Amado Römer – kapitulo 107 versikulo 1

Amado Romer 107-1-Novela

Den un temporada di retiro i fortalesa spiritual simannan largu un dje medio di komunikashon mas influensial Direct TV bou di liderasgo di Jachmin Pinedo a bin ta anunsia ku yen fanfara un novela nobo ku ela kumpra pa su televidente. E forma ku Direct a bin ta alaba e novela kasi hende lo kere ku benida di Hesus na Korsou ta na kaminda. Ta di lamenta i bergonsoso kon Direct no ta tin e kurashi komersial i kristian pa produsi un programashon diario tokante Kuaresma pa alimenta i alsa e spiritualidat di su publiko den tempunan di konfushon i trastorno sosial.

Den santu buki di Amado Romer e splikashon di e aktonan kondenabel di media ta hopi kla. “Skritura ta bisa: Diabel chiki nunka por konvense un pueblo di bai wak un novela Venezolano i laga nan kere ku esei lo duna nan bida eterno.”

Antikristu Chiki

Kabes i stoma ta gruña
un alkemestria ku ta duna empoderamentu spiritual
den regionnan selestial
kaminda Selikor
no ta pasa pa 3 siman.
I no tin niun partisipashon
na un quiz di matematika
paso much’i skol pober
no ta konta
Manera
Johan van Walbeeck
Schweitzer
Vigdis Mensing-Jonckheer
Schroeder
Papiando ulandes lo salbabu
Aktuando makambiá lo resusitabu
Periodista pretu
pero
e no sa ainda
Skibi, raporta
tokante su komunidat
mane e ta na
Terneuzen o Goeree Overflakee ainda

Atabo awo para den un masa
ta grita pa un kambio tur kara skarpion dek ta
wak bo straño.
Solidarismo un bisio,
pa bo sobrebibi
bo mester di niun sinti,
agrediendo, hode esnan
debalua ku semper
b’a skupi afo.

Labor pretu feminino barata
T’asina b’a gana bo miones
Niun fondo di penshun
Niun sindikato
Diabel stima plaka
paga un abogado
lage gaña ko’i kens
pa hende sigi kai
den e graf di
genesidio pretu finansiero.

Antikristu chiki
Kumprando kurason dje pueblo
Bendiendo koper pa oro
Wak nan den bo pantaya
Skucha nan na radio
Lesa nan den korant
Mira kon nan ta sita skritura sagrado

Pulpito di prensa pagá
ta mente di hende.
Basha káká riba e grupo
elektoral mayoritario klase trahado
bisa ku nan ta bubé
votando robes,
nan ta bobo,
selektando partidonan robes
pero ta nan plaka si ta soru
ku e patronisado komersial
por pasa aviso na
bo emisora pa abo i
bo klase di ‘hende drechi’
por kome.
Ekonomia politiko di falsedat mediatiko di hubilo.
Skucha bon nan kurason
ta pomp asido.

Radio un refugio di ribirishi
Korant un sanktuario di sensashonalismo
Empresario den su imperio perverso

Honor ne redentor
Boutisa den yorá di un
multi mionario, rifero
Mansedumbru t’esun ku kere
ku nan mes t’e salbado,
wak pa bo n’ hoga den
e arka di adorashon.
Baron di weg’i number
ta indoktrina un pueblo
i ekspropia miones feu
nan saku i bin broma ku
K I R I W I C H I
Un pastor ta indoktrina
ku beibel den man
ranka bo diesmo i
indignifika dons
di bo yumuhe.
Tata spiritual di
e apostel bon proteha bou
di alanan dje periodistanan angeliko

Ku boka ta konfesa
fieldat na Kristu
Ku kurason silensioso
ta sera aliansa ku Satan

Kuenta di banko na Suisa
YDK blanku ke ta e mesias ekonomiko i politiko di un pueblo pretu empobresa
Kuantu hendemuhe pretu ta doño di un pomp di gasolin?
Kuantu muhe blanku ta brasa bara na Piskelat?

Bo predikashi komersial pega den purgatorio
Bo fe frakasa den un fiernu temporal

Santoli p’e sinberguensanan

Antikristu chiki
Kumprando kurason dje pueblo
Bendiendo koper pa oro
Wak nan den bo pantaya
Skucha nan na radio
Lesa nan den korant
Mira kon nan ta sita skritura sagrado

Periodismo Dekolonial, Deboshon Na Esnan Empobresa

“Na Korsou no tin asuntu di pretu ku blanku.” – Angelo Virginie komunikado sosial na radio Hoyer reakshonando riba e protesta kontra Zwarte Piet

“No hinka Tula aden” – Orlando Cuales den Tertulia na Z86 reakshonando riba e protesta kontra Zwarte Piet

“Kwa medida ku bo mester a tuma bo ta mas orguyoso di dje?” – Anneke Polak periodista ulandes na Paradise FM den un entrevista ku minister di finansas Jose Jardim

Semper bai e speransa ta keda karga ku entidatnan i personalidatnan den media lo hiba e fishi di produsi notisia na un nivel haltu ku lo akompana un pueblo na kaminda ku inkonsientemente ta enbolbi den batayanan diario pa deshasi di e pispis di sklabitut i kolonisashon. E kouchi kolonial di awendia ta bin den diferente forma, un di nan ta e manera kon komunikadonan den media ta suministra notisia adapta na e realidatnan di e interesnan finansiero ku ta patronisa nan dunado di trabao. E Tambu ku keda toka pa tur hende skucha i baila riba dje ta esun ku kapital ta aproba su letranan i koro. Den un momentu eksepshonal por desvia i ekspresa sierto berdatnan ku lo spierta e publiko pero esei por keda kalifika komo aktonan suisidio laboral.

Ayera den e programa di notisia na Paradise FM e titular di finansas a keda entrevista. E periodista hoben feminino en kuestion ku a bin for di Ulanda establese su mes na Korsou opviamente no a lesa e raport di ECLAC un entidat di Nashonan Uni riba nivel di ekonomia-finansas ku a bedei ku e islanan den teritorio ulandes mester fleksibilisa e akseso na e merkado finansiero pa mehora e nivel di bida pa esnan ku entrada abou i e negoshinan chiki i mediano. Falta di e konesementu spesifiko aki ta lanta ora no tin sufisiente interes pa bringa pa balora bidanan pretu empobresa. Mester ta di naturalesa ku un periodista ta puntra un mininster di finansas ki dia ta bai implementa e hermentnan gobernamental pa adapta e manego bankario pa hende ku entrada abou? Medidanan ku a viktimisa gran parti di e populashon ta tin un impakto pero keda sin interoga e punto aki lo kai den e kategoria di komplase e manegonan neoliberal ku a mortifika bida sosial na Korsou. Ehempelnan di un muestra di empatia pa e klase trahado pretu lo tabata si a konfronta e minister ribaa e fabula ekonomiko-finansiero ku mester fleksibilisa leinan laboral pa klima di invershon drecha. I kon por hinka hopi mas plaka den ensenansa pa garantisa un futuro fortifika pa alumno nan ku awoki ta kai den e abismo di drop out, krimen of e bida di salario minimo paso nan no tin sufisiente pampel eskolar pa subi den sosiedat. E pashon pa informa solamente e interesnan di e komunidat ulandes i YDK klase medio ta opreshon mediatiko, e ta un kouchi kolonial ku ta mantene e strukturanan di poder den mes un posishon dominante i ta laga esnan desempodera pa nan kuenta. E alternativa ta pa demokratisa notisia, tumando responsbilidat rasial, rekonosiendo privilegio blanku periodistiko i kria un kultura di un konsenshi pa protega e klase trahado ku ta kargando e sosiedat ku nan sodo i sanidat.

Periodismo emansipatorio ta nifika ku un komunikado sosial mester ta na altura di e historia di sklabitut, kolonialismo i kapitalismo karibense i e maneranan ku esei ta manifesta na Korsou. Ta un imposibilidat ignorante ku na un emisora di mas ku tei mas ku un mitar siglo den kasnan di hende ta sali un ekspreshon falsu ku na Korsou e problematika di rasismo no ta eksisti. E mesun mentira mediatiko ta keda ripiti na un otro frekuensia radial ku ta manipula mente di e skuchado ku Tula nunka tin un konekshon ku un protesta kontra e figura rasista Zwarte Piet.

Periodistanan no tin e komprenshon, ni ke buska konesementu kon rasa, klase, genero i kapital a krusa den otro i laga e sosiedat aki drai. Disendente nan no ke ta paso esei lo trosa nan zona di komfort den kapitalismo krioyo. UNESCO ku mester tabata instrumental den honra e dekada pa hendenan afrodesendiente ku ta kana di 2015-2024 no ta sinti e nesesidat pa asuma su responsabilidat pa eleva e kalidat di periodismo pa lokual e ta risibi fondo di Nashonnan Uni.

Zonidonan ku na 2016 un otro koro lo kanta no ta na horizonte ainda. Podernan den prensa lo no stop laba man tanten pueblo no sali pa salba su mes.

Kai Zengene: Un Espasio di Libertat Pretu

Wiels portada buki

Kai Zengene ta pata pata di hende, e kaos di komberti un nashon aflihi pa podernan opresivo ta resona den kurasonnan dje publiko presente ku ta kana ront mane un Ban Topa den e magasina di kambio radikal. Un kaos organisa ku ta buta emfasis riba kuestiona, kritika i kambia e strukturanan eksistente ku ta tene pueblo komo presunan sosial na Korsou. Na entrada dje porta un dama i un kabayero ta saluda tur hende ku ta drenta ku un orashon tradishonal Afro-Kurasoleno yena ku kalor i amabilidat, un ritual ku ta pega i ta fortalese e relashon entre e bishitante dje sentro di empoderamentu pretu. Esaki ta e strategianan di un mundu nobo, pasonan pa progreso spiritual kamufla den taktikanan di kompashon.

Aja ta drei wak ront, midi e situashon di ariba te abou i ku kuidou ta komenta kon e ta sinti su mes den e komunidat kaminda espasionan nobo ta keda krea pa libera hende pretu for di un sistema di dominashon blanku ku ta manifesta su mes den ekonomia, finansas, salubridat, media, ensenansa, politika di gobiernu i arte: “Si nos tabata stima nos prohimo di berdat nunka lo mester ta tin leinan, gobiernunan, institutonan di poder ku ta rigi nos bida na tur momentu, ta pa falta di nos desbalanse spiritual ku nos ta keda goberna pa hende ku tambe ta choria den un laman di fayonan spiritual.”

Papia sanktuario i hende lo grita Zengene ku ta sinonimo na un teritorio ku ta ofrese outo-determinashon, liberashon pretu alina ku e eksperiensia di Helmin Wiels. Su asesinato politiko na 2013 a lanta hopi hende for di un sono letargiko. “Ta 5 di mei mi wowo a kuminsa spierta i ma mira e retnan di poder ku pa dekadanan a blendu un pueblo ku prenchi i prenda chiki mientras nan tabata chika saku di komunidat limpi limpi.”
E penshonado na palabra ta lamenta e morto di e lider di movementu politiko Pueblo Soberano i den mesun rosea e ta bisa ku bos duru ku algu similar a pasa na Guyana 10 di mart kaminda un aktivista, un shofur di bus, eks militar, deportista tabata protesta kontra korupshon i praktikanan ante klase trahado i rasa pretu den gobiernu a keda asesina. “E pueblo di Guyana a reakshona meskos ku aki na Korsou, un shok chiki pero bida a sigi normal manera nada no a pasa, niun protesta grandi, niun lamento masal di un bida pretu perdi manera esun di Courtney Crum-Ewing.”

Kisas esei ta e destino ku bida pretu den Karibe tin ku pasa aden. Ta yega un temporada ku bidanan blanku, e poder di elite blanku lo keda mata, nan sanger tambe lo kuri den kayanan di Korsou i Karibe. Konfeshonnan ku ta sali na kla durante e klasenan di edukashon politiko di djaluna anochi na Kai Zengene ta konfirma e sospecho ku ta keda opina. Un hoben di Feffik ta komenta kon ela kapta e similaridat entre tumbando e statua di Peter Stuyvesant i studiantenan na e universidat di Cape Town ku ta eksigi transformashon edukashonal, remplasa ensenansa sur-afrikano blanku pa un fundeshi di historial pretu tur hinka den e malchi di kita e statua di opresor kolonial Rhodes ku a abuza di e pueblo originario di Sur Afrika. “Nan a subi Wiels su lomba dia ela grita ku Stuyvesant tin ku donder op, a tilde di politiko di simbolismo pero nan no ta tin e komprenshon vishonario pretu ku kada proseso di kambio struktural ta inisia ku un ritual un simbolo pa habri e kaminda pa kambio struktural, Stuyvesant tabata para pa e adorashon di e supremasia blanku ulandes ku a kria rais den sesunan di hende pretu na Korsou. Lagando e statua disparse tabata un akto seremonial pa desmantela e sistema di kolonialidat den mente di hende, nos ta na kaminda pa drenta den un era nobo pero tin ku traha duru riba dje si, dedika, displina nos mes pa sigura un futuro kaminda bida pretu ta keda balora.”

Varios kursonan interesante ku klasnan yena tur siman ta riba historia di Karibe i Sur Amerika i Merka den e kontesto di pueblonan Afro-desendiente, leinan laboral i praktika di lei en general. Un dje representante di Zengene ta agregra ku e kurso nobo di poder di finansas ta keda risibi ku hopi interes speshalmente pa e echo ku mas i mas hende ke domina e konosementu di e sistema finansiero kapitalista ku ta manipula mente di hende di kere ku politika den Forti ta manda den e pais aki enbes di wak e strukturanan di poder finansiero-ekonomiko. E kurso kotisa ta eduka kon henter e sistema di bankonan ta funkshona, kon plaka ta keda krea for di nada i kon sin konsulta di pueblo ta krea manego bankario ku no ta na sirbishi di pueblo. Un kursista ta informa ku “nos ta bai krea nos mes institutonan finansiero, e era di keda sklabisa pa bankonan a pasa, na imperio ta kai un bes aki, si morto di Wiels mester a indusi esaki asi sea pero alomenos nos ta bai boga pa outo-determinashon finansiero.”

Wiels i religion ta un kuadro di relashon di amor i odio. Semper ela kuestiona liderasgo di iglesia katoliko, kulpando nan di bandona e Rerum Novarum ku ta un dokumento di siglo 20 ku ta insisti pa perkura humanidat pa e hende di klase abou. Ekplotashon di labor, anti-pretu rasismo, abuzu finansiero-ekonomiko, degenerashon den media tur ta un resultado di desekilibrio spiritual ku no a kai for di shelu den un anochi.
Ora lidernan religioso ta komersialisa nan fe bo krea katibunan kristian i versikulonan di beibel no ta salba hende si no tin akshon divino su tras. Hesus a revolushona e wega di libera hende, esaki mester keda refleha den e karakter di kada pastor, si nan no sa kon ta hasie nan por tuma un ehempel di Wiels ku a purba di resusita balornan di e Nazareno pretu.

Kai Zengene ta habri tur dia di siman for di mainta 6.30 te ku anochi 11 or. Na mei e lo habri su fasilidat di media pa transmiti na televishon e diferente kursonan, debatenan, foronan, dokumentario i tur otro sorto di informashon transformativo.
– Djadumingu – Grupo di estudio abolishon di prison i detenshon hubenil
– Djaluna – kurso soberania di kuminda i salud
– Djamars – aktivismo i arte tayer
– Djarason – independensia finansiero ekonomiko
– Djaweps – historia di Karibe, Latino Amerika i Merka
– Djabierne – tradishonnan afro-spiritual
– Djasabra – kurso di media radikal sosial