Maluku Media

E fishi di produkshon i distribushon di notisia hustu balansa ta resultado di un buskeda pa berdatnan ku atrabes di gara, analisa i sefta informashon i datonan ta yega serka pueblo den mochinan informativo komprendibel pa nan konsumo teniendo nan mes na altura di e akontesemientunan den sosiedat.

Hopi bja esnan ku ta karga un grado haltu di konfiansia popular den mundu di periodismo i komunikashon sosial ta netamente e personanan ku ta defrouda e pueblo pa motibu di deskuido di nan prinsipionan i etika ku mester keda respeta sagradamente pa guia e klima di kreamentu di informashon i opinion publiko ku na final den un interkambio di diferente aktornan ku nan interes ta determina
e direkshon di bo pais.

Na momentu ku periodistanan ku dos, tres dekadanan di eksperiensia manera Mariano Heyden na emisora Z-86 i alabes hefe di redakshon di korant La Prensa huntu ku Angelica Paris na TeleCuracao no sa, no por pronunsia fam di e aktual kansiyer di nos bisiña Venezuela Sr. Elías Jaua e ta brongosa hinter e mundu di profeshonalnan di periodismo. E no por keda registra komo un fayo chikitu ku dos periodista prominente ta gaga, trompeka ku nan lenga bruhando e style di bisa Jaua na mitar portuges mitar spaño. Lokual ku a sosode dilanti miles di publiko komo testigu silensioso ta ku simplemente nan no a interesa di sigui desaroyonan politiko nunka na Venezuela, (paso si ba skucha of wak televishon lo bo mester a tende e fam Jaua varios bja pa pronunsie na drechi) te pa nan por informa nan publiko na un manera profeshonal responsabel. Un pais ku nos tin lasonan di siglonan kaba. E ta ekspone e arogansia di sierto periodistanan ku pueblo ta konfia riba pa nan pa trese informashon korekto via un proseso di koba, sefta, verifika i los laga bai mane e Tumba ta bisa. Opviamente analisando for di un optika di notisia regional pueblo no mester stens tur ora riba e tipo di hende ku ta praktika e ramo di periodismo aki.

Malagradesi na e publiko aki ‘fo e periodistanan zagzeilu no mester ta paso e skrutiño ni sankshon no ta kai riba nan, -ainda- mesun kos ta konta pa e evento notisioso ku a straña hopi hende kaminda na krusada di Biesheuvel den e sede di e moveshon politiko Hustisia Sosial Kòrsou (HSK) a organisa un debate riba prensa. Dos miembronan di e panel Yves Cooper reportero/periodista i Dwight Rudolphina huntu ku lider di HSK Jorge Sulbaran a boga pa un lei di media ku ta regula difushon di informashon sin sensura kaminda seperashon di komersio i notisia independisa ta reina i infuensia komersial ta prohibi. Otro reglanan ku nan ta envishona ta pa medianan sosial aneksa ku kriterianan pa garantisa suministrashon di notisia.
E lei aki mester ankra nan derechinan huridiko i salarial i e ta eksigi un minimo pa trahado di medionan di komunikashon mester kumpli kune pa por keda tuma den servisio. Hala bola esaki ku kursonan speshal i universitario pa subi nivel tur e moshonnan aki a keda hinka den un resolushon di 13 di mart 2014.

Un noble gesto pa trata di stret e kaos komersialisa ku nos ta yama prensa. Kaminda un festival di outo di bo banko amigu ta bira un sekshon di ‘notisia’ di 8’or na bo planta nashonal
mane nada no a pasa. Of e bos tras di e mikrofono ku a keda di hur pa komersiantenan ku e meta pa figa kurso di e fluho di kapital den mannan di un grupo chikitu.

E rol ku Dwight Rudolphina i Yves Cooper ta hunga ta remarkabel mirando ku Sr. Rudolphina na MAS99 nunka a bringa visibelmente pa deshasi di e influensia di plaka i poder di komersio den media. Manera e Tambu di interes ta bati asina e zwai di e emisora ta baila ku doño Nelson Farah of miho konosi komo baron di ofisinanan di number Joe Black na kabes. Sr. Cooper ku a labora den un kantidat di medionan di komunikashon a indika varios bja kon hipokrita prensa ta i ku nan (inkluindo e mes aden tambe) ta okashonado mayo di hinter e kaos orkestra na Korsou. E komo persona tabata responsabel pa atverti pueblo bispu di 10-10-10 ku segun informashonnan ku e tabata manega Gerrit Schotte tabata korupto i no a pasa screening i konsekuentemente a akshona feros den media pa e no bira e prome minister-presidente di pais Korsou.

Memoria den prensa e di kuater pilar di demokrasia tin ora ta masha kortiku pasobra e posibilidat di rekonsilia un Dwight Rudolphina, ku ta e bosero komersialisa di partido MFK lidera pa Schotte na radio MAS99 for di dia ku ela keda lanta, ku un resolushon pa halsa profeshonalidat di media sin sensura, balansa skuchando tur dos banda ta kasi imposibel. No opstante di tur e hechonan ku pa niun ku a analisa e industria di media na Korsou no ta un sekreto e ta un akto kontradiktorio di Yves Cooper ku ta ankra den un agenda komersial skondi pa kibra su supuestamente huramentu di ta un reportero/periodista ku ke trese e berdat dilanti wowo di pueblo sin intervenshon di kapital.

26 di oktober 2013 tabatatin un dia yena ku panelnan di diskushon riba e proyekto ‘Reforma’ lidera pa Schotte. Yves Cooper ku a kampaña kontra e lider di MFK kuestionando su integridat den pasado resien tabata presente komo moderado invita pa yuda politikamente manipula publiko i gana simpatia pa e mesun Schotte ku ela difama ront Korsou.

Un nivel nobo di sekuestro di opinion i notisia ta revelando su mes. E politika di moveshonnan di poder a kita un di nan maskaranan i anunsia un guera mediatiko chiki kontra prome-minister Asjes. Lilo Sulvaran hefe di redakshon di e korant hudisial/investigativo Vigilante i fundado di Curaco Media organization (CMO) a mustra su malkontentu pa ku e komishon ku e ta kabesa ku e mes ta yama e komishon di konflikto den reino. E antorcha di antagonismo a keda sende un par’i siman pasa pa alerta pueblo riba e leinan di konsenso ku ta stroba Korsou di drei liber ku outonomia engrandese. Despues simannan a bula i ela kontinua di kritika gabinete Asjes di ta sumiso i konformando nan mes ku e leinan di reino ku ta stroba gobernashon, ekonomia i a kousa desempleo grandi. Sin por a supstansia esaki, sin publika e raport ku ela produsi riba henter e panorama politiko pa publiko mes por saka nan konklushon sin mester kana tras di un furia di informashon meskla ku politikeria. Teniendo na kuenta ku Lilo Sulvaran a fungi komo bosero di su ruman Glen dia ela bula kura i forma gobiernu komo yabi prinsipal i a reitera varios bja ku ela skohe pa un trankilidat den e pais. Lilo a para tras di esei, defendiendo e eskoho di su ruman pa integra un vishon politiko neoliberal suavisa. Na e kongreso di Pueblo Soberano na desember 2012 Lilo Sulvaran a emfatisa ku Korsou tin ku dekolonisa.Kon e ke rima dekolonisashon i asumi un rol di dividi i reina manera e kolonisado no ta konosi ainda.

Prome minister Asjes den su funkshon komo miembro di partido Pueblo Soberano a retalia ku un serie di kritika. Telecuracao a keda fuertemente kuestiona pasobra segun Asjes e komunikado sosial Glen Thomas tin un kustumber di bati gobiernu. Un di e preguntanan ku a keda lanta ta ken a nombra Thomas sin ta tin un solisitut pe? Kon por ta posibel ku plaka di pueblo ta bai (via UTS) na Telecuracao pa strukturalmente deskredita gobiernu.
Asjes a indika ku:
“Paul de Geus ta stur Glen Thomas tur dia. Kenneth Gysbertha (komo presidente di konseho di komesarionan di UTS) a buta Thomas den Telecuracao sin solisitut. Un medida pa reforma ta na kaminda. Korda ma taha. Minister Balborda tin ku atende e asuntu. Un planta nashonal tur mainta ta habri ku orashon despues ta bati gobiernu.”

Ta nada nechi ora mi habri korant mira kurpa sin bida. [c] Reshine

Reportero Xavier Cratz a hala kita for di Vigilante pa motibu ku ela fada ku Lilo Sulvaran tabata preshone pa yena su korant ku potretnan di sanger.
Den su diskurso na sede Asjes a sigi tira lus riba e partinan destruktivo di prensa ku ta usa tristesta di un pueblo empobresa pa ganashi personal i pretende di ta un bringado di outonomia i un dekolonisado. Asjes a mustra su asko pa e manera bajo ku Vigilante ta sigi keda publika Helmin Wiels asesina un kurpa sin bida den tera na Marie Pompoen. “No saka potret di Wiels drumi plat abou. Blo bisa defuntu Wiels a bise kiko, tal i torno.” Referiendo na e hecho ku si bo ta tin un bon relashon ku e defuntu ta pakiko bo ta falta respet pe, su famia i sigidonan? Asjes a emfatisa: “tin hende a mata Wiels, tin hende ku a paga pa mata Wiels i tin hende ku ta traha plaka ku morto di Wiels.”

Despues di e deklarashonnan aki e fundado di CMO no por a reakshona alkaso riba e kontenido di e kritika funda di parti di Asjes. Presidente di CMO Stanley Ignacio no a inverti den un diskushon riba maluso di poder di parti di Sulvaran i a keda ketu.
Otro personanan manera un Yves Cooper ku ta profila su mes komo super vigilado di prensa honesto a sensura su pensamentu i a debilita e di kuarter pilar di demokrasia birando saltpeter.

Media mes ku CMO na kabes ku ta propaga huntu ku UNESCO pa hisa e nivel di periodismo mester tin e vishon di madures manera nan ta predika i yega na un palabrashon ku sierto donjo di korantnan pa no (sigi) publika potretnan dehumanisa di viktimanan i sigur no di un lider politiko komo Wiels ku a muri un morto kruel violento. Di mes esaki ta oumenta e nivel di rabia den un pueblo i konsekuensia logiko ta ku Asjes kitando su pechi di prome minister ta denunsia:
“Stop di buta sanger riba frontpage. Buta kos positivo.”

Pueblo Soberano bou di su kartera di ensenjansa por buska alternativanan den lei pa koregi, si esei lo ta e strategia soberano stipula pa libra pueblo for di un prensa sangriente ta di mira. Skuma no por boltu bira chukalati di su mes. Mei mei di predekashi i praktika tin un mundu gigantesko ku yama politika i si tin un kos ku aktornan politiko a frakasa den dje ta di kwe e toro di tirania ku yama prensa mediokre kapitalista na su kachu i domine pe bienestar di pueblo.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s