Kiko Wiels Lo a Bisa? – What Would Wiels Say?

what would Wiels say - kiko Wiels lo a bisa

Un politiko blanku krioyo sosiopat ku semper ta tin miedu di bisa e palabra makamba, rasista, supremasia blanku ulandes ku nunka ta papia di opreshon merikano den Puerto Rico, Haiti, US Virgin Islands, ku no ta ni bisa nada riba e rebolishi sosial awoki na Guiana Franses ku a kansa di e desigualdat kousa pa Fransia, ku nunka a mustra un akto di solidarismo pa nos rumannan bringando kolonialismo na Boneiru, Saba, St Maarten i Statia ku a modela ku su potretnan saka huntu ku Chavez pero no ta saka un man fraternal na Venezuela ku ta pasando duru awoki, ku nunka ta papia riba e lucha anti-rasismo di e Afro-Kolombiano pero semper ta papia di Kolombia si ku nunka a bisa un palabra riba e dekada hende di desendensia Afrikano o e bataya pa reparashonnan di parti di CARICOM pa konsientisa i empodera su votadonan pretu, ku poder politiko pa tormenta Den Haag mesun duru pero semper ta kobardia di mobilisa i organisa su komunidat elektoral ku nunka pero nunka den su bida a duna kursonan di politika pretu Karibense ku tabata pro zwarte piet ku te ainda ta engaña su mes ku e ku su identidat blanku krioyo por ta un lider di un partido politiko den un pais pretu i ta uza miles di votado pretu troumatisa pa kolonialismo ulandes pega den un trampa kolonisa di identidat pa laga nan kere ku un YDK krioyo blanku por salba nan den politika ku pa kolmo ta purba di bringa un kaso den korte di korupshon kaminda ela keda sentensia pa keda kumpra di un Italiano blanku ku pa niun bledu ta interesa den e lucha di hende pretu i sin skrement ta uza e mesun abogado ulandes Knoops ku a defende e rasista sushi Geert Wilders na Ulanda.

E kumbu blanku ku henter su bida a parasita riba bidanan pretu via politika i tur su fortuna ta danki na kolonialismo ulandes awoki despues di un redada ta bin grita falsu fantochi ku ela kansa di makambanan i ku Korsou mester bira independiente..

 

A creole white sociopath politician that always been afraid to say the word ‘dutch white folks’, ‘racists’, ‘dutch white supremacy’, who never speaks about American oppression in Puerto Rico, US. Virgin Islands, Haiti and stays quiet on the social revolt right now in French Guiana who are sick and tired of the inequities created by France. Who never showed an act of solidarity to the peoples of Bonaire, Saba, Statia, St.Maarten fighting against dutch colonialism, who showing off with pictures taking with Chavez but doesn’t offer a helping hand to our struggling Venezuelan neighbors. Who always praises Colombia but never says anything on the plight of the Afro-Colombians and indigenous people battling for their dignity. Who fronts as a self-claimed regionalist but never talked about the decade for people of African descent or the fight for reparations started by CARICOM to empower his black electorate. Who together with his coalition partners has the political power to destabilize dutch colonial powers in The Hague but refuses to  walk his cheap decolonial talk. Who never organized and mobilized his political organization and Black voting community, who never ever set up courses on Black Caribbean politics, who has been pro black pete, who is trapped inside his own lies of thinking he is the political white creole messiah that has a god given calling to save Black people in Curacao using the traumatizing effects of dutch colonialism to make his electorate believe that a white identifying person will deliver them from dutch colonial violence. Who got sentenced for being bought by a white Italian who doesn’t give a damn about Black people, who is appealing his corruption case and hired out of all people mr. Knoops a lawyer that defended the dutch white racist politician Geert Wilders for a case againt anti-Moroccan racism in the Netherlands.

This damn white zombie who owes his abundant life and fortunes and everything else to Black people and the legacy of dutch colonialism now after a raid comes out crying that Curacao should become independent…

CHATA i Malestar Sosial

CHATA Pobresa

CHATA tin ku profundisa su mes den e historia di Korsou pa kompronde e origen di violensia sosial i kon esaki ta manifesta su mes. E ora ei lo rekonose ku nan grupo di interes mes a krea pobresa i mester chupa e preimu awo te ora nan tuma e kurashi i transforma kapitalismo krioyo den algu ku ta dignfika e bida pretu dje YDK enbes di trate komo merkansia karnal den ekonomianan blancha.

Stoi Tembla Pa Makamba Na Den Haag – Amado Römer Kapitulo 30, Versikulo 69

amado-romer-30-69-stoi-tembla-pa-makamba-na-den-haag

 

E Santu buki di Amado Romer den kapitulo 30 versikulo 69 ta bisa ku un gobiernu nobo ku ta huramenta nunka mester tin miedu di un gobiernu ulandes na Den Haag ku pa generashonnan largu a kolonisa pueblo di Korsou. Miedu di ta pretu, miedu pa eksigi pa respeta bo humanidat, miedu di tene bo kolonisado finansieramente responsabel. Temor pa forsa NL pe kumpli ku e prosesonan i tratadonan di dekolonisashon.

1795, Vensiendo sin Muri – 220 Aña

Slayana 1795

1791 Haiti a baster, 14 di ougustus e Bwa Kayiman seremonia di Vodou kaminda Haitianonan a hura i inisia di lucha i vense riba e sistema di sklabitut. Bombanan sutado i vitonan a konspira kontra nan shon, invoka un matansa pa demostra nan lealtat na nan rumannan sklabisa pa logra gradonan di libertat na e isla antes yama Saint Dominque. Notisia a plama ront Karibe i ku na mesun momentu mas i mas sanger a keda sakrifika pa anunsia e fin di genesidio pretu. Esaki tabata e som total di tur e rebelionnan organisa ku a kuminsa prome i despues di 1791. Cuba, Dominica, Puerto Rico, Martinique, Guadeloupe, Jamaica, Brazil, Colombia, Venezuela, Guyana, Barbados, Antigua, Nevis, Virgin islands, St. Vincent & Grenadines, Grenada, Trinidad & Tobago, Anguila, St. Lucia, Aruba, Boneiru, St. Maarten, Statia i Saba.

Apenas un luna despues na Jamaica nan tabata kanta kantikanan dje revolushon Haitiano. 12.864 hende pretu sklabisa, 3,564 hende blanku, 3.714 hende pretu liber segun senso di 1789 na Korsou ta mustra ku ni maske e populashon di desendensia Afrikano tabata e mayoria nan no tabata sa di domina e minoria blanku den karni i spiritu. Varios rebolishi for di Afrika prome ku nan a keda buta den e barku i durante e biahe Transatlantiko pa Karibe i despues a keda registra den e historianan oral di rebeldia ku a sirkula tur e islanan rekargando e energia di e almanan pretu pa libera nan mes na kada oportunidat ku nan por a krea ku sodo, sanger i strategianan spiritual.

Ampliamente e historia den Napa 1983 di Amigoe ta keda splika di sorpresa e tempu ei na Papiamentu. 17 di ougustus un fecha karga pa sintimentunan di odio propio den un mosaiko di mentalidat kolonial.

Awe Ulanda mester a bin dilanti e komite kontra diskriminashon rasial na Vienna, Suisa kaminda e organo di Nashonnan Uni a duna di konose den palabranan fini i brutu kla ku e gobiernu Ulandes ta eherse manegonan i aktonan rasista kontra su suidadanonan den reino di desendensia Afrikano. Manan e representante di gobiernu na Den Haag por kontesta e komentario i preguntanan ku e reportero speshal a hasi. Remarkabel tabata ku islanan BES no tin representante pasobra awoki nan ta parti di Ulanda i ni maske tur e werewere kolonial ku Ulanda ta kousando na Aruba i St.Maarten nan representantenan a papia mane no tin opreshon rasial for di man di gobiernu di Den Haag i internamente riba e islanan mes.

E cheri riba e bolo pruimu tabata ku Korsou no a wori mes pa manda un representante di gobiernu i sosiedat sivil pa keha, komenta i testigua dilante e komite kon ta para ku e eksperiensia rasial den e konteksto neokolonial, kapitalista.

Rif lo respu sanger ketu bai te ora seriedat tei bira e norma pa drei e pais aki segun e huramentu bou di sterki i polbu 220 ana pasa.

Psikologia di Plantashi, 1863-2015: Pashon Pretu, No Mas Heru na Kabes

proklamashon Papiamentu

Na 1863 Korsou ta tin 19.144 hende ku huntu a krea e eksperiensia di abolishon di sklabitut bou di e yugo hulandes riba e prome dia di yuli. 5.498 hende sklabisa a drenta den un transishon sosial kaminda nan a bira siudadano ku sierto grado di libertat sivil. E 29% ku pa gobernado Krol a keda proklama ‘liber’ sin definishon huridiko a keda den un limbo sin protekshon di lei na sirbishi di e 3445 hende blanku ku tabata representa 18% i na sierto grado e sobra 53% di hendenan ku a kumpra nan libertat sosial of risibi esaki for di nan shon.

152 ana despues e preguntanan ku hopi lo tin no a keda kontesta sientifikamente ainda pa nos akademikonan pero historia si ta demonstra kon un grupo elitario blanku di +/- 20% reparti pa mayoria den hende blanku hulandes (9% i hudieu (9%) ku a eherse e negoshi di sklabisa hende Afrikano for di siglo 17 no ta tin niun difikultat pa tene un mayoria di hende liber (82%) psikologikamente presu despues di 1 di Yuli 1863. Ounke e dominio blanku si ta tin nan duda ku e populashon pretu lo no a rebeldia kontra e regimen mental blancha e temporada despues di aboli sklabitut no a mustra un peliger pa e dominio blanku.

Rekordando e heridanan di dehumanisashon hulandes na 2015 ta laga un bola di interogatorio atras ku ta konopa e bida di katibu den pasado ku e krusada di ensenansa, salubridat, ekonomia, media i labor:

E atenshon ku resultadonan abou den skolnan di fundeshi i avansa a risibi ta laga sa ku ta sierto mayornan so ta kuminsa reklama i kuestiona e kalidat di ensenansa pasobra awoki nan yunan lo karga e vra edukashonal. E problema sentral si no ta keda bosifera: Pakiko pa dekadanan a permiti un Apartheid den ensenansa kreando skolnan di barionan empobresa kaminda di baina alumnonan ta sali bai un Havo-Vwo? Diana Lebacs den un programa na radio Hoyer djadumingu a indika ku a bira tempu pa kambia e sistema di edukashon hulandes mal kopia ku ta intimida, demotiva i hasi e alumno insigur. Ironia ta ku sra Lebacs 2 ana pasa a skibi un artikulo den Antilliaans Dagblad kaminda e tabata kansa di YDK ku ta “pega den pasado [sklabitut-kolonial]” pero awoki ta rekonfirma ku lokual ensenansa ankra den balornan hulandes a kousa un kaos humano pa nos sosiedat pasobra nos no ke dialoga i konfronta e historial di e eksperiensia kolonial ku a forma nos karakter sumiso ku no ta kapas pa interumpi e frakaso kalkula pa e arkitektonan den mundu di ensenansa,politika i mas importante ku tur sektor priva nos kapitannan di industria ku a konstrui un ekonomia fantasma ku mester keda karga pa labor barata, hende ku no tin hopi skol ku no por surpasa e salario minimino ya asina kompanianan por chupa un ganashi maksimo.

E karpachi di kapitalismo krioyo ta un tiki mas sofistika ku den siglo 17,18 i 19 pero e ta un manego di sufrimentu pretu ku ta reprodusi rasismo na skol i trabao ku meskos ku sklabisashon a oprimi i limita hende pretu pa no bira mas sabi via akseso na edukashon haltu ku ta habri kaminda pa yega na puestonan den sektor priva i gobiernu ku por garantisa un transformashon grandi pa e klase trahado ku entrada abou. Hechonan stret ta ku niun gobiernu a kai pa malmanego den ensenansa. E interes pa mucha pretu di barionan lubida tambe risibi e mesun kalidat di skol ku muchanan elite nunka tabata un punto di interes pa preshona e finansiado di partidonan politiko. Semper a sali for di punto di bista ku hende bashi mester keda bashi pa yuda hende riku sinta mas komfortabel riba nan trono di rikesa stinki.

E faktor di ekonomia manera kos ta awoki ta informa nos ku e orden establesi ta konsentrando riba un Korsou ku 250.000-300.000 hende. Nan ekskus ta ku e kantidat di hende ta hustifika pa wanta e gastunan sosial ku na e momentu ta sker saku di gobiernu. E fantasia ta bon purba pero e ta un teoria basa riba e miedu di buska un modelo hustu ku ta reparti e plakanan ku Korsou tin pa tur hende na un forma humano, sosialisa. Ta sinberguenseria ta krea ideanan ku ke laga kere ku 5 miyart anualmente ku Kosou ta genera no ta sufisiente si bo adapta bo sistema di ekonomia ku ta drai riba import i konsumo fantasma. Si bo mester pana pa bisti, podise un bes kada tres luna pero no kada siman. Pakiko sostone un importado di energy drink kaminda bo por kumpra un djus di sorsaka ku ta laga e florin sirkula siete bes mas den bo komunidat[?]

Dos siman pasa nefrologo, speshalista di nir dokter Naouf Ajubi a splika na Paradise FM tekstualmente (https://www.youtube.com/watch?v=8KEFrtozlKY) kon e malesa di nir ku spulamentu tin 3 bes mas pashent ku Hulanda i top 3 mundialmente ku ta direktamente konekta ku e pasado di komersio Transatlantiko. Speshialiistanan mediko, media hulandes i Papiamentu no ta sinti e tribilidat di hasi pregunta dirigi na e kompanianan di import pa nan kulpabilidat di traha plaka riba lomba di pueblo ku a keda sosialisa pa bira asina dependiente di produktonan ku hopi suku refina i vet sin balor nutritivo. Tin un interes ekonomiko haltu den miyones di florin ku e no ta responsabel pa dononan di medionan di komunikashon hasi nan trabao i responsabilisa e aktornan ku ta dana salud di hende konsientemente pa tene un ekonomia di fantasma na bida.

Falta di por adapta na e realidat ku abolishon di sklabisa hende pretu nunka a nifika ku e spiritu di sklabitut a stop di hala rosea. E ta suspira ketu bai den e asina yama ‘bida despues’. E herensia di dehumanisashon legal ta revela su mes den tur forma for di tur angulonan. Un yumuhe di e libertado pretu Papa Godett ta sinti su mes inkomfortabel pa bisa e palabra ‘hende blanku’ ku no ta zona “nechi pe”.  Un otro manifestashon di dje ta na 2013 ora a konmemora 150 ana abolishon di sklabitut e skol pa yunan elite Internashonal School of Curacao a organisa un biahe di estudio pa Hulanda kaminda nan a bai studia e historia hudieu den un temporada kaminda henter ana a dedika ekisbishonnan, lekturanan, konferensianan, debate, tayer i kursonan riba e tema di sklabitut. Un ehempel kla kon un grupo di bo ‘miho’ mentenan ta keda stimula pa ta fasilitadonan di anti-pretu rasismo.

No hopi tempu pasa Chicho Jonckheer a bisa Helmin Wiels na bida ku segun e: “Hende pretu no por manega e pais aki, ta hende blanku tin ku hasie…” Ta e sintimentu ku ta bibu bibu den e mente blancha ku ta fasilita e normalisashon di arogansia rasial ku Billy Jonckheer yu di Chicho por bira presidente di Kamera di Komersio ku ta un kontinuashon di e representashon di poder blanku ekonomiko na Korsou ku semper a parasita riba labor pretu.

T’e pus manera Elis Juliana a sbiki ku ta sali na nos pianan ku ta rekorda nos ku e kadena di sklabitut no a kita ainda. Dia nos rekonose e herida nos por buska un remedi pa trata di kura e pia pa nos por kana e kaminata di libertat ku un swai poderoso kibrando e psikologia di plantashi.