Joceline Clemencia: ”Kolonialismo Ulandes. Pare Aworaki”.

“No ta awe nos ta indigna. Nos a alerta ku kolonialismo ulandes no sa hasi wega. Bo ta dune un dede. E ta tuma bo brasa i pianan. Mester pare. AWORAKI.” ~Joceline Clemencia

beatriki Bai Dodo

Un hende ku ta laga rasismo kolonial prospera na Korsou, Boneiru, Aruba, St. Martin, Saba, Statia, nunka por yama su mes un prinses. Violashonnan di un pueblo Karibense pretu su derechinan di dekolonisashon ta na ordu di dia. Hasi un pueblo pober, laga nan sufri bou di un gobernashon for di Den Haag ku manegonan genosidial. Tur esaki a sosode bou di warda di e tempu ei ‘reina’ beatrix. E persona aki no ta un hende inosente, e no ta un santu blanku ku a baha for di nubianan. E ta ko-responsabel pa e ruinanan di apartheid rasial den Karibe i na ulanda i awoki e ta di bishita na Korsou pa sigui manipula mente di hende, laga nan den un fiernu di indoktrinashon kolonisa.

Drentando 2022 ta parse ku bringa pa libertat lokual politikonan, movementunan, sindikalismo, religiosonan, akademikonan, artistanan, prensa i tur sobra semper ta predika dilanti nan parokia ta ketu bai den un espasio pesta ku trouma. Pa mas ku un dekada kaba na momentonan di oro pa hiba un lucha di liberashon dilanti kasi niun no tei. Por sigui kulpa makambanan pa restu di nan bida pero ta yega un momentu ku nan tin ku wak den nan mes kurason i ripara ku a bira tempu pa ranka e rais di trouma for di nan mundu pa semper.

Abstene di enfrenta e diabel no ta lagabu bula drenta shelu. Sufrimentu, sakrifisio, sodo i hopi bja sanger brabu ta e ritualidat pa yega den un sorto di reino di reparashon pretu Karibense.