Papiamentu: Tur di Bludu

“Ami ta hinka man den eigen boezem.  E konstante atake kontra nos hende bon studia intelektual” ~ Juny Joseph komunikado sosial na MAS99

Billy jonckheer presidente di kamera di komersio: “Gobiernu tin un vinger in de pap . Awoki nos ta bezig ta schone op nos bestand. ”

Charles Cooper parlamentario MFK: “Schotte no mester bisti paña di prison. Direktor tin kompreshon pa esaki. Het komt goed. Nos ta hasi yamada riba tur hende pa bin sostenè nos djabierne tenzij bo doño di trabao no ta lagabu bai.”

Korant Vigilante: ‘Polis a bai duna asistensia na homber daklos.’
Eigenlijk eigenlijk eigenlijk
Inderdaad inderdaad inderdaad
Überhaupt überhaupt überhaupt

“Tur politiko a soru pa e 33 mion yega insel air podise PIN no pero voor de rest tur a partisipa koalishon i oposishon.” ~Wendel Meulen sindikato Cadmu

“Bo no mester vind e wiel uit.  E ta un
administratief onderzoek pa sa unda e droga a keda” ~ Humphrey HZ Zimmerman komunikado sosial New Song

“E firmamentu di e konvenant ku Ulanda. E ta mishi ku bo demokrasia i mas straño ta ku tur hende ta ketu. Mi ta hañe kwalijk.”  ~Sheldry Osepa

“Un begrotingskamer ta holle uit e outeridat di parlamento. Kontrole en ondersteuning ta nos tarea. Nos no por asepta e taferelennan aki. Rhuggenaath ta kana als een kip zonder kop.” ~Menki Rojer parlamentario KdNT

Komunikado sosial Etienne Rosario: “Direct no kier a paga pa transmiti Tumba i e ora ei dan houdt het op.”

Ta bira difisil pa gobiernu paga salaris di enseñansa i doorschalering ku loontrede i periodiek ku indexering.” ~Gino Bernadina periodista Z86

‘Hou het simpel’ ~Banda fantasma di festival di Tumba

“Pdvsa a kumpra bo loyalidat. Nan ta hasi sindikalismo di terorismo. Cova su draaiboek. Tur hende tin ku beken kleur. E aap is uit de mouw.  ~Steven Walroud parlamentario PAR

E pruebanan no tabata sufisiente onderbouwd i toereikend pa kite. Pdvsa no tin sen e ora ei ta einde verhaal, afgelopen.  ~presentado di notisia Direct Nobrega

Ronny Cornelis MEO: “Loon ta abou. Tin mensenhandel serka e Indionan den nan negoshi. E ta lantando kabes.”

“Si tur hende eksigi nan derechinan. Dan is het hek van het dam. E tin impakto i mester mas administratieve kracht.” Minister di enseñansa i kultura sra Alcala Wale

“Man su frakshon tei pa forma korum pero Laten we elkaar geen mietje noemen. E otro partidonan ta laga hopi di desea.” ~ Parlamentario MAN McWilliams

“Als de vos met passie preekt Boer pas op uw kippen. Hub humanitario aki anto di otrobanda dal bo ku sankshon. E koi so no ta bon” Parlamentario MAN sr. Hato

Konbenio Ruttenaath i Luchanan Kontrali -Dwalu Kontra Kolonialismo Ulandes

BonBiniBusinessCuraçao

“Kòrsou inspirami pa mi bolbe kas, stop di bende nos awa i nos tera pa depchi awo, sera boka di tur ku ta bisa ku nos lo no por. Ai Kòrsou habri man, mi ke ta bo yu. Kurason ta bo nifikashon.” ~Fridi Martina – ‘Anhelo’

Sangrando di paden ku wowoman tur di bludu sufisiente hende na tinu a mira na februari 2018 sekretario di estado Knops i parlamento ulandes uza un lei dehumanizante pa invadi un Statia anti-kolonial rebelde luchando pa un outonomia engrandese i rekolonisa su gobernashon i pueblo. E kolonialismo venenoso for di Den Haag no a perde pa gana i a sigui skupi su venenu riba un St. Martin destrui na filingrana despues di e orkan Irma. Djei e la baha bai Boneiru konkistando un gobiernu i su populashon ku palabranan manipulativo i e notorio saku di plaka.

Mientras e aktonan sin skrement di rasismo kolonial ulandes tabata avansa den reino Karibense e degradashon di kolonialismo finansiero tampoko no a wanta di parti sla via e kolegio Cft ku ta dikta kwantu gobiernu por gasta i unda mester benta machete pa asina sigui komberti Korsou den un santana sosial.

Na tres okashon esnan vigilando e pasonan abusivo dje makambanan a alerta ku algu similar por pasa na Korsou tambe. No a dura hopi ora e speransa inosente di gabinete Rhuggenaath pa un futuro miho a boltu den agonia i frustrashon i a ‘fada’ ku e situashon ekonomiko hodidu i e eterno preshon kolonial di Cft i a ‘tira e serbete den rin’ i huntu ku Den Haag i presidente De Boer di VNO-NCW ku ta representa interesnan di komersio ulandes a traha un konbenio pa desaroya: “Ekonomia, 2) Finansia públiko i 3) Aparato gubernamental. Ròl di Ulanda den esaki no ta pa yuda ku fondo, pero pa duna sosten tékniko kaminda surgi e nesesidat (esaki entre otro den forma di rekurso humano i konosementu). ” E puntonan mas esensial ta: “Ulanda ta pone na disposishon un konsehero di transishon (transitiebegeleider) pa yuda identifiká proyekto- i inisiativanan ku tin e potensial pa aselerá e proseso i asina krea e resultadonan deseá di forma mas efektivo i efisiente. Tambe pa duna guia i teps pa di e forma aki pasa konosementu na e aparato públiko, kreando asina un impakto duradero;

  • Ulanda lo fasilitá, kaminda ta deseá i ta nesesario, ekspertonan adekuá riba tereno di gobernashon i finansas pa yuda fortifiká i pasa konosementu na e aparato públiko;
  • Ulanda lo kompartí ku Kòrsou konosementu ekstenso pa loke ta trata eksplotashon di tereno i maneho di propiedat di Gobièrnu di Kòrsou, ku ta benefisiá i yuda mehorá finansia públiko.”

Aki nan kolonialismo ulandes internalisa den e liderasgo politiko di PAR, MAN, PIN a gana i den konspirashon ku B.V. Den Haag a krea un formula pa purba sigui implementa e medidanan ordena pa Cft sin risibi un intervenshon ofisial i asina tirando un pará pa intenta akselera e proyekto di rekolonisashon ulandes na Korsou.

E kenshinan kolonial aki ta un resultado dje operashon di opreshon rasial finansiero; un sistema asepta for di 2008 i e koalishon aktual i oposishon i tur otro den pasado semper a rekonose su legitimidat.  Pesei na momentu ku a organisa e di dos kumbre Bon Bini For Business Curaçao enkabesa pa prome ministernan Rhuggenaath i Rutte no ta tin niun gritu i eskritura di rebeldia apesar di varios analisis politiko ku a spierta pueblo pa tene kuidou ku e movidanan dje makambanan basa riba e atrosidatnan kolonial komete n’e otro islanan.

Un pueblo mentalmente kontamina ku kolonialismo ulandes ta aktua kontra su naturalesa i kontra su mes ku un kurason morto spanta. Atrobe esaki por a keda mira feu ora na Ulanda no ta tin niun esfuerso hasi di parti di e komunidat YDK konsiente pa eduka, agita i organisa kontra e gobiernu ulandes ku ta ehekutando su manego di rasismo kolonial den tur trankilidat sin niun molester. No ta algu abnormal di eksigi dje diaspora mondu biba na Ulanda pa emiti kritika den Volkskrant, NRC, kalke plataforma grandi di media kaminda por kita e maskarada di gobiernu ulandes. Tambe no ta nada imposibel pa esnan konsiente aki na Korsou pa publika kritika anti-kolonial den korantnan i plataformanan grandi di komunikashon na Ulanda pa asina sikiera batayá e diabelnan sinta na Den Haag ku palabranan i influensiá e klima di polygoon periodismo ku ta nara Korsou for di un brel kolonial blanku pa komplase nan klientela i mantenshon di poder politiko na Binnenhof.

Pa Kòrsou mesun kos. Henter aña tin bola di hende ta papiando skat di kos herigando kontra gobiernu ulandes. Individuanan i gruponan ku influensia  ku a proba nan por mobilisa hende kontra inhustisia pero ora e momentu di oro yega i e kabesante di kolonialismo ulandes i su ayudante tei riba e isla aki diripiente tur e gritochinan a bai skonde. Tur partido politiko opositorio a guli nan batimentu boka anti-ulandes, dobla nan rabu i a kai sinta den skina hasiendo koi bon mucha kedando ketu ketu na momentu ku shon Rutte i Knops a yega. Sindikalismo, lidernan religioso, akademikonan, miembronan di prensa, abogadonan, studiantenan, mundu di arte, influensiadonan riba medianan sosial tur ku semper a saka zonidonan pa konsientisa kontra e agreshon kolonial di Ulanda tambe a sensura nan mes alma durante e bishita dje podernan blanku politiko na Korsou. Tur a proba di ta yen yen di skuma i tiki chukaliti i no ta tin sufisiente forsa mental i vibrashon spiritual pa desobedese e ritual di miedu kolonial i kibra e siklo visioso di sklabisa un pueblo.

Varios hende ku ta haña stuhl pa sinta na radio, televishon i korant a kalifika lokual a pasa na Statia un golpi di estado i esun na Boneiru un variante suave pero despues a sigui ku e ordu di dia mane nada a pasa. Un desepshon i fayo grave si bo ta analisa i taha ku tin un peliger grandi na kaminda pero bo ta ninga di hinka un plan di defensa den otro.

Loke por sosode na Korsou tur lo depende kon e parti dje pueblo aki lo organisa kontra e intento nobo aki empaketa den un konbenio pero mas importante kon nan lo akshona ku forsa kontra tur e atrosidatnan kolonial en general. Ounke ta lat na tur oloshi i oportunista pa aktua despues ku e bom kolonial a baster e movementu politiko Kousa Prome ku su lider Rene Rosalia a organisa un reunion di protesta ku a kulmina den reunifikashon popular laganda divishon atras harmando un moveshon nobo ku ta para pa un “Frente Amplio pa Gobernashon Propio”

E proseso emansipatorio pretu ta adelanta ora prensa, poder popular, politika, akademia, intelektualnan publiko, sindikalismo, movementunan sosial, religiosonan, artistanan aleha nan mes for di luchanan robes pa drechi. E sekuensia korekto mester ta ku antisipando yegada di kalke representante di kolonialismo ulandes bo ta organisa for di tur angulo resistensia i konfrontashon kreativo i no despues ora e kolonisadonan a bai bek Ulanda kaba. I hasta si di tur manera esei sosode minimalmente bo tin ku duna boka i plama un kontrabalanse den medionan ulandes na Ulanda pero tambe regional i internashonal manera regularmente e movementu Nos Ke Boneiru Bek sa hasi. E ora ei den bista di hende nan lo legumai di tira e etiketa di politikeria barata riba bosnan pasobra a keda demostra ku bosnan porfin ta praktika lokual bosnan ta predika. Pero awoki tin muchu kos ku ta duna pueblo deskonfiansa. Legionnan di ehempel manera:

1. Rutte ta aki i prensa ta haña oportunidat pa hasi preguntanan kardinal durante un rueda di prensa i e miembronan di prensa ‘anti-kolonial’ ku ta profila komo patriotiko i kontra kolonialismo ulandes no tabata presente. Ta un ehempel klasiko dje lucha di dwalu. Nan por a primi i kuestiona Rutte i Knops i tene nan responsabel pa nan aktonan rasista kolonial pero enbes di esei nan a fasilita un hanchi di skapatorio pa nan i despues hipokritamente sigui bati kritika djis pa bati i kritika. Vigilante ku Lilo Sulvaran na kabes, MAS99 ku Juny Joseph, Dwight Rudolfina, Tele-Curaçao ku Glen Thomas, New Song ku pastor Papi Esprit i Humphrey Zimmerman, CBA ku Sherman Antonia, Krioyo ku Darwin Gregg i Rignald Maduro nan tur konsientemente a laga e kolonisadonan sali viktorioso tolerando prensa ulandes i prensa kolonisa di Korsou sigui skibi i dominando e historia falsu na nos desbentaha.

2. Rutte ta tin un enkuentro ku miembronan di parlamento. Parlamentario Moses di Movementu Progresivo i Korsou di Nos Tur no a tribi di konfronta e prome mandatario ulandes ku nan kritika, lagando nan votado na kaya ne ora mas krusial di nan karera politiko. Cordoba di Pueblo Soberano tampoko a bisa e makambanan nada manera e ke laga hende kere. Mas bergonsoso tabata ora pueblo a mira un Pik Pisas tur djente afo riba potret ku Rutte mientras su lider di MFK ta den prison, priva di su libertat pasobra manera e partido ta alega ku konsistensia “ta Ulanda” ta tras di su enkarselashon. Mas ridikulo no por.

3. E sigiuente siman minister van Engelshoven di enseñansa i kultura tabata di bishita i huntu ku minister Zita de Jesus-Leito i Alcala Wallé nan a bai keiru den Otrobanda, Punda, Skalo, Pietermaai. Pasobra e planifikashon pa gentrifika e barionan ku ta riba lista di Unesco herensia mundial ta sigui, e deseo ta pa rekolonisa henter e sentro di suidat pa akomoda turismo di makamba ku yudansa di fondonan di ministerio ulandes. Sin niun molester e proyekto di dominio ekonomiko blanku ta sigui. Sindikatonan SITEK i PWFC representando dosentenan i e trahadonan di Kas di Kultura welgando no a sinti nan mes motiva pa topa ku e minister ulandes i bise ku su gobiernu ta e rais dje malora finansiero i eksigi asistensia sin limite den nos finansas pa enseñansa i kultura. Studiantenan i eks studiantenan/hobennan profeshonal no a uni pa manda un mensahe bon kla pe minister ulandes ku niun hende na Korsou no tin un debe di estudio di paga. Ta bosnan a kolonisa nos i konsekuentemente ta Ulanda debe nos i ta gobiernu na Den Haag tin ku paga tur gastunan di estudio.

4. ABVO un sindikato ku no a sali na defensa di su trahadonan na Boneiru i atrobe na Korsou ta hasi mesun kos. Presidente Adri Williams te ainda no a deklara nada riba e konsekuensianan ku e konbenio firma por tin.

E realidat marga ta ku tur hende ku semper tabata tin algu di bisa a enkadena nan spiritu pa baña den un speransa ku e kumbre aki makambanan lo bin abou i trese hopi negoshinan pa Korsou. Politikonan komersial ku no ta pretu i ni ta kompronde kiko ta liberashon pretu, sin niun sorto di ideologia ku a yora pa makambanan bin ku un fabrika di keshi ta simboliko dje nivel mediokre ku nos ta aden. Lider di Kousa Komun diplomatikamente a splika esaki tambe ku Korsou no mester di invershonista makamba riku pa e yu  di Korsou por biba ku kiriwichi. Ront Karibe e pruebanan tei ku dependensia ekonomiko estranhero ta stroba desaroyo berdadero di un pueblo. Un ekonomia aun mas makambiá lo hundi emansipashon pretu di Kòrsou mas.

Historia no ta suta hende su kabes, ignorando e realidatnan historiko ku a kousa e labatiba ku nos ta aden si. Na 2005 tata di prome minister Ruggenaath a publika un kritika kontra Ulanda kaminda e ta splika ku “IMF tabata e mukel di inhustisia ku Ulanda a uza pa limpia e aparato publiko i bati e esfuersonan (neoliberal maligno) di prome minister di PAR Miguel Pourier.” E resultadonan desastroso dje era di sera wowo pa e salbahe blanku ku e kreadonan di kapitalismo krioyo ta bistu. Di 2000 pa 2019 e rutinario adorashon pe makambanan no a desvia masha. Ketu bai liderasgo di tur sektor skondi o habri ta kere i anhela pa nos destino komo un pueblo lo keda kondena ku Ulanda. Bo tin un grupo kolonisa mentalmente te den nan igra i e otro ke sierto adaptashon den e relashon kolonial basta nan por yanga den un tera fertil di poder, prestigio i ganashi personal. Tur ta ingredientenan dje pan ku e diabel blanku a mansa pa nos kome.  Awo ta na nos pa kuminsa kou e wesunan dje skeleta di opreshon ulandes ku tin nos spanta i spoela nos spiritu ku aw’i huramentu pa anunsia yegada di un era rebelde nobo.

 

1 aña Jasmin Salbahe TV, Pabien Direct

charmone natural direct

Bon:
– Germone de Lima ku su kabei natural ta un imagen ku ta yuda oumenta e muhe pretu YDK di stima su mes tur dia di nobo ora e ta riba pantaya.Hobennan talentoso a hana un oportunidat di nan bida pa kuminsa mesora den grandi produsi notisia. Ratu ratu tin notisia mas agresivo mas amplio mas profundidat riba topikonan di momentu.

Malu:
– hopi sensashon, notisia di momentu (breaking news) pa loko, muchu hambra pa sanger   i destrukshon, bomboshi. Falta di notisia importante di islanan Aruba, Boneiru i islanan   ariba. No tin notisia di region Karibe i Latino Amerika i Merka.

– Programashon debil ku ta depende riba eksito di Kabei Boto, no tin nada pa mucha, hende grandi. No tin debate, foro, diskushon riba topikonan ku ta na ordu di dia. Siegu pa plaka pesei no ta mira ku Korsou mester un planta di televishon ku ta yuda eleva e YDK for di su situashon sosial ferfelu ku e ta aden.

– Novela venezolano ta un abominashon pa mente i wowo di YDK pretu. Kompanianan ku ta sponsor programa na televishon tambe mesora ta risibi e poder di manipula berdat den notisia na tv i radio. (Vanddis/MFK)

Pabien Jasmin Salbahe pero mane e disku ta bisa Tula te ainda no ta wak paso tin hopi koi drecha.

1795: Vense ó Muri

TULA 17 aug 2017

Den un entrevista na Z86 na 1990 Gibi Bacilio a bisa ku na 1795 e hende pretu sklabisa a lanta kontra e hudieu i protestant blanku ku tabata e shonnan di e tempu ei. E mesun gruponan aki ta e kousa di e sirkumstansianan di pobresa ku pueblo ta biba bou di dje. E elite dominante ta manipula e gobiernu i tin tur kapital riba nos isla. Gobiernu tin ku sinta na mesa ku e gruponan di poder i konvense nan pa buta nan plaka i propiedat na servisio di pueblo.  Su palabranan 27 ana despues ketu bai tin mesun balor. E analisis sosio-finansiero no a kambia strukturalmente ….ainda.

Preshon severo
ku ta nase den
sanger di hende
ta algu presioso.
Un kurason ta borota,
un kurason ta brota,
un kurason ta buskando
un salida for di
e tragedia di tormenta sosial.
Bo no por dividi i reina mas
Bosnan no por kima maishi mas
No tin posnan di awa mas pa venena.
E sanger nobo
ta kushi den
polbu di
magia i misterio
ratifikando
e huramentu libertado
di 1795.

E Debe Historiko di Banko Maduro

mcb sketch

Banko Maduro por a prospera henter un siglo largu debi na e labor pornada di hende pretu sklabisa for di e prome dia ku nan ansestronan a yega na Korsou. Ora sklabitut riba pampel a kaba na 1863 e famianan hudiu no tabata tin e humanidat sivilisa den nan kurpa pa krea un proseso di duna bek e poder finansiero-ekonomiko na e hendenan i desedientenan ku a sufri bou di e regimen di katibukrasia. E debe historiko ku MCB tin ku paga e komunidat pretu ta grandi i impagabel pero no tin skapatorio i e banko mas grandi su destino ta mara na e konsenshi pretu i demokrasia finansiero di Korsou ku ta desaroya su mes.

100 Logro di Kapitalismo Krioyo – Tur Mucha Mester Kome

 

100 logro - 17 ana pa kompronde ku tur macha mester kome

Kapitalismo krioyo ta inyekta un likodo di lubida berdatnan historiko den hende ku por trese kambionan struktural den sosiedat. Un ehempel klasiko ta e revelashon despues di 17 ana di un reportero ku semper a proteha i kome for di e gremio elite ku ta e arkitektonan di krea sistemanan opresivo kruel ku ta hasi hende pober na Korsou porfin yega na un konsenshi fini ku pobresa ta eksisti i konsekuentemente tur mucha pretu no mag di tin hamber.