Amado: Guerero Spiritual, Malchi Mental pa Humanisa Nos Eksistensia

Amado Romer_Kristu_di_Korsou

Un sosiedat programa pa ninga di duna honor na un guerero spiritual kristian ta un sosiedat dekai, degenera pa e raisnan strangulado di supremasia blanku ulandes. Ta e kolonialismo mental ta opera den kabes di hende pa no transmiti un diskurso, publiko un entrevista, un video di e uniko disipulo katoliko ku a sirbi un pueblo di klase trahado ku e konsenshi di Kristu radikal. Di 2010 pa 2015 masha poko bes, si no kasi nada a keda dedika na Amado Römer, ni di parti su mes gremio di lidernan religioso ni di sindikalismo. Un desgrasia bergonsoso ku ta revela un goya di berdat pa identifika ken ta esnan ku ta ku nos di berdat.

Sitanan for di Amado Römer su buki ‘Kòrsou den siglo XX’:

– Su sentido di libertat ta keda manifestá solamente den kada hende, ku su kas den su kurá. Spiritual, sosial i ekonómikamente e ta mes dependiente ku ántes. Su ideal ta keda manifestá den su manera di dirigí su mes na otro deskonosí: “shon”. Tur lo ke ta “shon”. [un dje karakteristikanan despues di 1863 abolishon di sklabitut NL]

– Den un situashon asina ta kantika i ronkamentu di kueru den skondí di kunuku ta tene yu di Kòrsou kontentu òf nan ta kohe nan tumba te lat anochi. Ku poko nan ta satisfecho i nan ta parse kontentu tur ora, maske disenteria i pobresa ta kome nan paden.

– Apénas nos ta topa banda di Wacao hende di pueblo koló skur pero ku fakshonnan netamente indiano. Di unda eseinan ta? Meskla kisas di katibunan ku algun indjan ku a keda tóg despues ku a saka tur sobrá manda kosta di Venezuela i otro partí di Karibe?

– Mester nota ku tera no ta produsí, tampoko pa e “shonnan”. Tóg nan ta mantené apariensia ku nan kas grandi i tereno grandi, nan kunuku seku i nan pasishon di “shon” ku kabai i kitoki. Pero nan mes ta pasa nesesidat.

– Na “Punda”, esta den stat, tin poko di e grupo(kolonisado) akí ta biba tambe. Den nan bo ta haña algun komersiante i empleado di gobierno. Nan ta sigui e profeshon di nan antepasado i ta yuda goberná pueblo den Koloniale Raad.

– Nan relashon ku pueblo simpel, desendiente di katibu, ta di un distanshamentu hopi grandi. Maske nan tambe tin desendiente ku e pueblo, hopi biá yu di nan kriá di kas, nan no ta duna e yunan akí nómber di famia ma ta kambia e nómber òf ta les’é di patras bai dilanti manera: Torbed na lugá di Debrot, Sille òf Silie na lugá di Ellis, Wolfschoon i Borgschot na lugá di Schonewolf òf Schotborgh, algun bia ta kambia algu den e nómber p.e. EIsevijf na lugá di EIsevier ets. E distanshamentu akí ta keda i ta bai resultá hasta den añanan mas lat den un avershon ku ta yega na eksploshon.

– Enseñansa ta otro kos ku ta bin yuda pa eliminá poko poko algu di e diskriminashon pa motibu di koló. Ta keda remarkabel ku yu di pueblo simpel (katóliko) ta bai skol katóliko i muchanan desendiente di e kolonisador hulandes (protestant) i hudiu ta bai skol di gobièrnu. Tene kuenta ku no ta ekskIusivamente e gruponan akí ta bai skol katóliko òf skol di gobièrnu, pero ta e tendensha nos ta anotá akí. Tin tambe e famoso Emmaschool pa hende di pueblo ku ta skol di gobièrnu, ku basta hopi mucha pero no di kompará ku e skolnan di mishon. Tur skol sinembargo tin e mes programa i mes eksigensha pa eksamen final.

– E yu di pueblo ku tin un tiki chèns i ta gana un poko mas ta manda su yu skol katóliko di “plaka” i e instrukshon ta algu mas avansá ku skol “di pomada”. Lástima ku mester bisa ku skolnan di kunuku si ta keda poko atras i ta skol di pomada so tin i e chèns den bida pa e hendenan akí ta hopi redusí generalmente. Nos kier mustra aki riba ekspreshon di un shofùr di bus, tesorero di su Credit Union ku a bisa: “ami ta skol di kunuku mi a bai i ni katisashi mi no por a siña drechi pasobra mester bai pikí palu tur dia pa kushiná, awor atami tesorero di un Credit Union”. Esaki ta demostrá e loke nos kier indiká, problema pa mobilidat sosial den pueblo pa .falta di skol adekuá. Asina e distansha den pueblo tambe ta keda asentuá

– E kasitanan ku nan ta lanta i ku algun di nan nos por mira te awe, ta kas di tabla, kubrí ku bleki di kerosin, dak di zink. Ta hende ku ta traha mas ku ocho ora pa dia den petroli pretu i ta yega kas bon kansá i tur shushi. Den nan kasita kayente manera fòrnu no ta kos di wanta i asina nan ta buska nan dibertishon pafo di kas. Ni kargadó di karbón na Motètè no tabata pasa manera e trahador di Isla. E mentalidat ta kambia. No ta simplemente e hòmber rudo, pero awor e bida mes ta bira diferente, sin ilushon, ku un par di sènwèl, pero sin nada elevá den dje kasi. E no ta su mes mas, ma parti di un mashin òf un sistema.

– Asina por tin dos ruman, un ku a keda biba den kunuku, ku su kas, su dos kabritu i su pida tera wardando awaseru kai pa e por planta su mainshi i su bonchi ku pinda. Sin lus ni awa di pipa manera su ruman na Punda, pero e ta biba manera hende, a pesar di tur su fayonan e konosé rèspèt i e sa ku tin un Dios. E otro ruman, a pèrdè su mes, bibá na Punda den un kas ku apénas por karga e nòmber ei, sin mayor speransa e ta kasi mas un kos ku un hende. E ta bira hasta rebelde mirando duresa di bida. Esaki ta e “proletario” ku nos kier men i e ta un figura nobo den nos pueblo.

Advertisements

Kai Zengene: Un Espasio di Libertat Pretu

Wiels portada buki

Kai Zengene ta pata pata di hende, e kaos di komberti un nashon aflihi pa podernan opresivo ta resona den kurasonnan dje publiko presente ku ta kana ront mane un Ban Topa den e magasina di kambio radikal. Un kaos organisa ku ta buta emfasis riba kuestiona, kritika i kambia e strukturanan eksistente ku ta tene pueblo komo presunan sosial na Korsou. Na entrada dje porta un dama i un kabayero ta saluda tur hende ku ta drenta ku un orashon tradishonal Afro-Kurasoleno yena ku kalor i amabilidat, un ritual ku ta pega i ta fortalese e relashon entre e bishitante dje sentro di empoderamentu pretu. Esaki ta e strategianan di un mundu nobo, pasonan pa progreso spiritual kamufla den taktikanan di kompashon.

Aja ta drei wak ront, midi e situashon di ariba te abou i ku kuidou ta komenta kon e ta sinti su mes den e komunidat kaminda espasionan nobo ta keda krea pa libera hende pretu for di un sistema di dominashon blanku ku ta manifesta su mes den ekonomia, finansas, salubridat, media, ensenansa, politika di gobiernu i arte: “Si nos tabata stima nos prohimo di berdat nunka lo mester ta tin leinan, gobiernunan, institutonan di poder ku ta rigi nos bida na tur momentu, ta pa falta di nos desbalanse spiritual ku nos ta keda goberna pa hende ku tambe ta choria den un laman di fayonan spiritual.”

Papia sanktuario i hende lo grita Zengene ku ta sinonimo na un teritorio ku ta ofrese outo-determinashon, liberashon pretu alina ku e eksperiensia di Helmin Wiels. Su asesinato politiko na 2013 a lanta hopi hende for di un sono letargiko. “Ta 5 di mei mi wowo a kuminsa spierta i ma mira e retnan di poder ku pa dekadanan a blendu un pueblo ku prenchi i prenda chiki mientras nan tabata chika saku di komunidat limpi limpi.”
E penshonado na palabra ta lamenta e morto di e lider di movementu politiko Pueblo Soberano i den mesun rosea e ta bisa ku bos duru ku algu similar a pasa na Guyana 10 di mart kaminda un aktivista, un shofur di bus, eks militar, deportista tabata protesta kontra korupshon i praktikanan ante klase trahado i rasa pretu den gobiernu a keda asesina. “E pueblo di Guyana a reakshona meskos ku aki na Korsou, un shok chiki pero bida a sigi normal manera nada no a pasa, niun protesta grandi, niun lamento masal di un bida pretu perdi manera esun di Courtney Crum-Ewing.”

Kisas esei ta e destino ku bida pretu den Karibe tin ku pasa aden. Ta yega un temporada ku bidanan blanku, e poder di elite blanku lo keda mata, nan sanger tambe lo kuri den kayanan di Korsou i Karibe. Konfeshonnan ku ta sali na kla durante e klasenan di edukashon politiko di djaluna anochi na Kai Zengene ta konfirma e sospecho ku ta keda opina. Un hoben di Feffik ta komenta kon ela kapta e similaridat entre tumbando e statua di Peter Stuyvesant i studiantenan na e universidat di Cape Town ku ta eksigi transformashon edukashonal, remplasa ensenansa sur-afrikano blanku pa un fundeshi di historial pretu tur hinka den e malchi di kita e statua di opresor kolonial Rhodes ku a abuza di e pueblo originario di Sur Afrika. “Nan a subi Wiels su lomba dia ela grita ku Stuyvesant tin ku donder op, a tilde di politiko di simbolismo pero nan no ta tin e komprenshon vishonario pretu ku kada proseso di kambio struktural ta inisia ku un ritual un simbolo pa habri e kaminda pa kambio struktural, Stuyvesant tabata para pa e adorashon di e supremasia blanku ulandes ku a kria rais den sesunan di hende pretu na Korsou. Lagando e statua disparse tabata un akto seremonial pa desmantela e sistema di kolonialidat den mente di hende, nos ta na kaminda pa drenta den un era nobo pero tin ku traha duru riba dje si, dedika, displina nos mes pa sigura un futuro kaminda bida pretu ta keda balora.”

Varios kursonan interesante ku klasnan yena tur siman ta riba historia di Karibe i Sur Amerika i Merka den e kontesto di pueblonan Afro-desendiente, leinan laboral i praktika di lei en general. Un dje representante di Zengene ta agregra ku e kurso nobo di poder di finansas ta keda risibi ku hopi interes speshalmente pa e echo ku mas i mas hende ke domina e konosementu di e sistema finansiero kapitalista ku ta manipula mente di hende di kere ku politika den Forti ta manda den e pais aki enbes di wak e strukturanan di poder finansiero-ekonomiko. E kurso kotisa ta eduka kon henter e sistema di bankonan ta funkshona, kon plaka ta keda krea for di nada i kon sin konsulta di pueblo ta krea manego bankario ku no ta na sirbishi di pueblo. Un kursista ta informa ku “nos ta bai krea nos mes institutonan finansiero, e era di keda sklabisa pa bankonan a pasa, na imperio ta kai un bes aki, si morto di Wiels mester a indusi esaki asi sea pero alomenos nos ta bai boga pa outo-determinashon finansiero.”

Wiels i religion ta un kuadro di relashon di amor i odio. Semper ela kuestiona liderasgo di iglesia katoliko, kulpando nan di bandona e Rerum Novarum ku ta un dokumento di siglo 20 ku ta insisti pa perkura humanidat pa e hende di klase abou. Ekplotashon di labor, anti-pretu rasismo, abuzu finansiero-ekonomiko, degenerashon den media tur ta un resultado di desekilibrio spiritual ku no a kai for di shelu den un anochi.
Ora lidernan religioso ta komersialisa nan fe bo krea katibunan kristian i versikulonan di beibel no ta salba hende si no tin akshon divino su tras. Hesus a revolushona e wega di libera hende, esaki mester keda refleha den e karakter di kada pastor, si nan no sa kon ta hasie nan por tuma un ehempel di Wiels ku a purba di resusita balornan di e Nazareno pretu.

Kai Zengene ta habri tur dia di siman for di mainta 6.30 te ku anochi 11 or. Na mei e lo habri su fasilidat di media pa transmiti na televishon e diferente kursonan, debatenan, foronan, dokumentario i tur otro sorto di informashon transformativo.
– Djadumingu – Grupo di estudio abolishon di prison i detenshon hubenil
– Djaluna – kurso soberania di kuminda i salud
– Djamars – aktivismo i arte tayer
– Djarason – independensia finansiero ekonomiko
– Djaweps – historia di Karibe, Latino Amerika i Merka
– Djabierne – tradishonnan afro-spiritual
– Djasabra – kurso di media radikal sosial