Testimonio di e Bida Bondadoso di Joceline Clemencia

(via Amigoe)
Joceline a bai sosegá, pero su herensha ta keda bibu bibu, JEANNE HENRIQUEZ djasabra, 04 juni 2011

ESAKI TA e herensha ku Joceline a laga atras pa nos siña di dje: Joceline ta tin un amor grandi pa su lenga materno i pa historia i kultura di su pais.
Joceline a defendé di forma konsekuente I konsistente su tera ku su aktonan, su diskushon I diálogonan. Joceline tabata un independentista di taye. Mester
indiká bon kla den nos historia polítiko ku e ta e promé persona ku a tuma e inisiativa pa purba agrupá tur esnan di oposishon pa forma un aliansa
polítiko fuerte pa bai elekshon pa kombatí e atake riba outonomia di Kòrsou. Lástima ta ku un mayoria
di e gruponan polítiko di oposishon ainda no tabata asina leu. Aliansa tabata segun Joceline e manera
pa lucha pa logra pa bira doño den nos mes kas.

Historia a prueba esaki.

Joceline tabata un muhé ku a sòru di apliká e filosofia di independensha polítiko den su bida diario.
Ki otro nòmber e por a duna su empresa ku no ta Instituto Kultural Independensha. Joceline a logra di kombiná kuido, edukashon i
formashon di su yunan i sosten na su famia ku su karera i su ambishon polítiko. E kombinashon di tareanan aki no a spant’é, no a strob’é ni a par’é di ehekutá proyektonan dediká na informashon i formashon di hende hóben i adulto.

Su opinion e tabata ekspresá na bos haltu i nunka a permití hende pa tapa su boka. No tabata import’é ki
konsekuensia esaki lo por tin p’é.
Joceline tabata un muhé ku a ataká seksismo di forma sistemátiko den e arena polítiko di Kòrsou. Pa Joceline hende muhé tin tur derechi di ekspresá nan opinion anke esaki no ta komun i koriente.

Joceline no tabata preokupá su mes ku loke hende por pensa ni bisa di dje. E tabata duna su opinion na un manera skèrpi si bo ke tende òf no.
Joceline tabata un feminista polítiko konvensí ku si nos ke krea un mundu hustu, e polítika di kuido mester keda reflehá den nos manera di pensa, nos
akto i nos aktitut.

Joceline tabata un muhé ku un dominio di idioma riba nivel di ekselensha. Di forma elokuente e tabata sa di ekspresá su pensamentu i konvikshonnan. Joceline tabata dominá e arte di imitashon masha
bon mes i tabata usa esaki pa trese humor i zjeitu den pensamentu ku e tabata ke trese dilanti. Joceline tabata usa su kreatividat den tur loke e
tabata hasi i tabata sa di entusiasmá otro pa suproyektonan. Pa Joceline un stadion tabata e úniko lugá apropiá pa di forma masal duna lès di ortografia di Papiamentu pa tur esnan interesá ku asistensha di un batayon di boluntario.

Joceline tabata tambe un Karibense i un internashonalista i ta p’esei e a solidarisa su mes ku lucha di pueblonan rònt mundu. Históriko tabata e akshon aki na Kòrsou bou di guia di Joceline pa demonstrá nos repudio kontra e invashon di Irak.

Joceline tabata enfatisá e importansia di konosementu di nos rais Afrikano, i di ta na altura di e historia di sivilisashonnan grandi ku Afrika a
konosé pero tambe di historia kontemporáneo di Afrika. E tabata enfatisá e importansia di sa di
analisá i di komprondé e sistemanan di opreshon i di manifestashonnan di intriga polítiko. Den e kuadro akí Joceline a bishitá entre otro Repúblika di Suráfrika i a papia ku Winnie Mandela, muhé luchadó. Joceline a lucha kontra di Afrofobia.

Mi ta kontentu ku nos por a hasi pas ku otro promé ku Joceline a bai. Mi ta agradesido na Joceline pa tur e momentunan dushi, pa tur e momentunan di formashon profundo i tambe pa e momentunan amargo di kual nos tur dos a siña nos lès.

Joceline Clemencia: PRESENTE!
JEANNE HENRIQUEZ
Kòrsou

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s