonal pero enbes ta kontrubui na bomba e awanan intelektual di nos pueblo.
Semper tin alternativo si bo no ke papia na MAS99 paso e ta bou di bo nivel, tin alternativa si bo no ke deklara algu na Ultimo Noticia. Por manda un hende ku si tin e afinidat ku e muhe i hombu chiki ku kurason grandi. No tin nada ku por stroba e elite aki pa kumpra espasio den nan korant na nan emisora pa bedei sierto asuntunan esensial pa konesementu general na un manera fasil komprendibel.

E movimentu organiko mester ta ku e mentalidat elitario tin ku kondena nan mes akshonnan arogante i realisa ku ta danki na e pober den Dein, Ser’i Kandela, Soto of Fuik ku e por kore un Audi A6. Mester demostra gradisimentu eterno pa su prekupashon pa sobrebibi tur dia
ku e no tin e energia pa baha su ira
di kritika riba e podernan ekonomiko, politiko, finansiero pa eksigi miho distribushon di propiedat, oportunidatnan ekonomiko,
monetario na Korsou.

Opviamente e hirarkia di poder den praktika i teoria tin un lisensia di inkapasidat pa eduka un pueblo pa motibu di un miedu real ku tal edukashon lo gentrifika, boltu e espasionan di poder. Mas hende mas sabi ku antes lo perhudika nan sirkulo familiar pa optene puestonan haltu. Menos hende menos na tinu lo resulta den transformashon sosial mas lihe ku tin efekto imediato den formanan di hasi negoshi i politika barata. Konesementu ta poder pa un pueblo domina nan destino segun nan kultura indigeno di komparti i konbibi.

Ta deber di un minoria elitario pa plama e konesementu i sabiduria atkeri den pueblo masamalmente. Ounke e no ta den nan naturalesa pa hasie pero e reto nobo mester ta pa adapta na realidatnan nobo pa preveni i mengua kalamidatnan sosial ku ta kousa pa nan sistemanan di oprimi informashon riba nivelnan chiki i grandi den media.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s