Un Pueblo Rabia Ta Bati Huda, Chikote pa Wiels

– Bati un hende manera ta bati Huda | Duna un hende un bon hala di sota

– E ta masha huda| E ta un traidor

– Un Hudas| Un traidor, amigu falsu

E anja’ki Bati Huda organisa pa Hóbennan Ku Bista Riba Majan a karga e nomber di media-stilte referiendo ne hecho ku e persona ku semper tabata kla pa papia den media riba tur kos tur ora a disidi di keda ketu. E popchi ta tin un lomba hanchu ku helmu kora bisti lagando niun duda atras ku riba dia di resurekshon di Hesus Kristu e Huda pa 2013 tabata Helmin Wiels. Pueblo kritiko no a traga e traishon elektoral pa motibu di bandona e pakto ku MFK, MAN despues di elekshon i bula e drenta kura neoliberal di PAIS, PNP i miembro independiente Glen Sulvaran.

Frustrashon, rabia, desapunto, agonia dje sufrimentu di e traishon politiko ta keda ekspresa den e ritual di Bati Huda. Mientrastantu Wiels ta hasi cherchi dje evento krioyo bisando ku hende a wordu paga pa Bati Huda i ku nan tin miedu di bati su persona nan mes pesei nan ta bati un popchi, sigiendo kere ku su rol di Zorro no a keda desmaskara purbando di lusi komo e emansipado infalibel omnisiente di Korsou.

Domferstan ta un grip, un viro ku ta pega serka hende sigur ora bo lubida bo raisnan sosial. E pika mortal ku te ainda Wiels no ke rekonose ta ku ora ela disidi riba su mes den forma ku elite anti-demokratiko diktorial so semper a hasi di bai krea un werewere politiko lagando un elektorado di MFK (18450),MAN(8294) i gran parti di PS (19715) tur vulnerabel ku te ainda no a desaroya un konsenshi politiko atras komo werfano.

Ta e bruhamentu di ideologia, filosofia politiko ta debilita e konsenshi sosial dje grupo aki. Politika di chinchirinchi di bai bin sin por stabilisa sinta ketu i fortifika un vishon i akshon komun pa mehora e posishon ku a wordu roba for di nan ta un kansansio. Pueblo Soberano sin e sosten di 26mil piku voto di MFK, MAN ta mane e kantika “Mi So Den Boso” rondona pa partidonan semi i neoliberal no por pusha un agenda sosial dilanti. Esei no ta nifika ku antes ku Schotte i Cooper esei si tabata e kaso pero sikiera Wiels di banda por a influensia e votado di MFK i MAN pa preshona nan lidernan pa trese kambio real. Esaki ta bira hopi mas difisil (ku eksepshon mitar mitar di PNP) ku votadonan di PAIS ku su 4 asiento i miembro independiente Sulvaran ku tin e kartera di moneda magiko di finansas.

Wiels ni maske e tin su puntonan bon henter e bululu aki a kousa un epedemia di deskonfiansa serka pueblo ku ni maske ratu ratu e ta papia i move den lus i berdat su pasonan trastu feu november lastu 2012 ta strobe pa e por radia ku outoridat, kredibilidat politiko i hanja e sosten sin pueblo mester duda den dje.

No mester di un dia spesial disenja pa midi kon krouw pueblo ta riba lider di Soberano. Meskos ku antes hende no por a wanta di mira kara di Emily de Jongh-Elhage riba pantaya awendia Wiels na Telecuracao of CBA ta garantia ku hopi lo kambia kanal. Realidatnan ku futuro lidernan politiko tin ku tene bon kwenta kune. Tanten no ta demostra niun forma di arepenti e angustia dje elektorado konsiente i kritiko ta keda tota den weya.

E herensia kultural Bati Huda riba su mes mester keda biba i wordu engrandese yuda pa institutonan manera NAAM, Archivo Nashonal, Kas di Kultura ku dokumentashon profundo. Ne momentunan aki si bo subi youtube e grabashonnan ta kortiku i superfisial kaminda bo por saka hopi mas djus historiko kultural for di personanan pa sa kiko presis a pasa dor di piki pensamentu di hoben i bjeew, hombu i muhe, pretu i blanku kada anja ku ta tin batimentu Huda na Korsou. Temporada di Seu ta kabando i pa otro anja nos tin ku kosecha tiki mas seriedat den kwida nos goyanan kultural ku ta reforsa nos luchanan, alimenta nos identidat sigiendo di bai dilanti usando kustumbernan di nos antepasadonan.

Tambu a kologa Wiels

E lenga di resistensia, e bos di un pueblo trahado guia pa chapi i kueru fin di anja ta algu pa esnan sinta riba puestonan haltu tin ku tene debido kuenta kune. Niun tin skapatorio ora e koro zona, ora e tobo wordu bati. Ni maske bo tabata e supuesto angel wardado di e mesun pueblo ku pa anjos a keda wanta atras, no tin kwent’i ku bo a sigi kria un konsenshi sosio-politiko kritiko den tur barionan empobresa i hasta medio klase te riku ora ne momentu ku otro luchadonan a perde rosea. Ora Tambu dal aden su ira ta sin miserekordia, esaki lider di Pueblo Soberano Helmin Wiels por a sinti e prome bja dia Aya i su grupo a los e kantika “Mas Skuma Ku Chukulati”. E Tambu den un tempu trankil ta splika kon pueblo a hendel e desepshon despues di e elekshon di 19 di oktober kaminda PS a gana komo e partido ku mas voto. Aya ta kanta entre otro kon Wiels su politika ta un di papia papia so, un bon salesman, papia indoktrina, ku a konvensele pa sostene, pa konfie pero na final Papaito a bira Mamaita un metsla sin kuchu, un papiado ku tin zip di patras. E mesun hilu kora ta wordu kanta pa lider dje partido ku tabata of ta para pa independensia den e kantika di Tambu di Monchi i grupo Sorpresa ‘Mi Ta Kwe Bo Ta Tuma’. Aki den Monchi ta bin argumenta agresivo kon Wiels su prinsipionan sosial revolushonario a dirti ne momentu perta kaminda e strategia di un politiko oportunista ta tumba ideologia, etika i moral pa por forma huntu ku PARista Glen Sulvaran bulado di kura un gobiernu pa Korsou. Monchi komo kantante no ta laga niun espasio pa spekula i for di su riflu verbal e ta tira letranan pa Wiels mane: “Bo ta mas ladron ku esnan ka horta, Bo a traishona bo pueblo,
No tin un kaminda pa hinka bo kara.
Dia Rozier a kwe hesu ba rabia|Dia Cleopha a kwe hesu ba zundra|Awo ku Glen a kwe Wiels a tuma.
Mi pueblo habri boso wowo, ta un gobiernu di korupto”

E di tres Tambulero ku ta bosifera e pensamentu di pueblo ta Pincho i su komposishon di Tambu ta kwestiona kon ta posibel ku Helmin Wiels diripiente a bai djoin ku partidonan politiko ku semper ela kataloga komo enemigu: “Bo di bo no ta traha ku nai…pa bo ma vota… Awo bo ke un Taken kabinet (?)”

E delaster kritika popular musikal ta bini for di e grupo Zojojo i Mistica pero e bja aki no ta buta atenshon ne boltumentu di Wiels pero mas bien riba su vishon pa un Korsou independiente guia pa su partido. Mistica su bos di oro ta ranka sali ku un proganda anti-emansipatorio tanten Wiels ta hasi pantomina den politika konstitushonal: “Independensia ta loko bo mester ta, saka e wiel for di e gobiernu, sigui ku e kruiwag.” E Tambu aki spesifikamente ta indika ku Korsou falta hopi desaroyo politika madura pe bira independiente i ku klamor Mistica ta bedei ku nos “tin ku keda tene na saya di Ulanda” suponiendo te ora kos drecha pa laga los dje kolonisado.

Kwater Tambu tanki gera ta ferfelu pa desminti ku nan no ta yena kan kan ku berdat ku Wiels mes a yuda krea. Por bagatelisa hasi mane ta Tambuleronan bashi, ni awa i lus nan por paga i ku ta kwe fama kantando e lider di PS pero realidat ta ku sierto moveshon politiko astuto despues di elekshon den bista di pueblo a resulta un desepshon i e kousa noble di independensia tambe a hanja un sla na momentu ku e grupo di Tambu mas fama ta deskonseha pueblo pa bira un pais independiente. Musik ta poderoso i su potensia pa bringa kontra manipulashon den politika lo nifika algu serio solamente si e preshon sigi henter anja. Esei te maldishon di Tambu ku bo tin ku warda un 11/12 luna te ora bo por skucha bos di pueblo sin muchu sensura riba kosnan ku a tehi nan of hasi nan bida kontentu.

Honor ta bai na tur e Tambunan ku a remplasa periodismo ora prensa mester tabata mas kritiko pero pa motibunan di interes finansiero a laga pueblo konfundi, desampara. Den futuru serkano e Tambu lo mester bira e instrumento pa kwestiona bankonan i seguronan i otro den sektor priva ku riba mesun malchi di malehempel ta abusa, manipula bida di hende pa nan saku. Si e mensahe skerpi analitiko por avansa riba tur level nos por kristalisa un sosiedat un tiki mas hustu i e ora ei por papia o sonja ku pas.

http://m.soundcloud.com/morgan-isenia/grupo-sorpresa-mi-ta-kue-bo-ta

http://m.soundcloud.com/morgan-isenia/aya-i-su-grupo-bo-ta-mas-skuma

[« Kwa te emisoranan ku ta ninga di toka Tambunan ku ta kritika Wiels?

[« 2013 Bati Huda lo drei riba Helmin Wiels?

[« Si i NO a pasa pa olvido ta nifika ku Neo-Liberalismo, Kapitalismo salbahe a disparse tambe for di Korsou?

[« Kon pueblo por midi ku e pakto di sosialismo/independentista ku kapitalismo 3.0 por prospera di berdat?

[« Liderasgo vishonario ta nifika di laga bo partner den sosialismo na kaya paso nan no ta serio of muchu adikto na ‘bolo’ pa frei e real kapitalista koriendo e riesgo ku bo lucha emansipatorio ta plama for di otro?

[« Tin periodista ku a hasi Wiels e pregunta ku e kos ela hasi e mes den su bida anterior prome ku 19 di oktober lo a yame ‘froude elektoral’?

[« Por papia di PAS si Wiels despues di publikamente deklara ku e no ke gera mas ta tilda Dwight Rudolfina di ta un drogadikto, humado kos, tuma di kos pasobra ela kwestiona su pasonan skuins dwars?

[« Ki sorto di forsa Wiels tin pa domina su vishon sosialista riba e poder di kapital sin sosten i posibel mob ilisashon di 20mil piku votado di MFK i MAN ku ela eksklui?

[« Konta ku e Tambunan riba VBC i Ong Wichi?

[« Orashon nashonal pa gobiernu dekreta un ordenansa ku ta obliga emisoranan di toka 25% Tambu di nan selekshon musikal?

[« Unda e Tambu pe gobernado Goedgedrag a keda?