Aspirashon di un Hoben Komunikado Sosial vs Hororo. Un Lamento pa Edukashon i Periodismo Karibense Emansipatorio

“Tur mucha ta sabi.” ~ Joceline Clemencia

Un orashon chiki pa Kahlil Garubaldi. Esnan ku sa historia lo mester sa ku tabata Wiels a popularisa di yama e eks politiko Omayra Leeflang Horohoro. E venenu ku ela konsientemente disidi di skupi riba un hoben ku ta gatiando komo komunikado sosial ta algu kondenabel. Un ‘kristian’ ku un plataforma grandi manera facebook purbando di demonisa un nobato ta un akto diaboliko.

Relevante mester ta e pregunta ku Khalili a trata di formula durante un rueda di prensa: “Kwa rasa, religion i ku sifras ta tumando e bakuna? YDK pretu so, YDK no-pretu, makamba, chines, latino blanku, atventista, katoliko, muslim? Un pregunta ku niun hende ke puntra pa no keda tilda di ta rasista. “Kombin tin un patronchi ront Karibe ku hende pretu tin ku lucha kontra covid ku nan a pega den paisnan ku a kolonisa nan o ku e kolonisado a bin pega nos kune?” Djei otro ‘periodista na tinu rasialmente’ lo a sigui borda, profundisa: “Bosnan tin sifras di kantidat di hende segun rasa ku tin covid? Bosnan tin sifras segun rasa di esnan ku a muri di covid?” Den Karibe kasi ‘niun’ pais/isla ta obliga nan buro di statistik pa inbestiga for di un angulo rasial. Kaminda paisnan manera Merka kaminda nan ta kopia hopi di nan manera pa hasi inbestigashon/enkuesta si ta hasiele. Motibu pakiko na Merka nan si ta hasie ta pasobra e rasanan i etnisidatnan a bringa pa nan hende keda inklui den tur asuntu pa hana sifras i inbestigashon pa mehora nan bida riba tur tereno inkluso salubridat.

E motibu ta ku CBS i otro institutonan den Korsou/Karibe no por publika sifras ta paso bo ta hasi pueblo sabi i konsiente di nan rasa i kon nan ta keda oprimi. Tesei a laga Horohoro bira sataniko riba un hoben ku (kisas) inkonsiente a bai muchu hundu i lo a habri mente di hende. Kolonialismo internalisa den nos ‘lidernan’ ta un dje vironan mas mortal.

99,7% dje ‘periodista’ sinta den e ruedanan di prensa no tin un konsenshi pretu na tinu. Nan no por konekta covid ku rasa, genero, klase sosial. Tampoko ta kumbini paso e ora ei e chek fin di luna no por keda kobra. Unabes bo kumnisa kuestiona tipo di kosnan aki bo ta dunando kuminda pa pensamentu ku lo korta e hilu di diabel di kolonialismo i sklabitut ku tin Korsou mara. Konsekuentemente lo a lanta e pregunta si Izzy Gerstenblut un hudieu blanku komo e ‘dokter di covid-19’ ta kapas pa komprende e futuro liberativo di YDK pretu i por tuma desishonnan krusial riba tereno di salubridat basa riba prinsipionan di emansipashon. Opviamente ta den su sanger e 12 lunanan aki ku tur desishon ku ela tuma tabata for di su brel blanku ku balornan kapitalista krioyo. Ku otro palabra su gremio, su hendenan ku plaka mester a keda skapa for di e desaster ekonomiko finansiero ku covid ta kousando. Otro ehempel kon kolonialismo ta keda faya ku e pueblo pretu aki.

Ekspreshonnan ku hende ku a bini for di skol di AGO no por demostra nan inteligensia den e arena di prensa tambe ta un abominashon di un pueblo ku por rasona i analisa. Na prome luga AGO a keda krea pa e sistema di kapitalismo krioyo. 60-70% di forsa laboral na Korsou mester di hende ku a bini for di skolnan di Vsbo, AGO pasobra ta nan ta e hendenan ku tin ku sirbi e mashin kapitalista. Omayra Leeflang na su turno tabata e politiko/mandatario sklabisa ku a fasilita e apartheid edukashonal na Korsou i eks Antias dia e tabata minister di ensenansa pa partido PAR. No tin debate riba esei, e ta dokumenta i e resultado ta visibel den e kaos kolonial den ensenansa i futuronan destrui di miles di hende ku a pasa den esaki. Lokual ta pasando ku studiantenan, muchanan den e skolnan di di diskriminashon basa riba rasa i klase ta un violashon di areglo di estado di KOrsou, un violashon di leinan internashonal i tratadonan pa derechi di mucha i hoben.

Sindikato DOEN na e momentu aki si ta mirando e urgensia pa bringa e opreshon den edukashon. Direktivanan di skol ku tur ta kumplise den e sistema kapitalista te ainda no a demostra ku nan a arepenti i ke resolve e apartheid edukashonal ku nan mes a yuda krea pa mantene e orden di habuzu na Korsou. Ront Karibe, Merka, Latino-Amerika ta papia kon ta remplase e mentalidat kolonial ku ta kousando e drama aki pero den politika i komersio ketu bai ta papia kon ta krea un tipo di ensenansa ku ta kuadra ku e deseonan muribundu di un sektor priva ankra den supremesia blanku.

Finalmente e diskushon tambe ta lanta e kritika eterno bek: Pakiko Korsou, universidat, mundu di periodismo, komunikado sosial no por krea kurso, skol di periodismo, media? Kontesta: Paso e nivel tin ku keda mediokre pa laga politika lokal, komersio, ulanda sigui habuza pa nan keda na poder na Korsou. E supuesto ekskus semper tabata ku “no tin sufisiente hende interesa pa kubri e gastonan pa lanta un kurso/skol di periodismo ets.” Realidat ta ku si tin 7 hende interesa mester forsa gobiernu/komersio pa finansia. Tambe prensa riba su mes por kuminsa awoki ku teknologia digital. E boluntat simplemente no tei, e vishon no tei, ‘niun’ hende no ke mehora periodismo, mundu di komunikashon sosial. E no ta ‘kosta’ nada awoki. Ta den un pari zoom por alsa e nivel na modi bisa. Pero bo mester tin hende ku ke hasi e trabou i ku un mira pa krea espasionan di periodismo, komunikashon sosial emansipatorio.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s