Dia di Obrero 2020

laga e niger koba no siñele nada sembra desunion den su kurason

Un pastor makamba den Santa Famia predikando ku hende mester ta hustu i ku Korsou tin un futuro vago i insigur pero pueblo no mester nervia i keda kalmu paso dios tei. Su gobiernu opresor na ulanda,  su klase di empresario ulandes ku ta roba poder ekonomiko i finansiero na Korsou no ta hana un palabra di skualmentu. Di berdat e tabata un predikashi ku KdK, VBC, asosashon di bankonan, supermerkadonan i otro negoshinan ku a chupa sanger dje pueblo lo mester ta orguyoso di dje.

Siguiendo ordu di satanas pa sensura e evangelio di hustisia selestial ta un berguensa pa un saserdote (makamba). Korsou a keda di skop bek na siglo 18. Esaki te resultado di un liderasgo katoliko  frakasa di un italiano blanku ya pa 20 aña ku sistematikamente ta boikotia e realidat di un liberashon pretu karibense. Obispu Secco sirbido dje diabelnan di plaka na Korsou ta laga sierto fielnan kritiko hasta pensa ki sorti dios den shelu ta aproba un koño mama pa hala rosea pa dos dekada. Religiosonan rebelde ta defende e trahado i tur ku mester di trabao pa por biba. Absensia di esaki ta un sunchi riba frente di e profetanan di plaka.

No ta tin un kambio ku pueblo sufrido por a sinti e aña aki kompara ku e delaster 5 diskursonan dje liderasgo sindikal riba prome di mei na Otrobanda. Nada di urgensia, niun tono menasante pa defende e obrero kontra e krimen organisa pe elitenan ku ta konspira pa hasi e islanan mas pober ainda di un manera pa kompeti pe regio. Nan tin hopi gana di buska mas hende djafo pa dobel e kantidat di forsa laboral barata i komo ultimo deseo makabre ku nan tin ta pa dolarisa Korsou ku lo por bira un dje delaster klabunan den e kai morto dje baranka aki.

Palabranan bashi den un misa bashi, spiritunan sindikal bashi, ku no a ilumina pueblo riba nada, nada riba ulanda i eksigi pa kansela tur debe, niun vishon kon Korsou mester bira despues di Covid-19. E otro nivel di  luchadonan trahado ‘radikal’ di parti di Solidaridat Sindikal no tabata muchu diferente ku bo ta ripara di berdat tin un krisis. Nan por tin un analisis ku te na un sierto nivel ta parse ku nan ke i ta bringando pa instala hustisia sosial pero e akshonan den e luna aki ku a pasa e hamber pa e asina angela hustisia sosial no tabata den tur hende su kara. E ta keda vago i no ta sintiendo nan presensia den kaya, den prensa. Un gritu pa para e wega di uitzendburo i kompanianan ku ta abuza di trahado tabata hasi falta. E konfrontashon ku e klase elitario ta lanta e sinti di hustisa i esei nan a skohe pa no hasie pues nan a skohe pa laga pueblo mansu.

Wim van Lamoen eks-presidente di sindikato Straf pari aña pasa a rekorda tur hende ku trahadonan di gobiernu tin e derechi sagrado di eksigi di APC (fondo di penshun general di Korsou) na ken i kon e 4 miart ku nan ta sinta riba dje por keda inberti aki na Korsou den un manera ku e ta rende i krea un ekonomia i bienestar finansiero pa e trahadonan di gobiernu i pueblo en general. Esaki mester bira un realidat den 2020-21. Kosnan asinaki ku variashon riba manego bankario i ekonomianan ku no ta den man dje trahado mester krea un manual huntu ku pueblo pa dirti e kadenanan di kapitalismo krioyo. Esei te mandato dje sindikatonan anto sin sakrifisio esaki nunka por keda logra.

Parse ku sindikato, mandatarionan, parlamentu kompletu, religiosonan i prensa huntu ku intelektualnan, movementunan sosial i komunidat di arte ainda no por rementa e konsenshi kolonial i habraka e temor pa e hirarkia di poder di plaka lokalmente i regimen kolonial na den haag. Corona ta laga tur hende kana sunu keriendo ku nan tin paña bisti. Mientrastantu manera Chin Behilia a kanta “laga e niger koba, no siñele nada, sembra desunion den su kurason” bosnan pagatinu pa e buraku ku pueblo ta kobanda no ta destina pa bosnan tur. 

Konbenio Ruttenaath i Luchanan Kontrali -Dwalu Kontra Kolonialismo Ulandes

BonBiniBusinessCuraçao

“Kòrsou inspirami pa mi bolbe kas, stop di bende nos awa i nos tera pa depchi awo, sera boka di tur ku ta bisa ku nos lo no por. Ai Kòrsou habri man, mi ke ta bo yu. Kurason ta bo nifikashon.” ~Fridi Martina – ‘Anhelo’

Sangrando di paden ku wowoman tur di bludu sufisiente hende na tinu a mira na februari 2018 sekretario di estado Knops i parlamento ulandes uza un lei dehumanizante pa invadi un Statia anti-kolonial rebelde luchando pa un outonomia engrandese i rekolonisa su gobernashon i pueblo. E kolonialismo venenoso for di Den Haag no a perde pa gana i a sigui skupi su venenu riba un St. Martin destrui na filingrana despues di e orkan Irma. Djei e la baha bai Boneiru konkistando un gobiernu i su populashon ku palabranan manipulativo i e notorio saku di plaka.

Mientras e aktonan sin skrement di rasismo kolonial ulandes tabata avansa den reino Karibense e degradashon di kolonialismo finansiero tampoko no a wanta di parti sla via e kolegio Cft ku ta dikta kwantu gobiernu por gasta i unda mester benta machete pa asina sigui komberti Korsou den un santana sosial.

Na tres okashon esnan vigilando e pasonan abusivo dje makambanan a alerta ku algu similar por pasa na Korsou tambe. No a dura hopi ora e speransa inosente di gabinete Rhuggenaath pa un futuro miho a boltu den agonia i frustrashon i a ‘fada’ ku e situashon ekonomiko hodidu i e eterno preshon kolonial di Cft i a ‘tira e serbete den rin’ i huntu ku Den Haag i presidente De Boer di VNO-NCW ku ta representa interesnan di komersio ulandes a traha un konbenio pa desaroya: “Ekonomia, 2) Finansia públiko i 3) Aparato gubernamental. Ròl di Ulanda den esaki no ta pa yuda ku fondo, pero pa duna sosten tékniko kaminda surgi e nesesidat (esaki entre otro den forma di rekurso humano i konosementu). ” E puntonan mas esensial ta: “Ulanda ta pone na disposishon un konsehero di transishon (transitiebegeleider) pa yuda identifiká proyekto- i inisiativanan ku tin e potensial pa aselerá e proseso i asina krea e resultadonan deseá di forma mas efektivo i efisiente. Tambe pa duna guia i teps pa di e forma aki pasa konosementu na e aparato públiko, kreando asina un impakto duradero;

  • Ulanda lo fasilitá, kaminda ta deseá i ta nesesario, ekspertonan adekuá riba tereno di gobernashon i finansas pa yuda fortifiká i pasa konosementu na e aparato públiko;
  • Ulanda lo kompartí ku Kòrsou konosementu ekstenso pa loke ta trata eksplotashon di tereno i maneho di propiedat di Gobièrnu di Kòrsou, ku ta benefisiá i yuda mehorá finansia públiko.”

Aki nan kolonialismo ulandes internalisa den e liderasgo politiko di PAR, MAN, PIN a gana i den konspirashon ku B.V. Den Haag a krea un formula pa purba sigui implementa e medidanan ordena pa Cft sin risibi un intervenshon ofisial i asina tirando un pará pa intenta akselera e proyekto di rekolonisashon ulandes na Korsou.

E kenshinan kolonial aki ta un resultado dje operashon di opreshon rasial finansiero; un sistema asepta for di 2008 i e koalishon aktual i oposishon i tur otro den pasado semper a rekonose su legitimidat.  Pesei na momentu ku a organisa e di dos kumbre Bon Bini For Business Curaçao enkabesa pa prome ministernan Rhuggenaath i Rutte no ta tin niun gritu i eskritura di rebeldia apesar di varios analisis politiko ku a spierta pueblo pa tene kuidou ku e movidanan dje makambanan basa riba e atrosidatnan kolonial komete n’e otro islanan.

Un pueblo mentalmente kontamina ku kolonialismo ulandes ta aktua kontra su naturalesa i kontra su mes ku un kurason morto spanta. Atrobe esaki por a keda mira feu ora na Ulanda no ta tin niun esfuerso hasi di parti di e komunidat YDK konsiente pa eduka, agita i organisa kontra e gobiernu ulandes ku ta ehekutando su manego di rasismo kolonial den tur trankilidat sin niun molester. No ta algu abnormal di eksigi dje diaspora mondu biba na Ulanda pa emiti kritika den Volkskrant, NRC, kalke plataforma grandi di media kaminda por kita e maskarada di gobiernu ulandes. Tambe no ta nada imposibel pa esnan konsiente aki na Korsou pa publika kritika anti-kolonial den korantnan i plataformanan grandi di komunikashon na Ulanda pa asina sikiera batayá e diabelnan sinta na Den Haag ku palabranan i influensiá e klima di polygoon periodismo ku ta nara Korsou for di un brel kolonial blanku pa komplase nan klientela i mantenshon di poder politiko na Binnenhof.

Pa Kòrsou mesun kos. Henter aña tin bola di hende ta papiando skat di kos herigando kontra gobiernu ulandes. Individuanan i gruponan ku influensia  ku a proba nan por mobilisa hende kontra inhustisia pero ora e momentu di oro yega i e kabesante di kolonialismo ulandes i su ayudante tei riba e isla aki diripiente tur e gritochinan a bai skonde. Tur partido politiko opositorio a guli nan batimentu boka anti-ulandes, dobla nan rabu i a kai sinta den skina hasiendo koi bon mucha kedando ketu ketu na momentu ku shon Rutte i Knops a yega. Sindikalismo, lidernan religioso, akademikonan, miembronan di prensa, abogadonan, studiantenan, mundu di arte, influensiadonan riba medianan sosial tur ku semper a saka zonidonan pa konsientisa kontra e agreshon kolonial di Ulanda tambe a sensura nan mes alma durante e bishita dje podernan blanku politiko na Korsou. Tur a proba di ta yen yen di skuma i tiki chukaliti i no ta tin sufisiente forsa mental i vibrashon spiritual pa desobedese e ritual di miedu kolonial i kibra e siklo visioso di sklabisa un pueblo.

Varios hende ku ta haña stuhl pa sinta na radio, televishon i korant a kalifika lokual a pasa na Statia un golpi di estado i esun na Boneiru un variante suave pero despues a sigui ku e ordu di dia mane nada a pasa. Un desepshon i fayo grave si bo ta analisa i taha ku tin un peliger grandi na kaminda pero bo ta ninga di hinka un plan di defensa den otro.

Loke por sosode na Korsou tur lo depende kon e parti dje pueblo aki lo organisa kontra e intento nobo aki empaketa den un konbenio pero mas importante kon nan lo akshona ku forsa kontra tur e atrosidatnan kolonial en general. Ounke ta lat na tur oloshi i oportunista pa aktua despues ku e bom kolonial a baster e movementu politiko Kousa Prome ku su lider Rene Rosalia a organisa un reunion di protesta ku a kulmina den reunifikashon popular laganda divishon atras harmando un moveshon nobo ku ta para pa un “Frente Amplio pa Gobernashon Propio”

E proseso emansipatorio pretu ta adelanta ora prensa, poder popular, politika, akademia, intelektualnan publiko, sindikalismo, movementunan sosial, religiosonan, artistanan aleha nan mes for di luchanan robes pa drechi. E sekuensia korekto mester ta ku antisipando yegada di kalke representante di kolonialismo ulandes bo ta organisa for di tur angulo resistensia i konfrontashon kreativo i no despues ora e kolonisadonan a bai bek Ulanda kaba. I hasta si di tur manera esei sosode minimalmente bo tin ku duna boka i plama un kontrabalanse den medionan ulandes na Ulanda pero tambe regional i internashonal manera regularmente e movementu Nos Ke Boneiru Bek sa hasi. E ora ei den bista di hende nan lo legumai di tira e etiketa di politikeria barata riba bosnan pasobra a keda demostra ku bosnan porfin ta praktika lokual bosnan ta predika. Pero awoki tin muchu kos ku ta duna pueblo deskonfiansa. Legionnan di ehempel manera:

1. Rutte ta aki i prensa ta haña oportunidat pa hasi preguntanan kardinal durante un rueda di prensa i e miembronan di prensa ‘anti-kolonial’ ku ta profila komo patriotiko i kontra kolonialismo ulandes no tabata presente. Ta un ehempel klasiko dje lucha di dwalu. Nan por a primi i kuestiona Rutte i Knops i tene nan responsabel pa nan aktonan rasista kolonial pero enbes di esei nan a fasilita un hanchi di skapatorio pa nan i despues hipokritamente sigui bati kritika djis pa bati i kritika. Vigilante ku Lilo Sulvaran na kabes, MAS99 ku Juny Joseph, Dwight Rudolfina, Tele-Curaçao ku Glen Thomas, New Song ku pastor Papi Esprit i Humphrey Zimmerman, CBA ku Sherman Antonia, Krioyo ku Darwin Gregg i Rignald Maduro nan tur konsientemente a laga e kolonisadonan sali viktorioso tolerando prensa ulandes i prensa kolonisa di Korsou sigui skibi i dominando e historia falsu na nos desbentaha.

2. Rutte ta tin un enkuentro ku miembronan di parlamento. Parlamentario Moses di Movementu Progresivo i Korsou di Nos Tur no a tribi di konfronta e prome mandatario ulandes ku nan kritika, lagando nan votado na kaya ne ora mas krusial di nan karera politiko. Cordoba di Pueblo Soberano tampoko a bisa e makambanan nada manera e ke laga hende kere. Mas bergonsoso tabata ora pueblo a mira un Pik Pisas tur djente afo riba potret ku Rutte mientras su lider di MFK ta den prison, priva di su libertat pasobra manera e partido ta alega ku konsistensia “ta Ulanda” ta tras di su enkarselashon. Mas ridikulo no por.

3. E sigiuente siman minister van Engelshoven di enseñansa i kultura tabata di bishita i huntu ku minister Zita de Jesus-Leito i Alcala Wallé nan a bai keiru den Otrobanda, Punda, Skalo, Pietermaai. Pasobra e planifikashon pa gentrifika e barionan ku ta riba lista di Unesco herensia mundial ta sigui, e deseo ta pa rekolonisa henter e sentro di suidat pa akomoda turismo di makamba ku yudansa di fondonan di ministerio ulandes. Sin niun molester e proyekto di dominio ekonomiko blanku ta sigui. Sindikatonan SITEK i PWFC representando dosentenan i e trahadonan di Kas di Kultura welgando no a sinti nan mes motiva pa topa ku e minister ulandes i bise ku su gobiernu ta e rais dje malora finansiero i eksigi asistensia sin limite den nos finansas pa enseñansa i kultura. Studiantenan i eks studiantenan/hobennan profeshonal no a uni pa manda un mensahe bon kla pe minister ulandes ku niun hende na Korsou no tin un debe di estudio di paga. Ta bosnan a kolonisa nos i konsekuentemente ta Ulanda debe nos i ta gobiernu na Den Haag tin ku paga tur gastunan di estudio.

4. ABVO un sindikato ku no a sali na defensa di su trahadonan na Boneiru i atrobe na Korsou ta hasi mesun kos. Presidente Adri Williams te ainda no a deklara nada riba e konsekuensianan ku e konbenio firma por tin.

E realidat marga ta ku tur hende ku semper tabata tin algu di bisa a enkadena nan spiritu pa baña den un speransa ku e kumbre aki makambanan lo bin abou i trese hopi negoshinan pa Korsou. Politikonan komersial ku no ta pretu i ni ta kompronde kiko ta liberashon pretu, sin niun sorto di ideologia ku a yora pa makambanan bin ku un fabrika di keshi ta simboliko dje nivel mediokre ku nos ta aden. Lider di Kousa Komun diplomatikamente a splika esaki tambe ku Korsou no mester di invershonista makamba riku pa e yu  di Korsou por biba ku kiriwichi. Ront Karibe e pruebanan tei ku dependensia ekonomiko estranhero ta stroba desaroyo berdadero di un pueblo. Un ekonomia aun mas makambiá lo hundi emansipashon pretu di Kòrsou mas.

Historia no ta suta hende su kabes, ignorando e realidatnan historiko ku a kousa e labatiba ku nos ta aden si. Na 2005 tata di prome minister Ruggenaath a publika un kritika kontra Ulanda kaminda e ta splika ku “IMF tabata e mukel di inhustisia ku Ulanda a uza pa limpia e aparato publiko i bati e esfuersonan (neoliberal maligno) di prome minister di PAR Miguel Pourier.” E resultadonan desastroso dje era di sera wowo pa e salbahe blanku ku e kreadonan di kapitalismo krioyo ta bistu. Di 2000 pa 2019 e rutinario adorashon pe makambanan no a desvia masha. Ketu bai liderasgo di tur sektor skondi o habri ta kere i anhela pa nos destino komo un pueblo lo keda kondena ku Ulanda. Bo tin un grupo kolonisa mentalmente te den nan igra i e otro ke sierto adaptashon den e relashon kolonial basta nan por yanga den un tera fertil di poder, prestigio i ganashi personal. Tur ta ingredientenan dje pan ku e diabel blanku a mansa pa nos kome.  Awo ta na nos pa kuminsa kou e wesunan dje skeleta di opreshon ulandes ku tin nos spanta i spoela nos spiritu ku aw’i huramentu pa anunsia yegada di un era rebelde nobo.

 

100 Logro di Kapitalismo Krioyo – Dia di Labor

 

100 logranan di kapitalismo krioyo - dia di obrero labor

Dia di labor ta rekorda tur hende ku sindikalismo ta mal stanka ora kapitalismo krioyo ta na mando: bewakernan, trahadonan di supermerkado, trahadonan den konstrukshon i mayoria trahado di pakus, hotel, kuminda lihe i den limpiesa te dia di awe no tin un sindikato, sufriendo bou di kondishonnan laboral menos faborabel strobando nan di por biba un bida digno na Korsou

VBC i KdK i Rasismo Komersialisa

sesunan-KvK-VBC-Korsou

Sesunan di VBC (Verenigd Bedrijfsleven Curacao) i KdK (Kamera di Komersio) ta prueba sientifikamente ku patronchinan di pensa ta aktivo 24 ora pa dia, 7 dia pa siman: “YDK pretu nunka por bira don di su mes pais, YDK pretu no por para na kabes di CPA, CPS, Airport, offshore, turismo, import, industria petrolero. YDK pretu pa mayoria ta traha e plaka brutu pa nos i nan tin ku sera nan smoel i no eksigi niun salario hustu pa biba un bida digno. YDK pretu tin ku keda katibu di elite ekonomiko, finansiero. Nunka laga nan bira dono di institutonan finansiero. Nunka eduka YDK pretu riba ekonomia i finansas emansipatorio.”

 

#30diMei69 Ong-A-Kwie

Waldi

“E pueblo di Korsou a keda bou di hopi opreshon. Mi ta papia di sklabitut mental: E sintimentu ku bo no ta sirbi i ku otro hende tin ku solushona bo problemanan. E sintimentu tei ainda pasobra esaki a keda hinka den nan ananan tras di otro. Speshalmente Shell tabata bon den esei.” Presidente di CFW e sindikato ku a representa e trahadonan di WESCAR kaminda e simia di rebelion rasial-laboral di 30 di Mei 1969 a keda planta.

 

Bèbè ta Bedei Trint’i Mei

Huma-Hubert-Bebe-Rojer-30-Mei-69-Korsou

“Kada YDK awoki tin e sintimentu ku e ta keda goberna pa famia Jonckheer. Un Jonckheer gobernado, un Jonckheer representante pa Antias na Washington, un Jonckheer miembro di parlamentu i propone komo minister plenipotensario, un jonckheer dono di un empresa merkantil kaminda hopi preisnan ta keda determina i monopolionan forma, un jonckheer dono di La Prensa korant di gobiernu, un Jonckheer ku tin tur pakus di suvenir, E ora ei tur obrero sa ku pa yega na algu den mundu aki bo mester ta miembro di famia Jonckheer. Pero e no por pasobra e ta pretu i Jonckheer ta blanku.” – Hubert ‘Bebe’ Rojer riba e rebolishi di trinta di mei 1969 na Korsou