Salubridat di Pueblo un Negoshi Lukrativo di Malestar

Pan bonchi pretu, kora, simiya flor di solo i pampuna di Korsou

Pan bonchi pretu, kora, simiya flor di solo i pampuna di Korsou

Mainta trempan ku hopi diplomasia doktor Bob Pinedo onkologo, e spesialista renombra di kanser rekonose mundialmente ta spierta pueblo na Telecuracao ku e kasonan di pechu di kanser serka hendemuhe ta subiendo ku sifranan espantoso pa motibu di gordura.
E entrevistado feminino mara na tempu i opviamente pa paktonan kapitalista ku patronisado di e programa i e planta nashonal no ta riska di drenta kombin nos dieta publiko ta resulta den asina tantu kasonan di kanser ku hopi bes ta kaba mortal.

Resien ta tin e Ride, Walk, Swim for the Roses un kampanja deportivo pa rekouda fondo pa fundashon fondo Wilhelmina ku ta kuida e bienestar di pashentnan di kanser. Par’i mil hende ta sea kana, landa of kore riba nan baiskel ora solo subi pa un bon kousa pero e pregunta esensial ta keda para: Dikon ta organisa un evento kada ana sin pone lus grandi riba e oferta di produktonan, kuminda pesta ku suku, vet i salu ku ta kondusi na gordura, obesidat ku ta kousa malesa di suku (diabetis), preshon haltu, kanser, malesa di nir, malu di pulmon, probleman kardiologiko (kurason) i otro sortonan di malesa?

Fundashon Prevenshon a keda lantá
pa profesor Pinedo ku yudansa di Lio ‘Paps’ Capriles su generosidat pa prevení kanser mas tantu
ku ta posibel aki na Kòrsou. Nan ta drenta den bario, hala hende pa screen pa kanser pa asina skapa bida di hende. No opstante ku e ta un bunita gesto, pueblo tin ku keda pensa kritiko i kwestiona pakiko no ta kwe e toro na su kachu? Tabata Lio Capriles mes ku a aktua komo e mersenario merkantil instrumental via su banko MCB ku a soru ku mayoria komersiantenan ta hanja fiansa pa hasi un pueblo adikto na kuminda, produktonan di suku, salu, vet ku ta kondusi na malesa.

CBS (Buro Sentral di Statistik) den su senso di 2011 ta indika ku nos importashon total di produktonan ta 2.2 miyart. For di esei nos ta kumpra kos pafo di nos tera 426 miyon na kuminda i animalnan bibu i ko’i bebe ku tabako 89 miyon. Na momentu mester skohe pa salud nashonal ku ta pisa riba e presupuesto nashonal ku un Cft e supervishon finansiero di NL/Korsou riba lomba di gobiernu pa baha gastunan den sektor di salubridat di un of otro manera (kapitalista/finansista politiko) ta skohe pa laga kompanianan di import sigi kumpra i bende produktonan ku ta oumenta e estado malu di salud nashonal.

Politika di kuminda i kos di bebe ta asina un menasa ku e ta difikulta un parlamentu pa aktua. Pesei den demokrasianan bibu bo tin huristanan, abogadonan, movementunan di salud ku sin interes finansiero-politiko por interveni na bienestar di pueblo. Den e kaso aki na Korsou un evento kaminda un grupo di ekspertonan di lei a reuni pa kuminsa kasonan sivil kontra importadonan i gobiernu pa koregi nan manego duars skuins ku ta peligra nos salud no a presenta ainda. E konsenshi, e sintimentu di responsabilidat ta den un fase pre-infantil ku pa motibunan kapitalista ta keda aborta kada momentu un moveshon huridiko ke nanse.

Loke si eksisti ta e barbaridat di un abogado manera Eldon ‘Peppie’ Sulvaran ku di un banda ku hopi sansaya ta sali dilanti den prensa komo un anti-kolonialista, bringando kontra rasismo ulandes den e aparato hudisial, bogando pa kaba ku e mafia den Banko Sentral pa yuda esnan semper empobresa pa un elite krioyo pero riba un trankil ta defende i libra ku eksito den korte un chines-YDK ku su panaderia klandestino na Gato ku a keda aresta di ta bende pan bieu di mansa putri na pueblo di Korsou.

Bosero di asosashonnan di panaderonan sr. Keithley Hooker den su reakshon na CBA Television ora a tira redada na e panederia na Gato tabata basta kla. Ela motiva ku tin hopi negoshi ku ta traha pan asina i ku un ingrediente den nan harinja manera Bromine/Bromate ku ta fasilita e trahamentu di mansa mas barata pero e Bromine ta kousa un proseso kanseroso den kurpa di hende.
E sigiente dia ‘niun’ hende den prensa a piki e deklarashon for di suela, solamente un tiki reklamo manera dia ta tin seramentu di sneknan chines-YDK ku tabata bende porkeria danjando salud di hende.

Temor elektoral di gobierno parlamentu, temor ekonomiko
di parti di institutonan finansiero, temor di spesialistanan, doktor di kas
i ekspertonan den sektor di salubridat, kombina ku un miedu den prensa pa ataka e origen i un ignoransia di pueblo krea pa tur e gremionan huntu menshona a evolushona den un epidemia di salud for di balanse.

E kultura di kome bebe malu, ta un pilar grandi di ekonomia di Korsou. Unda ku bo bai bo ta dal den sea sneknan of tokonan chines-YDK, Kentucky Fried Chicken, Burger King, McDonalds, Pizza Hut, Domino’s, Wendy’s, Subway i tantu supermerkadonan ku ta merkadia den un forma agresivo nan produktonan no-saludabel. Protekshon kontra e merkadeo omnisiente ta kasi non-eksistente i pesei pueblo ta kai den nan trampa sin pensa i analisa kritiko kiko nan ta kumpra pa nan kome i bebe i kon esaki por afekta nan salud. E industria di kuminda i bebida den un korte di hustisia di futuro lo hanja nan mes kulpabel na venenamentu di un pueblo pasobra nan tabata sa bon bon ku kiko nan ta bezig kune. E mishon di importadonan, bendedonan di e produktonan, vet, suku, salu ta unu di oumenta ganashi. E kompanianan aki lo usa e ekskusa ku prensa tambe ta usa: “Ta pueblo mes ta pidi pa e kosnan aki.” Pero realidat di e historia aki ta ku for di komienso di siglo 20 ta importadonan a kambia e patronchi di kome i bebe di e pueblo aki. A kuminsa usa ketchup enbes di ruku (yerba kora ku ta bin hinte of den pepita ku antes tbt usa pa traha sous). Enbes di machika pampuna, ku koko raspa i djus di mispel ta kumpra kahanan di Ensure pa mal-alimenta pashent, hende grandi i awoki hasta mucha. E importado su direktor Jan Beaujon di Curacao Pharmacal Company ainda no tin e konsenshi korporative responsabel di salbaguardia un sosiedat su salud. VBC e asosiashon di komersiantenan ku su kritika riba tur proseso na Korsou menos riba e komportashon haragan di su miembronan tin un visepresidente Joop Kuster, direktor di Kuster Trading ku ta importa produktonan ku tambe ta kontribui na e gastunan haltu di trata gordura, obesidat, diabetis i otro malesanan non komunikabel.

E instituto di salud di pueblo di Korsou (www.vic.cw) tin un investigashon ku den media Papiamentu no a hanja e atenshon ku e merese. E raport riba su mes falta hopi sifra i splikashon pero un dje kosnan indikativo ta ku
62,6% di hendehomber i 67,3% di hendemuhe tin sobrepeso of obesitas. Esaki ta nifika ku 32.148 hendehomber i 43.941 hendemuhe di 18 anja bai ariba ta luchando ku nan peso i tur konsekuensia pa nan salud. Un total di 76.000 piku hende riba un populashon di 150.00 hende. Sin konta aden e muchanan.

E instituto ta sigui e lina di WHO (World Health Organization) ku ta rekomenda gobiernu pa duna insentivo ekonomiko na e negoshinan ku lo redusi nan benta di asortimento no-saludabel. Na 2010 Ulanda a saka 3% di nan gastunan total di salud na komportashon i prevenshon, na Korsou esaki ta menos ku 0,5% di gastunan total ku ta laba den 400 piku miyon florin.

E lista di kuminda i bebida ku mester keda skrutina pa ekspertonan nutritivo ta largu. Te ainda no tin niun garantia ku e galinja ku Hubert van Grieken ta ofrese na KFC ta salud. Pueblo no sa si e baba ros ku nan ta meskla den bo hamburger pa skapa gastu di produkshon na McD, BK a keda afo despues di un kampana di e chef Jaimie Oliver.

Tin muchu preguntanan ku no ta keda hasi pa proteha un ekonomia basa riba desepshon di un pueblo. Ta yega un momentu ku e industria di kuminda i bebida no por rek e kakinja di manipulashon mas. Opshon ta keda na nan i antisipa e kambio ku ta na kaminda of sigi kere ku vampirisa riba salud di un nashon lo klara nan bida barika yen.

Zjegere

Hobensita den su
abismo di agonia
ta keda eksploita
pa radio djamanta.
Media ta inkapas
pa fasilita programashon
pa empodera hoben ku
problemanan sosial.
Liderasgo asina’ki nunka
por bona den un klima
violente di opinion.
Pero henter un ekonomia
di fiesta, panja, kuminda,
koi bebe, buki, uniform
ta drei riba hoben
su lealtat sin limite.
Apesar di esei no ta ofrese
partisipashon igual den difushon radial.

Parlamentario tur kubri ku glitter i glamur, dia e dedika tempu na mehora enseñansa via televishon e ora ei e lo briya manera un strea selestial di berde.

Abogado Peppie a merkadea su mes komo anti-rasismo ulandes defendiendo den korte un panaderia klandestino ku ta venena pueblo ku pan bieu ku a hala liña, fortifikando e fundeshi di rasismo alimentario. Mas bruha no por.

Zjègèrè
Zjègèrè
Zjègèrè, Zjègèrè
Zjègèrè
Zjègèrè

Prome finalista Tumba 2014 Kantante : Elia Isenia Komposishon: Un Korsou mas hodidu ta posibel. Banda : MFK, Letra: Gerrit Francesco Corallo Schotte

Realidat di ribirishi religioso ta:
Fanatismo di fe ta kontrol sosial-politiko. Religion ta modifika bo kompertashon. Un jeki mental invisibel bisti pa komunidat.

FKP ta selebra 35 aña kas pa pueblo.
E lista di espera di 6000 persona niun ratu so a bira menos. Un punto pa luna, 400/500 punto pa un kas. Garantia figo ku hende lo hanja un kelder den santana prome ku un kas serka fundashon kas popular.

Zjègèrè
Zjègèrè
Zjègèrè, Zjègèrè
Zjègèrè
Zjègèrè

UTS a alaba CTEX, kumpra partisipashon, awo e ke bende sin ku e negoshi di warda data por a hasi un florin di ganashi ainda.

Ba bai studia tera frieu bin bek ku yen inisial dilanti bo nomber pero enbes di yuda hiba nos ne tera priminti ba bai traha pa esnan ku semper a bati nos ku malora.

Zjègèrè
Zjègèrè
Zjègèrè, Zjègèrè
Zjègèrè
Zjègèrè

Pastor Atventista no sa, no ke, no por bringa desempleo, pobresa ku poder di orashon, ta su negoshi di konstrukshon di kas ta buta pan riba mesa pa hende.

Lidernan sindikal a perde e poder di konvense trahadonan di Centrum, Albert Heijn, Esperamos, Mangusa pa drenta sindikato. Na scrap-yard Zeelandia e doño Luigi Mancinelli ta kere ku sklabitut lo keda aboli na 2063.

Zjègèrè
Zjègèrè
Zjègèrè, Zjègèrè
Zjègèrè
Zjègèrè

Mane alma malu, bankonan, seguronan i fondonan di penshun a grita yora ku gobiernu no mester a laga Ulanda finansia hospital nobo. Nan mes a promove Si ku a negosha e oportunidat aki, a skapa pueblo 70 miyon florin. Feu ki dia institutonan finansiero no tin e saber i kontaktonan pa por hala proyektonan ekonomiko for di eksterior, ta pueblo semper tin ku hala boso garoshi sinberguensa?

Zjègèrè
Zjègèrè
Zjègèrè, Zjègèrè
Zjègèrè
Zjègèrè

Mas Rufian, Mas Rebolishi

Bisti kompletu na blanku manera Obatala un homber ku dred shinishi
ta para den sombra bou di e palu di arte korta pa Mac Alberto na palasio di gobernado dilanti bahia di Santa Ana. Su garoti mane un wes’i lomba largu ta pinta alanan den e nubianan den laira pa splika e grupo di turista ku awe ta rekorda ku bos di un emansipado gigante a keda silensia sangrientemente. Un grunja wanta
a sali mishi ku un herida hundu,
e merikanonan ta sintie meskos ku
e guia.

“Pa bo genosidia poder pretu bo mester mata hopi kurpa mas ku spiritunan vibrante atrapa den nan.” Asina un dama den shimis beibi blou na Pir a interpreta e situashon di awoki. E ta kontempla su vishon:
“Tur dia mi ta pidie masha despensa, bai Marie Pompoen 2 di februari ora e lineahe Candomblista na Brazil ta duna ofrenda na Iemanja e forsa di laman grandi, awa salu, protektor
di tur beibi, maternidat, mama di
e universo. Ku un buket di flor blou
ma eksigi pe kuida e beibinan,
e generashon nobo nan lo sprengu magia kambia kos pa semper.”

Un makutu yena ku triki kon ta
tumba un orden di opreshon modernisa, mayanan pa konstrui un patria, provoka pensamentu i akshon pa adora kultura i historia di nos mes pa glorifika nos mes. Tesei tabata inherente na Wiels, tentabu ku pantomina politika folkloriko pa gara bo tinu pa despues devora bo ignoransia ku konosementu di Paolo Freire, lagabu bai spar kumpra buki di Armand Zunder riba asesora e finansas di reparashon na Surnam.

Kontroversia i polarisashon ta komponentenan di un dinamismo di kambio radikal, di rais kaminda lumbrishinan dera ta alimenta nan mes ku balornan, ensenansanan di nos avochinan ku no ta tin masha opshon pa no sakrifika bida.

Kosnan a bira moderno, awendia
danki di mundu ta pishi yewa. Pero Amilcar un suidadano mondu no ta drei ront: “Tin hende ku a disfrasa komo independentistas, anti-kolonial, otro ta modela i tin ku lot outo of mester organisa parada pa yega na
un nukleo elektoral. Pero mayoria a fastidia di nan kaba. Zumbi bo sa ken e ta na su pia.” Su bro ku flanel di e jump up ‘Korsou Karago’ ta rekonfirma: “Stinki, esei mi por bisa, mane ta rekluta hende pa guli bolita asina ta piska voto anto e malisia ta ku media ta kopera, anto awo ta temporada karnaval. Bon chens pa manipula pueblo mata mi ruman.”

Sra. Bastiaan e panadero na Montana ku te ainda ta bende e notorio pan ‘Dabudek’ ta kontentu ku Pueblo Soberano a supera e sla duru i a manda un delegashon bai CELAC na Cuba pa unifika e region i stipula un strategia pa kombati pobresa i danki na esei e siguiente reunion di CARICOM lo ta aki. “Ta di aploudi ku Konsenshi Sivil un bes pa siman ta drenta den kontakto ku otro media independiente Karibense pa informa nos riba desaroyonan sosio-politiko den region pa konstrui un mangasina
di konesementu i sinkronisa e vishon grandi.”

Universidat a revindika su mes ku estudionan Afro-Karibense, hendemuhe, kursonan pa analisa temanan di historia di identidat, rasa, genero, poder i resistensia. E lider di sindikato pa studiantenan di UoC jufrou Assata Angela ta remarka: “Nos ta trahando pa invoka un forsa di inteligensia renoba pa kontra-aresta neoliberalismo apliando ekonomianan diferente sali for di komunidat di abou bai ariba. E fakultat di lei a aserka profesornan di Merka pa duna les di Critical Race Theory ku lo boltu e strukturanan di poder den korte i hustisia, algu ku nos abogadonan i huristanan lokal nunka a tribi di realisa.”

Di tur skina hende ta mobilisa i organisa pa emansipa nan sektor;
Trahado ekstranhero i yu di Korsou den limpiesa di kas a forma un koperativa. Empleadonan di banko Maduro & Curiel a kuminsa un banko publiko, kaminda plaka di pueblo, fiansa, interes, invershon ta keda aproba pa lidernan di bario ku a hanja mandato popular di pueblo.
Un miyonario merikano a lesa e buki skibi pa Wiels inspira pa e kreado di luna di historia di hende pretu Carter G. Woodson: “Maledukashon di e elite pretu” i su outobiografia di Wichi i ta pensando pa bin inverti den un instituto di arte kambio sosial kaminda antes MCB tabata dilanti barkunan venezolano.

Tronkon ta bin kana den hofi Pali Seba, kurpa kortiku ku un prek di un lagrima yena ku 5-5 bou di wowo robes. Suave i sigur su palabranan ta sali: “Kapitalismo krioyo ta kanaya pero e futuro ta mas feros kune mi stimanan. Helmin semper a zona ku no ta miedu ta domina bida di un pueblo pero falta di kurashi. Danki dios Whiteman komo minister di Salud a kapta esaki tambe i tuma e desishon ferfelu di blokia tur import di produktonan vet i suku te ku quota di 40%.” -E por keda mata tambe un hende a bisa para bandi e karawara spanjo.- “Si esei si pero tin yen bandera blou strepi hel ku strea plama ront e isla aki. Ta di gare i sigi stret bai. E lucha nunka por kai e no tin ni pia pa trompeka, ta ala di kerubin e tin, karni por keda di sker pero e spiritu ta invinsibel.”

Telecuracao FM: Kon Ta Horta Plaka di Pueblo

Definishon di un estafa mediatiko ta na momentu ku plaka di pueblo di un kompania ku ta kai bou di gobiernu ta lanta loko riba un dia kumpra un emisora ku e meta pa ofrese un alternativa komersial den e zona kaotiko radial di 28 radio. Den un forma diktorial sin aviso e gerensia ku Paul de Geus na kabes a kwe fondonan deriva di e kompania publiko di telekomunikashon UTS i gasta esaki na kompra di radio TOP FM 93.3 sin niun outorisashon gobernamental, sin niun aprobashon moral popular of logika komersial permiti pa un kompania publiko di tin.

Asina 31 di yanuari 2011 un beibi bochornoso a mira lus di dia hanjando e nomber di TCFM (Telecuracao FM) despues di e boutismo di e pastornan di plaka i poder komunikativo.
E bendishon ku saserdote Simon a sprengu riba e deseo kumpli di Telecuracao di hopi dekada pa hanja un ruman radial tabata e komienso di un programashon ku segun gerensia lo mester ta kontenido informativo kortiku pero potente di un durashon
di mei ora. Esaki tur presenta den e studio teknologikamente mas avansa di Karibe segun direktor di UTS sr. De Geus.

Maluso di e tesoro publiko di un kompania di pueblo sin metanan figo pa kontrubui na eleva of fasilita kalidat di bida pa pueblo ta un akto kriminal. Lansamentu di un emisora ku plaka di pueblo mester ta serio. Niun sorto di programashon ku TCFM ta ofrese ta duna realse na respeta e publiko pagado di impuesto. Lanta skucha mainta tempran 6.30 mei ora lesamentu di titularnan di korant durante e programa ‘Moru Bon Dia’ di Telecuracao pa despues 7’or sigi un ora ku Glen Thomas ku su kontenido di notisia i entrevista. Su tras te ku 12’or ta muzik ku papiamentu.
Merdia notisia 1’or ta sigi ku muzik i animashon di lokutor te ku anochi pa notisia di 8’or dal aden un ratu sigi ku muzik, 5 dia pa siman, 2 anja largu e mesun programashon mediokre finansia ku sen di suidadanonan di Korsou.

Nunka por a tilda Telecuracao FM ku na kabes Hugo Lew Yen Tai i Renny Oehlers di dispidimentu di plaka si
ta tin un programashon ku ta nutri
un pueblo promoviendo balornan edukativo, informativo ku sierto
grado di entrenamentu na nivel.
Pero den e situashon aki debidamente por papia di tres estafadornan den difushon radial.

Riba nivel legislativo te ainda despues di dekadanan no ta eksisti un konsenshi parlamentario fuerte ku por kibra e miedu i instrui komesarionan di tur partido pa implementa un programashon na radio ku ta ofrese: Notisia lokal, regional di Karibe i
Latina Amerika, Merka. NL, Oropa, Afrika, Asia. Politika, Komersio, Arte, Teknologia, Edukashon, Siensia, Muzik, Kultura, Deporte, Salud.

Telecuracao tin un kantidat di programa kaminda por piki kompila
i pase na su radio ruman TCFM pa publiko por skucha. Tambe e ta duna respet na bo komunidat ku tin retonan ku bista pa nan tambe por disfruta di un programashon ku temanan mas diverso i interesante.

TCFM komo radio komersial tin niun derechi di eksisti ku 28 otro emisoranan komersial. Lokwal ta pasando awoki na 93.3 FM ta hortamentu di plaka di pueblo pa paga tokado di disku ku lokutornan
ku komentarista nan onderstant tur luna. Dia ta introdusi un programashon ku ta kuadra ku kriterianan internashonal pa un radio keda paga ku fondonan publiko e ora ei por hustifika e eksistensia di Telecuracao FM.
Pa awoki e tipo di radio fantasma aki ta yerba di kabes di Kristu mes e tin ku bai kome. Pabien.