Reskatando Enseñansa Liber

Indiskutibel te realidatnan di rechaso ora un pueblo tin ku maniobra den un labirint gobernamental obedesido na e leinan universal di kapitalismo ku no ta rekonose dignidat humano pa e por karga un sprinchi di speransa pe progresa den su bida.

E sistema di kapitalismo kaminda produkshon di konesementu, plaka, produkto i propiedat ta den un man chiki so i ku no ta laga un pueblo prospera. E ta diseña pa mayoria di e nashon aki keda trata komo un produkto ku aspektonan humano ora ta kumbini i kontrubui finansieramente na e sistema.

Manera tabata e prekupashon di Mgr. Dr. Amado Romer semper ku e doktrina oropeo-merikano ta pa salbaguardia e ekonomia i finansas na prome, di dos, di tres i di kuarter luga. E politika neo-liberal ku ta dirigi riba traha plaka riba un style di egoismo no ta wak hende komo un ser humano pero mas bien komo un opheto ku por keda uza mane nan ta hana ta bon pa por optene un miho ganashi posibel.
Romer ta enfatisa ku pa domina e arte di trata hende komo hende i no komo katibu moderno den siglo 21 mester keda fiel na e leinan spiritual ku ta regi: “E naturalesa dje hende no ta kambia, pero e ta domina si. Ta einan e problemanan grandi ta sinta serka nos. Nos no ta hana sufisiente edukashon i pesei nos ta sukumbi pa e parti natural, material.”

Cft (College financieel toezicht) e supervishon hulandes ku miembronan di Korsou i St.Maarten for di 2013 a inkulka den koalishon di PS, PNP, PAIS, Sulvaran pa burduga saku di pueblo pa skapa gastunan riba nan presepuesto di gobiernu kousa pa kapitalismo. Pueblo Soberano adaptando su eksperimento di sosialismo krioyo den un kompromiso huntu ku kapitalismo krioyo-hulandes di e otro partidonan neoliberal a haña su mes obliga di ehekuta medidanan doloroso pa en kambio di fiansanan priviligia for di mesun Hulanda ku ta duna instrukshon pa korta, saka miyones for di e aparato di enseñansa.

Tiki espasio tin pa hasi patria i sali pa bo pueblo den su nesesidat diario ora bo a firma konsientemente pa sigi ordu di bo eks kolonisado for di Hulanda i ta den un koalishon neoliberal ku ta dikta ku negoshi tin ku domina riba tur asuntunan sosial. Naturalesa di politika krioyo ta pertenese ne leinan no-skibi: Gobiernunan tin ku sirbi e interesnan di e sektor priva i pa despues e suidadano por hana e benefesio kiriwichi supuestamente di dje.

Enseñansa semper a sufri sam-sam ku Korsou su klase trahado. Medidanan ku a keda revoka pa minister Irene Dick a laga Cft flota ku un baf neoliberal i kolonial den nan boka. Kisas esei tabata e intenshon di gabinete Asjes pa via di preshon popular laga elimina e pakete di ousteridat for di e pantaya edukashonal.

E arkitektonan di enseñansa a krea un kaos pa studiantenan i esaki te labirint kaminda nan tin ku kana den funkshona ku tur su fayonan i trampanan ku hopi ta kai aden. Un gobiernu ku signatura di un movimentu sosial independentista ku a inventa enseñansa liber pa empodera pueblo nunka por implementa medidanan pa stroba e klase trahado di studia, limitando su opshonnan edukashonal pa subi e trapi sosial. Mester perkura un struktura pa por sigi studia sin wak edat i tene kuenta ku otro burokrasia kolonial, sigur awoki ku un merkado laboral violento kaminda abuzu ta na ordu di dia i 65 ana a bira e edat pa risibi un onderstand penshona.
Mama soltero, famia di dos kabes ku yu, personanan ku a start lat den bida of a topa kontratempu, nan tur no por keda opstakulisa pa pensamentunan neoliberal ku ta kla pa kompara Korsou ku otro paisnan klaba ne krus di kapitalismo pa proba nan rason desespera.

Despues di e viktoria meresi pa e studiantenan un sabiduria nobo a sali na horizonte indikando ku awoki si mas ku nunka no por laga e studiantenan pafo di e proseso di konsulta ora ta regarda ensenansa.
Un sindikato estudiantil komo parter igual den negosashon ta un prioridat, un organisashon ku ta sali na defensa pa nan derechinan garantisa trankilidat pa nan estudio.
Ni esnan pro of kontra ku a sali den media no a soru tur e anañan pa instala un organismo di defensa pa studiantenan keda ankra den lei ku direktivanan di skol tin ku kumpli kune.

Prensa tin ku enbolbi alumnonan di skol paso e kultura di eksklui e hoben tei fuerte. Na radio, tv, korant su bos no tei struktura via un kolumna, pagina of programa. Ta trate komo beibi ku chupon. Media no ta puntra kiko e ta pensa riba tur sorto di topiko ku lo influensia su bida den futuro serkano. Kada bes di nobo e hoben tin ku karga e vra di desishonnan tuma sin su amen of sikiera tumando su puntonan di bista na kuenta.

E kultura aki di sensura institushonalisa a keda apoya tur ten pa un mayoria konsiente ku tur a grita protesta awoki. Na 2009 durante e referendum hopi (mayor, direktiva di skol, maestro, studiante) a vota pa e opshon ‘Si’ gana ku a habri e portanan dje kura di skol pa medidanan neoliberal, hasta hopi ku a vota pe opshon ‘NO’ tambe a prefera un sopi kapitalismo, podise mas krioyo ku un par’i rasinchi sosial pe sabor pero te mesun ingredientenan: “No duna pueblo e hermentnan pa podera di su mes destino manera e ke.”

Dosentenan, direktivanan di skol no a inventa e mentalidat neoliberal ku ta korta kap den presepuesto pero for di ananan 1994 ku e benida di PAR te ku 2010 huntu ku e sindikato SITEK mester repasa kronologikamente kon e konsenshi ku ta sostene e kapitalismo krioyo a krese i haña raisnan fuerte den tur skol te pe bira un monster. Hustu ta pa interoga Errol Cova, Bicho Justiana komo eks-lidernan di SITEK e sindikato pa maestronan di skol i responsabilisa nan liderasgo i midi sientifikamente ki sorto di struktura edukashonal na a laga tras, ki sorto di maestro nan a lidera i ki sorto di alumno nan a krea durante nan enkargo.

Kada bes ta viktimisa enseñansa pero dikon maestronan e delaster 25 aña no por harma un sistema edukashonal kaminda ta produsi studiantenan ku ta bira un rasa votado ku ta predika i biba segun sikiera un kapitalismo sosialisa?

Nos no ‘mag’ di kulpa of mane Levi Silvani ta kanta den ‘Wak Bo Mes’ ta dios so mag di husga, pero nos tambe mag, hasta nos mester pa diferensia e bagas for di intenshonnan bon. Si un dosente tin un ehersito di agentenan di kambio potensial den un klas e tin ku hasi milager pa 3/4 bira e forsa di un rumbo nobo den sosiedat.
E mester tin un kurikulo nobo na su disposishon pe por milagrá.
Mas esensial ta ku e maestro mes mester respira e transformashon sosial di pia te kabes.
Dosentenan ta konsiente ku nan por ta ‘sosial’ pero ketu bai votando, pensando, aktuando na fabor di un sistema kapitalista, dunando e struktura rosea di bida pe sigi prospera, atakando e mesun dosente i su studiantenan?

Dia ta tin protesta di parti di e studiantenan di fakultat sosial na University of Curacao e solidaridat di parti di Vsbo, Sbo, Havo-nan i otro mane OTC, IUOC tabata e gran ousente. Durante e rebelion di studiantenan di Frater Aurelio SBO e solidarismo di parti di tur e otro alumnonan di skol atrobe tabata bergonsosamente skars. Ni e parlamento di reino di hubentut ku a kaba di keda selekshona via kanalnan elitario den nan soño di selebra 200 aña reino hulandes no a habri nan boka pa desaproba e medidanan. E ta refleha parsialmente un miedu pero tambe e individualismo di e hubentut ku a keda krea dekadanan pasa pa politika di adultonan den gobiernu, iglesia i reforsa pa maestronan na skol .
Esaki tambe ta un herensia ku no por keda ninga.

“Na 30 di november 2013 minister president Asjes na nòmber di Gobièrnu di Kòrsou i e sindikato di maestronan di skol, SITEK su presidente Sr. Lio Plantijn a firma e protokol di koperashon pa krea i stimulá e asina yamá ‘siudadanía aktivo’ den enseñansa di Kòrsou. Bou di denominashon ‘siudadano aktivo’
mester komprondé: Un suidadano di Korsou ku ta disponé di e konsenshi históriko-sosial di tal forma
ku e ta realisá: 1) ku ta e, komo suidadano di Korsou, mes mester aktivá i akshoná pa drecha su
propio situashon i di su pais i 2) ku, komo yu di Korsou, e tin e deber pa emansipá mediante saber i akshon pa asina liberá su mes, su komunidat i su pais di tur trábanan (e.o. emoshonal, sikológiko, sosial) ku ta strob’é realisá
su potenshalnan i logra un bienestar máksimo”.

E desishon sabio aki mester ta un promesa di sanger pa kaba ku e miedu mortal pa konvense e merkadonan di kapital ku por ehempel kuminsa kontribui ku un license fee pa bankonan pa edifika komunidat.
Pa enkurasha BAB pa oumenta kobransa di impuesto serka kompanianan. E tin ku duna balornan di balentia pa gobiernu por yega Den Haag negosha pa fleksibilisa Cft, e supervishon finansiero ku ta sklabisa un gabinete pa basha kuchu den ensenansa i asuntunan sosial.

Den tur e tumultu di trabukunan neoliberal e futuro di studiantenan di klase trahado aki a keda sigura pa un grupo di hoben ku un bosero Carina Ruiter di Frater Aurelio SBO ku a sali briya ku un kurashi uniko. Tur hende a haña e don pa distingi manipulashon pero hopi biaha e situashon bieu ta mas dushi pa basila den dje enbes di bai un guera pa sakudi e luga.
Srta. Ruiter su mensahe di rebelion konsiente pa otro studiantenan tabata ku bo no mester enkarsela bo mes den miedu i ignoransia, bo mes tin ku lucha, sakrifika orguyo falsu i no sinta man krusa kere kambio ta bin kai for di shelu.

Mama Korsou a duna lus, e lumbrishi a keda korta, un studiante nobo a nanse.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s