Konbenio Ruttenaath i Luchanan Kontrali -Dwalu Kontra Kolonialismo Ulandes

BonBiniBusinessCuraçao

“Kòrsou inspirami pa mi bolbe kas, stop di bende nos awa i nos tera pa depchi awo, sera boka di tur ku ta bisa ku nos lo no por. Ai Kòrsou habri man, mi ke ta bo yu. Kurason ta bo nifikashon.” ~Fridi Martina – ‘Anhelo’

Sangrando di paden ku wowoman tur di bludu sufisiente hende na tinu a mira na februari 2018 sekretario di estado Knops i parlamento ulandes uza un lei dehumanizante pa invadi un Statia anti-kolonial rebelde luchando pa un outonomia engrandese i rekolonisa su gobernashon i pueblo. E kolonialismo venenoso for di Den Haag no a perde pa gana i a sigui skupi su venenu riba un St. Martin destrui na filingrana despues di e orkan Irma. Djei e la baha bai Boneiru konkistando un gobiernu i su populashon ku palabranan manipulativo i e notorio saku di plaka.

Mientras e aktonan sin skrement di rasismo kolonial ulandes tabata avansa den reino Karibense e degradashon di kolonialismo finansiero tampoko no a wanta di parti sla via e kolegio Cft ku ta dikta kwantu gobiernu por gasta i unda mester benta machete pa asina sigui komberti Korsou den un santana sosial.

Na tres okashon esnan vigilando e pasonan abusivo dje makambanan a alerta ku algu similar por pasa na Korsou tambe. No a dura hopi ora e speransa inosente di gabinete Rhuggenaath pa un futuro miho a boltu den agonia i frustrashon i a ‘fada’ ku e situashon ekonomiko hodidu i e eterno preshon kolonial di Cft i a ‘tira e serbete den rin’ i huntu ku Den Haag i presidente De Boer di VNO-NCW ku ta representa interesnan di komersio ulandes a traha un konbenio pa desaroya: “Ekonomia, 2) Finansia públiko i 3) Aparato gubernamental. Ròl di Ulanda den esaki no ta pa yuda ku fondo, pero pa duna sosten tékniko kaminda surgi e nesesidat (esaki entre otro den forma di rekurso humano i konosementu). ” E puntonan mas esensial ta: “Ulanda ta pone na disposishon un konsehero di transishon (transitiebegeleider) pa yuda identifiká proyekto- i inisiativanan ku tin e potensial pa aselerá e proseso i asina krea e resultadonan deseá di forma mas efektivo i efisiente. Tambe pa duna guia i teps pa di e forma aki pasa konosementu na e aparato públiko, kreando asina un impakto duradero;

  • Ulanda lo fasilitá, kaminda ta deseá i ta nesesario, ekspertonan adekuá riba tereno di gobernashon i finansas pa yuda fortifiká i pasa konosementu na e aparato públiko;
  • Ulanda lo kompartí ku Kòrsou konosementu ekstenso pa loke ta trata eksplotashon di tereno i maneho di propiedat di Gobièrnu di Kòrsou, ku ta benefisiá i yuda mehorá finansia públiko.”

Aki nan kolonialismo ulandes internalisa den e liderasgo politiko di PAR, MAN, PIN a gana i den konspirashon ku B.V. Den Haag a krea un formula pa purba sigui implementa e medidanan ordena pa Cft sin risibi un intervenshon ofisial i asina tirando un pará pa intenta akselera e proyekto di rekolonisashon ulandes na Korsou.

E kenshinan kolonial aki ta un resultado dje operashon di opreshon rasial finansiero; un sistema asepta for di 2008 i e koalishon aktual i oposishon i tur otro den pasado semper a rekonose su legitimidat.  Pesei na momentu ku a organisa e di dos kumbre Bon Bini For Business Curaçao enkabesa pa prome ministernan Rhuggenaath i Rutte no ta tin niun gritu i eskritura di rebeldia apesar di varios analisis politiko ku a spierta pueblo pa tene kuidou ku e movidanan dje makambanan basa riba e atrosidatnan kolonial komete n’e otro islanan.

Un pueblo mentalmente kontamina ku kolonialismo ulandes ta aktua kontra su naturalesa i kontra su mes ku un kurason morto spanta. Atrobe esaki por a keda mira feu ora na Ulanda no ta tin niun esfuerso hasi di parti di e komunidat YDK konsiente pa eduka, agita i organisa kontra e gobiernu ulandes ku ta ehekutando su manego di rasismo kolonial den tur trankilidat sin niun molester. No ta algu abnormal di eksigi dje diaspora mondu biba na Ulanda pa emiti kritika den Volkskrant, NRC, kalke plataforma grandi di media kaminda por kita e maskarada di gobiernu ulandes. Tambe no ta nada imposibel pa esnan konsiente aki na Korsou pa publika kritika anti-kolonial den korantnan i plataformanan grandi di komunikashon na Ulanda pa asina sikiera batayá e diabelnan sinta na Den Haag ku palabranan i influensiá e klima di polygoon periodismo ku ta nara Korsou for di un brel kolonial blanku pa komplase nan klientela i mantenshon di poder politiko na Binnenhof.

Pa Kòrsou mesun kos. Henter aña tin bola di hende ta papiando skat di kos herigando kontra gobiernu ulandes. Individuanan i gruponan ku influensia  ku a proba nan por mobilisa hende kontra inhustisia pero ora e momentu di oro yega i e kabesante di kolonialismo ulandes i su ayudante tei riba e isla aki diripiente tur e gritochinan a bai skonde. Tur partido politiko opositorio a guli nan batimentu boka anti-ulandes, dobla nan rabu i a kai sinta den skina hasiendo koi bon mucha kedando ketu ketu na momentu ku shon Rutte i Knops a yega. Sindikalismo, lidernan religioso, akademikonan, miembronan di prensa, abogadonan, studiantenan, mundu di arte, influensiadonan riba medianan sosial tur ku semper a saka zonidonan pa konsientisa kontra e agreshon kolonial di Ulanda tambe a sensura nan mes alma durante e bishita dje podernan blanku politiko na Korsou. Tur a proba di ta yen yen di skuma i tiki chukaliti i no ta tin sufisiente forsa mental i vibrashon spiritual pa desobedese e ritual di miedu kolonial i kibra e siklo visioso di sklabisa un pueblo.

Varios hende ku ta haña stuhl pa sinta na radio, televishon i korant a kalifika lokual a pasa na Statia un golpi di estado i esun na Boneiru un variante suave pero despues a sigui ku e ordu di dia mane nada a pasa. Un desepshon i fayo grave si bo ta analisa i taha ku tin un peliger grandi na kaminda pero bo ta ninga di hinka un plan di defensa den otro.

Loke por sosode na Korsou tur lo depende kon e parti dje pueblo aki lo organisa kontra e intento nobo aki empaketa den un konbenio pero mas importante kon nan lo akshona ku forsa kontra tur e atrosidatnan kolonial en general. Ounke ta lat na tur oloshi i oportunista pa aktua despues ku e bom kolonial a baster e movementu politiko Kousa Prome ku su lider Rene Rosalia a organisa un reunion di protesta ku a kulmina den reunifikashon popular laganda divishon atras harmando un moveshon nobo ku ta para pa un “Frente Amplio pa Gobernashon Propio”

E proseso emansipatorio pretu ta adelanta ora prensa, poder popular, politika, akademia, intelektualnan publiko, sindikalismo, movementunan sosial, religiosonan, artistanan aleha nan mes for di luchanan robes pa drechi. E sekuensia korekto mester ta ku antisipando yegada di kalke representante di kolonialismo ulandes bo ta organisa for di tur angulo resistensia i konfrontashon kreativo i no despues ora e kolonisadonan a bai bek Ulanda kaba. I hasta si di tur manera esei sosode minimalmente bo tin ku duna boka i plama un kontrabalanse den medionan ulandes na Ulanda pero tambe regional i internashonal manera regularmente e movementu Nos Ke Boneiru Bek sa hasi. E ora ei den bista di hende nan lo legumai di tira e etiketa di politikeria barata riba bosnan pasobra a keda demostra ku bosnan porfin ta praktika lokual bosnan ta predika. Pero awoki tin muchu kos ku ta duna pueblo deskonfiansa. Legionnan di ehempel manera:

1. Rutte ta aki i prensa ta haña oportunidat pa hasi preguntanan kardinal durante un rueda di prensa i e miembronan di prensa ‘anti-kolonial’ ku ta profila komo patriotiko i kontra kolonialismo ulandes no tabata presente. Ta un ehempel klasiko dje lucha di dwalu. Nan por a primi i kuestiona Rutte i Knops i tene nan responsabel pa nan aktonan rasista kolonial pero enbes di esei nan a fasilita un hanchi di skapatorio pa nan i despues hipokritamente sigui bati kritika djis pa bati i kritika. Vigilante ku Lilo Sulvaran na kabes, MAS99 ku Juny Joseph, Dwight Rudolfina, Tele-Curaçao ku Glen Thomas, New Song ku pastor Papi Esprit i Humphrey Zimmerman, CBA ku Sherman Antonia, Krioyo ku Darwin Gregg i Rignald Maduro nan tur konsientemente a laga e kolonisadonan sali viktorioso tolerando prensa ulandes i prensa kolonisa di Korsou sigui skibi i dominando e historia falsu na nos desbentaha.

2. Rutte ta tin un enkuentro ku miembronan di parlamento. Parlamentario Moses di Movementu Progresivo i Korsou di Nos Tur no a tribi di konfronta e prome mandatario ulandes ku nan kritika, lagando nan votado na kaya ne ora mas krusial di nan karera politiko. Cordoba di Pueblo Soberano tampoko a bisa e makambanan nada manera e ke laga hende kere. Mas bergonsoso tabata ora pueblo a mira un Pik Pisas tur djente afo riba potret ku Rutte mientras su lider di MFK ta den prison, priva di su libertat pasobra manera e partido ta alega ku konsistensia “ta Ulanda” ta tras di su enkarselashon. Mas ridikulo no por.

3. E sigiuente siman minister van Engelshoven di enseñansa i kultura tabata di bishita i huntu ku minister Zita de Jesus-Leito i Alcala Wallé nan a bai keiru den Otrobanda, Punda, Skalo, Pietermaai. Pasobra e planifikashon pa gentrifika e barionan ku ta riba lista di Unesco herensia mundial ta sigui, e deseo ta pa rekolonisa henter e sentro di suidat pa akomoda turismo di makamba ku yudansa di fondonan di ministerio ulandes. Sin niun molester e proyekto di dominio ekonomiko blanku ta sigui. Sindikatonan SITEK i PWFC representando dosentenan i e trahadonan di Kas di Kultura welgando no a sinti nan mes motiva pa topa ku e minister ulandes i bise ku su gobiernu ta e rais dje malora finansiero i eksigi asistensia sin limite den nos finansas pa enseñansa i kultura. Studiantenan i eks studiantenan/hobennan profeshonal no a uni pa manda un mensahe bon kla pe minister ulandes ku niun hende na Korsou no tin un debe di estudio di paga. Ta bosnan a kolonisa nos i konsekuentemente ta Ulanda debe nos i ta gobiernu na Den Haag tin ku paga tur gastunan di estudio.

4. ABVO un sindikato ku no a sali na defensa di su trahadonan na Boneiru i atrobe na Korsou ta hasi mesun kos. Presidente Adri Williams te ainda no a deklara nada riba e konsekuensianan ku e konbenio firma por tin.

E realidat marga ta ku tur hende ku semper tabata tin algu di bisa a enkadena nan spiritu pa baña den un speransa ku e kumbre aki makambanan lo bin abou i trese hopi negoshinan pa Korsou. Politikonan komersial ku no ta pretu i ni ta kompronde kiko ta liberashon pretu, sin niun sorto di ideologia ku a yora pa makambanan bin ku un fabrika di keshi ta simboliko dje nivel mediokre ku nos ta aden. Lider di Kousa Komun diplomatikamente a splika esaki tambe ku Korsou no mester di invershonista makamba riku pa e yu  di Korsou por biba ku kiriwichi. Ront Karibe e pruebanan tei ku dependensia ekonomiko estranhero ta stroba desaroyo berdadero di un pueblo. Un ekonomia aun mas makambiá lo hundi emansipashon pretu di Kòrsou mas.

Historia no ta suta hende su kabes, ignorando e realidatnan historiko ku a kousa e labatiba ku nos ta aden si. Na 2005 tata di prome minister Ruggenaath a publika un kritika kontra Ulanda kaminda e ta splika ku “IMF tabata e mukel di inhustisia ku Ulanda a uza pa limpia e aparato publiko i bati e esfuersonan (neoliberal maligno) di prome minister di PAR Miguel Pourier.” E resultadonan desastroso dje era di sera wowo pa e salbahe blanku ku e kreadonan di kapitalismo krioyo ta bistu. Di 2000 pa 2019 e rutinario adorashon pe makambanan no a desvia masha. Ketu bai liderasgo di tur sektor skondi o habri ta kere i anhela pa nos destino komo un pueblo lo keda kondena ku Ulanda. Bo tin un grupo kolonisa mentalmente te den nan igra i e otro ke sierto adaptashon den e relashon kolonial basta nan por yanga den un tera fertil di poder, prestigio i ganashi personal. Tur ta ingredientenan dje pan ku e diabel blanku a mansa pa nos kome.  Awo ta na nos pa kuminsa kou e wesunan dje skeleta di opreshon ulandes ku tin nos spanta i spoela nos spiritu ku aw’i huramentu pa anunsia yegada di un era rebelde nobo.

 

1 aña Jasmin Salbahe TV, Pabien Direct

charmone natural direct

Bon:
– Germone de Lima ku su kabei natural ta un imagen ku ta yuda oumenta e muhe pretu YDK di stima su mes tur dia di nobo ora e ta riba pantaya.Hobennan talentoso a hana un oportunidat di nan bida pa kuminsa mesora den grandi produsi notisia. Ratu ratu tin notisia mas agresivo mas amplio mas profundidat riba topikonan di momentu.

Malu:
– hopi sensashon, notisia di momentu (breaking news) pa loko, muchu hambra pa sanger   i destrukshon, bomboshi. Falta di notisia importante di islanan Aruba, Boneiru i islanan   ariba. No tin notisia di region Karibe i Latino Amerika i Merka.

– Programashon debil ku ta depende riba eksito di Kabei Boto, no tin nada pa mucha, hende grandi. No tin debate, foro, diskushon riba topikonan ku ta na ordu di dia. Siegu pa plaka pesei no ta mira ku Korsou mester un planta di televishon ku ta yuda eleva e YDK for di su situashon sosial ferfelu ku e ta aden.

– Novela venezolano ta un abominashon pa mente i wowo di YDK pretu. Kompanianan ku ta sponsor programa na televishon tambe mesora ta risibi e poder di manipula berdat den notisia na tv i radio. (Vanddis/MFK)

Pabien Jasmin Salbahe pero mane e disku ta bisa Tula te ainda no ta wak paso tin hopi koi drecha.

Domferstant II

Domferstan

“Hecho ta ku mayoria di Merka a skohe pa Donald Trump, prome minister Rutte ta diskriminatorio kontra ekstranhero i esei ta bon pa proteha makamba na ulanda na Korsou tin ku hasi mesun kos.” (c) Dwight Rudolfina MAS99 [Segun su logika di 40 piku ana di periodismo NL por sigui brutalisa bida di YDK numa na Korsou via Cft i otro manego politiko ku ta keda dikta for di Den Haag riba gobiernu]

“Mi ta gosa sra Leeflang paso e ta para tras di su kos,e ta konsistente.” (c) Juny Joseph MAS99 [Segun su logika un eks minister di ensenansa ku a sostene un manego di gobiernu pa desbentaha alumnonan empobresa na Korsou i Antias por risibi aplouso i respet pasobra e ta hasie ku konsistensia.]

“No tur hende por bira dokter, abogado, akountent, direktor di banko.” (c) Mayoria di politiko i dokter, abogado, direktor di banko [Segun nan logika ta sierto hende ku ta bin for di un ‘bon’ famia i ku un diploma for di un ‘bon skol por tin e privilegio di risibi un salario gordo pasobra e sobra mayo dje pueblo (pretu) aki ta predestina pa bira e buriku di karga trahando e plaka brutu pa un grupo chiki elitario pasobra nan ta keda kalifika komo hende bobo pretu ku no tin e forsa intelektual pa yega na un nivel haltu di estudio pa okupa puestonan manera dokter, abogado, akountent i direktor di un banko.]

“Nos no tin sen pa traha kas ku kura pa tur hende. Gobiernu no tin e finansas, trahando kas den altura lo skapa tereno.” (c)Mac Cijntje – Eks parlamentario di Pueblo Soberano [Segun su logika tin ku stiwa i sklabisa famianan riba otro den flet di 4,5 piso pasobra gobiernu no tin e kurashi di honra su areglo di estado i tur tratadonan humanitario i hustifika un forma nobo di krea kas ku kura pa hende por biba sano manera nos kultura krioyo semper a biba i por a prospora independiente pa motibu di tin un pida tereno.]

“No mester tin igualdat den parlamentu pa hendemuhe. 10 hendemuhe ta muchu, sala a bira un kangamentu di saya di otro mundu. Forsa di muhe ta su lenga.” (c) Juny Joseph MAS99 [Segun su manera di pensa mayoria di hende ku por vota mester basha nan voto pa hendehomber so pasobra hendehomber no ta kapas di pusta boka politikamente ora nan ta reuni.”]

“Hendemuhe a emansipa di mas.” (c) Dwight Rudolfina i Juny Joseph MAS99 [Segun nan logika e hendemuhe ku a pari nan a krea un generashon di ser feminino ku ta lucha kontra di ta trata mane un katibu di hendehomber i ke para riba su mes pia pa krea su destino sin metechi maskulino]

“Mi no tin problema ku makamba, mas makamba mas miho, laga nan bin basta
nan strooi plaka pa ekonomia drai. Laga e luga aki yena ku hende.” (c) Amparo Dos Santos [Segun su logika komersial-politiko Korsou tabata di makamba antes i awe i pa eternidat e por keda asinei tambe pasobra plaka ta tumba prinsipio i ideologia di liberashon semper]

“Homoseksualismo ta un malesa mental manera tabata defini antes den DSM-VI (e manual di statistik di disordennan mental) (c) Rignald Sitoris – psikologo [Segun su logika ora bo stima hende di bo mes sekso bo ta loko segun analisis bieu frakasa di mundu di psikologia ku ya a desbarata sientifikamente e mentira alternativa]

“Por benta karni 20, 40 ana ku fecha kaduka den frizer i kome despues trankil.” (c) Gonzalo Cuales Z86 [Segun su logika ela google lihe lihe un kos i kere ku e por bin tira un para na radio pa defende un posibel kliente o futuro kliente ku ta bende karni na su emisora]

“Un mayoria di 20% den e referendum na Puerto Rico a skohe pa bira parti di Merka.” (c) Ricardo Isebia komentarista radio New Song [Segun su logika e tin difikultat di bisa e berdat na su skuchadonan ku mayoria partidonan politiko portorikeno a boikotia e referendum pasobra nan ta hostina riba Merka i su violensia kolonial]

“Nos produktividat ta esun mas abou na mundu.” (c) Billy Jonckheer presidente di kamera di komersio [Segun su logika Korsou for di 195 pais ta skor komo number un den produkshon laboral sin por bin ku prueba sientifiko, sin niun lista di region, ni e kalkulashon kon ta yega na un sifra.]

“Hopi hende inkapas despues di 30 mei 1969 a hana trabou djis pa nan kolo i esei a stanka nos pais ekonomikamente te dia di awe.” (c) Jurgen Arvelo komentarista na Hoyer i TV Direct (Segun su logika Korsou su ekonomia hodidu domina pa hende blanku ta falta dje YDK pretu bobo ku nunka den su bida tin e kapasidat di por funkshona riba un nivel haltu den gobiernu. Preferiblemente e lo ta ke pa Korsou bai bek na e tempunan prome ku 1969.]

“Nos tin ku wak un manera pa regula, kontrola e influensia negativo di emisoranan, televishon i medionan sosial pa garantisa un bon edukashon pa pueblo i espeshal pa hobennan.” (c) Gibi Doran parlamentario MFK (Segun su logika MAS99, GIO semper tabata tin un influensia santifika riba su generashon i e komo lider di un banda i lider na un emisora nunka a ninga di eduka su pueblo i fanatikonan pa medio di letranan i programanan radial.]

“Mi no tabata sa esei, solamente mi tabata sa ku O.B. ta tin un probema ku ‘muhe’ pero mi no tabata sa ku e tabata abuza di mucha tambe.” (c) Pastor Bakhuis presidente saliente di e asosashon di pastornan di Korsou [Su logika religioso di un lider pastoral banda di no tin un problema ku su kolega ta viola hendemuhe adulto,ta ku e ta atmiti meskos ku Papi Esprit i Raimy Juliet ku nan ta enganando nan sigidonan kristian lagando nan kere ku nan tin un don speshal ku tin un lina di komunikashon direkto ku dios ku semper ta tene nan na altura di tur kos ku ta pasando riba e isla aki i pa asina por interveni i skapa bida di hende ku ayudo divino na tempu.”

“Sueldo minimo no ta yega pa biba un bida digno pero tin ku tena kuenta ku nos situashon ekonomiko tambe.” (c)Steven Martina minister di ekonomia (MAN) [Segun logika di un yu di Don Martina sosialista e wega ekonomiko tin ku viola e derechinan laboral-sosial ankra den areglo di estado i tratadonan i konvenionan internashonal pa despues e YDK por hana un oumento di su salario di hamber.] ]

Jandi Paula – Shon i Katibu

Alejandro Jandi Paula

Aki nan solamente pa lei ta tin abolishon di sklabitut. Niun kaminda den historia di e pais aki bo por a lokalisa un kiebro den e relashon original di shon i katibu. t’asina ta ku te dia di awe e ydk pretu a keda un ser dependiente. — Alejandro ‘Jandi’ Paula

E Debe Historiko di Banko Maduro

mcb sketch

Banko Maduro por a prospera henter un siglo largu debi na e labor pornada di hende pretu sklabisa for di e prome dia ku nan ansestronan a yega na Korsou. Ora sklabitut riba pampel a kaba na 1863 e famianan hudiu no tabata tin e humanidat sivilisa den nan kurpa pa krea un proseso di duna bek e poder finansiero-ekonomiko na e hendenan i desedientenan ku a sufri bou di e regimen di katibukrasia. E debe historiko ku MCB tin ku paga e komunidat pretu ta grandi i impagabel pero no tin skapatorio i e banko mas grandi su destino ta mara na e konsenshi pretu i demokrasia finansiero di Korsou ku ta desaroya su mes.

Jossy Rosales – Rei di Skalo

Jossy Rosales Rei di Skalo

Ta ken a sakami for di Skalo? Hende blankunan. Ta ken a kumpra tur luga den Skalo? Hende blanku, makambanan.

Ken tabata dono promo? Hudieunan. Ami ta e uniko YDK ku e kolo aki ku nan ta yama ‘tristu’ ku a tribi di kumpra siete kas. Monumentunan ku tabata dono di protestant i hudieu. Drecha nan ku mi mes sen.” – Jossy Rosales – 13 di mei 1937

Kiko Wiels Lo a Bisa? – What Would Wiels Say?

what would Wiels say - kiko Wiels lo a bisa

Un politiko blanku krioyo sosiopat ku semper ta tin miedu di bisa e palabra makamba, rasista, supremasia blanku ulandes ku nunka ta papia di opreshon merikano den Puerto Rico, Haiti, US Virgin Islands, ku no ta ni bisa nada riba e rebolishi sosial awoki na Guiana Franses ku a kansa di e desigualdat kousa pa Fransia, ku nunka a mustra un akto di solidarismo pa nos rumannan bringando kolonialismo na Boneiru, Saba, St Maarten i Statia ku a modela ku su potretnan saka huntu ku Chavez pero no ta saka un man fraternal na Venezuela ku ta pasando duru awoki, ku nunka ta papia riba e lucha anti-rasismo di e Afro-Kolombiano pero semper ta papia di Kolombia si ku nunka a bisa un palabra riba e dekada hende di desendensia Afrikano o e bataya pa reparashonnan di parti di CARICOM pa konsientisa i empodera su votadonan pretu, ku poder politiko pa tormenta Den Haag mesun duru pero semper ta kobardia di mobilisa i organisa su komunidat elektoral ku nunka pero nunka den su bida a duna kursonan di politika pretu Karibense ku tabata pro zwarte piet ku te ainda ta engaña su mes ku e ku su identidat blanku krioyo por ta un lider di un partido politiko den un pais pretu i ta uza miles di votado pretu troumatisa pa kolonialismo ulandes pega den un trampa kolonisa di identidat pa laga nan kere ku un YDK krioyo blanku por salba nan den politika ku pa kolmo ta purba di bringa un kaso den korte di korupshon kaminda ela keda sentensia pa keda kumpra di un Italiano blanku ku pa niun bledu ta interesa den e lucha di hende pretu i sin skrement ta uza e mesun abogado ulandes Knoops ku a defende e rasista sushi Geert Wilders na Ulanda.

E kumbu blanku ku henter su bida a parasita riba bidanan pretu via politika i tur su fortuna ta danki na kolonialismo ulandes awoki despues di un redada ta bin grita falsu fantochi ku ela kansa di makambanan i ku Korsou mester bira independiente..

 

A creole white sociopath politician that always been afraid to say the word ‘dutch white folks’, ‘racists’, ‘dutch white supremacy’, who never speaks about American oppression in Puerto Rico, US. Virgin Islands, Haiti and stays quiet on the social revolt right now in French Guiana who are sick and tired of the inequities created by France. Who never showed an act of solidarity to the peoples of Bonaire, Saba, Statia, St.Maarten fighting against dutch colonialism, who showing off with pictures taking with Chavez but doesn’t offer a helping hand to our struggling Venezuelan neighbors. Who always praises Colombia but never says anything on the plight of the Afro-Colombians and indigenous people battling for their dignity. Who fronts as a self-claimed regionalist but never talked about the decade for people of African descent or the fight for reparations started by CARICOM to empower his black electorate. Who together with his coalition partners has the political power to destabilize dutch colonial powers in The Hague but refuses to  walk his cheap decolonial talk. Who never organized and mobilized his political organization and Black voting community, who never ever set up courses on Black Caribbean politics, who has been pro black pete, who is trapped inside his own lies of thinking he is the political white creole messiah that has a god given calling to save Black people in Curacao using the traumatizing effects of dutch colonialism to make his electorate believe that a white identifying person will deliver them from dutch colonial violence. Who got sentenced for being bought by a white Italian who doesn’t give a damn about Black people, who is appealing his corruption case and hired out of all people mr. Knoops a lawyer that defended the dutch white racist politician Geert Wilders for a case againt anti-Moroccan racism in the Netherlands.

This damn white zombie who owes his abundant life and fortunes and everything else to Black people and the legacy of dutch colonialism now after a raid comes out crying that Curacao should become independent…