Mac Alberto – Mensahe pa Kapitalismo Krioyo

dinamit Mac Alberto 1971 feb 11

11 di februari 1971 ta tin e alegashon ku Mac Alberto presidente di sindikato BTG a drenta sala di reunion di Kamera di Komersio hostina ku un pakete di dinamit pa anunsia e marionetanan di e elite ku kapitalismo krioyo ta matando e klase trahado pretu na Korsou i ku un djis abolishon di e negoshi neokolonial di sklabisa hende lo bira un realidat nobo.

Antikristu Chiki

Kabes i stoma ta gruña
un alkemestria ku ta duna empoderamentu spiritual
den regionnan selestial
kaminda Selikor
no ta pasa pa 3 siman.
I no tin niun partisipashon
na un quiz di matematika
paso much’i skol pober
no ta konta
Manera
Johan van Walbeeck
Schweitzer
Vigdis Mensing-Jonckheer
Schroeder
Papiando ulandes lo salbabu
Aktuando makambiá lo resusitabu
Periodista pretu
pero
e no sa ainda
Skibi, raporta
tokante su komunidat
mane e ta na
Terneuzen o Goeree Overflakee ainda

Atabo awo para den un masa
ta grita pa un kambio tur kara skarpion dek ta
wak bo straño.
Solidarismo un bisio,
pa bo sobrebibi
bo mester di niun sinti,
agrediendo, hode esnan
debalua ku semper
b’a skupi afo.

Labor pretu feminino barata
T’asina b’a gana bo miones
Niun fondo di penshun
Niun sindikato
Diabel stima plaka
paga un abogado
lage gaña ko’i kens
pa hende sigi kai
den e graf di
genesidio pretu finansiero.

Antikristu chiki
Kumprando kurason dje pueblo
Bendiendo koper pa oro
Wak nan den bo pantaya
Skucha nan na radio
Lesa nan den korant
Mira kon nan ta sita skritura sagrado

Pulpito di prensa pagá
ta mente di hende.
Basha káká riba e grupo
elektoral mayoritario klase trahado
bisa ku nan ta bubé
votando robes,
nan ta bobo,
selektando partidonan robes
pero ta nan plaka si ta soru
ku e patronisado komersial
por pasa aviso na
bo emisora pa abo i
bo klase di ‘hende drechi’
por kome.
Ekonomia politiko di falsedat mediatiko di hubilo.
Skucha bon nan kurason
ta pomp asido.

Radio un refugio di ribirishi
Korant un sanktuario di sensashonalismo
Empresario den su imperio perverso

Honor ne redentor
Boutisa den yorá di un
multi mionario, rifero
Mansedumbru t’esun ku kere
ku nan mes t’e salbado,
wak pa bo n’ hoga den
e arka di adorashon.
Baron di weg’i number
ta indoktrina un pueblo
i ekspropia miones feu
nan saku i bin broma ku
K I R I W I C H I
Un pastor ta indoktrina
ku beibel den man
ranka bo diesmo i
indignifika dons
di bo yumuhe.
Tata spiritual di
e apostel bon proteha bou
di alanan dje periodistanan angeliko

Ku boka ta konfesa
fieldat na Kristu
Ku kurason silensioso
ta sera aliansa ku Satan

Kuenta di banko na Suisa
YDK blanku ke ta e mesias ekonomiko i politiko di un pueblo pretu empobresa
Kuantu hendemuhe pretu ta doño di un pomp di gasolin?
Kuantu muhe blanku ta brasa bara na Piskelat?

Bo predikashi komersial pega den purgatorio
Bo fe frakasa den un fiernu temporal

Santoli p’e sinberguensanan

Antikristu chiki
Kumprando kurason dje pueblo
Bendiendo koper pa oro
Wak nan den bo pantaya
Skucha nan na radio
Lesa nan den korant
Mira kon nan ta sita skritura sagrado

Estado di hendemuhe 2016 i Prensa Emansipatorio Feminino

dh16

 

Min Ruthmilda Larmonie-Cecilia su mensahe pa Dia Internashonal di Hendemuhe ta un di e momentunan pa reflekshona riba aktonan heroiko di kurashi i determinashon di hendemuhe, pa eksihi nan emansipashon den un mundu di muchu desigualdat struktural. Emfatisando ku e historial di hendemuhe na Korsou mester keda inklui den e kurikulo di ensenansa pa alsa e konsenshi di lucha den e proksimo generashonnan. Mirando ku te ainda e bataya pa balora hendemuhe no kaba e minister a publika datonan di Ofisina Sentral di Statistik pa duna un bista ku sifra kon e posishon di e hendemuhe na Korsou ta desigual:
– 1 yanuari 2015 – 85.258 hende muhe i 71.713 hende homber
– 12,8% desempleo pa hendemuhe
– 10,5% desempleo pa hendehomber

– 31.976 hendemuhe ku trabao na 2015 i 6% tin un empresa chiki
– 29.846 hendehomber ta traha i 11,3% tin un empresa chiki

Promedio entrada pa luna bruto pa hendemuhe na 2011 tabata Kfl. 2.483,-
Promedio entrada pa luna bruto pa hendehomber ta Kfl. 3.690,-

Kasnan di famia ku un hendemuhe na kabes e promedio entrada ta Kfl. 3.891,-
Kasnan di famia ku hendehomber na kabes e entrada promedio ta Kfl. 6.389,-

E situashon familar ta trese kune ku kasnan di famia tin pa 44% un hendemuhe na kabes, ku chens grandi ku e kasnan aki ta kore e riesgo pa keda enfrenta ku pobresa 35% kompara ku ora un hendehomber na kabes 17%.

Tur e sifranan aki ta yuda pa forma un vishon kon e eksperiensia ta di ta un ser feminino na Korsou ku tur su retonan riba tur tereno. E ta konfirma tambe kon atras pega den kouchi boulo sierto hendehomber den prensa ta ku ta habri mikrofono pa miles di hende skucha deklarando opservashonan kontra-emansipativo. Un hendehomber tin un privilegio hopi grandi na Korsou kaminda su opinion den komunikashon radial ta domina riba e tiki bos feminino ku tei. Tin sigur dos bosnan maskulino na MAS99 ku frekuensia i konstistensia ignorante ta bosifera ku e era di e hendemuhe ‘debil’ a kaba. Nan filosofia ta ku e hendemuhe di awendia ta ‘skerchi’ i ku nan ta mesun abusado of mas abusado ku e hendehomber i ku no mester wori mas ku ponementu di emfasis riba nan desaroyo pasobra nan ta “igual” awoki riba tur nivel segun nan. Nan ta bai asina leu di hinka un malchi di manipulashon mediatiko den kabes di hende pa bai di akuerdo ku e pensamentu falsu aki. Pa nan no mester papia riba dianan speshal pa hendemuhe, sea ta dedika pa eleminja violensia domestiko, relashonal o kalke otro dia por ehempel pa salud di hendemuhe komo kombatiendo kanser di pechu. Ku nan silensia kalkula di boikotia kada oportunidat pa yuda emansipa outo-determinashon feminino sosio-ekonomiko i alsa e outo-estima di un hendemuhe nan ta kulpabel di e progreso stanka di e ser feminino ku nan di nan ta stima asina tantu.

Programanan di opinion ku ta reina awoki ta pa mayoria okupa pa hendehomber, esaki tin ku kambia pa pone un balansa den e espasio di krea persepshon publiko. no por tasina ku for di mainta Korsou ta lanta, yega merdia, te atardi i hasta anochi kasi tur bos ku bo ta skucha na emisoranan, lesa den korant, mira na televishon ta produkto di sea un hendehomber direkt of indirekto . Mirando un kara feminino na televishon no ta nifika ku e tabata esun ku a disidi kiko lo bai bira notisia. Ku mas independensia di hendemuhe den prensa e notisia lo bira mas miho i mas informashon for di e brel di e hendemuhe lo sali ku lo yuda hiba e hendemuhe bai dilanti den su bida ora nan tin e herment di konosementu na nan disposishon. E konbersashon mester keda habri den prensa pa tuma pasonan konkreto ku lo garantisa komunikashon sosial emansipatorio feminino.

*(Kfl. – Korsou Florin)

Edsel Evertsz, Un Bos Soshal Den Mundu di Komunikashon Radial

IMG01464-20160212-0920

Djasabra ultimo a rekorda un dekada di e ousensia fisiko di un produktor grandi di notisia na Korsou.
Un Santu Sakrefisio dedika na e hefe di redakshon di radio Hoyer sr. Edsel Evertsz ku den su tempu a pone un emblema den opserva desaroyonan notisioso i transmiti esaki na su manera pa e publiko. Ta un misterio ku despues di dies aña ni doño di radio Hoyer, su koleganan i kompañeronan den atmosfera di prensa no a yega na e konklushon inevitabel ku mester duna un sorto di homenahe na su persona den forma di un premio di periodismo, un konferensia, debate nashonal pa konsientisa mundu di prensa pa alsa nan nivel.

Edsel Evertsz a duna su pida den periodismo radial i speshal den e oranan di atardi kaminda e tabata habri e oportunidat pa pueblo por a yama i duna su opinion. Den un era kaminda e programanan di ‘yama papia’ tabata basikamente reserva pa Z86 i Hoyer. Manera 5’or bati tur hende tabata klaba pa skucha Edsel ku su topikonan di dia ku a yuda yena korantnan ku fasildat. Transmishonnan maratoniko no tabata algu abnormal, papiando oranan largu riba perspektivanan politiko, soshal, kultural ku ta influensia bida diario. Ta straño ku su aporte pa e klima di opinion i indirektamente huntu ku e oyentenan un tesoro di edukashon sosiopolitiko no ta keda rekonose pa e mesun komunidat di medionan di komunikashon. E ta rekonfirma e kultura di ignoransia den prensa pa uza historia i su hendenan di balor pa un ruta di asenshon pa evalua i eleva e produkshon di notisia na un nivel liberatorio pa tur su suidadanonan. Den tradishon di Edsel por konstata ku e zamurunan i hendenan sabirrrr nunka lo siña.

Prensa Plézi

E prome mainta di e luna di yanuari, dies or a bati un notisia di ultimo ora ta drenta na radio Hoyer, e reportero ta relata un suseso fatal kaminda 3 homber i un kuchu a laga Suffisant sangriente. Despues dje notisia di e prome dia di ana e lokutor bake feminino ta sigi ku su animashon, tokando un Tumba alegre di Doble R pa su oudensia mane nada speshal a pasa, komosifuera e prome nobo di morto no a kaba di sosode mes.

3 di yanuari Korsou atrobe ta spierta ku un otro notisia di asesinato, na mesun emisora e moderado di e programa di notisia i opinion ta prefera di no pone muchu atenshon na 3 hende morto den apenas 1 siman, e topiko di un ora i mei ta bira trafiko i strepi riba kaya.

Fin di 2015 den pitu Extra ta publika un deklarashon di parlamentario independiente Marylyn Moses kaminda e ta indika ku pa 2016 mester wak e votado bon paso nan a kwe un fada ku politika i si no tene kuidou nan por basha nan bala pa MFK. MAS99 ku ta keda patronisa pa MFK no ta hisa e notisia feu suela, sobra medionan ta drai kara hasi mane nada no a pasa kaminda par’i siman atras a uza mesun parlamentario komo e klabu pa dal e kaha di morto gubernamental sera.

Ta ora media ke, na nan kumbiniensia, ta wak kon por manipula ku notisia pa laga nan partido, interes ekonomiko, finansiero preferi lusi. Na Z86 no ta otro, einan bankeronan, presidente di banko sentral ta papia prome i na mayoria okashon einan so. Den nan resumen di ana 2015 nan konsentrashon tabata riba politika batiendo minister plenipotensario Marvelyne Wiels, Pueblo Soberano for di tur proporshon. E sektor priva no ta risibi mesun skrutinio eksagera, kasonan di froude mionario na Giro Bank no a keda menshona, Eric Garcia a keda proteha. Emsley Tromp su kontroversia na banko sentral ku raport KPMG i Kontroleria General, no a keda papia. PNP ku a sakrifika minister Balborda i ku un sra Verginie ku e kaso di aksidente durante marcha karnaval no tabata notisia di importansia humano pa nan. Cft ku a deklara ku sektor priva, bankonan i otro institutonan finansiero tin ku hinka man den kaha fuerte i inberti plaka den Korsou tampoko a risibi e atenshon nesesario pa e emisora pionero na Otrobanda.

Parlamentario Moses ku a dera gobiernu pa un minuto, no a bai den profundidat pero eks prome minister Asjes su retiro insplikabel si a fiesta kune, C-tex e proyekto di sentro di data fantasma ku a bai sawaka tampoko a elabora riba dje pa proteha nan hirarkia finansiero.
Dos ora i mei un resumen di ana di Z86 a resulta un hilaridat anto ketu bai den un shelu di pretenshon ku nan ta praktika “periodismo responsabel” manera nan mes ta kalifika nan mes den ” e resumen kompletu, e analisis final” di 2015.

MAS99, Krioyo, Fiesta FM na 2015 tabata entre otro e defensor di MFK, Robbie Dos Santos, Sure and Joe Black lottery. Gilbert Sparren no por a wanta e situashon manipulativo na MAS99 mas i a bula waya bai serka Direct kaminda e ta profila hopi mas miho ku un outoridat periodistiko ku tabata hasi falta na su delaster dunado di trabao. E fayo grandi ku Sparren a hasi ta pa pretende ku pueblo no tin mester di sa pakiko ela transishona pa un otro emisora. Periodistanan, reporteronan i propietarionan di media ta hole stinki di un arogansia di poder informativo kaminda nan ke sensura e berdat pa motibu di argumenta ku no ta pueblo su asuntu dikon un miembro di prensa ta hasi un mudansa laboral.
No solamente fresku pero tambe kulpabel pa tene un pueblo den ignoransia i sigui krea un airu di skonde kos i kore pa nan responsabilidat di enfrenta otro medionan di komunikashon riba nan aktonan di imoralidat den media.
Tur esaki ku amen di e grupo di periodistanan elitario ku a asisti e tayernan di UNESCO ku ofishalmente a kompromete nan mes pa alsa e nivel di produsi notisia na Korsou.

Den un pais ku pa mayoria ta identifika su mes komo kristian ta rebaha su mes ora e ta asepta ku ‘niun’ media a transmiti e ayuno I orashon nashonal hasiendo nan mes un dje kumplise mayo den kreando i alimentando e asina pa nan mes yama ‘krisis’ ku nos ta den. Ta resulta ku preparashonnan pa karnaval te dios di rango muchu mas haltu. Lo ta otro si nan Hesus tabata na bida i lo keda krusifika e ora ei si nan lo bai bibu mesora pasobra sanger ta bende, atentonan religioso di salbashon i sanashon di un nashon no ta konta den nan mundu komersialisa.

Reportero di Direct despues di un entrevista ku un parlamentario ulandes a keda enkurasha pa duna supermerkadonan ku nan preisnan haltu un kritika bon funda pero pa mesun moneda e boka grandi no ta habri papia riba un raport ku banko sentral a saka kaminda ta bisa ku ekonomia di bon di fiansa ta abuza di e fiado den nesesidat kaminda nan ganashi ta muchu grandi. Bon i otro fiansa mikro ta patronisa emisoranan manera MAS99 i Direct i pesei e raport nunka a bira notisia paso GL, MAS i otronan ta hana plaka pa pasa propaganda i aki e interes di pueblo no ta keda defende ku boka hanchu.

Kritika riba manego finansiero di bankonan ta keda bosifera sporadikamente pero ora presidente di Banko Sentral tei den studio di p.e. Direct e interogashon periodistiko ta dirti. E kabes di Banko Sentral na varios okashon a atverti ku nos nivel di bida ta muchu haltu. Lokual e kiermen ta ku klase medio i haltu ta fia, i spat plaka na kos ku no ta na nodi pero prensa iresponsablemente no ta profundisa den dje paso esei lo afekta su patronisadonan ku ta nifika un perdida di entrada ora ta eduka pa no hinka man den bo potmoni, hunga duru i konsumi produktonan pa loko.

Tabata prome minister Whiteman den su diskurso di ana nobo a duna signifikashon na e fenomeno di kolonisashon di plaka. Akinan prensa a hanja un oportunidat pa borda un diskushon publiko meskos ku tin awoki riba hisamentu di salario minimo. E dialogo riba entrada basiko nunka tabata un topiko pa media, i atrobe esaki ta keda refleha ora Direct ku konsistensia tin e privilegio komo un dje emisoranan popular di por entrevista minister di finansa Jose Jardim. Su dilanti den studio e entrevistadonan no ta hasi e pregunta kardinal ku e mester a hasi for di 2012 ora e titular di finansas a sinta: “Kiko lo ta e posibilidatnan pa oumenta un salario minimo teniendo kuenta ku Cft i presepuesto?”.

Ganando konfiansa di pueblo no ta bin ku hungamentu badjon tras di mikrofono ora esnan responsabel pa e malora ekonomiko-finansiero no tei. Ta tuma madures di tur akshonista den media pa sali na defensa di pueblo. Kibrando ku e miedu pa tene direktornan di kompanianan den sektor priva responsabel ta un riesgo grandi pasobra prensa su modelo ekonomiko ta traha pa drai riba nan plaka. Den un ana desisivo pa vota pa un parlamento nobo ku un gobiernu nobo e reto mester ta pa legumai e konkelmentu di manipulashon mediatiko i kuminsa stima e pueblo di berdat enbes di plama e meskla antikua di trese mitar berdatnan pa mantene e situashon sosiopolitiko i satifase e podernan ku ta goberna trai kortina na Forti. E lunanan benidero hopi kos lo pasa i pueblo lo testigua ku nan no ta interesa mas den e platonan putri ku prensa ke pusha den su korokoro.

Produkshon di notisia mayoria bja ta propaganda, e ta krea mensahenan ku ta konstrui karakter, aktitutnan pa laga hende pensa i aktua di djalunaa pa djadumingu den un malchi kolonial ku lo trese menos kambio posibel pa tene esnan ku poder i fortuna na Korsou den un posishon djingueri. Media un instituto ku ta trata su konsumido komo un mitar ser humano ku no merese atenshon informativo kritiko pa e sali for di e berans soshal ku nan a kondishone pa keda aden lo peligra su eksistensia ku ta mara na e eksplotashon ekonomiko ku ta kadukando.

Burda pa plaka te mannan ku a koba e buraku entre notisia di kalidat emansipatorio i notisia mediokre senshonalista. Dekadanan largu hefenan di redakshon, dononan di korant, televishon, wepsait, emisora ta fayendo den kibrando e aliansa ku kapital krioyo pa edifika un nashon. E tiki espasionan ku ta ofrese notisia riba sierto kalidat na sierto momentu por broma falsu pasobra ta e sobra mundu di media ta mediokre, no ta paso nan trabao ta asina fantastiko pero pasobra nan kompetidornan ta hasi un mal trabao. Ta e prosesonan aki ta soru ku esnan ku ta hunga rol di ta un medio di komunikashon konfiabel di kalidat haltu nunka ta sinti e preshon pa mester oumenta nan nivel ku defakto den ana 2016 mester ta un dje aktornan prinsipal pa transformashon struktural. Tin yen reto, tin boshi hende ku mester arepenti, pueblo di Korsou semper ku konsistensia a demostra ku nan tin e abilidat pa pordona, un transmishon di karnaval den HD no te kos. Tur esnan enbolbi den prensa sa ku no tin skapatorio o mane magno kanto-outor Nildo Martis a kanta: “Kambia bo manera…”.

Periodismo Dekolonial, Deboshon Na Esnan Empobresa

“Na Korsou no tin asuntu di pretu ku blanku.” – Angelo Virginie komunikado sosial na radio Hoyer reakshonando riba e protesta kontra Zwarte Piet

“No hinka Tula aden” – Orlando Cuales den Tertulia na Z86 reakshonando riba e protesta kontra Zwarte Piet

“Kwa medida ku bo mester a tuma bo ta mas orguyoso di dje?” – Anneke Polak periodista ulandes na Paradise FM den un entrevista ku minister di finansas Jose Jardim

Semper bai e speransa ta keda karga ku entidatnan i personalidatnan den media lo hiba e fishi di produsi notisia na un nivel haltu ku lo akompana un pueblo na kaminda ku inkonsientemente ta enbolbi den batayanan diario pa deshasi di e pispis di sklabitut i kolonisashon. E kouchi kolonial di awendia ta bin den diferente forma, un di nan ta e manera kon komunikadonan den media ta suministra notisia adapta na e realidatnan di e interesnan finansiero ku ta patronisa nan dunado di trabao. E Tambu ku keda toka pa tur hende skucha i baila riba dje ta esun ku kapital ta aproba su letranan i koro. Den un momentu eksepshonal por desvia i ekspresa sierto berdatnan ku lo spierta e publiko pero esei por keda kalifika komo aktonan suisidio laboral.

Ayera den e programa di notisia na Paradise FM e titular di finansas a keda entrevista. E periodista hoben feminino en kuestion ku a bin for di Ulanda establese su mes na Korsou opviamente no a lesa e raport di ECLAC un entidat di Nashonan Uni riba nivel di ekonomia-finansas ku a bedei ku e islanan den teritorio ulandes mester fleksibilisa e akseso na e merkado finansiero pa mehora e nivel di bida pa esnan ku entrada abou i e negoshinan chiki i mediano. Falta di e konesementu spesifiko aki ta lanta ora no tin sufisiente interes pa bringa pa balora bidanan pretu empobresa. Mester ta di naturalesa ku un periodista ta puntra un mininster di finansas ki dia ta bai implementa e hermentnan gobernamental pa adapta e manego bankario pa hende ku entrada abou? Medidanan ku a viktimisa gran parti di e populashon ta tin un impakto pero keda sin interoga e punto aki lo kai den e kategoria di komplase e manegonan neoliberal ku a mortifika bida sosial na Korsou. Ehempelnan di un muestra di empatia pa e klase trahado pretu lo tabata si a konfronta e minister ribaa e fabula ekonomiko-finansiero ku mester fleksibilisa leinan laboral pa klima di invershon drecha. I kon por hinka hopi mas plaka den ensenansa pa garantisa un futuro fortifika pa alumno nan ku awoki ta kai den e abismo di drop out, krimen of e bida di salario minimo paso nan no tin sufisiente pampel eskolar pa subi den sosiedat. E pashon pa informa solamente e interesnan di e komunidat ulandes i YDK klase medio ta opreshon mediatiko, e ta un kouchi kolonial ku ta mantene e strukturanan di poder den mes un posishon dominante i ta laga esnan desempodera pa nan kuenta. E alternativa ta pa demokratisa notisia, tumando responsbilidat rasial, rekonosiendo privilegio blanku periodistiko i kria un kultura di un konsenshi pa protega e klase trahado ku ta kargando e sosiedat ku nan sodo i sanidat.

Periodismo emansipatorio ta nifika ku un komunikado sosial mester ta na altura di e historia di sklabitut, kolonialismo i kapitalismo karibense i e maneranan ku esei ta manifesta na Korsou. Ta un imposibilidat ignorante ku na un emisora di mas ku tei mas ku un mitar siglo den kasnan di hende ta sali un ekspreshon falsu ku na Korsou e problematika di rasismo no ta eksisti. E mesun mentira mediatiko ta keda ripiti na un otro frekuensia radial ku ta manipula mente di e skuchado ku Tula nunka tin un konekshon ku un protesta kontra e figura rasista Zwarte Piet.

Periodistanan no tin e komprenshon, ni ke buska konesementu kon rasa, klase, genero i kapital a krusa den otro i laga e sosiedat aki drai. Disendente nan no ke ta paso esei lo trosa nan zona di komfort den kapitalismo krioyo. UNESCO ku mester tabata instrumental den honra e dekada pa hendenan afrodesendiente ku ta kana di 2015-2024 no ta sinti e nesesidat pa asuma su responsabilidat pa eleva e kalidat di periodismo pa lokual e ta risibi fondo di Nashonnan Uni.

Zonidonan ku na 2016 un otro koro lo kanta no ta na horizonte ainda. Podernan den prensa lo no stop laba man tanten pueblo no sali pa salba su mes.

5 Aña Despues di 10-10-10, Un Lustro di Lamento

“Ta tin preshon riba hopi radio, a ordena pa nan kopera, emisora ku n’ kopera temp’i elekshon ta keda kumpra. 10-10-10 warda 10-10-10.

“Banko a kobra. Su sen di bono, haña sen kompletu paga i mesora nan a propaga interes di spar lo keda baha” (c) Chin Behilia

Den e temporada di 2005 pa 2009 kaminda pueblo den un klima di informashon konfuso riba nivel akademiko mester a disidi den un forma manipulativo ku nan ke biba den un Korsou outonomo den reino ta tin hopi bataya pa gana e guera di identidat pa mantene e elite ekonomiko na poder. E trayekto pa yega na un restrukturashon estatal tabata plama ku susesonan kaminda por detekta kla kla ken tabata na fabor na negosha debe di gobiernu pa un outonomia na mochi. Bo ta tin e independentistanan ku tabata kontra rekolonisashon ulandes, e otro banda dje spektrum tabata e eks pro Antias ku a haña nan mes ta boltu pe finansas i a bira vlatapa outonomista ku hopi rasinchi holandia i mei mei bo ta tin esnan ku no kier a mira Korsou tin su mes pasaporte komo pais soberano ni tampoko tabata kere den un status aparte plus manera Aruba pero karakteristikanan kan kan lealtat na e gobiernu di Den Haag.

Na desember 2006 e minister di finansas di PNP sra Ersillia ‘Zus’ Delannoy tabata asina ariba abou dje agitashon popular ku Helmin Wiels a laga baster riba e proyekto estatal di PAR i PNP ku e a propone pa sientifiko sosial bai inbestiga e estado psikologiko dje poblashon pa buska un manera kon ta deshasi di e kompleho di inferioridat. Segun Delannoy (Amigoe 15 dec) den un debate den parlamento hopi frustrashon a bin ariba i palabranan manera ‘kurasoleño legitimo, enemigu komun Ulanda i un bataya entre pretu ku blanku’ a skeiru pa dera e slotverklaring of mas popular bisa: ‘sloti’. E inbestigashon mester a saka afo ‘kiko tabata robes den sosiedat’. No muchu mas lat prome ku referendum di 2009 e minister di finansas tabata forsa pa revela su mes kompleho ora a sali na kla ku e ta tin un diskushon ku diputado di struktura estatal sra Zita Jesus-Leito kaminda ela tilde di ‘stop lembe e makamabanan’ poko durante e supuesto negosashonnan pa Korsou outonomo den reino.

E kara di Frente Obrero Liberashon Trinta di Mei 1969 pa hopi tabata Papa Godett ku a vishona e partido komo un wardado pe pueblo pretu ku a keda marginalisa den un pobresa krea pa e elite blanku i ulandesnan aki i na Ulanda. Bou di guia di yu Anthony kos gradualmente a kambia. Durante e kongreso statuario na november 2005 despues dje referendum konstitushonal a konklui ku pa FOL e Yu di Korsou ideal mester ta: “Un persona ku ta mentalmente independiente, ku un sentido haltu di patriotismo, ku un grado aseptabel di formashon i preparashon i ku ta kumpli ku su responsabilidatnan komo siudadano.” Den mundu nobo di FOL finansiamentu for di Den Haag lo mester a krea sirkumstansianan pa e gobiernu lokal huntu ku komersio por a bira e skulptor di e YDK nobo, serando un aliansa ku partidonan neoliberal ku net kontrali dje idealismo di FOL a konstrui dependensia mental i patriotismo ulandes pa e yu di tera ku tiki preparashon pa sirbi e interes ekonomiko di kapitalismo krioyo.

“E debenan di pais (Antias) no ta debenan di Korsou i no mester keda buta riba e isla (Korsou) ku o sin yabi di repartishon. E debe di pais (Antias) ta un debe di reino. Ulanda ta liber pa kita e debe aki o responsabilisa reino pe.” Erich Zielinski (2005)

PAR e arkitekto di e remodelashon estatal a opta pa plaka ta e salbashon pa un pais. Ku nan minister-president Emily de Jong-El Hage ku a keda sinkretisa komo santu patron dje rikunan krioyo, klase medio konservativo i ulandesnan. “Ulanda stima nos i bo no por kome dignidat” tabata frasenan memorabel di su identifikashon ku e (eks) kolonisado i e saku di plaku ku por a reskata i dignifika bida di hende enbes di terkedat outonomista i independentista kedando bashi den ‘miseria’. Ehempel klasiko di e amor pa Ulanda dje grupo spesifiko aki tabata ora De Jong-El Hage riba 10-10-10 mes band’i prinses Maxima i prins Willem-Alexander na Awasa malu malu purbando di kanta Wilhelmus e himno di Ulanda huntu ku e pareha real. Sin sa 97% dje letranan tirando para, riba un karaoke konstitushonal tratando di demostra bon sirbitut karibeño.

(La Prensa 3-3-2005) “Komishon referendum ta bisa ku “Pa Ulanda tambe e resultado ta obligatorio, pasobra a base di e Karta di Nashonnan Uni eks potensianan kolonial tin “e deber sagrado” di ehekuta deseo di di pueblo di e eks kolonianan pa nan fiha nan propio futuro estatal. (artikulo 73 di e Karta di Nashonnan Uni) Aki no tin kuenta di negosha, sino di un deber di ehekuta denter e margenan di loke ta rasonabel i hustu.”

Media ku su poder informativo, manipulado, influensiado a sentralisa tur su propaganda traha pa e gruponan di interes mayoria bja riba hende pretu klase trahado. Ratu ratu ta tin avisonan politiko dirigi spesial riba e komunidat chines, ulandes, kreyol i latino pero gran parti tabata konsentra riba e YDK-Afrikano.

Sanea debe paso e miedu di para riba derechinan di dekolonisashon ku ta obliga e pais kolonisado pa hiba su (eks) kolonianan na nivel igual komparativo pa nan mes por drei ku tur kapasidat tabata un konfrontashon di anarkia pa e koalishon di PAR ku ni e aliansa di NO por a ehekuta despues ora nan a gana elekshon na 2010. Den un flip flop historiko a firma pa bai di akuerdo ku leinan di reino ku nan a hura di lo ninga te den porta di shon arei.

5 aña despues di 10-10-10 por konklui ku tur ideologia politiko huntu ku komersio, sindikalismo, gruponan sosial, religioso i prensa a soru pa un obediensia nashonal pa laga e proyekto kolonial kana su ruta trapando e derechinan di dekolonisa i independisa un pueblo den tur skina. Esaki a normalisa un degenerashon demokratiko, lubidando ku nan mes tin e herment politiko no solamente na urna pero tur momentu pa organisa nan mes komunidatnan pa harma poder komunal pa transforma e opreshon di estado i komersio.
E proseso di para na kantu, laga kos pasa riba pa un forsa ku ta parse mas grandi ku bo ta un karakteristika kolonial di mentenan kaptura. Hende ta apstene nan mes pa enbolbi nan mes den akshonnan di sakrifisio pasobra nan a keda sosialisa ku e meritonan di drei un bida kaminda seguridat sosial i un salario fin di luna ta mas satisfaktorio. Di tur angulo e saku di plaka ta un insentiva pa fria kalke moveshon di rebelion kontra situashonan sosio-ekonomiko indesea i e estado mental ei ta tremendo tera fertil pa e fe kapitalista yanga den.