Preguntanan Bou Dje Pal’i Pasku

1. Bob Pinedo por keda honra na momentu e hospital nobo ta kla i nombre na dje pero pa integridat mediko lo ta mas perfekto si ora Bob bedei i ekspone e kompanianan den e ekonomia di kome i bebe ku (segun fondo prinses Wilhemina) ta kousa 8 pashentnan di kanser pa luna o no?

2. Lio Capriles mes a kontribui na e eksploshon di e industria di kuminda i bebida komo bankero, destrukshon di agrikultura. Pakiko tantu alabamentu pa un baron finansiero ku a yuda di hinka nos dieta nashonal den kuido intensivo motiva pa kriminologia kapitalista?

3. Ripara kon e notisia di WHO(World Health Organization) ku a deklara ku karni kora i karni prosesa ta kanseroso pero prensa no a interoga kompanianan di import, industria di kuminda?

4. Pakiko no ta tin e inteligensia emansipatorio sinematografiko pa hinka e asuntu di reparashonnan den e pelikula Doubleplay honrando Frank Martinus Arion su vishon pa kobra NL pa sklabisa kolonisa Korsou i sinkronisando CARICOM su mishon di 10 punto pa hustisia reparativo?

5. Filantropo Jacob gelt Dekker nunka mas a bai buska studiantenan di Harvard mane ela hasi na 2009 pa manipula referendum? E no ke pa YDK papia riba sklabitut pero e ta propaganda su museo ketu bai ront mundu komo un di esnan mas grandi den region riba e historial di sklabisa hende Afrikano?

6. Dick Drayer no por a menshona den su NOS artikulo ku NL ta obliga pa finansieramente yuda Boneiru segun prosesonan di dekolonisashon di Nashonnan Uni, strano no kon periodismo blancha ta opera pa mantene un publiko blanku den nan bobedat rasial ku ta alimenta partidonan politiko na Den Haag pa mantene e mesun posishon kolonial frusa.

7. Tin un ordu den media NL na Korsou pa nan no hasi periodismo inbestigativo riba e matris di e 100 makamba ku poder finansiero riba e isla aki?

8. Propetario di Vigilante Lilo Sulvaran por a uza e siman di referendum pa Boneiru pa kuminsa lansa un proyekto pa Korsou evalua via su korant inbestigativo si nan ta di akuerdo ku e leinan di konsenso ku e semper ta kritika. Ta abnormal ku e no ta praktika loke e ta predika den su korant, 2 pagina dedika na notisia di Ulanda, 2 pagina pa Aruba, 0 artikulo, pagina djaluna pa Boneiru, un hende di: “sin karakter e ora ei?”

9. Pa medio di parasita riba dolo pretu, hendenan ku a keda importa kontra nan boluntat for di Afrika un kolonia di hudieu por a krese paso nan sobrebibensia tabata pa vampirisa riba hende pretu, sigi dehumanisa nan te ora nan poder finansiero por a keda konsolida den un banko Maduro & Curiel ku awoki ta selebra 99 ana di eksistensia. Hipokresia nunka mester di un forlestu paso ku e hendenan aki e lo no muri nunka, den silensio ta rekonfirma ku karanan skur no tin mag di ta hefe ehekutivo di un banko ku ta drai riba plaka pretu. Bo banko di amigu berdat?

Deklarashonnan Domferstan (1)

“Ta hende ku mente rasista ta bin ku e kosnan ei. Nan ta hinka odio den pueblo. Zwarte Piet tur ten a sali feu chimenea pesei e ta pretu. E mesun hendenan, ta nan ta straight nan kabei. Bo no mester tin kompleho.” – Jasmin Pinedo, direktor di Direct 107.1 FM a lanta ku un frustrashon ku e no por a skonde mas 9 dia despues di 5 di desember. Manera korektamente Jason Fullinck ko-organisado dje protesta kontra e spoki rasista a splika ku ni maske Nashonnan Uni, sientifikonan sosial i hopi otro mas a inbestiga i konstata ku Zwarte Piet ta tirania rasial hende ku ta propetario di un emisora ta sigui sapatia maledukando nan publiko skuchado.

“Ami no ta bai kana den un marcha kontra violensia kontra hendemuhe. Mi no ta di akuerdo ku esei. Mi lo bai un marcha ora ta protesta kontra violensia di tur hende.” – Juny Joseph moderado di programa di opinion na MAS99 strukturalmente no ta kompronde kiko ta nifika un proseso pa hendemuhe emansipa su mes. Na Merka hende blanku konservativo ta puntra “pakiko Black Lives Matter? Ta All Lives Matter tog? Sr. Joseph ta hasi mesun kos, silensiando e bos dje hendemuhe, su agensia, su poder pa yega na derechinan igual, pa por biba kome ser humano i no un opheto karnal pa sirbi hendehomber.

“Mi tin sentimentunan sosial pero mi no ta un sosialista…” – Marilyn Moses parlamentario independiente a rementa un gobiernu pasobra ela konstanta ku su eks partido PAIS no ta tin un kurason sosial pe pueblo i reporteronan di Direct a puntrale ki sorto karakter politiko e ta tin. Un gagamentu a kuminsa, skohendo su palabra ku koutela ekstremo pa nan no yame un Chavista den futuro lokual por herida su karera, ela bira, trose lenga purbando di tapa su solo sosial ku un dede politiko.

Hombernan ta baiendo Campo Alegre pasobra e muhenan YDK segun bosero, direktor Marlon Regales no ta dje avansa den desaroyo seksual ku e muhenan Latino. Institushonalisando un preferensia pa muhenan Latino, menospresiando muhenan YDK ta un akto di genesidio pero podise esei Sr. Regales no a sina ainda den su lesnan komo agente di lus na Kas di Kultura.

“For di dia a kambia e nomber den HWB e aksidente a oumenta, of tin ku purifika? – Kita e nomber, laga pastor obipu bendishona e kaya ei.” Mariano Heyden periodista Z86 tambe tin difikultat ekstremo pa okulta su odio pa Wiels, un erupshon diaboliko a terorisa su oudiensa na momentu ku ela uza disaparishon lamenta di Aisha Quirindongo komo arma mediatiko pa asesina lider di Pueblo Soberano di nobo.

“Hende ku ta bai jazz festival ta hende drechi, hende nechi pero e hende ku ta bai wak futbol den stadion ta hende porko papiando palabra malu. Ta porkeria nan ta..” Etienne Rosario i Yves Cooper deshogando nan mes despues di Curacao North Sea Jazz festival den e programa di opinion Tribuna Popular na Hoyer kaminda e hendenan ku nan ta yama porko ta e hendenan nan tin ku gradesi ku nan bida si por keda biba den un forma ‘drechi, desente.’ Ta e falta di konesementu sosio-politiko, historiko ku ta laga hende ku komplehonan di superioridat kere ku e klase trahado pretu nunka tabata un konstrukshon di e podernan elite i kolonial.

“Ora nos hende tin ku duna servisio , ya kaba esei ta sklabitut. Mi ke bai asina leu ku ya ora hende lanta feu kama ku tin ku bai traha, ya esei ta un sklabitut pa nan.” Joel da Silva Gois gerente di Goisco despues di un kontrol rigoroso i no-faborabel mediatisa pa depertamentu di labor den un ‘entrevista kani mi pa mi kani bo’ sostene pa Yves Cooper na CBA television. Un otro ehempel kon kapitalismo krioyo a krea situashonnan sosial i kon eksplotashon laboral, pobresa pretu, Apartheid edukashonal no tin prioridat pasobra esei lo afekta negativamente e kresementu ekonomiko di 0.277 %.

Moketa Anti-Kolonial den Hantskun di Felpa

E kara ku nan tin no ta nan kara no, e kara ku nan tin no ta nan kara. Di dilanti tin dobel kara, si bo wak bon di dilanti maskarada. Satanas nan tata konosemi kaba si, Satanas nan tata konosemi kaba. E sa ku mi ta yu di Rastafari, e sa ku mi ta yu di Rastafari…  (c) Goldy Locks – Dobel Kara http://www.youtube.com/watch?v=7V6y96T_DsABrigada di kolonialismo

Arestonan di e liderasgo di partido Movementu Futuro Korsou a keda kalifika pa nan mes i fantikada bou di giua di e medianan ku ta simpatisa o keda patronisa pa e ala finansiero di MFK komo aktonan kolonial di gobiernu Ulandes sinta na Den Haag. Nan meta lo tabata e ripitishon dje senario ku lider di Frente Obrero Liberashon 30 di mei 1969 Anthony Godett a pasa den na kuminsamentu di siglo 21 na momentu ku ela keda akusa i sentensia pa un kaso di froude. E rasonamentu politiko tabata ku FOL tabata muchu sosial i lo stroba e ruta neoliberal, un merkado ekonomiko liber sin muchu regla, lei, vigilansia di gobiernu kaminda por hasi i deshasi ku e trahado i su bida pa ganashi komersial. Pa Godett e gritunan anti-kolonial no a resulta ku su votadonan un mayoria respeta e tempu ei na 2003 di 8 asiento a sali bai kaya, mobilisa protesta kontra un hostilidat ulandes politiko di ekterior i sostene pa e elite reinante den komersio.

Un Saliña choria ku un par di mil hende pa bin wak bandanan popular di Ritmo Kombina i Tambu paga pa MFK simulando ku nan tin un sosten popular grandi no a keda replika e periodo kaminda e dos lidernan Schotte i Jamaloodin a keda detene pa outoridatnan. Partiendo lot pa gana outo enbes di duna strukturalmente edukashon politiko popular a presenta un kuenta di kasi niun sosten di e pueblo votado di MFK ora e dos lidernan a keda libra tentativamente for di nan selnan di polis na Barber, Banda Bou ni maske e kameranan di televishon kwe angulonan straño pa purba di tapa e bashi di hende presente. Na momentu ku un partido i su sirkulo sosial ta deklara ku Ulanda ta konspira pa efektua un kaida di un organisashon politiko bo mashin di harma protesta via kanalnan di institutonan hudisial lokal, na Ulanda i den bo region mester ta zetá.

E kaso di e tres abogadonan Eldon ‘Peppie’ Sulvaran, Chester Peterson i Anthony Eustatius ku mester a defende nan mes dilanti di konseho di supervishon di abogasia a duna hopi kla di konose ku ta tin protesta organisa pero ela mengua, debilita i e seriedat dje mobilisashon ta kuestionabel tambe. Ora e ekspertonan di lei no ta uza leinan pa bringa kolonialismo ulandes e ta sigi mancha nan supuesto karakter anti-kolonial. Un otro ehempel ta ku ora nan tabata hiba nan defensa kontra presidente Emsley Tromp pa defamashon henter nan nota no a keda tradusi na Papiamentu pa hende por a lese i piki sierto enseñansa politiko-huridiko for di dje pa fortifika i amplia konesementu di resistensia. Papiando 25 minut na radio MAS99  tampoko no ta libera un pueblo si komo profeshonal den lei bo no ta ninga di eduka un masa grandi via e medio di komunikashon mas popular. Emisoranan manera MAS99 i FiestaFM, Krioyo konsientemente ta borota ku mannan di Ulanda ta meti den e persigishonnan politiko i diskordia den mundu di abogadonan pero for di nan frekuensianan radial no ta saliendo un programshon ku por duna empuhe grandi den empodera e pueblo a base di konesementu un avanse den mobilisashon i organisashon den politika anti-kolonial.

Media su rol no ta solamente limita na radio pero un dje influensia mas grandi despues di dje ta pa e oudensia ku ta lesa, korant Vigilante ku su propietario Lilo Sulvaran no tin e konsenshi di komberti su korant di unu ku ta kolonisa e lucha diario di e pueblo ku entrado abou bibando den barionan pa malu lubida. Su korant hudisial, invetsigativo ta drei riba e strugel di e klase trahado kaminda un aresto of dalmentu outo ta keda privilegia riba edukasho di un pueblo ku artikulonan ku por yuda e lesado sali afo di su opstakulonan sosial.

18 di november  Ronald Plasterk e minister di asuntunan di reino tabata di bishita na Korsou, un dia prome e tabata na Boneiru kaminda bou di liderasgo di James Finies a invoka riba nan ansestronan libertado Martis di Catalina Janga ku a rebeldia kontra podernan kolonial 180 aña pasa. Einan na e isla ruman nan si a enfrenta e minster Plasterk ku pankarta i no ta tin duda pa eksigi un referendum konstitutional. Un dia despues na Korsou e minister di asuntunan di reino a yega sin mester a wori mes ku editorialnan strategiko di korantnan i emisoranan of protestanan anti-kolonial, e furia di masbangu di parti di MFK i e abogadonan ku nan medionan di komunikashon a keda un spektakel barata solamente pa konsumo lokal, niun intenshon nan ta tin pa di berdat hunga badjon kontra Ulanda. E uniko aktonan rekordabel tabata ora Chester Peterson a bisa Dick Drayer reportero makamba : “Sodemieter op klootzak” lokual for di e spektrum dje supuesto movementu anti-kolonial mester tabata e koro kanta kontra minister Plasterk durante su bishita pero enbes di esei ta wowonan skuins so e grupo a risibi pa nan manego mediokre sin un strategia kordina di bringa kolonialismo ulandes. Esaki ta keda rekonfirma na momento ku un kaso den korte lo keda entama kontra un website ulandes Knipsel Krant Curacao (www.kkcuracao.net) ku a risibi hopi kritika di ta rasista huntu ku http://www.versgeperst.com. E problema ta sinta ku si bo ta pretende di ke ta un benefaktor den e lucha kontra rasismo ulandes i bo boka ta mas hanchu ku haf di Sta Anna i abo komo abogado i tur otro miembronan politiko (MFK. MAN) influente mester hinka man den saku, konekta ku bo netwerk finansiero i soru pa bin ku bo mes media riba internet ku ta kontra-aresta e kolonialismo mediatiko di parti di e websitenan di notisia i opinion. Keda lamenta i agita sin konstrui un struktura di media digital pa konsientisa un publiko riba e kolonialidat ku ta reina na Korsou ta yuda ku masha nada.

Podernan den media, politika, komersio, i mundu huridiko tin ku alivia e dolo dje pueblo prome nan por bin na remarke di risibi un sosten grandi pa luchanan anti-kolonial. Un kas, trabao, bon skol, kasnan di kuido i siudadanonan senior, un parada di bus, leinan di labor ku ta keda respeta, korant, radio, televishon ku ta remedi edukashonal pa lagabu briya komo un suidadano liber i kritiko. Anto e ora ei mane Gibi di Windt ta skibi den su poema ‘Lucha Sagrado’ e yu di Korsou balente lo lanta kontra e abusu rasial blanku i podernan elite di mesun kolo, kultura ku lo kondusi na:

“Sino ta awe, lo ta mañan òf otro aña

E lucha sagrado pa dushi Kòrsou

Lo kanta viktoria den kurason

Di tur ku ta sinti nan yu di Kòrsou”

 

Prensa Chikungunya

Prensa katibu
di shon nobo shon bieu
Periodista bobo
Bobolin
Ku nes e no tin.
Hambra pa keda paga
Rabia tras di mikrofono
Un pida bolo
Den su stoma
Riba su kuenta di banko
Ate ta kokocha tuma
yabi outo serka Vamparo

Plaganan di periodismo ‘5 florin 2 outo’
Skupi venenu den kabes di hende
Lage kere ku redu a bira e berdat verifika pa dios mes.
Doño di tv, korant, radio
Santu manipulado pa kapitalismo krioyo.
Mas sanger ainda riba bo portada
Mas potret di ‘Rasta’ pa yena bo saku? Mas televishon pa laga un pueblo pega soño pa semper?
Sigi papia ku lenganan di ignoransia infinito
Prensa ku bruki bisti,
holo stinki stinki di pupu.
Den su fase di beibi,
Gatiando.
Miedu pa hasi un pueblo mas sabi.

Plaka, plaka
Prensa chikungunya
Plaka, plaka
Ta laga periodistanan baila ku burdugu
Plaka ta lanta morto foi santana.
Un dia domferstant diabel tin ku disparse
Bibu e ta ta.
Un kambio irevokabel,
na kaminda.
Asina mes.

Sugailie Maduro

Jolanta Pawlak

Jolanta Pawlak

Muhe ta un milager revela
entre shelu i tera.
Maraviya di kòsmòs
Pero
Agredi ku agreshonnan fini
den kaya, na kas, den diskotek,
na skol den klas, toko i port’i snek
–Nan no ta kompronde noh.–
Dushi
Mami
Bin tende noh
Mi tin ko’ pabo.
Tribi di mishi, fula
Invadi su espasio priva
Su poseshon e ta
Su ko’i hunga ela bira
E fantasia di repchi di hombu,
wesu di su wesu.
Un pida karni ku un splechi
Sintimentunan hiper-seksualisa
tira na un opheto kanando
Ningabu anto e rechaso ta rousmentu: “tonto sushi mi n’ ke ko’i mes.”

Terorismo emoshonal
Hormon di hombu brua
Muhenan bou di e yugo macho
Nan ke persiguí bo perlanan
Hasibu mansu purba di kap bo pechunan mane Diana i Rebecca

Asina nos a lanta
Sin nunka por a kastra
e supremasia maskulino

Kria un toleransia di manka emoshonnan eternamente
“Wak par’i sanka pa hinka.
Bokonko pa dal.”
“Pensa ku patin patronchi”
Ta einan e perdishon ta.

Papia riba nan mane shon na 1750
Asina a kulmina den
normalisa matanza di muhe
Bo frei, kasa, ruman, tanchi, wela

Korsou kaminda koper horta ta kousa mas konsternashon ku bida di un hendemuhe asesina.

Muhe Sagrado

T’esaki te raisnan

Bo por dal é
Bo por skop é
Bo por zundré
Bo por hinké
Bo por los bala riba dje
Kita bida di un muhe
Un muhe sagrado
Un muhe ku balor infinito
úniko den universo
Angel wardado feu ora
ba slip sali feu su skochi santu
i
Lage den un lagun di sanger.

For di Sesunan Blankia pa Un Imperio Pretu

proklamashon 1863 gobernado Crol

Sklabitut riba su mes no ta nada nobo. Semper, for di tempu ku mundu
a prinsipiá, reynan ku a proklamá nan mes ‘dios terenal’ tabata bringa otro pa haña mas poder. Despues di kada guera di nashon kontra nashon e rey ku a sali viktorioso dje bataya tabata konsiderá esnan ku el a aplastá su apsoluto propiedat i e tabata desidí asta riba bida o morto di kada ser humano ku el a sklavisá. Pero ta un echo ku ni den skritura santu – ku segun kreyentenan Dios Tata mes a aprobá – sklabitut di hende no ta kondená.

Loke sí a sosodé djis algun siglo pasá ku hamas i nunka ami desendiente di Afrika lo por lubidá komo datu dia djawe mi sanger ta venená, ta e humiliashon kon piratanan europeo – lesa tambe hulandes tabata “brandmerk” katibu kumprá, hòrtá o koutivá, ku lèter di heru kayente riba kosta di Fort Elmina promé ku a stiwa nan manera saku di kakabú den bodeganan di barku pa bai bende nan na Merka, den Karibe i na Kòrsou.
Aviso den korant (1784) ku barkunan a yega. “Shonnan, benta di neger fresku for di Afrika. Domá komo hèrmèn pa sirbi den tur sorto di trabou.”

[c] Elis Juliana 1 di yüli
2003

Un plaza Brion bashi ku mandatarionan i invitadonan sosial i aki aya mayornan den tribuna ku a bin sinta wak nan yu kanta aktua durante e konmemorashon di 150 aña abolishon di sklabitut ku a tuma lugá prome di yüli 2013. Asina e realismo kuru ta yag nos konsenshi mane Ézé riba sanger di un yuchi e di ocho dia di mira lus di mundu. Tur energia ta bai pa e dia siguiente Dia di Bandera 2 di yuli, e fiesta kolosal di bebe, kome, baila, chèlèlèleria na tur hende su antoho bou di e bandera i himno di Korsou.

Pa ritualnan importante krese pega pa konstrui un identidat fuerte sabechi mester tin e konvikshon di un grupo grandi ku ta manifesta nan fieldat na -den e kaso aki- e rekordansa na un epoka historiko di un sorto di libertat di su ansestronan ku despues di tabata un propiedat karnal di e shon por a eksperiensia na 1863 un liberashon fini ku hopi restrikshon korporal i mental den un geografia rasial opresivo kamufla.
Abolishon di sklabitut no ta igual ku emansipashon di katibunan, e ta un proseso den fase chiki of desaroyo grandi manera Amado Romer ta bedei: “Emansipashon ta eksigi hopi mas ku un pida pampel ku e nesesario firmanan ku ta pretende ku bo ta liber.” Un kultura di saka forsa for di un pasado kaminda hende pretu tabatin mesun balor mane Elis Juliana a yame un saku di kakabu no tei ainda. Pa esei bira un kustumber, folklor di un pueblo medionan di komunikashon i musik, kanto, arte publiko, politika, religion, sindikalismo, ensenansa tin ku demostra nan deboshon pa di berdat libera un pueblo. Si tur e aktonan di konmemorashon di ana pasa tabata tin un forsa magnifiko pa inventa di nobo un otro pais awe na bispera di un otro Dia di Emansipashon lo no a bira un fecha ku tur hende a lubida riba dje.

Politikamente hende pretu a emansipa. Despues di e rasismo durante e temporada di konseho kolonial kaminda famianan elite di mulato, blanku, hudieu krioyo i makamba a goberna Korsou a bin e tempu nobo pa hende di kolo bira gobernado, parlamentario, okupa puestonan haltu den aparato gobernamental. Pero di 1863 pa 1954 ora firma Statuut i outonomia politiko a keda ankra esei no a trese pa hende pretu un kambio den e desbalanse di propiedat di tereno, rikesanan natural. E podernan mayoritario finansiero, ekonomiko tabata den man di un elite blanku krioyo, hulandes manera tur otro kaminda den Karibe. Na Buro pa Statistik nan no por mustra ku datonan kuantu e persentahe ta di e sektor di finansa i ekonomia di hende pretu aki na Korsou. Esei te kultura di emansipashon ku no a penetra den e aparato di gobiernu pasobra te ainda ta reina e kultura di proteha e baka santu ku ta duna nan tur dia di kome. Pa un departamento sientifiko lubida of stroba di investiga desaroyo sosial-politiko, ekonomiko, finansiero ta algu normal den un ambiente neo-kolonial. E ta internalisa, nan a pega un chip den nan kabes ku ta laga nan lepia i e ta instrui nan via prosesonan natural pa nunka midi progreso di e desendientenan di un pueblo ku antes a keda sklabisa i ketu bai ta bringando e efektonan ku a lage keda atras kompara ku e kolonisadonan i e trupanan ekonomikamente poderoso di kolo.

Sklabitut a harma un sistema ekonomiko ku a saka raisnan empresarial den aktividatnan na haf kaminda e hudiew sefardim Salomon Elias Levy (S.E.L.) Maduro a kuminsa su negoshi na 1837 ku tei stret te dia awe reinando den e komersio portuario den bahia di Santa Anna. Otro famianan konosi tambe a probecha di nan kolo i rasa priveligia i a bula den e wega di haf manera Perret-Gentil, Maduro, Da Costa Gomez. E negoshi di avion ku a bin bo ta topa famianan Kluyver i van der Kwast (Insel Air). Naturalmente ora huridikamente a aboli sklabitut na 1863 Maduro ta tin un dominio den haf ku su kompanianan di komersio di import, eksport, servisionan portuario. For di einan a dal den Joseph ‘Shon Jojo’ Alvarez-Correa i na 1917 nan a funda e prome banko komersial ku a krese bira esun mas grandi den kolonianan hulandes: Banko Maduro & Curiel akompanando e fortunanan nobo ku e refineria multi-nashonal SHELL lo a trese dia nan a baha bin Korsou pa prosesa petroli for di vayenan di Venezuela.

Na Bandabou plantashi Sabaneta tabata den posishon di Mathias van der Dijs ku segun historia oral trese pa kulturista Elia Isenia tabata “gusta bati su katibunan mal bati.” Famia Van der Dijs na 2014 no a perde su luga den komersio i ta saka ganashi monetario for di su pompnan di gasolin Vanddis, Licores Maduro i Lovers.

E ardu mayo ku a krea henter e bembé di podernan ekonomiko, finansiero blanku na Korsou tabata sklabitut. Ela forma e infrastruktura di influensia i forsa kapitalista pa sigi impone un futuro nobo den korte, gobiernu kolonial, komersio i religion pa asina sam sam ku benida di e bonanza di petroli i e revolushon industrialisa di mashin sigi borda riba nan dominashon blanku hulandes-hudieu krioyo den siglo 20 ku negligensia konsiente kon e mayoritario populashon di desendensia afrikano mester okupa asientonan di poder pa goberna nan futuro.

Sin falta argumentunan lo lanta bisando ku hende di kolo tambe a benefisia for di e bolo ekonomiko i ounke esei por tin balides e ta un kritika flaku pasobra pa hende di desendensia afrikano drei huntu ku blankunan den komersio nan mente mester ta adapta den un malchi blanku. Mentenan blankia den kurpanan pretu ta radia mas konfiansa, nan no ta pensa pa of prepara intelektualmente pa diseña struktura nobo pa hende pretu por emansipa ekonomikamente. E regimen ideologiko di e ekonomia domina pa supremasia blanku-krioyo ta ordena hende pa “ta kontentu ku e minoria di elite blanku-krioyo, makamba paso sin nan nos lo drumi stoma bashi den kas di pali maishi.”

Sesunan blanku den kabesnan pretu kombina ku podernan blanku ekonomiko-finansiero muchu grandi ku a sekuestra posishonnan strategiko den sosiedat ta kousa ku e progreso dje YDK pretu ta keda stanka. E komunidat di elite blanku den su mayoria for di 1863 nunka a demostra komprenshon pe realidat ku outodeterminashon ekonomiko-finansiero ta figa bo rumbo sosial, kultural, edukashonal i politiko i imposibilitando pa podernan pretu den un pais pretu inventa su mes guion pa krea su mes nashon sin intervenshon kolonial di un trupa chiki afortuna ta un bofta di rasismo blanku den kara di Korsou.

Sarantoni

Ken Ta Mi Tata Papi Esprit

Tata su nanishi ta kore pero e no ta ferkout, knockout dje manzaliña blanku, adore mane un santu ounke ela hasi ko’ diabel. Laga mai atras.

Abogado Peppie Sulvaran tata hurista konose lei feu su planti man, artikulo kiko, konsiso, tratado internashonal torna pero no tin igra pa inisia un lucha den korte pa presunan haña dokter, dentista, psikologo, nutrishonista, un diploma den piskelat pa ora nan sali nan ta kana den patronchinan dignifika i kisas bira un abogado pa pueblo.

Tata no sa kon ta stima
Riba weg’i skrima
Maskarada pretu
Pa kara no reda sintimentunan
Puñalando kurason di hende
2 paso bai dilanti
4 paso bek
Un subida aki, un abismo aya
Kurpa grandi pero kurason di un adolesente ku ta bati duru pa kada pida saya.

Tata Marlon Regales un agente di lus proklamando pa libera un pueblo di sklabitut mental, empodera komunidat ku konsenshi historiko di sklabitut i kolonialismo i alabes dyayabanda mantene un ideologia kolonial seksista komo relashonista publiko di Campo Alegre ku 150 muhenan Latina so mester putia
eiden i YDK no. Glorifikando e mesun sistema di eksplotashon i mantene dominashon maskulino finansiero
riba e muhenan, ningando nan rekapasitashon ekonomiko, ningando nan e derechi di forma un sindikato durante nan hosel karnalmente pa un miho bida pa nan mes i nan stimanan.

Piramide di palabra i pensamentu, barankanan riba otro; un bola di batayanan bunita i te ne punta shelu a keda kishiki pe niester tiki amor pa nos akibou.

Tata pastor Norwin Josepa ta ordena MAS99 pa keda siegu pe ira di ser supremonan ku ta hostina riba e periodismo mentiroso manipulativo saliendo feu boka di Dwight Rudolphina. Tanten tata Darwin Gregg ta basila trankil paso papa pastor Juano Coco no ta wori ku su radio Krioyo ta un luga pa skuchado keda horta pa charlatan spiritual sin nomber sin fam ‘Los misioneros de la fe’. Papi Esprit ta alaba diosnan falsu usando Kristu pa atrahe plaka fresku drenta na radio New Song danki na broyo politiko krea pa manipulado periodista Humphrey ‘HZ’ Zimmerman. Tatanan ku Beibel den man i Belzebub grawatando den nan mente.

Doble R na Jan Boos anochi lat luna yena ku Sagitario ta sklama: “Dios Tata poderoso ki dia mi yu musikal Gibi Doran ta bin bei i pone un paro ne porkeria mainta den studio na Kura Piedra?”

Studiantenan riba barikada i kada bes di nobo e mesun kansion kanta pa tatanan kabesando sindikato, politika, sektor priva, media: Un melodia di no respekta nan komo partner igual den negosashon di nan futuro. Tatanan no ke pa nan haña poder ku nan mes programanan na radio, televishon, korant strukturalmente.

Tatanan lidernan sindikal mes a kontrubui pa krea suidadano ku ta alaba e sistema kapitalista. Tata Bebe Rojer i Wim van Lamoen por bedei bosnan dia bosnan stoi keda hasi koi bon mucha i eduka bo miembresia pa milita kontra e makina neoliberal lenga i rosea.

Di wes’i lomba abou bai ariba, di hanchi tera pa komunidatnan ku wachimen priva. Wikentnan na Bogota lagando bo yu para na Hot Center desampara riba hilchi haltu.

Tata no por sin su kopa mundial, kayanan di favela kaminda sanger a kuri pa e wak weg’i bala riba pantaya, hende mata pa akomoda FIFA gana miyones riba pueblo di Brasil anto aki ku un polar e no ta ni rel ni trel, ta sanka brasileira i bala e ke mira. No ta su asuntu tog ku nan a saka hende for di nan kas, tira hende den kabes. E fuchibol ta rondo, morto p’esun un otro su gosadera.

Tata minister di transporte publiko Earl Barlborda mester 16 luna i 3 seizoen di orkan mas pe kuminsa un teleton na Telecuracao pa kolekta plaka pe buska par’i staka di heru i plachinan di zim pe sirbi pueblo ku a paga impuesto i pone borchi bus ku dak pa wanta solo i yobida di awa.

Tata di direktivanan di skol ta krea apartheid, si skol Berg Carmel por saka 48% di nan alumno pa bai Havo, otro maestronan di skol tin ku bai e universidat ei siña klara hubentut ku e mesun trikinan edukashonal. Ki mishi tantu skol kristian manera Emmy Berthold no por saka ni un di nan alumnonan bai Havo?

Un yu sin tata ta skop un boter di plastik, den su mundu imaginario riba kaya. Kas sin televishon, niun Flow niun Direct, delantero chiki goleando pa su trofeo soñando un dia e por kumpra un flat screen pa su mama i rumannan

Tatanan mandatario morto spanta pa preshona banko, seguro, fondonan di penshun pa yuda inberti miyones den e pueblo. A boltu gobiernu, pone ekspertonan pa trese konfiansa bek pa plaka lora pero te ainda kapitannan di industrianan finansiero no ke demokratisa na institutonan ni mishi ku e sen gana for di nos sodo’i frenta pa diskredita e opinion general ku nan ta sinberguensa reinkarna.

Pai plaga pretu Sarantoni habri kaminda pa nan.
Pai plaga hudiew Sarantoni eskolta nan na regionnan mas noble
Pai plaga blanku Sarantoni tuma nan den bo brasa, floria nan ku fe sanado

Sarantoni sakudi
Sarantoni skupi
Sarantoni kinipi

Sarantoni sakudi
Sarantoni skupi
Sarantoni kinipi
Habri e kaminda.

30 di Mei: Oportunidatnan Perdi of Speransa pa Futuro?

Artikulo skibi pa historiado Franklin ‘Max’ Elstak publika den Extra 24 di mei 2014

Den ananan 60 di siglo 20 Korsou tin un deterioro sosial-ekonomiko ku a afekta un gran mayoria di e poblashon. Na ana 1965 kasi un kuart di poblashon tabata desemplea. Klase sosial i oportunidat sosial-ekonomiko ainda tabata mara na grupo etniko, a konsekuensha di e herensha historiko-kolonial di sklabitut, funda riba e relashonnan sosial di desigualdat. E klase trahado den su mayoria tabata konsisti di Afrodesendiente. E entrada promedio di poblashon entre ananan 1958 pa 1965 a baha di 1078 doler pa 961 doler pa ana.

Entre e ananan 1958 pa 1968 kosto di bida a subi ku 10%. Den ananan ’60 kasi 75% di poblashon tabata depende pa su sobrebibensha di un persona ku un entrada di menos di 5000 florin pa ana. Pues kasi un terser parti di poblashon di Korsou tabata balansa algu riba e indise di pobresa.

Tur esaki a konsekuensia di ekonomisashon den e sistema di produkshon denter di e sektor petrolero. Retirunan masal a kondusi na oumento di desempleo na Korsou.

Di aya banda un individuo pertenesiente na e grupo elite pudiente tabata tin un entrada ku tabata 80 biaha mas haltu ku un persona ku un entrada bou di indise di pobresa. E desigualdat aki no a mengua, pero a perdura dekadanan despues di ananan ’60.

Sifranan di senso 2011 ta indika ku di e 121.000 habitante di nos pais riba 15 ana, kasi 99.000 tin un entrada. Alrededor di 22.000 no tin un entrada. 15% di e 99.000 persona ku un entrada ta gana mitar di e promedio di entrada bruto bruto mensual.

Ta mas ku ku opvio ku hopi famia den un unidat domestiko no por kumpli ku e nesesidatnan basiko elemental manera kuminda, pana, kas i edukashon. E entradanan di yudansa sosial ku gobiernu ta duna no ta yega pa kontraresta pobresa. Mamanan soltero desemplea, mamanan kabes di famia, personanan ku un hendikep(deshabilidat) fisiko, hobennan desemplea, kobradonan di ‘onderstand’ , penshonado i adultonan mayo ta konfronta problemanan serio pa sobrebibi.
Un estudio di OECD (organisashon pa koperashon di desaroyo ekonomiko) 2013 a formula kriterionan di desigualdat di entrada den paisnan industrialisa. “Benchmark” den e paisnan aki ta ku e parti di poblashon ku ta gana menos ku mitar di e entrada nashonal ta 11%. Naturalmente Korsou no ta un pais industrialisa, pero na numeroso okashon nos ta posishona nos mes komo tal. Den e kuadro ei un komparashon kisas ta hustifika. Na Korsou 43% ta gana menos di e promedio di entrada bruto mensual di 2830 florin.

E susesonan di 30 di mei tabata ekspreshon di frustrashonnan akumula atraves di generashonan di eksplotashon i tresaso sosial-ekonomiko di e grupo mayoritario di Korsou.

E ananan direktamente despues di 30 di mei a konose te na sierto altura un rekonosimentu di e grupo mayoritario di pueblo di Korsou. E klase trahado a disfruta di benefisionan sosial ku a keda inkorpora den leinan laboral i provishonan sosial. Riba tereno sosial politiko tambe a bini algun kambio no muchu fundamental: Antias a konose su prome gobernado i minister president pretu i Korsou a hana su prome ‘gezaghebber’ pretu. E kambionan aki tabata mas bien kosmetiko, pasobra nan no a trese kambio fundamental den e relashonnan di poder na Korsou. E klasenan dominante a mantene nan posishon privilegia denter e sosiedat. Denter di e proseso di emansipashon a surgi un ruptura sosial di e persepshon historiko kultural di inferioridat di e mayoria di e poblashon Afrodesendiente. E ruptura sosial a influensia i fortalese e proseso di buskeda i formashon di un identidat propio i genuino di e Afrokurasoleno.

Lamentablemente no a stabilisa i fortifika e proseso aki ku un maneho/politika edukashonal struktura denter di nos institushonnan di ensenansa, edukashon i formashon. Manera nos a indika no tin masha hopi kambio riba e tereno ekonomiko. No a bin kambionan signifikativo den e situashon ekonomiko di un gran parti di nos pueblo. Fuera di esei politika di rekolonisashon hulandes i e posishon asumi pa gruponan ekonomiko poderoso ku ta sali solamente na defensa di nan interes komersial spesifiko sin tene kuenta ku interes general a afekta i influensha e proseso di emansipashon politiko i ekonomiko di e mayoria di nos pueblo.

E ekspreshon “pan i rekonosimentu” ta ilustra e 2 faktornan mas importante ku a kondusi na 30 di mei esta un distribushon inhusto di entradanan ekonomiko i diskriminashon rasial ku ta kondusi na un posishon i status sosial inferior di prinsipalmente e mayoria Afrodesendiente na e elite blanku denter di e sosiedat di Korsou.

E faktor sosial-rasial a hunga un papel importante. E ekspreshonnan: “e Bon Yu-di-Korsou” i “e Yu di tera” ta ilustra e diferenshanan eksistente entre e gruponan minoritario pudiente blanku i e grupo mayoritario de desendensha Afrikano. Ta di lamenta ku e tendensha di 30 di mei den direkshon di krea un identidat propio fuerte, mas patriotismo i formashon di un nashon solido no a keda kristalisa. Gobernashonnan susesivo no a institui un maneho di ensenansa pa lanta un sentido di orguyo rondo di e konosementu i saber di kultura i historia di Korsou bou di hubentut.

For di ananan 90 estado hulandes pa motibunan strategiko, geo-politiko i geo-ekonomiko a desaroya un konsepto di kambionan huridiko-estatal den Reino Hulandes. Pa logra e ophetivo aki estado hulandes a presenta limitashonnan den outonomia di Korsou impone un direkshon di mas koperashon obligatorio i supervishon di Reino, lesa Hulanda. E kambio di direkshon di mas koperashon obligatorio i supervishon di Reino, lesa Hulanda. E kambio di direkshon aki a keda hustifika pa e supuesto mal gobernashon ku ta eksisti na Korsou, prinsipalmente riba tereno finansiero ku defisitnan presupuestario struktural i un debe nashonal haltu. Tambe e oumento grandi di kriminalidat ku alaves a traspasa frontera di Korsou i yega Hulanda tabata un otro motibu pa estado hulandes interveni den nos asuntu.

Preshon desproposhonal di estado hulandes riba gobernashon di Korsou despues di ana 2010 pa balansa presepuestonan a sigui afekta e mayoria di nos poblashon i a kondusi na un oumento di pobresa den barionan manera Seru Fortuna, Marchena, Wishi, Buena Vista, Koral Specht i areanan grandi di Banda Bou. E maneho politiko di ultimo ananan no a logra di solushona e problema grandi di desempleo. Tin tur indikashon ku e politika aki a trese bienestar pa un grupo priveligia. E politika di desaroyo ekonomiko a hasi dano na union i solidarismo bou di e klase trahado. Medidanan fiskal pa subi entrada di gobiernu a krea desunion, desempleo i mas individualismo pa por sobrebibi. A surgi un oumento desproposhonal di kriminalidat i korupshon.

Esaki ta kontrali na e perspektiva di mehoransa sosial ku 30 di mei a krea pa mayoria di nos sosiedat. E esperitu di mas bienestar pa un i tur i rekonosimentu pa mayoria di nos poblashon ta eksistente. Solamente gobernashonnan di ultimo dekadanan no a fungi komo katalisador di e pensamentu aki. Manera ya a manifesta, gobiernunan a opta pa desaroyo ekonomiko i saneamentu di finansa publiko pa por a indika kresementu kuantitativo i material. Sinembargo desaroyo ekonomiko riba su so no a logra trese bienestar sosial pa pueblonan na mundu. Esaki ta resalta den e vishon ku mayoria gobiernu a aplika e ultimo dekadanan den mundu i e resultadonan ku esaki a genera. Aplikashon di e konsepto antikua di desaroyo ekonomiko komo uniko sektor pa logra bienestar sosial lo sigui okashona empobresimentu aselera.
Mester bini un kambio di paridigma ku enfasis riba un desaroyo sostenibel ku ta hasi uzo di tur rekurso humano i natural pa subi kalidat di bida di tur siudadano irespekto desendensha, genero, kredo i posishon sosial-ekonomiko i sigura alaves bienestar i eksistensha pa futuro generashonnan.

Koroto di Airu

Koperando den programanan di kontra-inteligensia pa konfundi opinion publiko i alabes proteha tentakulonan di poder.

Koroto di airu, eiden olarkia ta fiesta

Provokando selektivamente sierto politiko protehando bankeronan, personanan klave ku a inventa sostene e sistema finansiero ku ta chupa sanger di pueblo.

Ninga di eherse periodismo investigativo pa prueba ku doñonan di media ta eherse sierto gradonan di un diktadura riba nan komunikadonan sosial i pueblo en general a base di interes finansiero.

Koroto di airu kaminda spokinan ta flota bai bin gritando den suku.

Keda sin inberti den kreashon di un konsenshi periodistiko ku eksepshon den perta politiko of pa gloria personal.

Ku konsistensia apstene di organisa riba dia di prensa un dialogo nashonal pa oumenta kalidat i integridat di suministrashon di informashon mientras e akseso na tur netwerk, media pa hasi esaki ta un realidat faktibel.

Un koro komersial ta sali for di e koroto di airu

Sosteniendo den e referendum di 2009 e opshon Si un pakete neo-kolonial, sin hasi periodismo investigativo den e konsekuensianan dje restrukturashon estatal. Agonisa despues di kuater aña ku pueblo ta sufri di hamber pa e mesun medidanan neo-kolonial ku mayoria a vota pe pa keda ehekuta.

Fasilitando zonanan di komfort pa sierto mandatarionan, institutonan finansiero, hefenan di servisio, kapitannan di industria.

Koroto di airu un sanktuario pa orden establesi, supremasia blanku, rasismo internalisa, hustisia di klase.

Asimilando un diktador notisiero ku ta disidi ki ora si algu ta keda publika komo notisia pa publiko.

Desvia interes pa no splika i siña pueblo na plaka chiki kiko ta ensera libertat di prensa ku fundeshi huridiko nashonal internashonal.

Periodismo chupa lenga merkadea
diabelnan disfrasa komo pannan di dios.

Den e koroto di airu enemigunan ta boltu bira amigunan di lucha pa elimina enemigunan nobo

Hasi servisionan klandestino pa un oligarkia hungando defensor di un klase trahado enkarsela den un depreshon ekonomiko.

Korotonan di airu
Ei e periodista-reportero den tur trankilidat ta konstrui su heroismo.
Korotonan di airu
Ei e ta imagina su mes komo salbado
Korotonan di airu
Ei e popchinan di meya ta haña su krus di merito.

Fugitivo Finansiero

Willemstad – Djaweps 15 di mei, alrededor di 10.24’or, Sentral di Polis a risibí notifikashon ku kuater detenido a hui for di Sentro di Detenshon I Korekshon Kòrsou.
E kuater detenidonan Chikoe Capriles, 51 aña di edat, Billie Jonckheer, 53 aña di edat, Leo Rigeaud 52 aña di edat, Hermen Behr 63 aña di edat, tabata huntu ku otro detenidonan den e tayer kaminda presunan ta ehersé diferente tipo di trabou. Diripiente e kuater detenidonan ariba menshoná a dominá un wardado di presu pa despues dominá e hefe di e tayer.
Nan a choka un di nan te na momentu ku e la pèrdè su konosementu i a mara e otro. Seguidamente e kuater detenidonan a usa un balki pa asina por a pasa diferente stap i despues bula bai pafó di e tereno di prizon. Mesora trahadónan di Sentro di Detenshon i Korekshon Kòrsou a
kuminsá ku un búskeda paden i tambe pafó den área di prizon. Polis ku koperashon di Warda Kosta
ku nan helikòpter ku den laria i boto riba laman, tambe a duna nan sosten i ayudo den e búskeda. Te na e
momentunan aki un búskeda intenso ta kontinuá pa asina mas pronto posibel por bolbe detené e
kuater detenido nan ku awe den oranan di mainta a
hui for di prizon.

E personanan aki ta sumamente peligroso arma ku un vokabulario di manipulashon finansiero. E deskripshon di nan ta:

NÒMBER : Chikoe Capriles

EDAT : 51

SENTENSIA PA: Konspirashon finansiero na Banko Maduro kontra pueblo di Korsou. Falsifikashon di Torah i Kabalah. Instigashon pa mantene institutonan finansiero den un estado di dikatadura kaminda pueblo no tin nada di bisa kiko ta pasa ku nan plaka.

AKTUAL HUIDA : 15 di mei 2014

HALTURA : 1.78 m

POSTURA. : normal

KOLÓ DI KUTIS : blanku

KOLÓ DI KABEI : shinishi

PAÑA : kaki

NÒMBER : Billie Jonckheer

EDAT : 53

SENTENSIA PA : Konspirashon ekonomiko na Kamera di Komersio kontra pueblo di Korsou, manteniendo un sistema di ekonomia domina i na benefisio di un elite blanku. Intenshonalmente neglishando di tene su tata Chicho responsabel pa fomenta un guera mediatiko den su korant Ultimo Noticia.

AKTUAL HUIDA : 15 di mei 2014

HALTURA : 1.68 m

POSTURA. : chiki

KOLÓ DI KUTIS : blanku

KOLÓ DI KABEI : blont/blanku

PAÑA : kaki

NÒMBER : Lio Rigeaud

EDAT : 52

SENTENSIA PA : Opstakulashon di demokratisa e asosashon di bankeronan di Korsou. Sabotahe di e demokratisashon popular na tur bankonan pa empodera pueblo den e proseso di tuma desishon riba nan plaka.

AKTUAL HUIDA : 15 di mei 2014

HALTURA : 1.80 m

POSTURA. : chiki

KOLÓ DI KUTIS : blanku

KOLÓ DI KABEI : pretu

PAÑA : kaki

NOMBER : Hermen Behr

EDAT : 63

SENTENSIA PA : Konspirashon kontra un pueblo ku un maneho di VBC pa komersio ekstorshona gobiernunan di turno ku un modelo ekonomiko bieu neo-liberal ku ta akumula rikesa di un pueblo i ta abuza trahadonan violando derechinan laboral ku e meta pa semper keda mendiga pa un salario minimo miserabel.

AKTUAL HUIDA : 15 di mei 2014

HALTURA : 1.65 m

POSTURA. : chiki

KOLÓ DI KUTIS : blanku

KOLÓ DI KABEI : kora/blanku

PAÑA : kaki

Polis ta supliká tur persona ku ta kere ku nan tin informashon riba e kaso aki, pa pasa e informashon pa polis. Por yama na 917 durante
24 ora òf e number anónimo 108.

Tambe por konekta via Twitter @sablikatriumph ku e hashtag #FugitivoFinansiero