Konfiansa Siegu: Media Mesianiko den Elekshon

mediatiko-2

Djadumingu 12 di februari 2 miembro di PS ta retira nan sosten for di gabinete Koeiman. No tin un rueda di prensa pa klarifika e situashon politiko di parti di Pueblo Soberano. Edukashon politiko ku antes tabata un di nan palanka ideologiko mas balora no ta konta mas. Mundu di media tardando pa yama i responsabilisa e parlamentarionan Mac Cijntje i Sherwin Leanora ku a saka e steker, fasilitando e politikonan enbolbi pa prepara nan kuenta mas miho posibel pa konkel ku e berdat tras di e berdat ku nan no ke pa pueblo haña sa. Un fin abrupto a yega depues di un racha di 4 aña akusando MFK di tin manchanan di sanger na nan man en konekshon ku e asesinato di nan lider Helmin Wiels dirpiente a keda labà den un rat’i ora. Introdusiendo ofisialmente un politika di kadaver kaminda ta uza bo lider asesina pa gana poder politiko sin biba su prinsipionan di liberashon pretu.

E kortina di huma ta diki, un novela eterno di intriga, redu, ribirishi politiko pa tapa e mannan invisibel ku plaka monstroso halando e kadenanan di bui ne bokanan den prensa i speshal den prensa radial ku ta alkansa miles di e votadonan tur ora na tur momentu. Ku tiki esfuerso un emisora ku un ekipo mediokre bou di nivel ku preparashon periodistiko hodidu ta drenta den kas, boka di trabou, den bus unda ko bo por ta pa influensia e manera ku bo ta nabega bo bida personal. Kada emisora ku nan adorashon komersial i nan konekshon politiko, kada un di nan ku sierto grado di kolonialismo radial, praktikando e fishi di produsi notisia for di un manego pa mantene un kontrol kon hende mester pensa i hasi pa sirbi e interesnan ekonomiko, finansiero i politiko di e pais.

Dos dia prome ku e gobiernu a rementa Cali Manuel reportero veterano di Direct den un konfrontashon ku Paul de Geus a kalifika e direktor di UTS komo un abuzado di poder. Normalmente mirando nos historia di tin miedu di bisa e berdat i e temor despues pa retaliashon lo mester tabata algu grandi di selebra pero pueblo den silensio a saka un gritu di alegria so pero niun kondenashon nashonal di parti di prensa a sali. Esaki ta e klima di periodismo. Deshonestidat ta sigui reina den medionan di komunikashon i e speransa ku tin kambio na kaminda ta hopi chiki den e tempu benidero ku lo finalisa den e elekshon nobo den e proksimo lunanan.

Demokrasia radial ta chikitous ainda mirando e sensura di e ‘diosnan chiki’ papiando tras di nan mikrofono. Boseronan di oposishon i koalishon tur ta hungando mesun wega di komenta, kritika e popchinan politiko pero sporadikamente nan ta uza nan poder mediatiko pa desmaskara e strukturanan di plaka brutu ku ta move e marionet politiko. Te ainda ta hopi skuma anti-kolonial anti-makamba sin por mobilisa un forsa popular ku por enfrenta e dominio di elite na Korsou i su ardu mayo na Den Haag. Pa e podernan bionario di invershonistanan, komersiantenan i otro tribunan ku agendanan skondi semper tin skapatorio tanten prensa ta proteha nan.

Nos tin 8 korant, 4, 5 tv, 8 radio grandi ku departamentu di notisia ku no tabata interesa pa informa pueblo via un debate-foro den e delaster elekshon di 5 oktober 2016. Ku hopi fanfara UNESCO i Renske Pin a skibi un raport mancha ku e enk di privilegio blancha riba e esfera di media na Korsou sin keda konsistente i organisa o sikiera purba di motiva tur hungado den prensa pa madura i harma debatenan pa yuda klara mas miho posibel e pueblo pa su eskoho politiko. Tabata Cifa e organisashon di sektor di servisionan finansiero ku a harma e uniko debate na televishon flankea pa studiantenan di universidat di Korsou i e klup di ekonomistanan. E dividendo di akademikonan, profeshonalnan i trahadonan den media ta keda pober si nan no bin bei i kuminsa bora e pos di finansas pa drecha e estado deplorabel di prensa, un raport, un debate simplemente no ta sufisiente i e ta refleha e flohera intelektual i komplisidat den tene un pueblo den ignoransia pa nan keda sinta riba nan mes stuhlnan chiki di poder i posishon sosial.

Pa e futuro serkano ya na Direct nan a kuminsa mansa e oreanan di nan publiko pa pordona nan aktonan di demonisashon di e lider di MFK  kondena pa korupshon antisipando un gabinete nobo bou di su liderato. Plaka bieu, plaka nobo, plaka pober tur ta skeiru e lunanan aki riba tur frekuensia, hinkamentu di palu bou kandela kolonial, hunagamentu di rol di badjon kontra ulanda den studio sin organisa niun krou.

Un tutu di desepshon dekolonial lo bai eksplota mas ainda den kara dje parti di e pueblo di Korsou ku ta angela (un sierto grado di) liberashon politiko i sosio-ekonomiko-finansiero (pretu) na momentu ku e grupo di 12 (MFK, PS, MP, KTDNT, Braam, Dennawi) ku tin un mayoria pa forma un gabinete interino i postpone elekshonnan pa dekonstrui e strukturanan kolonial di paden i djafo ku tin e pais aki strangula. E desishon pa bai prepara un  guera di dekolonisashon tin su sakrifisionan finansiero i historikamente e gritochinan anti-kolonial nunka a proba nan mes di ta tene nan sakrifisio 100 pa swai e spada dekolonial kontra forsanan elitario riba suela i e politika di apartheid ulandes ora e momentu di oro yega un bes mas riba un skalchi di oro.

 

Advertisements

3 thoughts on “Konfiansa Siegu: Media Mesianiko den Elekshon

  1. BuliBuli says:

    Hopi bon kon bo por deskribi mi sintimentu nan pa ku e situashon di Korsou ku palabra!

    Mi tabata sa ku media na Korsou ta paga, pero e siman aki algu a pasa i ma hanja sa sigur ku esaki ta un berdat. Dos biaha (na diferente okashon) mi a manda Juni Jozef e siman aki un SMS kaminda mi ta bise ku mi ta sumamente prekupa pa ku e violensia bou di nos hobenan i tambe e kargamentu di arma, si mi no ta hera 10 hoben entre 16 i 26 anja a wordu detene ku arma i tabata tin asta un matamentu pa koi pendew. Den e mensahe ma bise ku nos tinku stop di drumi riba problema anto despues nos ke yora i kritika.

    Juni Jozef no a ninga di lesa mi SMS (na TUR dos okashon), el a prefera di kritika kabinete Koeiman, Gobernado,aktual oposishon et cetera et cetera. E konjo naki ta hincha e pueblo pornada sin ta kla pa manifesta of organisa niun konjo. Anja pasa mi tabata tin un diskushon ku Juni, mi a bise na radio kiko ela logra pa Korsou dor di tur dia borota i laga e oyente nan tambe borota na radio, ela rabia i korta e linja di telefon.

    Mi tabata un votado di PS. Ta un dolo profundo ku elekshon ku a pasa mi a sostene Cordoba i e partido. Awor aki mi ta realisando ku mi ta un sigido di e filosofia di Helmin, pero Helmin no tei mas. E supuesto “aktitud revolushonario” ku tur hende a kopia a kuminsa kai, i keremi ku unbeki e no ta ni bai eksisti mas.

    Mi stima Korsou hopi, pero tiki tiki mi ta perdiendo amor pa e struktura i hopi hende ku ta biba riba e isla aki. Porta mi ta un tiki emoshonal, pero bai den e bario pober nan di Korsou i bo ta mira tur e problema nan, i asina nos ke sigi yama nos mes Dushi Yu nan di Korsou.

  2. Jermain Ostiana says:

    Korekto, atardi na MAS99 Jozef tin e ordu pa desvia, i sigui ku mesun taktika di dividi i reina i sensura kada forma di kritika ku por trese e pueblo riba un nivel mas haltu kaminda nan lo bai organisa nan mes. Hopi hende a perde e strea nort despues di asesinato di Wiels pero mester yega un union si di esnan ku a sobra pa trese kambionan struktural.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s