Wiels -6-

san wichi 2

Den Parke Djamanta Djandjara nan a bin uni bek atrobe despues di disputa i divishon despues di un temporada di fria kabes konfundi i pidimentu pordon di otro pa enfrenta un dia nobo kaminda Korsou por keda impregna ku un oura di liberashon pa un i tur ku awoki ta sufriendo. E pal’i flor di libertat tabata dunando nan un sombra pa kombersa riba futuro, riba kosnan ku tabata stroba nan di biba sin sufrimentu. E sufrido a toka topikonan mane kon ta deshasi dje doñonan di kapital i kon ta boltu e sistema i destrui e malchi di menospresio pa e trahado pretu i impregna un spiritu nops-nops ku ta buta repartishon hustu di fortuna i poder riba tur hende su alta. Tin di nan a gruña lemanan arkaiko: “dak i pan riba mesa” ku te ainda no a bira un realidat. Otronan mal fada ku e fe siegu den politika a borota pa bula tur mashin di plaka o sekuestra gobernado i representante di Ulanda na Skalo i eksigi respet i hustisia reparativo; “Duna nos bek e 770 trion dollar bek ku bosnan a horta for di nos ansestronan awo.”
Mei mei di bebementu djus di kenepa i Henny bosnan a bai haltu aya diskutiendo kombin nos ta laga e forsanan dinastiko mane Jonckheer ketu bai despues di un mitar siglo ta influensia nos ekonomia i gobernashon den Kamera di Komersio? Ta prohibi pa YDK pretu ta presidente di VBC?

Batiendo pechu rekonosiendo e kulpa por parti serka nan mes i nan a priminti pa brongosa kara di Rutte i Knops o kalke mandatario makamba kolonisado di bishita. Tambe mester konfronta e doñonan di prensa ku ta shuata di hipokresia teniendo un pueblo den ignoransia i mansu. Den nan analisis a tira lus riba e fenomeno nobo di eks presidente di banko sentral ku a empobresa nos pa 26 aña i awoki numa a ripara ku Cft ta un aparato di estado ulandes ku meskos ku ten su ten tei pa krea un pueblo den miseria i malfortuna. Emoshonnan a kuminsa subi ora durante dia di obrero un predekashi mediokre di un pastor katoliko a keda bende komo un berdat divino enbes di un skeinmentu dje realidat ku kapitalismo salbahe a degenera Korsou ku ayudo i bendishon di iglesia katoliko i obispu.

Mientras e skalchinan ku rep’i pampuna, kala i balchinan di kalalu tabata bai rondu a surgi un diskushon riba banko MCB su ganashi mionario den un ruina ekonomiko i “ki mishi te ainda un gerensia predominante blanku disidiendo un futuro finansiero pa hende pretu?” Papiando riba hende blanku, kombin lider di MFK ku a tira atrako riba poder politiko di YDK pretu awoki ta rogando su votadonan pretu pa plaka? Dikon no bisa su famia Van der Dijs un famia multi-mionario pa paga p’e por sali prison?

Mamanan prekupa tambe a zona i ta mal rabia “ku e pruebanan di EFO ku ta krea herederonan nobo di e elite bieu ku ta tene nos den un mundu di opreshon. Mester sanger nobo den gobiernu i komersio ku sa kiko ta lucha ku sa kiko ta lanta kome Ramen ku pan bieu kaduka. Nos a bira un sosiedat obedesidu, yangando riba ritmo di ribirishi. Ta pesei Robby por a komberti su mes den un bandidu di nos potmoni hortando 35 mion pa aña. Ta pesei Merka su avionnan di guera elektroniko por bula bai bin pa viktimisa Venezuela i hinka nos den nan barika danki na un geopolitika di chupon dirigi for di Den Haag. Nan tin nos bida nan tiranisá. Viudonan di honestidat nos lo keda si nos no ripara ku te ainda e kelki ta mitar yen. Ta riba un madoa nos ta pero no dodo kompletu. E uñanan di libramentu tin ku sali si i mester skupi polbu ku rom pa klara.”

(parti dos dje anochi ta sigui)

Advertisements

Konbenio Ruttenaath i Luchanan Kontrali -Dwalu Kontra Kolonialismo Ulandes

BonBiniBusinessCuraçao

“Kòrsou inspirami pa mi bolbe kas, stop di bende nos awa i nos tera pa depchi awo, sera boka di tur ku ta bisa ku nos lo no por. Ai Kòrsou habri man, mi ke ta bo yu. Kurason ta bo nifikashon.” ~Fridi Martina – ‘Anhelo’

Sangrando di paden ku wowoman tur di bludu sufisiente hende na tinu a mira na februari 2018 sekretario di estado Knops i parlamento ulandes uza un lei dehumanizante pa invadi un Statia anti-kolonial rebelde luchando pa un outonomia engrandese i rekolonisa su gobernashon i pueblo. E kolonialismo venenoso for di Den Haag no a perde pa gana i a sigui skupi su venenu riba un St. Martin destrui na filingrana despues di e orkan Irma. Djei e la baha bai Boneiru konkistando un gobiernu i su populashon ku palabranan manipulativo i e notorio saku di plaka.

Mientras e aktonan sin skrement di rasismo kolonial ulandes tabata avansa den reino Karibense e degradashon di kolonialismo finansiero tampoko no a wanta di parti sla via e kolegio Cft ku ta dikta kwantu gobiernu por gasta i unda mester benta machete pa asina sigui komberti Korsou den un santana sosial.

Na tres okashon esnan vigilando e pasonan abusivo dje makambanan a alerta ku algu similar por pasa na Korsou tambe. No a dura hopi ora e speransa inosente di gabinete Rhuggenaath pa un futuro miho a boltu den agonia i frustrashon i a ‘fada’ ku e situashon ekonomiko hodidu i e eterno preshon kolonial di Cft i a ‘tira e serbete den rin’ i huntu ku Den Haag i presidente De Boer di VNO-NCW ku ta representa interesnan di komersio ulandes a traha un konbenio pa desaroya: “Ekonomia, 2) Finansia públiko i 3) Aparato gubernamental. Ròl di Ulanda den esaki no ta pa yuda ku fondo, pero pa duna sosten tékniko kaminda surgi e nesesidat (esaki entre otro den forma di rekurso humano i konosementu). ” E puntonan mas esensial ta: “Ulanda ta pone na disposishon un konsehero di transishon (transitiebegeleider) pa yuda identifiká proyekto- i inisiativanan ku tin e potensial pa aselerá e proseso i asina krea e resultadonan deseá di forma mas efektivo i efisiente. Tambe pa duna guia i teps pa di e forma aki pasa konosementu na e aparato públiko, kreando asina un impakto duradero;

  • Ulanda lo fasilitá, kaminda ta deseá i ta nesesario, ekspertonan adekuá riba tereno di gobernashon i finansas pa yuda fortifiká i pasa konosementu na e aparato públiko;
  • Ulanda lo kompartí ku Kòrsou konosementu ekstenso pa loke ta trata eksplotashon di tereno i maneho di propiedat di Gobièrnu di Kòrsou, ku ta benefisiá i yuda mehorá finansia públiko.”

Aki nan kolonialismo ulandes internalisa den e liderasgo politiko di PAR, MAN, PIN a gana i den konspirashon ku B.V. Den Haag a krea un formula pa purba sigui implementa e medidanan ordena pa Cft sin risibi un intervenshon ofisial i asina tirando un pará pa intenta akselera e proyekto di rekolonisashon ulandes na Korsou.

E kenshinan kolonial aki ta un resultado dje operashon di opreshon rasial finansiero; un sistema asepta for di 2008 i e koalishon aktual i oposishon i tur otro den pasado semper a rekonose su legitimidat.  Pesei na momentu ku a organisa e di dos kumbre Bon Bini For Business Curaçao enkabesa pa prome ministernan Rhuggenaath i Rutte no ta tin niun gritu i eskritura di rebeldia apesar di varios analisis politiko ku a spierta pueblo pa tene kuidou ku e movidanan dje makambanan basa riba e atrosidatnan kolonial komete n’e otro islanan.

Un pueblo mentalmente kontamina ku kolonialismo ulandes ta aktua kontra su naturalesa i kontra su mes ku un kurason morto spanta. Atrobe esaki por a keda mira feu ora na Ulanda no ta tin niun esfuerso hasi di parti di e komunidat YDK konsiente pa eduka, agita i organisa kontra e gobiernu ulandes ku ta ehekutando su manego di rasismo kolonial den tur trankilidat sin niun molester. No ta algu abnormal di eksigi dje diaspora mondu biba na Ulanda pa emiti kritika den Volkskrant, NRC, kalke plataforma grandi di media kaminda por kita e maskarada di gobiernu ulandes. Tambe no ta nada imposibel pa esnan konsiente aki na Korsou pa publika kritika anti-kolonial den korantnan i plataformanan grandi di komunikashon na Ulanda pa asina sikiera batayá e diabelnan sinta na Den Haag ku palabranan i influensiá e klima di polygoon periodismo ku ta nara Korsou for di un brel kolonial blanku pa komplase nan klientela i mantenshon di poder politiko na Binnenhof.

Pa Kòrsou mesun kos. Henter aña tin bola di hende ta papiando skat di kos herigando kontra gobiernu ulandes. Individuanan i gruponan ku influensia  ku a proba nan por mobilisa hende kontra inhustisia pero ora e momentu di oro yega i e kabesante di kolonialismo ulandes i su ayudante tei riba e isla aki diripiente tur e gritochinan a bai skonde. Tur partido politiko opositorio a guli nan batimentu boka anti-ulandes, dobla nan rabu i a kai sinta den skina hasiendo koi bon mucha kedando ketu ketu na momentu ku shon Rutte i Knops a yega. Sindikalismo, lidernan religioso, akademikonan, miembronan di prensa, abogadonan, studiantenan, mundu di arte, influensiadonan riba medianan sosial tur ku semper a saka zonidonan pa konsientisa kontra e agreshon kolonial di Ulanda tambe a sensura nan mes alma durante e bishita dje podernan blanku politiko na Korsou. Tur a proba di ta yen yen di skuma i tiki chukaliti i no ta tin sufisiente forsa mental i vibrashon spiritual pa desobedese e ritual di miedu kolonial i kibra e siklo visioso di sklabisa un pueblo.

Varios hende ku ta haña stuhl pa sinta na radio, televishon i korant a kalifika lokual a pasa na Statia un golpi di estado i esun na Boneiru un variante suave pero despues a sigui ku e ordu di dia mane nada a pasa. Un desepshon i fayo grave si bo ta analisa i taha ku tin un peliger grandi na kaminda pero bo ta ninga di hinka un plan di defensa den otro.

Loke por sosode na Korsou tur lo depende kon e parti dje pueblo aki lo organisa kontra e intento nobo aki empaketa den un konbenio pero mas importante kon nan lo akshona ku forsa kontra tur e atrosidatnan kolonial en general. Ounke ta lat na tur oloshi i oportunista pa aktua despues ku e bom kolonial a baster e movementu politiko Kousa Prome ku su lider Rene Rosalia a organisa un reunion di protesta ku a kulmina den reunifikashon popular laganda divishon atras harmando un moveshon nobo ku ta para pa un “Frente Amplio pa Gobernashon Propio”

E proseso emansipatorio pretu ta adelanta ora prensa, poder popular, politika, akademia, intelektualnan publiko, sindikalismo, movementunan sosial, religiosonan, artistanan aleha nan mes for di luchanan robes pa drechi. E sekuensia korekto mester ta ku antisipando yegada di kalke representante di kolonialismo ulandes bo ta organisa for di tur angulo resistensia i konfrontashon kreativo i no despues ora e kolonisadonan a bai bek Ulanda kaba. I hasta si di tur manera esei sosode minimalmente bo tin ku duna boka i plama un kontrabalanse den medionan ulandes na Ulanda pero tambe regional i internashonal manera regularmente e movementu Nos Ke Boneiru Bek sa hasi. E ora ei den bista di hende nan lo legumai di tira e etiketa di politikeria barata riba bosnan pasobra a keda demostra ku bosnan porfin ta praktika lokual bosnan ta predika. Pero awoki tin muchu kos ku ta duna pueblo deskonfiansa. Legionnan di ehempel manera:

1. Rutte ta aki i prensa ta haña oportunidat pa hasi preguntanan kardinal durante un rueda di prensa i e miembronan di prensa ‘anti-kolonial’ ku ta profila komo patriotiko i kontra kolonialismo ulandes no tabata presente. Ta un ehempel klasiko dje lucha di dwalu. Nan por a primi i kuestiona Rutte i Knops i tene nan responsabel pa nan aktonan rasista kolonial pero enbes di esei nan a fasilita un hanchi di skapatorio pa nan i despues hipokritamente sigui bati kritika djis pa bati i kritika. Vigilante ku Lilo Sulvaran na kabes, MAS99 ku Juny Joseph, Dwight Rudolfina, Tele-Curaçao ku Glen Thomas, New Song ku pastor Papi Esprit i Humphrey Zimmerman, CBA ku Sherman Antonia, Krioyo ku Darwin Gregg i Rignald Maduro nan tur konsientemente a laga e kolonisadonan sali viktorioso tolerando prensa ulandes i prensa kolonisa di Korsou sigui skibi i dominando e historia falsu na nos desbentaha.

2. Rutte ta tin un enkuentro ku miembronan di parlamento. Parlamentario Moses di Movementu Progresivo i Korsou di Nos Tur no a tribi di konfronta e prome mandatario ulandes ku nan kritika, lagando nan votado na kaya ne ora mas krusial di nan karera politiko. Cordoba di Pueblo Soberano tampoko a bisa e makambanan nada manera e ke laga hende kere. Mas bergonsoso tabata ora pueblo a mira un Pik Pisas tur djente afo riba potret ku Rutte mientras su lider di MFK ta den prison, priva di su libertat pasobra manera e partido ta alega ku konsistensia “ta Ulanda” ta tras di su enkarselashon. Mas ridikulo no por.

3. E sigiuente siman minister van Engelshoven di enseñansa i kultura tabata di bishita i huntu ku minister Zita de Jesus-Leito i Alcala Wallé nan a bai keiru den Otrobanda, Punda, Skalo, Pietermaai. Pasobra e planifikashon pa gentrifika e barionan ku ta riba lista di Unesco herensia mundial ta sigui, e deseo ta pa rekolonisa henter e sentro di suidat pa akomoda turismo di makamba ku yudansa di fondonan di ministerio ulandes. Sin niun molester e proyekto di dominio ekonomiko blanku ta sigui. Sindikatonan SITEK i PWFC representando dosentenan i e trahadonan di Kas di Kultura welgando no a sinti nan mes motiva pa topa ku e minister ulandes i bise ku su gobiernu ta e rais dje malora finansiero i eksigi asistensia sin limite den nos finansas pa enseñansa i kultura. Studiantenan i eks studiantenan/hobennan profeshonal no a uni pa manda un mensahe bon kla pe minister ulandes ku niun hende na Korsou no tin un debe di estudio di paga. Ta bosnan a kolonisa nos i konsekuentemente ta Ulanda debe nos i ta gobiernu na Den Haag tin ku paga tur gastunan di estudio.

4. ABVO un sindikato ku no a sali na defensa di su trahadonan na Boneiru i atrobe na Korsou ta hasi mesun kos. Presidente Adri Williams te ainda no a deklara nada riba e konsekuensianan ku e konbenio firma por tin.

E realidat marga ta ku tur hende ku semper tabata tin algu di bisa a enkadena nan spiritu pa baña den un speransa ku e kumbre aki makambanan lo bin abou i trese hopi negoshinan pa Korsou. Politikonan komersial ku no ta pretu i ni ta kompronde kiko ta liberashon pretu, sin niun sorto di ideologia ku a yora pa makambanan bin ku un fabrika di keshi ta simboliko dje nivel mediokre ku nos ta aden. Lider di Kousa Komun diplomatikamente a splika esaki tambe ku Korsou no mester di invershonista makamba riku pa e yu  di Korsou por biba ku kiriwichi. Ront Karibe e pruebanan tei ku dependensia ekonomiko estranhero ta stroba desaroyo berdadero di un pueblo. Un ekonomia aun mas makambiá lo hundi emansipashon pretu di Kòrsou mas.

Historia no ta suta hende su kabes, ignorando e realidatnan historiko ku a kousa e labatiba ku nos ta aden si. Na 2005 tata di prome minister Ruggenaath a publika un kritika kontra Ulanda kaminda e ta splika ku “IMF tabata e mukel di inhustisia ku Ulanda a uza pa limpia e aparato publiko i bati e esfuersonan (neoliberal maligno) di prome minister di PAR Miguel Pourier.” E resultadonan desastroso dje era di sera wowo pa e salbahe blanku ku e kreadonan di kapitalismo krioyo ta bistu. Di 2000 pa 2019 e rutinario adorashon pe makambanan no a desvia masha. Ketu bai liderasgo di tur sektor skondi o habri ta kere i anhela pa nos destino komo un pueblo lo keda kondena ku Ulanda. Bo tin un grupo kolonisa mentalmente te den nan igra i e otro ke sierto adaptashon den e relashon kolonial basta nan por yanga den un tera fertil di poder, prestigio i ganashi personal. Tur ta ingredientenan dje pan ku e diabel blanku a mansa pa nos kome.  Awo ta na nos pa kuminsa kou e wesunan dje skeleta di opreshon ulandes ku tin nos spanta i spoela nos spiritu ku aw’i huramentu pa anunsia yegada di un era rebelde nobo.

 

100 Logro di Kapitalismo Krioyo – Tur Mucha Mester Kome

 

100 logro - 17 ana pa kompronde ku tur macha mester kome

Kapitalismo krioyo ta inyekta un likodo di lubida berdatnan historiko den hende ku por trese kambionan struktural den sosiedat. Un ehempel klasiko ta e revelashon despues di 17 ana di un reportero ku semper a proteha i kome for di e gremio elite ku ta e arkitektonan di krea sistemanan opresivo kruel ku ta hasi hende pober na Korsou porfin yega na un konsenshi fini ku pobresa ta eksisti i konsekuentemente tur mucha pretu no mag di tin hamber.

Kiko Wiels Lo a Bisa? – What Would Wiels Say?

what would Wiels say - kiko Wiels lo a bisa

Un politiko blanku krioyo sosiopat ku semper ta tin miedu di bisa e palabra makamba, rasista, supremasia blanku ulandes ku nunka ta papia di opreshon merikano den Puerto Rico, Haiti, US Virgin Islands, ku no ta ni bisa nada riba e rebolishi sosial awoki na Guiana Franses ku a kansa di e desigualdat kousa pa Fransia, ku nunka a mustra un akto di solidarismo pa nos rumannan bringando kolonialismo na Boneiru, Saba, St Maarten i Statia ku a modela ku su potretnan saka huntu ku Chavez pero no ta saka un man fraternal na Venezuela ku ta pasando duru awoki, ku nunka ta papia riba e lucha anti-rasismo di e Afro-Kolombiano pero semper ta papia di Kolombia si ku nunka a bisa un palabra riba e dekada hende di desendensia Afrikano o e bataya pa reparashonnan di parti di CARICOM pa konsientisa i empodera su votadonan pretu, ku poder politiko pa tormenta Den Haag mesun duru pero semper ta kobardia di mobilisa i organisa su komunidat elektoral ku nunka pero nunka den su bida a duna kursonan di politika pretu Karibense ku tabata pro zwarte piet ku te ainda ta engaña su mes ku e ku su identidat blanku krioyo por ta un lider di un partido politiko den un pais pretu i ta uza miles di votado pretu troumatisa pa kolonialismo ulandes pega den un trampa kolonisa di identidat pa laga nan kere ku un YDK krioyo blanku por salba nan den politika ku pa kolmo ta purba di bringa un kaso den korte di korupshon kaminda ela keda sentensia pa keda kumpra di un Italiano blanku ku pa niun bledu ta interesa den e lucha di hende pretu i sin skrement ta uza e mesun abogado ulandes Knoops ku a defende e rasista sushi Geert Wilders na Ulanda.

E kumbu blanku ku henter su bida a parasita riba bidanan pretu via politika i tur su fortuna ta danki na kolonialismo ulandes awoki despues di un redada ta bin grita falsu fantochi ku ela kansa di makambanan i ku Korsou mester bira independiente..

 

A creole white sociopath politician that always been afraid to say the word ‘dutch white folks’, ‘racists’, ‘dutch white supremacy’, who never speaks about American oppression in Puerto Rico, US. Virgin Islands, Haiti and stays quiet on the social revolt right now in French Guiana who are sick and tired of the inequities created by France. Who never showed an act of solidarity to the peoples of Bonaire, Saba, Statia, St.Maarten fighting against dutch colonialism, who showing off with pictures taking with Chavez but doesn’t offer a helping hand to our struggling Venezuelan neighbors. Who always praises Colombia but never says anything on the plight of the Afro-Colombians and indigenous people battling for their dignity. Who fronts as a self-claimed regionalist but never talked about the decade for people of African descent or the fight for reparations started by CARICOM to empower his black electorate. Who together with his coalition partners has the political power to destabilize dutch colonial powers in The Hague but refuses to  walk his cheap decolonial talk. Who never organized and mobilized his political organization and Black voting community, who never ever set up courses on Black Caribbean politics, who has been pro black pete, who is trapped inside his own lies of thinking he is the political white creole messiah that has a god given calling to save Black people in Curacao using the traumatizing effects of dutch colonialism to make his electorate believe that a white identifying person will deliver them from dutch colonial violence. Who got sentenced for being bought by a white Italian who doesn’t give a damn about Black people, who is appealing his corruption case and hired out of all people mr. Knoops a lawyer that defended the dutch white racist politician Geert Wilders for a case againt anti-Moroccan racism in the Netherlands.

This damn white zombie who owes his abundant life and fortunes and everything else to Black people and the legacy of dutch colonialism now after a raid comes out crying that Curacao should become independent…

Amado Römer – kapitulo 107 versikulo 1

Amado Romer 107-1-Novela

Den un temporada di retiro i fortalesa spiritual simannan largu un dje medio di komunikashon mas influensial Direct TV bou di liderasgo di Jachmin Pinedo a bin ta anunsia ku yen fanfara un novela nobo ku ela kumpra pa su televidente. E forma ku Direct a bin ta alaba e novela kasi hende lo kere ku benida di Hesus na Korsou ta na kaminda. Ta di lamenta i bergonsoso kon Direct no ta tin e kurashi komersial i kristian pa produsi un programashon diario tokante Kuaresma pa alimenta i alsa e spiritualidat di su publiko den tempunan di konfushon i trastorno sosial.

Den santu buki di Amado Romer e splikashon di e aktonan kondenabel di media ta hopi kla. “Skritura ta bisa: Diabel chiki nunka por konvense un pueblo di bai wak un novela Venezolano i laga nan kere ku esei lo duna nan bida eterno.”

Kurashi

Wiels Kora Kora Chavez.jpg

Helmin Wiels a yuda pueblo di Korsou pa nunka tin tantu temor pa kritika i dekonstrui e armaduranan di poder ekonomiko-finansiero i estado ulandes ku huntu den nan bembe di violensia ta e inventornan di pobresa i tur sobra malisia sosiopolitiko.

Konfiansa Siegu: Media Mesianiko den Elekshon

mediatiko-2

Djadumingu 12 di februari 2 miembro di PS ta retira nan sosten for di gabinete Koeiman. No tin un rueda di prensa pa klarifika e situashon politiko di parti di Pueblo Soberano. Edukashon politiko ku antes tabata un di nan palanka ideologiko mas balora no ta konta mas. Mundu di media tardando pa yama i responsabilisa e parlamentarionan Mac Cijntje i Sherwin Leanora ku a saka e steker, fasilitando e politikonan enbolbi pa prepara nan kuenta mas miho posibel pa konkel ku e berdat tras di e berdat ku nan no ke pa pueblo haña sa. Un fin abrupto a yega depues di un racha di 4 aña akusando MFK di tin manchanan di sanger na nan man en konekshon ku e asesinato di nan lider Helmin Wiels dirpiente a keda labà den un rat’i ora. Introdusiendo ofisialmente un politika di kadaver kaminda ta uza bo lider asesina pa gana poder politiko sin biba su prinsipionan di liberashon pretu.

E kortina di huma ta diki, un novela eterno di intriga, redu, ribirishi politiko pa tapa e mannan invisibel ku plaka monstroso halando e kadenanan di bui ne bokanan den prensa i speshal den prensa radial ku ta alkansa miles di e votadonan tur ora na tur momentu. Ku tiki esfuerso un emisora ku un ekipo mediokre bou di nivel ku preparashon periodistiko hodidu ta drenta den kas, boka di trabou, den bus unda ko bo por ta pa influensia e manera ku bo ta nabega bo bida personal. Kada emisora ku nan adorashon komersial i nan konekshon politiko, kada un di nan ku sierto grado di kolonialismo radial, praktikando e fishi di produsi notisia for di un manego pa mantene un kontrol kon hende mester pensa i hasi pa sirbi e interesnan ekonomiko, finansiero i politiko di e pais.

Dos dia prome ku e gobiernu a rementa Cali Manuel reportero veterano di Direct den un konfrontashon ku Paul de Geus a kalifika e direktor di UTS komo un abuzado di poder. Normalmente mirando nos historia di tin miedu di bisa e berdat i e temor despues pa retaliashon lo mester tabata algu grandi di selebra pero pueblo den silensio a saka un gritu di alegria so pero niun kondenashon nashonal di parti di prensa a sali. Esaki ta e klima di periodismo. Deshonestidat ta sigui reina den medionan di komunikashon i e speransa ku tin kambio na kaminda ta hopi chiki den e tempu benidero ku lo finalisa den e elekshon nobo den e proksimo lunanan.

Demokrasia radial ta chikitous ainda mirando e sensura di e ‘diosnan chiki’ papiando tras di nan mikrofono. Boseronan di oposishon i koalishon tur ta hungando mesun wega di komenta, kritika e popchinan politiko pero sporadikamente nan ta uza nan poder mediatiko pa desmaskara e strukturanan di plaka brutu ku ta move e marionet politiko. Te ainda ta hopi skuma anti-kolonial anti-makamba sin por mobilisa un forsa popular ku por enfrenta e dominio di elite na Korsou i su ardu mayo na Den Haag. Pa e podernan bionario di invershonistanan, komersiantenan i otro tribunan ku agendanan skondi semper tin skapatorio tanten prensa ta proteha nan.

Nos tin 8 korant, 4, 5 tv, 8 radio grandi ku departamentu di notisia ku no tabata interesa pa informa pueblo via un debate-foro den e delaster elekshon di 5 oktober 2016. Ku hopi fanfara UNESCO i Renske Pin a skibi un raport mancha ku e enk di privilegio blancha riba e esfera di media na Korsou sin keda konsistente i organisa o sikiera purba di motiva tur hungado den prensa pa madura i harma debatenan pa yuda klara mas miho posibel e pueblo pa su eskoho politiko. Tabata Cifa e organisashon di sektor di servisionan finansiero ku a harma e uniko debate na televishon flankea pa studiantenan di universidat di Korsou i e klup di ekonomistanan. E dividendo di akademikonan, profeshonalnan i trahadonan den media ta keda pober si nan no bin bei i kuminsa bora e pos di finansas pa drecha e estado deplorabel di prensa, un raport, un debate simplemente no ta sufisiente i e ta refleha e flohera intelektual i komplisidat den tene un pueblo den ignoransia pa nan keda sinta riba nan mes stuhlnan chiki di poder i posishon sosial.

Pa e futuro serkano ya na Direct nan a kuminsa mansa e oreanan di nan publiko pa pordona nan aktonan di demonisashon di e lider di MFK  kondena pa korupshon antisipando un gabinete nobo bou di su liderato. Plaka bieu, plaka nobo, plaka pober tur ta skeiru e lunanan aki riba tur frekuensia, hinkamentu di palu bou kandela kolonial, hunagamentu di rol di badjon kontra ulanda den studio sin organisa niun krou.

Un tutu di desepshon dekolonial lo bai eksplota mas ainda den kara dje parti di e pueblo di Korsou ku ta angela (un sierto grado di) liberashon politiko i sosio-ekonomiko-finansiero (pretu) na momentu ku e grupo di 12 (MFK, PS, MP, KTDNT, Braam, Dennawi) ku tin un mayoria pa forma un gabinete interino i postpone elekshonnan pa dekonstrui e strukturanan kolonial di paden i djafo ku tin e pais aki strangula. E desishon pa bai prepara un  guera di dekolonisashon tin su sakrifisionan finansiero i historikamente e gritochinan anti-kolonial nunka a proba nan mes di ta tene nan sakrifisio 100 pa swai e spada dekolonial kontra forsanan elitario riba suela i e politika di apartheid ulandes ora e momentu di oro yega un bes mas riba un skalchi di oro.