E logika produsi di mira hende pretu komo propiedat i katibu pa traha plaka i prosperidat pa hende blanku a sali for di sklabitut i kolonialismo (ulandes). Atrabes di siglonan esaki no a disparse despues di abolishon di 1863. Un malchi maligno rasista ku makambanan a kere den dje i biba su fe rasial falsu pa 4 siglo largu no a dirti manera sneu dilanti nos wowo. E sistema, e maneho makabre a sigui hala rosea, supla rosea den e forma di maltrata e islanan i su populashon den Karibe. Bo ta mire den gobernashon ulandes na den haag, den nan universidatnan i akademikonan, den nan sektor priva, nan arte i kultura popular, den nan media, lei i otro espasionan di hustisia.
10-10-10 no tabata un resultado di solamente kambia status politiko di parti di tur islanan. E tabata orkestra for di den haag. Den e asina yama’negosashonnan’ no ta tin politiko ni konsehero ku tabata kompronde e derechinan di dekolonisashon di e islanan. Konesementu di sklabitut i kolonisashon su efekto riba sosiedatnan i gobiernunan tampoko tabata un faktor pa konfronta gobiernu ulandes. Reparashonnan dios sa si nan a yega di tende di dje mes. Ta nifika ku e ekipo di politiko i ‘negoshado’ tabata maleduka, malprepara, malinforma i no ta tin e spiritu di liberashon den nan kurpa ora mester a disena paisnan nobo pa 2010.
A kuminsa ku un debe pa Korsou di 1.6 bion florin. Nan a yame un posishon saludabel pa kuminsa un pais Korsou nobo. Kaminda ulanda tabata sa bon bon ku pa Korsou logra prospera e siguiente 5 ana e mester a kuminsa ku un saldo positivo di sikiera 2 bion pa drai tur servisio i debernan ku un estado Karibense tin pa su suidadanonan. Ulanda a traha un trampa huntu ku e gobiernu di Korsou ku a ‘negosha’ e pakete estatal. Den kolonialismo ekonomia no por krese i si e krese e ta pa esnan rikunan so.
Ora Corona kuminsa suta Korsou i lockdown a bin para ekonomia e gobiernu di PAR MAN PIN a kore bai ulanda. Na su turno ulanda a buta nan na rudia i asepta plaka en kambio pa medidanan neoliberal ku lo rekolonisa i hasi Korsou mas pober ku e ta kaba. Un ana den covid-19 a laga e debe fiktisio krese na 765 mion florin. Dikon e debe ta un debe falsu pasobra ta kolonialismo ulandes a krea e ekonomianan fantasma, blanku ku no ta alsa prosperidat ekonomiko finansiero dje YDK pretu. E ta un debe falsu pasobra sklabitut i kolonialismo a krea e gobernashonnan kolonial i neokolonial ora ‘nos mes hendenan’ a kuminsa goberna. E ta un debe falsu pasobra ulanda huridikamente ta obliga di no fia sen pero sigura finansas pa pone Korsou i tur otro isla para riba nan pia ekonomikamente i finansieramente i riba tur otro nivel konsekuentemente.
Na momentu ku covid a yega si ulanda for di 1863 a kumpli ku su obligashonnan pa garantisa propio gobernashon solido na Korsou e ora ei na 2020 por a sera airport trankil. Sin mester a lockdown ekonomia pasobra Korsou lo no tabata depende di un ekonomia di 30% turismo ulandes. Lo no ta tin kasonan di covid di 300, 400, 500. Lo no ta tin artikulonan den korantnan ulandes kuenti hende ta muri di hamber, hende ta muri di covid, mester di enfermero, dokter, mester di plaka, mester di ulanda. Tur e kuentanan kolonial ku ulanda lo salba nos, sin ulanda Korsou no por tur lo no tabata eksisti mes.
E siguente minister presidente Gilmar ‘Pik’ Pisas den un diskurso nashonal a bisa awe ku e tin sanger di un leon i e no ta entrega nunka, uni e forsa spiritual i bringa e atversidatnan tabata su mensahe pa krea un kurashi nobo na Korsou. Esaki a keda harma pa bringa e viro di covid pero e mesun bravura di energia ta nesesario pa hinka un angua di bakunashon den pueblo pa hiba un lucha anti-kolonial kontra e violensia ulandes ku ta asota Korsou. Si e gobiernu nobo di MFK i PNP komprende e seriedat pa hasi mesun kos e ora ei di berdat por kuminsa papia ku tin un ‘speransa’ nobo pa e pueblo aki pa komberti Korsou bek den na mane e lider a yame e ‘Perla di Karibe’.