Konfiansa Siegu: Media Mesianiko den Elekshon

mediatiko-2

Djadumingu 12 di februari 2 miembro di PS ta retira nan sosten for di gabinete Koeiman. No tin un rueda di prensa pa klarifika e situashon politiko di parti di Pueblo Soberano. Edukashon politiko ku antes tabata un di nan palanka ideologiko mas balora no ta konta mas. Mundu di media tardando pa yama i responsabilisa e parlamentarionan Mac Cijntje i Sherwin Leanora ku a saka e steker, fasilitando e politikonan enbolbi pa prepara nan kuenta mas miho posibel pa konkel ku e berdat tras di e berdat ku nan no ke pa pueblo haña sa. Un fin abrupto a yega depues di un racha di 4 aña akusando MFK di tin manchanan di sanger na nan man en konekshon ku e asesinato di nan lider Helmin Wiels dirpiente a keda labà den un rat’i ora. Introdusiendo ofisialmente un politika di kadaver kaminda ta uza bo lider asesina pa gana poder politiko sin biba su prinsipionan di liberashon pretu.

E kortina di huma ta diki, un novela eterno di intriga, redu, ribirishi politiko pa tapa e mannan invisibel ku plaka monstroso halando e kadenanan di bui ne bokanan den prensa i speshal den prensa radial ku ta alkansa miles di e votadonan tur ora na tur momentu. Ku tiki esfuerso un emisora ku un ekipo mediokre bou di nivel ku preparashon periodistiko hodidu ta drenta den kas, boka di trabou, den bus unda ko bo por ta pa influensia e manera ku bo ta nabega bo bida personal. Kada emisora ku nan adorashon komersial i nan konekshon politiko, kada un di nan ku sierto grado di kolonialismo radial, praktikando e fishi di produsi notisia for di un manego pa mantene un kontrol kon hende mester pensa i hasi pa sirbi e interesnan ekonomiko, finansiero i politiko di e pais.

Dos dia prome ku e gobiernu a rementa Cali Manuel reportero veterano di Direct den un konfrontashon ku Paul de Geus a kalifika e direktor di UTS komo un abuzado di poder. Normalmente mirando nos historia di tin miedu di bisa e berdat i e temor despues pa retaliashon lo mester tabata algu grandi di selebra pero pueblo den silensio a saka un gritu di alegria so pero niun kondenashon nashonal di parti di prensa a sali. Esaki ta e klima di periodismo. Deshonestidat ta sigui reina den medionan di komunikashon i e speransa ku tin kambio na kaminda ta hopi chiki den e tempu benidero ku lo finalisa den e elekshon nobo den e proksimo lunanan.

Demokrasia radial ta chikitous ainda mirando e sensura di e ‘diosnan chiki’ papiando tras di nan mikrofono. Boseronan di oposishon i koalishon tur ta hungando mesun wega di komenta, kritika e popchinan politiko pero sporadikamente nan ta uza nan poder mediatiko pa desmaskara e strukturanan di plaka brutu ku ta move e marionet politiko. Te ainda ta hopi skuma anti-kolonial anti-makamba sin por mobilisa un forsa popular ku por enfrenta e dominio di elite na Korsou i su ardu mayo na Den Haag. Pa e podernan bionario di invershonistanan, komersiantenan i otro tribunan ku agendanan skondi semper tin skapatorio tanten prensa ta proteha nan.

Nos tin 8 korant, 4, 5 tv, 8 radio grandi ku departamentu di notisia ku no tabata interesa pa informa pueblo via un debate-foro den e delaster elekshon di 5 oktober 2016. Ku hopi fanfara UNESCO i Renske Pin a skibi un raport mancha ku e enk di privilegio blancha riba e esfera di media na Korsou sin keda konsistente i organisa o sikiera purba di motiva tur hungado den prensa pa madura i harma debatenan pa yuda klara mas miho posibel e pueblo pa su eskoho politiko. Tabata Cifa e organisashon di sektor di servisionan finansiero ku a harma e uniko debate na televishon flankea pa studiantenan di universidat di Korsou i e klup di ekonomistanan. E dividendo di akademikonan, profeshonalnan i trahadonan den media ta keda pober si nan no bin bei i kuminsa bora e pos di finansas pa drecha e estado deplorabel di prensa, un raport, un debate simplemente no ta sufisiente i e ta refleha e flohera intelektual i komplisidat den tene un pueblo den ignoransia pa nan keda sinta riba nan mes stuhlnan chiki di poder i posishon sosial.

Pa e futuro serkano ya na Direct nan a kuminsa mansa e oreanan di nan publiko pa pordona nan aktonan di demonisashon di e lider di MFK  kondena pa korupshon antisipando un gabinete nobo bou di su liderato. Plaka bieu, plaka nobo, plaka pober tur ta skeiru e lunanan aki riba tur frekuensia, hinkamentu di palu bou kandela kolonial, hunagamentu di rol di badjon kontra ulanda den studio sin organisa niun krou.

Un tutu di desepshon dekolonial lo bai eksplota mas ainda den kara dje parti di e pueblo di Korsou ku ta angela (un sierto grado di) liberashon politiko i sosio-ekonomiko-finansiero (pretu) na momentu ku e grupo di 12 (MFK, PS, MP, KTDNT, Braam, Dennawi) ku tin un mayoria pa forma un gabinete interino i postpone elekshonnan pa dekonstrui e strukturanan kolonial di paden i djafo ku tin e pais aki strangula. E desishon pa bai prepara un  guera di dekolonisashon tin su sakrifisionan finansiero i historikamente e gritochinan anti-kolonial nunka a proba nan mes di ta tene nan sakrifisio 100 pa swai e spada dekolonial kontra forsanan elitario riba suela i e politika di apartheid ulandes ora e momentu di oro yega un bes mas riba un skalchi di oro.

 

Estado di hendemuhe 2016 i Prensa Emansipatorio Feminino

dh16

 

Min Ruthmilda Larmonie-Cecilia su mensahe pa Dia Internashonal di Hendemuhe ta un di e momentunan pa reflekshona riba aktonan heroiko di kurashi i determinashon di hendemuhe, pa eksihi nan emansipashon den un mundu di muchu desigualdat struktural. Emfatisando ku e historial di hendemuhe na Korsou mester keda inklui den e kurikulo di ensenansa pa alsa e konsenshi di lucha den e proksimo generashonnan. Mirando ku te ainda e bataya pa balora hendemuhe no kaba e minister a publika datonan di Ofisina Sentral di Statistik pa duna un bista ku sifra kon e posishon di e hendemuhe na Korsou ta desigual:
– 1 yanuari 2015 – 85.258 hende muhe i 71.713 hende homber
– 12,8% desempleo pa hendemuhe
– 10,5% desempleo pa hendehomber

– 31.976 hendemuhe ku trabao na 2015 i 6% tin un empresa chiki
– 29.846 hendehomber ta traha i 11,3% tin un empresa chiki

Promedio entrada pa luna bruto pa hendemuhe na 2011 tabata Kfl. 2.483,-
Promedio entrada pa luna bruto pa hendehomber ta Kfl. 3.690,-

Kasnan di famia ku un hendemuhe na kabes e promedio entrada ta Kfl. 3.891,-
Kasnan di famia ku hendehomber na kabes e entrada promedio ta Kfl. 6.389,-

E situashon familar ta trese kune ku kasnan di famia tin pa 44% un hendemuhe na kabes, ku chens grandi ku e kasnan aki ta kore e riesgo pa keda enfrenta ku pobresa 35% kompara ku ora un hendehomber na kabes 17%.

Tur e sifranan aki ta yuda pa forma un vishon kon e eksperiensia ta di ta un ser feminino na Korsou ku tur su retonan riba tur tereno. E ta konfirma tambe kon atras pega den kouchi boulo sierto hendehomber den prensa ta ku ta habri mikrofono pa miles di hende skucha deklarando opservashonan kontra-emansipativo. Un hendehomber tin un privilegio hopi grandi na Korsou kaminda su opinion den komunikashon radial ta domina riba e tiki bos feminino ku tei. Tin sigur dos bosnan maskulino na MAS99 ku frekuensia i konstistensia ignorante ta bosifera ku e era di e hendemuhe ‘debil’ a kaba. Nan filosofia ta ku e hendemuhe di awendia ta ‘skerchi’ i ku nan ta mesun abusado of mas abusado ku e hendehomber i ku no mester wori mas ku ponementu di emfasis riba nan desaroyo pasobra nan ta “igual” awoki riba tur nivel segun nan. Nan ta bai asina leu di hinka un malchi di manipulashon mediatiko den kabes di hende pa bai di akuerdo ku e pensamentu falsu aki. Pa nan no mester papia riba dianan speshal pa hendemuhe, sea ta dedika pa eleminja violensia domestiko, relashonal o kalke otro dia por ehempel pa salud di hendemuhe komo kombatiendo kanser di pechu. Ku nan silensia kalkula di boikotia kada oportunidat pa yuda emansipa outo-determinashon feminino sosio-ekonomiko i alsa e outo-estima di un hendemuhe nan ta kulpabel di e progreso stanka di e ser feminino ku nan di nan ta stima asina tantu.

Programanan di opinion ku ta reina awoki ta pa mayoria okupa pa hendehomber, esaki tin ku kambia pa pone un balansa den e espasio di krea persepshon publiko. no por tasina ku for di mainta Korsou ta lanta, yega merdia, te atardi i hasta anochi kasi tur bos ku bo ta skucha na emisoranan, lesa den korant, mira na televishon ta produkto di sea un hendehomber direkt of indirekto . Mirando un kara feminino na televishon no ta nifika ku e tabata esun ku a disidi kiko lo bai bira notisia. Ku mas independensia di hendemuhe den prensa e notisia lo bira mas miho i mas informashon for di e brel di e hendemuhe lo sali ku lo yuda hiba e hendemuhe bai dilanti den su bida ora nan tin e herment di konosementu na nan disposishon. E konbersashon mester keda habri den prensa pa tuma pasonan konkreto ku lo garantisa komunikashon sosial emansipatorio feminino.

*(Kfl. – Korsou Florin)

Edsel Evertsz, Un Bos Soshal Den Mundu di Komunikashon Radial

IMG01464-20160212-0920

Djasabra ultimo a rekorda un dekada di e ousensia fisiko di un produktor grandi di notisia na Korsou.
Un Santu Sakrefisio dedika na e hefe di redakshon di radio Hoyer sr. Edsel Evertsz ku den su tempu a pone un emblema den opserva desaroyonan notisioso i transmiti esaki na su manera pa e publiko. Ta un misterio ku despues di dies aña ni doño di radio Hoyer, su koleganan i kompañeronan den atmosfera di prensa no a yega na e konklushon inevitabel ku mester duna un sorto di homenahe na su persona den forma di un premio di periodismo, un konferensia, debate nashonal pa konsientisa mundu di prensa pa alsa nan nivel.

Edsel Evertsz a duna su pida den periodismo radial i speshal den e oranan di atardi kaminda e tabata habri e oportunidat pa pueblo por a yama i duna su opinion. Den un era kaminda e programanan di ‘yama papia’ tabata basikamente reserva pa Z86 i Hoyer. Manera 5’or bati tur hende tabata klaba pa skucha Edsel ku su topikonan di dia ku a yuda yena korantnan ku fasildat. Transmishonnan maratoniko no tabata algu abnormal, papiando oranan largu riba perspektivanan politiko, soshal, kultural ku ta influensia bida diario. Ta straño ku su aporte pa e klima di opinion i indirektamente huntu ku e oyentenan un tesoro di edukashon sosiopolitiko no ta keda rekonose pa e mesun komunidat di medionan di komunikashon. E ta rekonfirma e kultura di ignoransia den prensa pa uza historia i su hendenan di balor pa un ruta di asenshon pa evalua i eleva e produkshon di notisia na un nivel liberatorio pa tur su suidadanonan. Den tradishon di Edsel por konstata ku e zamurunan i hendenan sabirrrr nunka lo siña.

Prensa Plézi

E prome mainta di e luna di yanuari, dies or a bati un notisia di ultimo ora ta drenta na radio Hoyer, e reportero ta relata un suseso fatal kaminda 3 homber i un kuchu a laga Suffisant sangriente. Despues dje notisia di e prome dia di ana e lokutor bake feminino ta sigi ku su animashon, tokando un Tumba alegre di Doble R pa su oudensia mane nada speshal a pasa, komosifuera e prome nobo di morto no a kaba di sosode mes.

3 di yanuari Korsou atrobe ta spierta ku un otro notisia di asesinato, na mesun emisora e moderado di e programa di notisia i opinion ta prefera di no pone muchu atenshon na 3 hende morto den apenas 1 siman, e topiko di un ora i mei ta bira trafiko i strepi riba kaya.

Fin di 2015 den pitu Extra ta publika un deklarashon di parlamentario independiente Marylyn Moses kaminda e ta indika ku pa 2016 mester wak e votado bon paso nan a kwe un fada ku politika i si no tene kuidou nan por basha nan bala pa MFK. MAS99 ku ta keda patronisa pa MFK no ta hisa e notisia feu suela, sobra medionan ta drai kara hasi mane nada no a pasa kaminda par’i siman atras a uza mesun parlamentario komo e klabu pa dal e kaha di morto gubernamental sera.

Ta ora media ke, na nan kumbiniensia, ta wak kon por manipula ku notisia pa laga nan partido, interes ekonomiko, finansiero preferi lusi. Na Z86 no ta otro, einan bankeronan, presidente di banko sentral ta papia prome i na mayoria okashon einan so. Den nan resumen di ana 2015 nan konsentrashon tabata riba politika batiendo minister plenipotensario Marvelyne Wiels, Pueblo Soberano for di tur proporshon. E sektor priva no ta risibi mesun skrutinio eksagera, kasonan di froude mionario na Giro Bank no a keda menshona, Eric Garcia a keda proteha. Emsley Tromp su kontroversia na banko sentral ku raport KPMG i Kontroleria General, no a keda papia. PNP ku a sakrifika minister Balborda i ku un sra Verginie ku e kaso di aksidente durante marcha karnaval no tabata notisia di importansia humano pa nan. Cft ku a deklara ku sektor priva, bankonan i otro institutonan finansiero tin ku hinka man den kaha fuerte i inberti plaka den Korsou tampoko a risibi e atenshon nesesario pa e emisora pionero na Otrobanda.

Parlamentario Moses ku a dera gobiernu pa un minuto, no a bai den profundidat pero eks prome minister Asjes su retiro insplikabel si a fiesta kune, C-tex e proyekto di sentro di data fantasma ku a bai sawaka tampoko a elabora riba dje pa proteha nan hirarkia finansiero.
Dos ora i mei un resumen di ana di Z86 a resulta un hilaridat anto ketu bai den un shelu di pretenshon ku nan ta praktika “periodismo responsabel” manera nan mes ta kalifika nan mes den ” e resumen kompletu, e analisis final” di 2015.

MAS99, Krioyo, Fiesta FM na 2015 tabata entre otro e defensor di MFK, Robbie Dos Santos, Sure and Joe Black lottery. Gilbert Sparren no por a wanta e situashon manipulativo na MAS99 mas i a bula waya bai serka Direct kaminda e ta profila hopi mas miho ku un outoridat periodistiko ku tabata hasi falta na su delaster dunado di trabao. E fayo grandi ku Sparren a hasi ta pa pretende ku pueblo no tin mester di sa pakiko ela transishona pa un otro emisora. Periodistanan, reporteronan i propietarionan di media ta hole stinki di un arogansia di poder informativo kaminda nan ke sensura e berdat pa motibu di argumenta ku no ta pueblo su asuntu dikon un miembro di prensa ta hasi un mudansa laboral.
No solamente fresku pero tambe kulpabel pa tene un pueblo den ignoransia i sigui krea un airu di skonde kos i kore pa nan responsabilidat di enfrenta otro medionan di komunikashon riba nan aktonan di imoralidat den media.
Tur esaki ku amen di e grupo di periodistanan elitario ku a asisti e tayernan di UNESCO ku ofishalmente a kompromete nan mes pa alsa e nivel di produsi notisia na Korsou.

Den un pais ku pa mayoria ta identifika su mes komo kristian ta rebaha su mes ora e ta asepta ku ‘niun’ media a transmiti e ayuno I orashon nashonal hasiendo nan mes un dje kumplise mayo den kreando i alimentando e asina pa nan mes yama ‘krisis’ ku nos ta den. Ta resulta ku preparashonnan pa karnaval te dios di rango muchu mas haltu. Lo ta otro si nan Hesus tabata na bida i lo keda krusifika e ora ei si nan lo bai bibu mesora pasobra sanger ta bende, atentonan religioso di salbashon i sanashon di un nashon no ta konta den nan mundu komersialisa.

Reportero di Direct despues di un entrevista ku un parlamentario ulandes a keda enkurasha pa duna supermerkadonan ku nan preisnan haltu un kritika bon funda pero pa mesun moneda e boka grandi no ta habri papia riba un raport ku banko sentral a saka kaminda ta bisa ku ekonomia di bon di fiansa ta abuza di e fiado den nesesidat kaminda nan ganashi ta muchu grandi. Bon i otro fiansa mikro ta patronisa emisoranan manera MAS99 i Direct i pesei e raport nunka a bira notisia paso GL, MAS i otronan ta hana plaka pa pasa propaganda i aki e interes di pueblo no ta keda defende ku boka hanchu.

Kritika riba manego finansiero di bankonan ta keda bosifera sporadikamente pero ora presidente di Banko Sentral tei den studio di p.e. Direct e interogashon periodistiko ta dirti. E kabes di Banko Sentral na varios okashon a atverti ku nos nivel di bida ta muchu haltu. Lokual e kiermen ta ku klase medio i haltu ta fia, i spat plaka na kos ku no ta na nodi pero prensa iresponsablemente no ta profundisa den dje paso esei lo afekta su patronisadonan ku ta nifika un perdida di entrada ora ta eduka pa no hinka man den bo potmoni, hunga duru i konsumi produktonan pa loko.

Tabata prome minister Whiteman den su diskurso di ana nobo a duna signifikashon na e fenomeno di kolonisashon di plaka. Akinan prensa a hanja un oportunidat pa borda un diskushon publiko meskos ku tin awoki riba hisamentu di salario minimo. E dialogo riba entrada basiko nunka tabata un topiko pa media, i atrobe esaki ta keda refleha ora Direct ku konsistensia tin e privilegio komo un dje emisoranan popular di por entrevista minister di finansa Jose Jardim. Su dilanti den studio e entrevistadonan no ta hasi e pregunta kardinal ku e mester a hasi for di 2012 ora e titular di finansas a sinta: “Kiko lo ta e posibilidatnan pa oumenta un salario minimo teniendo kuenta ku Cft i presepuesto?”.

Ganando konfiansa di pueblo no ta bin ku hungamentu badjon tras di mikrofono ora esnan responsabel pa e malora ekonomiko-finansiero no tei. Ta tuma madures di tur akshonista den media pa sali na defensa di pueblo. Kibrando ku e miedu pa tene direktornan di kompanianan den sektor priva responsabel ta un riesgo grandi pasobra prensa su modelo ekonomiko ta traha pa drai riba nan plaka. Den un ana desisivo pa vota pa un parlamento nobo ku un gobiernu nobo e reto mester ta pa legumai e konkelmentu di manipulashon mediatiko i kuminsa stima e pueblo di berdat enbes di plama e meskla antikua di trese mitar berdatnan pa mantene e situashon sosiopolitiko i satifase e podernan ku ta goberna trai kortina na Forti. E lunanan benidero hopi kos lo pasa i pueblo lo testigua ku nan no ta interesa mas den e platonan putri ku prensa ke pusha den su korokoro.

Produkshon di notisia mayoria bja ta propaganda, e ta krea mensahenan ku ta konstrui karakter, aktitutnan pa laga hende pensa i aktua di djalunaa pa djadumingu den un malchi kolonial ku lo trese menos kambio posibel pa tene esnan ku poder i fortuna na Korsou den un posishon djingueri. Media un instituto ku ta trata su konsumido komo un mitar ser humano ku no merese atenshon informativo kritiko pa e sali for di e berans soshal ku nan a kondishone pa keda aden lo peligra su eksistensia ku ta mara na e eksplotashon ekonomiko ku ta kadukando.

Burda pa plaka te mannan ku a koba e buraku entre notisia di kalidat emansipatorio i notisia mediokre senshonalista. Dekadanan largu hefenan di redakshon, dononan di korant, televishon, wepsait, emisora ta fayendo den kibrando e aliansa ku kapital krioyo pa edifika un nashon. E tiki espasionan ku ta ofrese notisia riba sierto kalidat na sierto momentu por broma falsu pasobra ta e sobra mundu di media ta mediokre, no ta paso nan trabao ta asina fantastiko pero pasobra nan kompetidornan ta hasi un mal trabao. Ta e prosesonan aki ta soru ku esnan ku ta hunga rol di ta un medio di komunikashon konfiabel di kalidat haltu nunka ta sinti e preshon pa mester oumenta nan nivel ku defakto den ana 2016 mester ta un dje aktornan prinsipal pa transformashon struktural. Tin yen reto, tin boshi hende ku mester arepenti, pueblo di Korsou semper ku konsistensia a demostra ku nan tin e abilidat pa pordona, un transmishon di karnaval den HD no te kos. Tur esnan enbolbi den prensa sa ku no tin skapatorio o mane magno kanto-outor Nildo Martis a kanta: “Kambia bo manera…”.

Prensa Chikungunya

Prensa katibu
di shon nobo shon bieu
Periodista bobo
Bobolin
Ku nes e no tin.
Hambra pa keda paga
Rabia tras di mikrofono
Un pida bolo
Den su stoma
Riba su kuenta di banko
Ate ta kokocha tuma
yabi outo serka Vamparo

Plaganan di periodismo ‘5 florin 2 outo’
Skupi venenu den kabes di hende
Lage kere ku redu a bira e berdat verifika pa dios mes.
Doño di tv, korant, radio
Santu manipulado pa kapitalismo krioyo.
Mas sanger ainda riba bo portada
Mas potret di ‘Rasta’ pa yena bo saku? Mas televishon pa laga un pueblo pega soño pa semper?
Sigi papia ku lenganan di ignoransia infinito
Prensa ku bruki bisti,
holo stinki stinki di pupu.
Den su fase di beibi,
Gatiando.
Miedu pa hasi un pueblo mas sabi.

Plaka, plaka
Prensa chikungunya
Plaka, plaka
Ta laga periodistanan baila ku burdugu
Plaka ta lanta morto foi santana.
Un dia domferstant diabel tin ku disparse
Bibu e ta ta.
Un kambio irevokabel,
na kaminda.
Asina mes.

Rebelion di Oranjeschool: Un Plegaria di Skolnan di Bario

Klas 8

Jufrou di skol den bario ta bedei su muchanan

Abo por bai traha na Selikor
Abo Cost U Less
Abo EWT
Abo Centrum Mahaai si por drecha bo ulandes.
Abo limpiesa Martina
Abo por studia periodismo pero wak pa bo no ta muchu kritiko riba e orden establesi.

Romerschool a dunabu bon fundeshi bo ta bon na un puesto di Banko Sentral pero soru pa nunka fleksibilisa e manego bankario i nunka nunka nunka demokratisa manego bankario.
Abo no hasi ferfelu korda ku danki na skolnan mansu ku no ta kwestiona miedu habri boka nan ta kai net pafo dje boto dus bo mester ta kontentu ku bo por bira direktor di haf of aeropuerto ya bo kolo kla ta den bo bentaha mi yu no yora mami ta bin un bes pa bai bo les di golf of esei ta djaweps no awe ta kore kabai despensa.

Vigdis Mensingh college mayoria ku ta bai Radulphus podise otro anja podise e skolnan kanti kai fundashonnan por hanja un chens ku nan alumnonan tambe por sigi edukashon tiki mas haltu ya nan tambe por bira doktor, antropologo, sosiologo, kriminologo pa asina studia tur e atrakadonan dje elite riba nos oportunidatnan edukativo sosio-ekonomiko.

Skol di plaka
Skol di diabel
Skol di zumbi
Skol di kabes pali maishi
Skol di marioneta

Abo tin mag di bira un Mac Alberto kanando tur na blanku bisti skaf arte rebeldia den pali wayaka dilanti palasio gobernado.

Abo por bai Havo paso mi sa bo ke bira pintor of aktor pero di lamenta ku nan e riku sushinei a sera akademia di arte. Ta di bai Venezuela numa wak bo no choria di mas den Chavismo.

Abo por bira ama di kas den un bario margina skuchando Leutener Scanner na Krioyo keriendo ku un boter di awa bendita di Hesus por trese bo hombu bek.

Bosnan te uniko 4 di Banda Bou ku por bai Havo mi yu sperando boso yega den banki universidat pero korda ora boso studia lei no hinka den boso kabes pa bira un hurista aktivista defende bo komunidat ku leinan nobo of renoba ku ta empodera esnan ku nan a debilita semper.

Abo por bira donjo di korant pero korda eduka un krenchi i bruha kabes di hende mas tantu ku sanger, aksidente outo i otro kos kens.

Anto abo por bira miss Universe Curacao pero semper bedei ku kabei duru ta mahos i flaku te uniko forma pa logra titulo di miss.

Abo kiko bo ke bira, bo konseho ta Vsbo bera? Si jufrou pero mi ta bai Havo trankil di mi jufrou. Mi ta bai studia ekonomia sosial. Mi ke bira un ekonomista ku ta yuda pueblo hanja un potmoni gordo, diki ya asina mas yu por bai Havo ku leptop den nan man.

Jufrou di skol ta papia ku kabes di skol: Bo sa ami a kwe un fada supernatural riba e direktivanan diktorial di skol. Nan sistema di tofer ku test pasina sierto skol fundeshi so ta hanja preferensia pa Havo ta un abusu, ni dos eks prome minister ku tabata jufrou di skol nunka ta tin e kurashi pa kambia mehora e sistema di Apartheid edukashonal. Bo sa bon bon si nan tira un basora den e sistema di privilegio, e sosiedat kompletu lo bira mas balansa, mas mucha di barionan pober lo sali ku diploma universitario lo okupa funkshonnan ehekutivo ku si lo tin e pueblo aki ku ta lucha tur dia na su kurason. Un revolushon sosial mas Havo ku tin Kentucky, Burger King, MacDonald huntu. Desaster pa tur nan interesnan finansiero-ekonomiko.
Un fiernu sosial pa nan pa nos un espasio selestial sosial. Nan no ke mire sosode. Esei nan lo stroba, nan lo bringe ku rabu i kachu.

Bon Yu di Korsou No Ta Sinti E Dushi di Demokrasia 75 Anja

`Hende ku hamber no por pensa` te dicho original di e moderado Juny Joseph na Fiesta FM ku ta lagabu reflekshona kiko bida ta pa un mayoria grandi ku dia aden dia afo tin ku biba den un mundu di kapitalismo krioyo sin por gara chensnan pa krese komo hende, gana un salario na drechi, subi e trapi sosial bira un suidadano ku tin e hermentnan pa yuda su prohimo briya meskos kune dia ela klara un krenchi.

Ora bo ta den bo drama sosial diario di traha plaka pa kria yu, paga hur, awa i lus, wak tanchi of mai, ta drif net net ku kabes riba awa ku un salario minimo disenja pa lagabu bira un salbage bo no ta interesa den kampanjanan manera esun di Telecuracao ku su ‘Bon Yu di Korsou’.
Un merkadeo su tras ku ta butabu pensa kiko tin ei tras, kiko UTS/Paul de Geus kemen ku awo ela bin ku tarifanan mas abou, promoshon nobo? Kiko Hubert van Grieken donjo di Kentucky Fried chicken, Pizza Hut, Subway kemen? Chicu Capriles di MCB ta bai demokratisa bankonan ku awero pueblo por tin un bos signifikante den e manego bankario di banko Maduro i Curiel? Tesei ta e esensia di duna instansia, instituto, hende un seyo di aprobashon di ta Bon Yu di Korsou.

Awe na Merka ne suidat New York trahado di fast food luganan a bai welga paso nan ke oumento di nan salario. Trahadonan ku basikamente suptilmente wordu menasa pa no bai buska representashon di sindikato den empresanan manera Wendy’s, KFC, Burger King i otronan. Situashon na Korsou no ta otro pero nos a tende den prensa e notisia importante ku por a habri wowo i inspira, inkurasha e trahadonan di por ehempel Hubert van Grieken? Nos planta nashonal Telecuracao bou dje mente magnifiko di direktor Hugo Lew Yen Tai no a pasa e notisia impaktante i di importansia grandi pa pusha e konsenshi di hustisia laboral na un nivel superior den nos sektor di servisio di horeka.

For di nan boka ta sali frasenan filosofiko mane komporta bo mes komo Bon Yu di Korsou pero Telecuracao ku tin e instrumento magiko poderoso pa komberti nos tur den suidadanonan kritiko ku kompertashon ku por eleva nos mes te aya no ta hasi uso di dje ora e tin ku traha notisia of programanan pa chispa e mentalidat pa bira un bon yu di tera di berdat. Unda bo programanan riba salu, edukashon, arte, ekonomia, finansas, politika, kultura ta pa nos komo hende por desaroya i bira lokwal boso ta purba di merkadea awoki?

E Bon Yu di Korsou e ta kontentu ku majan lo selebra 75 anja di demokrasia parlamentario? Awenochi ta tin un diskushon di panel despues di un diskurso di wes Bob Wit di Korte di Hustisia di Karibe for di Trinidad i Tobago. E miembronan dje panel tabata Wit, Orlando Cuales direktor di Z86, Suzy Camelia-Romer eks prome minister, hurista, Hitzig Bazur aktivista politiko, intelektual ku a krea un konstistushon nobo.

Diskurso di Bob Wit tabata riba nivel pero organisado por a usa mas kreatividat i invita un persona ku ta biba na Korsou ku por papia e lenga dje 60/70% dje klase trahado ku ta luchando pa sobrebibi i no tin gana pa skucha ‘un koi kwenti demokrasia’ na un emisora mal skucha pa pueblo klase trahado manera Z86. Na momentunan asinaki un Bon Yu di Korsou lo a organisa un debate riba 75 anja demokrasia i kon nan ta kere por lagele drei mas miho pa nan por hala un rosea i disfruta dje benefisionan ku awoki un parti chikitu so por manera esnan durante e panel na Banko Sentral.

Oportunidatnan manera esun aki bo tin ku transmiti nan na televishon i radionan popular manera Krioyo, Deltha, MAS99, Direct. Awo si ta e patronchi eterno di laga hende studia bon para so hiba diskushon semi-diktorial kiko ta demokrasia i kon por perfekshone sin e pueblo mayoritario den bom tin un bos influensial bo ta rekete robes i violando lokwal di berdat nos ta yama demokrasia pe pueblo.

Ekslushon dje empobresa, esnan sin diploma karu, e hoben, e muhe, e hende grandi, e presu, e studiante ta tin awenochi na Banko Sentral. Sobadje a papia skat di kos pero nada nada riba e faktor prinsipal ku ta orkestra kon hende ta pensa, papia, aktua i reakshona riba demokrasia: e sistema kapitalista krioyo ku su man drechi media via plataformanan di korant, televishon, radio i internet.
Si bo wordu manipula foi mainta trempan ora bo lanta pa wori kwa hende a hanja un bala, ken a wordu atraka, kwa outo a dal, ken a bai Venezuela hasi kiko, kwa parlamentario a hasi torne e proseso pa traha un malchi mas hustu di bo demokrasia ta destina pa frakasa pe pueblo, no pa esnan den sirkulonan di poder nan si lo ta di hubilo.

Bon Yu di Korsou nekdo tin hopi, e intenshon ta bon pero meskos ku e kampanja di Telecuracao tabata hasi falta di un aserkamentu mas profeshonal sientifiko kombina ku sabiduria di kaya. Sosiologo Adriaan Moen a skupi palabranan di kalidat profundo ora ela bisa tin 84.000 vehikulo, hopi outo pero 1 famia tin 4 outo i 4 famia no tin outo mes. Pa demokrasia ta bibu mester tin diskushonnan riba interes dje orden establesi, e 1/2/3% ku ta domina e forsa ekonomiko-finansiero. Debatenan pa oumenta bo konsenshi i partisipashon politiko, papia i efektivamente organisa un kambio di bo sistema di sirkulashon di poder i plaka dje Bon Yu di Korsou einan kos tei sinta, einan e Tambu tin ku sera pa nos spiritu por monta na un mundu ku demokrasia renoba di berdat.

[= For di e diskushon lo sali artikulo den korant, na radio lo papia riba dje i asina ta manipula un agenda di demokrasia real sin e pueblo mes mes por a naviga e debate segun su nesesidatnan, asinaki nos lo sigi 75 anja mas?

[= Positivo ku a menshona Referendum Konvokatorio i Asemblea Popular ku tin na Venezuela

[= Diskurso di Bob Wit tbt na ulandes, Latino, Hatiano, habla Ingles no por a sigi si nan tabata asina loko pa skucha Z86…

[= PAIS Alex Rosaria no ta organisa pa pueblo diskuti 75 anja demokrasia parlamentario manera su idolo Doktor Da Costa Gomez lo a hasi si e tabata na bida awe?

[= Gruponan di preshon elitario Akshon Sivil, Dushi Korsou, Pro Pueblo, Grupo 33 unda nan ta, no ta organisa mas?