Apartheid Edukashonal [1]

Skol ta un instituto kaminda ta sigui kria e raisnan di diskriminashon di klase i rasa i genero. Un danki na direktivanan di skol sostone pa sektor priva ku tur tempu a para tras di priva derechinan di mucha.

Tayer di Apartheid Edukashonal

Skerpene, fraternan ku nan muchanan

E anja aki Ulanda ta para ketu na e echo ku na 1814 nan a firma e tratado di Utrecht e anja ku ofisialmente nan a bira un estado ku na kabes e prome rei di Oranjo. E selebrashon di dos shen anja reino ulandes tambe ta toka e teritorionan den Karibe i e prome evento ta un debate pa hubentut di e seis islanan: Aruba, Boneiru, Korsou, Saba, Statia, St. Maarten huntu ku Ulanda.

E debate aki a sali for di Comite Koninkrijksrelaties* na Ulanda, un resumen di nan vishon ta sigui: “Ulanda i e seis islanan ya pa hopi anjanan largu kaba tin un relashon speshal pero nos no sa masha di otro. Drentando den kombersashon i debati ku otro por kambia esei. Papiando tokante asuntunan ku a bai bon den nos reino manera: kiko nos a logra e delaster 200 anja i tambe diskuti asuntunan ku por drecha. No solamente topikonan abstrakto pero kosnan ku tin un signifikashon praktiko pa e pueblo riba un base diario manera edukashon, salubridat, ambiente, labor o kultura.”

Despues riba nan website nan ta splika ku nan mester di 50 hoben di reino pa realisa e debate i kada isla i BES lo hanja un embahador i un persona ku ta guia e hobennan a base di nan eksperiensia den politika.
Pa Korsou e ‘coach’ lo bira eks prome minister Suzanne Camelia-Romer.

Kandidatonan di 16 pa 23 anja por partisipa na e selekshon pero pa motibu di faltando sufisiente fondo a disidi ku e debate ku ta tuma luga na St. Maarten lo bira unu kaminda por debati solamente den dos idioma: ulandes i ingles. E organisado : “Esaki ta nifika ku kada kandidato mester domina un dje dos idiomanan aki na perfekshon i e otro mester por lese i komprondele rasonablemente bon.”

Halando un banda e inosensia di un rasismo prenatal di Comite Koninkrijksrelaties riba twitter ku ta ekspresa su mes riba 15 di desember: “Happy Kingdom Day!!! Al sinds de 17e eeuw met elkaar verbonden en dat is best bijzonder!” (Dushi dia di reino!!! Ya for di siglo 17 mara na otro i esei ta basta speshal!) E selekshon di e kandidatonan ta un agreshon kontra e hobennan di e klase trahado ku pa motibu di un ensenansa di Apartheid no a hanja e mesun oportunidat pa desaroya su mes pa domina ingles i ulandes manera hobennan ku si a partisipa i keda selekshona fasilmente for di skolnan ‘elitario’ ku ta hiba un regimen edukashonal ulandes pa sigura posishonnan haltu den e sirkulo laboral.

Ora bo kuminsa sefta hende riba klase, skol, filosofia politiko, aperensia i idioma bo ta prolonga, e apartheid perpetuo ku a inisia siglonan prome ku 1814.

E ultimo frater a yega 1995 pero ta parse ku historia ta sigi ripiti su mes i kada bes un ulandes ku no por kapta esensia di sklabitut i kolonialismo ta bin purba di bin humanisa pueblo ku den su bista ta e ‘salbahenan’. Ta un instituto di debate for di Ulanda ta bin sinja e hobennan rekluta kon pa debati. E hubentut di Karibe segun e organisashon no tin e fakultat, ni e fuentenan di konosementu humano pa informa i disiplina nan mes pa kumpli ku un bon debate riba nivel.

Hobennan ku edukashon i ensenansa for di un posishon di privilegio lo sigi debati riba kosnan ku vishonnan distorshona, bruha i hasta yegando na fronteranan di opinion kontrali na studiantenan di skolnan di klase trahado ‘problematiko, pober’ ku pa motibu di diskriminashon di idioma ta keda isola.

Yudando di kondishona mente di hende for di un edat hoben pa sirbi sierto kousanan den e sfera geo-politika-kolonial, moldeando nan pa bira un mima pa un reino ulandes no ta un merito pa Suzy Camelia-Romer.
Komo den pasado e eks mandatario semper tabata boga pa kibra e mentalidat di katibu, ta net e ta yuda reforsa e tradishon ku un selekshon diskriminatorio di klase.
Lastu na un debate na UdK (Universidat di Korsou) sra. Camelia-Romer a tene duru na e noshon ku nos aki na Korsou ta hasi hopi kos mitar mitar pero aki e ta demostra ku e mes ta tuma parti den un debate mediokre riba un style di ‘miho mitar webu ku kaska bashi’.

Hende su wowo ku bichi tin ku kome ta kansa di mira e menospresio pa hobennan ku ta studia na skolnan VSBO, AGO of FEFFIK. E pupumentu kontinuo riba un klase menos privilegia ta un fenomeno ku tin ku risibi un moratorio.

Bo ta dera un tesoro di opinion na bida ku ta representa 70% di e pueblo aki segun sifrasnan di CBS (Buro pa Statistik). Kalke organisashon ku tin komo meta pa fortifika lasonan den reino ku tur islanan i speshalmente profundisa e relashon ku Ulanda, tin ku obliga su mes pa inklui e pueblo ‘plan bari’ den e dialogo. Ta esnan ku a keda empobresa pa filosofianan ekonomiko, finansiero ku manehonan politiko di Korsou i Ulanda por bedei den debate for di nan propio eksperiensia den bida diario kwa direkshon tin ku kue ku asuntunan sosial, salubridat, ensenansa, trafiko di hende i otro topikonan.

E apartheid bi-sentario ku Comite Koninkrijksrelaties ta sigi mantene ta fortalese e politika di Den Haag i e hierakia elite chiki ku tin propiedatnan mayoritario i kontrol i podernan riba produkshon di kapital i distribushon di sirkulashon ekonomiko-finansiero ku sin e hobennan di klase margina aki nunka lo keda kwestiona, reta den un debate pa buta kambia sosial kana ku lo faborose e klase abou ku ‘tiki’ skol den e reino ulandes festivo.

*) un organisashon sinta na Den Haag ku un website indikando hopi kos sin publika ken ta e personanan tras di Comite Koninkrijksrelaties banda di inisiado i sekretario Ron van der Veer ku tampoko ta revela su nomber riba e sitio digital.

Dia Internashonal di Mucha

UNICEF a hasi un analise di e situashon di muchanan i adolesentenan na Korsou na 2012.
[http://www.unicef.nl/media/1371768/curacao_executive_summary__28english_29.pdf]
Esaki ta un tradukshon di e rekomendashonnan:

General
→ Fortifika kordinashon i koperashon entre gobiernu su institutonan i departamentunan den
tratamentu di e derechinan di mucha den salud, edukashon, protekshon di e mucha i partisipashon.
→ Fortifika e rol di estado den buta normanan i standardnan pa kalidat i funkshonamentu di organisashonan non-gobernamental i fundashonnan, inkluiendo di establese mekanismonan kla pa referi na trata e derechinan di mucha den un forma holistiko.
→ Krea sistemanan di monitor i evaluashon ku datonan konfiabel i aksesibel den e implementashon di
plannan di akshon relata na e periodo di ta mucha i adolesensia.
→ Hasi estudio pa profundisa komprendementu di e situashon di muchanan i adolesentenan den termino di salud, edukashon, protekshon i various aspektonan di bida sosial. Un enkuesta di
origin di nashonalidat ku por duna variashonnan importante den e populashon ku por sirbi planifikashon di estado.
→ Buta kana mekanismonan, inkluiendo suidadanonan ku por supervisa i e uso di formanan kontemporaneo di
komunikashon manera Internet i netwerknan sosial, pa sigura transparensia i kontabilidat
pa ku akshonnan na fabor di muchanan i adolesentenan.
→ Enkurasha dialogo ku otro paisnan den Karibe i Amerika Latina, komo tambe interkambio kultural i
ekonomiko, pa asina kontribui na e proseso di konstrui un estado nobo.

Salud
→ Pone na su luga un sistema di kuido preventivo, kurativo i rehabilitativo ku ta pone emfasis spesial riba obesidat di mucha, tendensia pa adikshon i embaraso hubenil.
→ Krea un kampanja di komunikashon huntu ku edukashon di dietanan saludabel den luganan di trabao, skolnan i kolegionan komo tambe promoshon di ehersisio fisiko pa tur, pa hendel obesidat.
→ Hasi investigashon riba kousanan di e problemanan di salud di muchanan i adolesentenan. Esaki lo inklui estudionan na e impaktonan di environmental polushon ambiental.
→ Hasi esfuersonan grandi pa promove lechi di pechu ekslusivo i kumpli ku e kodigo internashonal di merkadeo di lechi di pechu.
→ Hasi investigashon riba e subimentu di e mortalidat di beibi i wak na e kalidat di kuido prenatal komo tambe
e kondishonnan di mamanan embarasa ku problemanan.

Edukashon
→ Yuda famianan ku ta traha pa medio di oumenta e number di kreshnan di estado, ofresiendo aktividatnan despues di skol i promove i krea espasionan publiko pa aktividatnan deportivo i kultural.
→ Engrandese e efisiensia i efektividat di e rekursonan optenibel ku e meta pa oumenta asistensia di skol i resultadonan mehora di sinja.
→ Konsidera e adaptashon di e perspektiva ulandes den e
sistema edukashonal na unu
ku un perspektiva mas lokal i
krea metodologianan inovativo
di ensenjansa pa muchanan na
nivelnan diferente.
→ Fortifika programanan di reintegrashon pa mucha i adolesentenan ku a kai/a keda pusha for di e sistema eskolar i kontinua di monitor e impaktonan di e medidanan tuma pa redusi e absensia na skol.
→ Introdusi mekanismoman di atvertensianan trempan den skolnan pa detekta kalke problema sosio-ekonomiko o desabilidatnan di sinja afektando muchanan.
→ Entrena dosentenan i soru pa nan hanja materialnan di sinja pa asina muchanan ku desabilidatnan por integra mas miho posibel den e sistema eskolar regular.
→ Inklui edukashon di seks den e kurikulum di skol i enkurasha famianan i skolnan pa traha huntu den preveni embaraso indesea ku un emfasis speshal riba muchamuhenan di 12 anja bai ariba.

Protekhon
→ Fortifika e sistema di protekshon pa mucha pa medio di un netwerk ku ta kordina e varios ministerionan i institutonan publiko relata ku edukashon, salud, protekshon i hustisia i e fundashonnan ku ta kuida muchanan I adolesentenan.
→ Krea mekanismonan pa gobiernu
monitoreamentu oumenta i evaluashon di e akshonnan di e ONG-nan i fundashonnan trahando den e area di protekshon pa mucha i pa monitor nan efisiensia i efektividat di nan kumplimentu ku regulashonnan di gobiernu.
→ Disenja i implementa un kodigo pa protekshon di muchanan i adolesentenan ku ta kwadra ku realidatnan lokal.

→ Entrena personal di gobiernu riba asuntunan spesifiko relata na e protekshon di muchanan i adolesentenan.
→ Implementa manegonan pa ku trafikashon – detekshon, edukando e populashon i lokalisa i persigi hende – ku prevenshon i e protekshon di muchanan i adolesentenan komo e pilarnan mayo. Esaki por keda komplementa ku servisionan
di kuido pa muchanan afekta.
→ Toka e problema di violensia na kas i bute publiko pa e no bira algu konsidera normal.
→ Krea alternativanan pa e sistema hudisial hubenil ku un fokus riba kreamentu di programanan edukashonal i tratamentu psikologiko. Ponementu di muchanan den institutonan semper mester ta e ultimo remedio i sistemanan alternativa mester ta prioridat.
→ Krea un sistema di informashon ku ta lokalisa e edat di muchanan den konflikto ku lei, nan historia sosio-ekonomiko i tipo di krimen komete i pa sigura e varios trabounan sosial di e agensianan di protekshon pa traha huntu i reintegra e muchanan den sosiedat.

Partisipashon
→ Sigura ku tur skolnan tin konsehonan di studiantenan i promove partisipashon di muchanan bou di 12 anja.
→ Desaroya manegonan pa drai bek e disbentaganan ku ta persisti entre muhenan i hombernan den e areanan di empleo i partisipashon politiko, pa yuda tatanan di ta mas enbolbi den e proseso di kuido i sostene mamanan ku ta na nan boka di trabao.

[Lokwal UNICEF no a dedika atenshon ne pero ku ta mas importante ku tur ta pa laga mucha i hoben krea nan mes netwerknan di prensa. Nan mes notisia di 7or di mainta, 12or merdia, 7/8or anochi. Programanan den siman pa e mucha i hoben na radio, tv i korant ku nan puntonan di atenshonan di nan realidatnan. Tasina ta kria liderasgo riba tur nivel i asina ta sigura kreamentu di lidernan pa futuro. Ta na e donjonan di media pa realisa esaki i integra e vishon nesesario aki si no ta via politika, parlamentu i gobiernu pa ordena kambionan den e aserkamentu di media pa garantisa desaroyo sano pa mucha i adolesente na Korsou.]