Eksodo For Di Un Mundu Mediatiko di Tronchi i Termo: Dia Di Prensa 2015

DDP

“E ta bira hopi difisil pa un kahera no para riba su pia, ta ront mundu tur kaminda ku bo bai e kos t’asina. E no ta bon tampoko ku bo sinta ocho ora largu riba un stuhl.” Djaweps atardi alrededor di seis or e dono di emisora Krioyo ta purba di kumpra un guera pa e orden di komersio na Korsou splikando sin e konosementu di e leinan laboral ku un kahera den un pakus, supermerkado of toko no mester reklama ku e tin ku para riba su pia mas ku kuater ora largu.

Djadumingu 12’or a bati, radio Hoyer ku su 60 ana eksperiensia ta kuminsa su programa popular di notisia i opinion. E moderado den un entrevista riba komishon di mayor i sierto desaroyonan indesea a keda enfrenta ku un deklarashon ku un magnate di offshore tabata negosha pa risibi e negoshi di e asina yama ‘inkoopcentrale’ di bukinan di skol. E siguiente dianan un silensio ta reina den prensa.

Aspirashonnan pa prome di september ta un dia di prensa kaminda ta para ketu na su rol mayo di influensiado informativo i evalua si esaki ta na agrado di su publiko no a bira un realidat kustumbra ainda. Pa di dos ana konsekutivo ta uza e festival di jazz pa skapa for di e responsabilidat doloroso di analisa, dialoga huntu ku pueblo si ta kumpli ku e kriterianan pa krea un tera fertil den produkshonan diaro di media pa konstrui un Korsou ku suidadanonan kritiko.

Mundu di media den union no ta balora e outo-kritika anual ku nan mester tin riba e fishi ku ta determina basikamente te na sierto grado e desaroyo sosio-politiko di bida di hende. Tur propetarionan den media ta hasi manera nan ke, basta e manego di produsi notisia ta kuadra ku e kalkulashon finansiero ku na final di dia ta e motibu prinsipal pakiko nan a kuminsa e aventura di ta un dono di korant, televishon of radio. E meta nunka tabata pa eduka e pueblo ku notisia pa nan bira indepediente, pa nan transforma den un forsa ekonomiko-finansiero-politiko ku no mester mas di e hirarkia di poder ku semper ta manipula nan sobrebibensia den sosiedat.

“Nos no ta komenta riba kiko otro medionan di komunikashon ta hasi of laga di hasi. Esei no ta nos asuntu, kada media ta responsabel pa su aktonan.” – Direktor di Z-86

Ku plaser semper den media ta referi i kompara ku desaroyonan global pa defende un situashon sosio-politiko pero e nivel di domferstan ta ekspone su mes ora e dia nashonal ta yega pa analisa na unda Korsou ta para ku su medionan di komunikashon. Hasta si ta observa i diskuti no ta saka konklushon, no ta regula disordu, no ta buta restrikshon riba e kaos komersial ku pa dekadanan a infiltra prensa.

5 VENEZOLANO A HORTA KLENKU
BRUHERIA DEN PRENSAtitularnan riba portada di korantnan di mainta

Tayernan balioso di media organisa pa UNESCO kaminda e gremio di miembronan di prensa ulandes i Papiamentu ku afinidat ulandes so a partisipa no por a risibi sosten di e otro grupo organisa ku ta CMO (Curacao Media Organization) i sobra miembronan den media ku no tin un afiliashon kla. Invitando Jeroen Pauw ku hopi fanfara ta bunita pa keda dokumenta na Archivo Nashonal pero e dialogo ku pueblo mes i e periodistanan, trahado di medionan ku ta konekta ku e klase trahado no tabata riba nan agenda di prioridat ku hustamente ta esenshal pa hisa e estado degenera di prensa i krea sosten popular pa tene tur miembro responsabel ku awendia no a yega di pasa ainda.

Degenerashon no ta konta solamente pa media Papiamentu, esaki hopi bja ta e persepshon ku medionan ulandes i esnan krioyo ku ta sinti nan mes miho ke laga kere. Ta e media elitario aki ku ta e eskudo pa e kompanian i institutonan finansiero ku kasi nunka ta kai bou di un investigashon periodistiko. Esaki tambe ta un forma di degenrashon ora prensa ta sera wowo pa indikashonnan di korupshon ekonomiko i finansiero ku ta pertenese na nan sirkulo sosial. Prueba di esaki ta Alex Rosaria komo lider politiko mester a skibi un artikulo riba e desaroyo prekupante di e sektor di tereno i bendementu di kas na Korsou ku ta keda domina pa makamba. Prensa ulandes nunka no ta tin e independensia ni e libertat pa publika un investigashon den historia di media na Korsou.

Un dono di un korant hudisial investigativo kontra tur etika i prinsipio ta bira komesario na un fundashon di gobiernu ku ta kuida miones di florin. Prensa kolektivo ta drei kara.

Ekspertonan di ekonomia ta duna nan vishon ekonomiko den sala di universidat. E raport di ECLAC ta taha institutonan finansiero pa stop e manego habuzado i habri akseso finansiero pa e klase abou i komersio chiki i mediano.  Manera kustumbra prensa no ta na altura di e raport, no ta uza logika sosial-finansiero pa pusha bankonan den un direkshon di demokratisa i fleksibilisa e plakanan dje pueblo. E diosnan chiki no ta koi mishi kune.

Fluho struktural di sanger nobo den media no ta eksisti. No tin un skol, no ta duna kurso sertifika pa drenta den e espasio di e di kwater poder. E kustumber tabata pa hopi tempu kaba ku esnan studia ku of of sin diploma no por a kombati e forsa di kapitalismo krioyo i konvense e pueblo via nan trabou den prensa pa un otro forma di finansia medionan di komunikashon. Nan resistensia abou i falta di seguridat finansiero, laboral a soru ku nan a kai pa kana drenta den e hanchi komersial i hopi di nan a bai traha pa empresanan priva of gobiernu. Konsekuentemente esaki a yuda pa debilita e posishon dje periodista. A konfundi nan rol komo suminstrado di berdat komo un eskoho enbes di un yamada noble kaminda no tin asuntu di bula waya I bandona e defensa di pueblo.(29-8-1992 Amigoe)  Paul Commencia eks periodista ta ilustra e esaki: “Konsientemente mi no a skohe
eksklusivamente pa (studia periodismo). Mi tabata sa ku mi lo a kambia di rumbo pasobra mi tabata ke hopi mas ku sinta yama politikonan i sindikalistanan henter mi bida.” T’e filosofia zagzeilu ei ta fortifika un realidat degenera ku no por mira ni komprende e vishon ku den e fishi di periodismo ta asuntu di kore trai sierto gremionan den komunidat so, semper ekskluiendo esnan mas poderoso of ku a sera un pakto ku e podernan finansiero ku kasi nunka ta keda skrutina strukturalmente. Desertashon mediatiko, bora e fiesta di komersio a kousa un dekadensia di prensa enbes di konstrui un institushon fuerte independiente ku por a genera investigashon, responsabilisashon sosial di tur e partidonan di interes ku ta influensia i manega bida di hende.

Universidat di Korsou no ta kuminsa un kurso di pa trahadonan den media pa motibu ku e klas no ta yega e kantidat desea pa kubri e gastonan. Kapitalismo krioyo ta hiba vra pe futuro generashon. 

Na un emisora un ruman ku traha na redakshon di notisia ta entrevista su ruman ku ta presidente di direktiva di un moveshon politiko ku tin e asignatura dje gobernashon.

Bankeronan, direktor di kompanianan di seguro, eks gobernado, presidente di korte, fiskal ulandes, asosashon di sektor priva ta duna entrevista solamente na un emisora na Korsou.  Nestornan di e sistema di kapitalismo krioyo ku a simplifika devalua bida di hende den frasenan manera gastu di hasi negoshi i fleksibilisa labor ku ta kita poder di nan demokrasia ekonomiko finansiero.

Lagando atras e prensa di tronchi i termo ta un tarea sobrenatural. 10-10-10 a trese un oportunidat nobo pa hasi kos diferente ku ta benefisia pueblo. E poder ku ta manega kon hende ta pensa, papia i aktua segun e informashon ku e ta asepta komo un berdat sea sunu of mitar bisti mester restruktura un kredibilidat nobo.

Un minister-president ta entrega su retiro na palasio di gobernado djaluna, bahando trapi periodistanan ta risibi e kontesta ku e ta bai aklara su desishon djarason. E trupa di media ta lage trankil drenta su outo, sin kuestiona, kritika e arogansia di poder.

E bosero dje partido ku a kita sosten for di e prome-minister ta deklara ku djasabra na su sede e lo splika pakiko e retiro a kai. Prensa ta gulie sin resistensia.

Chacho de Castro den felis memoria a remarka den pasado ku e unidat di
periodistanan mester bira “un kolegio ehekutivo (bestuurscollege) di
periodismo, un kacho di vigilansia. Algu mas ku un asuntu sosial, si no
miho bo lanta un Jaycees o un Lions club.” Un prensa ku ta koriendo kada bes pa e responsabilidat di organisa su mes, wak den spil i responsabilisa su dononan, finansiadonan i miembronan ta sembrando mas simianan marga ku nunk’i bo bida por trese un kosecha di konfiansa den e pueblo. E pregunta ta keda: Pa ken bosnan ta traha, un kolektivo di kapitalistanan of pa un populashon ku ta fada di notisianan komersialisa pusha den nan korokoro ku no ta edifika e YDK nobo?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s