Porta-Poti Periodismo

Porta-Poti Periodismo 2017

1 di september tabata Dia di Prensa.  Felis dia.

Diabelnan Bisti na Pastor den Purgatorio

move yourself

Lo benta diabel, ku a gaña nan, den e lagun di kandela i suafel, kaminda e bestia i e profeta falsu tambe ta. Lo torturá nan di dia i anochi, te den tur eternidat. — Revelashon 20:10

Espasionan kaminda silensio ta reina por mustra komo luganan na unda tur kos ta den un sfera di trankilidat pero hopi biaha tambe e por representa un estado di rabia, un sintimentu di kulpabilidat. Aktitut di Ponsio Pilato ta prevalese, ekspreshonnan mane “Ami no, no t’ami,” ta sigui persisti pa fortifika e manipulashon di laba man for di un asuntu kaminda man, kurpa, mente kompletu tabata meti den bochorno grandi.

10 keho ofisialisa di abuzu seksual kontra un lider kristian di parti di miembronan viola di e iglesia ku e mes a lanta ta krea un ambiente silensosio pero e kedamentu ketu ta bira mas grandi ora e apostel en kuestion a haña tur libertat pa su violashon makabre kontra muchamuhenan menor di edat i damanan adulto sin intervenshon di pastornan manera Papi Esprit i Raimy Juliet. Serka iglesia New Song Orlando Balentina a risibi su guia religioso bou dje alanan di Papi Esprit. Segun inbestigashon hudisial den korte despues di 10 aña e pupilo di Esprit mester a bandona pa motibu di kehonan di miembronan feminino i ela bai di New Song pa House of Worship serka pastor Juliet. Aki e la keda un temporada kortiku pa despues konstrui su mes tempel religioso na Korsou i Ulanda yama Rains of Blessing kopiando e malchi di Esprit ku su iglesia New Song huntu ku programanan na radio pa kompleta e merkadeo perfekto di kaptura mente di hende pa metanan di malisia.

Pa prensa di sensashon e historia di horor seksual ta na prome luga. Eksplotashon di hende ta bende bon, sufrimentu ta sashia nan sed komersial pesei pa nan e ta bira kasi imposibel pa tene e dos pastornan responsabel pa e aktonan kruel ku apostel Balentina a komete 13 aña largu.  Esprit i Juliet nunka a mira nada, nunka a tende nada straño tokante apostel Lando, tampoko a demostra di vigila i hasi chekeo rutinario pa saka afo si e ta mishi ku hende ainda, si ela disiplina su mes p’e no daña e imagen di iglesia kristian na Korsou i Ulanda. Nada di esei a sosode bou di warda di e dos pilarnan di komunidat kristian pentekostal. Tur ten na a bira nan kara i sigui modela komo e mesiasnan manda for di shelu lagando nan karne bai perdi, kaiendo den trampanan di teror krea pa nan disipulo perverso.

Ruman homber di un dje sobrebibiente baliente ku a hasi e prome denunsia a opserva korektamente ku e kontrol mental ta hopi hundu. No solamente e ta hinka e kongregashon di iglesia den su gara pero tambe pafo dje murayanan. Gremio katoliko, atventista, testigonan yehova, reforma, protestant, niun ta papia, niun ta sinti un gota di responsabilidat den nan vena pa lanta para i resisti kontra abuzo struktural pa medio di e evangelio.  Aki e problema ta sinta, den iglesianan, e adorashon falsu forsa krea pa e lider di iglesia i sobra liderasgo. E deseo pa ta un kristu chiki  ta grandi.  Mayoria iglesia kristian ta hasi uzo di un forma o otro di kontrol di seleber di nan miembronan, un supervishon dje grupo pa indoktrina nan pa bati den nan kabes un manera di biba bida ku ta kai na benefisio finansiero, sosial, di e lider religioso. Un topiko ku niun hende ke toka pasobra iglesianan den un o otro sistema ta tene un komunidat den un hipnosis sosial kaminda e mayoria ta keda tene manzu, obedesidu na e strukturanan di poder ekonomiko, finansiero i politiko. Pasobra un masa di hende pretu ku mentenan libera lo laga henter nan dominio donder abou kai den otro.

Tur e drama diaboliko ta guia hende na e pregunta kardinal si hendehomber a kousa daño mayo na kredibilidat di religion kristian pakiko te ainda hendehomber ta para na kabes enbes si nan a proba di no por a kuida e ser feminino ku a karga e vra den kurason, karni i wesu tur e tempu ei? “Abatoir p’e antikristunan chiki” ta lokual e kerubinnan ta kanta leu aya pero bo tin ku buska e silensio selestial den bo mes pa por skuchele bon si.

[Ayera 17 di yuni 2017 na Hoyer den e programa Tribuna Popular e presentado Etienne Rosario a invita pastor Papi Esprit pa bin papia riba e topiko tata. Den pitu, e ultimo dies minuto Rosario a referi na Orlando Balentina sin hasi un pregunta direkto na Esprit, den un hansia ku un bos agita ela reakshona kortiku splikando kon e asuntu abominabel tabata sinta den otro entre Balentina i su persona. Lokual por saka afo di su deklarashon ta ku Papi Esprit a atmiti ku e ta e tata spiritual di Orlando pero ora e lanta su ‘yunan’ miho ku tur mihonan i bira grandi i bai para riba nan mes pia i komete un fayo, e fayo ei ta pa nan kuenta. Ku hopi enfasis ela bisa ku si su yunan faya esei no ta su falta. Tambe a bin dilanti ku e ta alega ku di su banda ta tin sosten pa e sobrebibientenan den e kaso i ku ela ninga di duna entrevista na prensa (pasobra a purba di tira kulpa riba dje) pasobra esei ta entre e ku su dios i niun hende mester sa.
Segun Esprit dios no a yame pa ta fiskal ni hues di Orlando. Nos no mester husga. Na final ela broma ku e tin iglesianan den kontinente afrikano i ku awe e ta riba ruta pa Ecuador kaminda tambe tin un iglesia New Song.]

Aktonan di Sakrefisio, Telecuraçao Despues di un Mitar Siglo

Telecuracao 55 Dekolonial

Telecuracao 31 di yuli a selebra, konmemora, rekorda, para ketu pa refleha su di 55 aniversario.  Sin bai den dialogo ku su televidentenan. Sin duna respet na e hendenan ku ta paga nan salario. Sin honra e sintonia ku ta finansia nan avansenan teknologiko, sin balora e opinion, vishon di e publiko ku ta keda insulta ku programashon  i notisia mediokre. Pabien, hopi ana mas di manipulashon mediatiko.

Prensa Chikungunya

Prensa katibu
di shon nobo shon bieu
Periodista bobo
Bobolin
Ku nes e no tin.
Hambra pa keda paga
Rabia tras di mikrofono
Un pida bolo
Den su stoma
Riba su kuenta di banko
Ate ta kokocha tuma
yabi outo serka Vamparo

Plaganan di periodismo ‘5 florin 2 outo’
Skupi venenu den kabes di hende
Lage kere ku redu a bira e berdat verifika pa dios mes.
Doño di tv, korant, radio
Santu manipulado pa kapitalismo krioyo.
Mas sanger ainda riba bo portada
Mas potret di ‘Rasta’ pa yena bo saku? Mas televishon pa laga un pueblo pega soño pa semper?
Sigi papia ku lenganan di ignoransia infinito
Prensa ku bruki bisti,
holo stinki stinki di pupu.
Den su fase di beibi,
Gatiando.
Miedu pa hasi un pueblo mas sabi.

Plaka, plaka
Prensa chikungunya
Plaka, plaka
Ta laga periodistanan baila ku burdugu
Plaka ta lanta morto foi santana.
Un dia domferstant diabel tin ku disparse
Bibu e ta ta.
Un kambio irevokabel,
na kaminda.
Asina mes.

Mundu, Kòrsou i Su Libertat Di Prensa

Korant Vigilante di 3 di mei 2014 ta pone ku leternan grandi, kubriendo e mitar pagina abou: “PLAN PA DETENE DOS EKS MINISTER I UN KOMERSIANTE”. Na momentu ku e lesado saka FL1,50 pa sasia su kuriosidat e ta ripara ku te na pagina 12 e artikulo ta aparese konsistiendo di tres frase chikitu miserabel ku bo ta kaba di lesa den menos ku 20 sekonde. Un triki barata a keda di komete pa manipula atenshon di e konsumido pa gasta su sen aportando na e garantia ku periodismo di sensashonalismo ta keda na bida pa un tempu largu.

E kaso no ta unu normal sin mas pasobra pa prome e doño di e korant ta Merril ‘Lilo’ Sulvaran fundado di Curacao Media Organization(CMO) ku ta para pa hisa kalidat di periodismo en general atrabes di e organisashon i na di dos luga tres di mei ta dia internashonal di libertat di prensa un dia ankra den artikulo 19 di derechinan humano universal ku ta para ketu na libertat di kada hende pa opina i ekspresa sin keda stroba i pa buska, hana i parti informashon via media sin frontera.
E vishon ta ku libertat di media i e akseso na informashon ta yuda desaroya e meta pa empodera pueblo ku medionan di komunikashon serio ku ta alimenta pueblo ku sufisiente material informativo pa por opina i partisipa den tur proseso di su komunidat pe por ta doño di su mes destino usando e informashon i konesementu di kalidat haltu.

Ironia di bida ta ku aña pasa na mei CMO huntu ku UNESCO di Korsou a hana e oportunidat pa organisa un konferensia Karibense di tres dia den kuadro di Dia Mundial di Libertat di Prensa. Notisia360 ta raporta: ” Lilo Sulvaran tambe di CMO, a reiterá e importansha pa prensa traha
riba kalidat, esaki pa mitigá e krítikanan ku sa tin riba prensa lokal. Ta importante pa hisa nivel di
nos komunikadonan, tantu na radio, televishon komo korant. E vishon di Unesco i CMO ta pa tin un kontinuidat den konsientisashon dje komunikado i sigui ku e proseso di kalidat.”
Presidente di CMO Stanley Ignacio i trahado pa Extra i miembro ko-organisado dje konferensia na 2013 Valeska Diaz komo hefe redaktor na korant Extra huntu ku Sulvaran na Vigilante den nan korantnan di djasabra 3 di mei no a duna ni un artikulo chikirititu di sikiera dos frase na e dia speshal ku ta salbaguardia e derechinan di nan mes fishi di komunikashon.

—Prensa ku no ta papia, analisa riba nan mes dia di libertat di ekspreshon den media ta mane obispo Secco ku enbes di duna predikashi den katedral di Pietermaai ta bai bishita Campo riba un djadumingu.—

Mariano Heyden aña pasa a deklara ku e si no ta interesa pa konekta ku su koleganan Karibense i no mester bai na e konferensia regional di prensa organisa pa CMO den Renaissance hotel pasobra ta “tin nada ku nan por a sine einan” ku e ya sa kaba.
Un testimonio di ignoransia lokal di marka mayo ku a haña su reperkushon 2 di mei riba un djabierne ora e periodista ku mas di 30piku ana di eksperiensia a invita den su programa Perspektiva na Z86
reportero/periodista Yves Cooper huntu ku Reina Joe eks periodista kaminda na a elabora den un forma desorganisa riba dia di libertat di prensa i a ekspresa un prekupashon kolektivo pa e forma kon medionan di komunikashon ta den un estado di degenerashon.
Heyden i Cooper a laga nan bosnan kritiko resona den e studio radial den kurason di Otrobanda, e problema si ta ku ora bo pretende di ta un outoridat den mundu di periodismo i konstantemente tin algu di bisa riba bo koleganan i medionan di komunikashon ku nan ta representa ta yega un dia ku nan tin ku manifesta nan outoridat. E skuma tin ku komberti den chukulati. Heyden, Joe, Cooper tur tres tin akseso na tur doñonan di media i nan finansiadonan i un publiko ku ta adora e tera ku nan ta kana ariba. Prensa a kai hopi, e kalidat ta bai atras dia pa dia pa años kaba pero kada bes ora un dia manera 3 di mei of 1 di september Dia di Prensa presenta no tin niun esfuerso for di na skina pa organisa un konferensia, un debate, un foro transmiti na radio/televishon huntu ku tur miembronan i doñonan di media pa analisa, diskuti e problemanan den mundu di medionan di komunikashon i ofrese solushonnan huntu ku e representantenan di komunidat ku a profundisa den e materia di prensa.

E wikent aki tambe e notisia a yega den Amigoe (djabierne) ku TeleCuracao i TeleCuracaoFM lo separa for di nan kompania mama UTS i lo kai bou di gobiernu representa via komesarionan. E desishon a kai fin di mart pero a keda skondi ya un luna kaba pa publiko pa e propio TeleCuracao te dia di awe. E relato den e korant hulandes ta bisa ku e desishon a kai pa preveni ku influensia politiko (opositor) por (sigi) domina na e planta nashonal.
Si di berdat Korsou tin un prensa liber pero a prefera di tapa e notisia aki e ora ei e siman ku ta bin e liderasgo den prensa mester revindika su mes i mustra publiko kiko ta e origen di e kaso na TeleCuracao ku a kaba na un futuro separashon ku UTS.
E mesun koleganan ku aña pasa a partisipa for di Jamaica den e konferensia di UNESCO i CMO rondo e tema Libertat di Prensa ta tuma e dia hopi na serio i a kana un marcha dia 3 di mei den kayanan di Kingston pa laga sa ku nan tin un kompromiso ku e lucha pa ta i keda ku un grado haltu di libertat di prensa.
Reporters Without Borders a publika ku 2014 Jamaica ta okupa posishon 17 den e indise pa paisnan ku libertat di prensa. Hulanda ta na 4, Merka ta na luga 46, Haiti na 47. Ki luga Korsou tin, ken tin e liderato pa hasi un investigashon sientifiko den e espasionan di medionan di komunikashon pa hana sa na unda nos ta situa ku nos derechinan di buska, parti i risibi informashon di kalidat?

Periodismo a Gana na 2013?

Semper manera kustumber fin di aña den e delaster luna tin un avalancha di analisis i resumen riba mayoria bja e arena politiko pero tambe otro areanan di otro indole ku a domina mas e 12 luna den medionan di komunikashon. E tereno ku semper ta skapa un proseso di skrutinahe ta e funkshonamentu di e kolektividat di nos prensa mes ku ta fasilita e notisia pe publiko. E temor pa no wak den e spil i determina kiko prensa su frutanan laboral tabata pa e aña anterior ta un ritual atrasa ku ta debilita e desaroyo di un sosiedat su forsa demokratiko popular ku mester pensa i akshona kritiko riba kalke areanan di interes pa e avansa.

Na momentu ku bo ta mek wowonan kritiko riba obranan di periodismo i komunikashon sosial kwa ta e personanan ku pa 2013 mester keda premia?

– Ken ta e donjonan di radio i korant ku tin ku hanja un merito?

– A base di kwa kriteria miembronan di prensa ta merese un pluma di respet?

– Ban asumi ku e madures no a laga nan na kaya, ken a produsi obranan den periodismo/media ku a trese kambio den maneho di gobiernu i sektor priva ku a impakta bida di hende masalmente?

– Unda por a tende, lesa, mira revelashonnan grandi tokante korupshon i abuso di poder?

– Ken a ilustra problemanan sosial ku ta afektando un pueblo sistematikamente i a tira lus for di diferente angulonan riba e posibel solushonnan den varios publikashonnan den media?

– Kwa a genera un archivo diario di temanan ekonomiko, finansiero pa strukturalmente eleva i enrikese e kontenido den media?

– Topikonan di taboe manera seksualidat, genero, rasismo, apartheid di klase, ken a toka nan i a trese un asortimentu amplio di opinion i vishon?

– Agrikultura, salubridat i edukashon, kwa personahe den prensa a interveni ku artikulonan, temanan pa desaroya riba un base struktural un dialogo nobo?

– Riba nivel di siensia, arte, kultura ken a skibi, papia i figa un ruta intelektual kreativo pa publiko por diskuti i kana?

– Filosofia, religion, spiritualidat a keda interoga di parti di prensa e aña aki ku konsistensia edifikando un fundeshi di fe renoba?

Ku siguransa por konklui ku ta -kasi- imposibel pa saka un periodista, reportero, departementu di notisia, hefe di notisia, propetario di un medio di komunikashon di aña. E sistema kapitalista ta diseña pa traha pampel, pa skupi moneda na prome, di dos i terser luga i no por introdusi niun espasio mucha grandi kaminda e miembro di prensa por eherse su trabou den un kuadro di profeshonalismo haltu te pe keda nomina pa un premio.

2014 no por kontinua e mesun mentalidat di mantek’i bela den prensa, e deseo mester keda kumpli pa trese notisianan, programanan di opinion ku ta nutri un nashon den su desaroyo pa bira mas hende.

Kòrsou bo yunan no sa ken su baluartenan ta.

Nydia Ecury a bula bai otro dimension ku mas dulsura.
Pa basta ratu ta den moda ku na Korsou no ta dokumenta bida di artista.
Nydia Ecury ku Irene van Grieken a bai sin ami ku hopi miles mas sa di berde ken e sra aki tbt.
Di Sra. van Grieken a pasa un komedia bjeew di dje pero nada kon ela bira un artista ken tabata su idolonan. Kon e tabata pensa riba eventonan importante por ehempel pa hendemuhe of esnan lubida. Kon e ta mira e mundu di arte den siglo 21 na Kòrsou.
Erich Zielinski otro ku a bai pari siman patras. E siman aki Stanley Cras tambe a bula bai. ‘Niun’ di nos no sa of no por lese of wak bek kon nan bida tabata hinka den otro pa sa ken nan ta i kiko nan a nifika pa Korsou. Anto tin hopi mas hende di edat ku lo span nan ala un bes i ketu bai nos ta chupa dede pega den politriki di tur dia kaminda hopi trabao tin riba tereno di dokumenta kultura. Nos tin ku prepara.

Den wikent danki na Robby Schouten i Alex Alberto ku den e programa Leu Foi Kas nos por a mira e legendario kantante di La Perfecta Sr. Nildo Martis na Hulanda. Mester bira un kustumber ku nos ta kuminsa traha dokumentario visual of radial di nos baluartenan prome ku nan muri.

Di mes e eksus lo ta: “No Tin Sen”. Pero di berde esei ta koi kens. Tin mangasinanan yen di plaka pero nan no ke los man los
bai saku pa honra nos baluartenan.
Den kaso di Nydia parsemi ku e tin su hendenan den region haltu pa dokumenta su bida sin muchu problema pero tin boshi artista ku no tei mas of ku ta na bida ainda pero mester roga tur instansia finansiero , fondo, gobiernu pa imortalisa nan leyenda artistiko. Un borchi di kaya ku nan nomber riba dje no ta sufisiente. Tin un ‘Apartheid Kultural’ pa basta ratu kaba anto e no ta na fabor di Kòrsou.

Si bo wak media i speshal televishon ku ta yega den mayoria kas di hende di tur klase, rasa, religion nan manego no tei of e ta konfuso. E respet pa hende ku a duna nan granito pa kultura di Korsou ta masha nada. Televishon te medio ku por gara kurason di hubentut paso lesamentu ta foi moda kiermen si bo ke halsa bo kultura ta via tv bo tin ku hasie. Kas di Kultura tin su programa un bes pa siman pero mester di mas. Ta un Boneiriano sr. Boi Antoin ku su programa Herensia ratu ratu ta bin Kòrsou i dokumenta bida dje YDK. E formula di Sr. Antoin ta eksitoso: E ta bai serka e persona hasi un entrevista di un ora kaminda e bida dje invitado te topiko prinsipal.

Tin kos hopi robes anto e bla bla riba politika henter dia no ta yuda koregi e fayo aki. Pa Kòrsou briya, pa Kòrsou choria den gloria nos tin ku kuminsa duna rekete balor na nos heroenan sosial-kultural. Gobiernu tin gia e proseso i aktivista kultural tin ku eksigi mas. No por tasina ku no tin un emisora kultural of ni sikiera programashon kultural diario.
Ta muri bo ta manda Arte bai muri riba plenchi asina.

Asinaki nos ta sigi pompa, hunga rol kada un den nan mes mundu elite sin por lanta un fondo un instituto ku por ankra rais fuerte pa nos por plama konesementu krea konsenshi di arte stret bai sin kada bes lembe aki lembe aya.
Un dia e labatiba tin ku kaba.
Un dia
Keremi Kere Dios Mama.

~ Abo sa ken ta Stanley Cras, ba yegi tende di revista Independiente?

~ Bo konose Beberin, bo sa pakiko e tipo aki tbt eksitoso pa anjanan largu?

~ Ken ta skonde e echo ku Erich Zielinski tabata e kabes tras di e konstitushon alternativa pa pais Kòrsou di Pueblo Soberano?

~ Dikon AD so a publika poesia di Nydia Ecury?

~ Ken ta bai skibi un master tesis riba e kantikanan skibi pa Nildo Martis den su temporada di La Perfecta?

~ Dikon Telecuracao, CBA i sobra media popular ku hopi sintonia no ta kuminsa programanan kaminda ta graba entrevista ekstensivo profundo di bida di nos artistanan?

~ Nos baluartenan no ta hala sintonia pa paga pa gastunan di un programa?
~ Prins Bernardfonds lo sigi kolonisa arte bou di e manego nobo di Michelle Capriles?

~ Unda e gruponan di preshon di arte a keda? Arte di Protesta ta palabra malu?

~ Ken lo kanta, deklama, filma e berdat aki?