Pa bo dignifika un pueblo na kaminda i predika un konsientisashon konstante bo mester refleha un grado haltu di sinsersidat ku ta surpasa palabranan manera: orden, disiplina i respet ku ta e eskudo verbal di partido Nashonal. Pa bo biba e herensia di emansipashon di Doktor Da Costa Gomez bo komo un partido manera PNP tin ku demonstra esei tur ora tur dia, henter anja. Bo sede mester ta habri pa pueblo, manera tokonan i ofisinanan di number ront Korsou ta, pa ofrese servisio na pueblo ku tin ku hosel pa nan bida i mester di yudansa huridiko, edukativo, laboral, formashon politiko, kultural i hopi mas. Esei antes tabata meta di Doktor (aunke Amado Romer tin un wowo skerpi riba e deskripshon tambe) pero ta tiki dje mishon noble a keda i Partido Nashonal ta mane den un ruina moral politiko igual ku su sede bjeew na Penstraat e ‘Kas di Pueblo’.
Ayera tabata e fecha pa rekorda ku Doktor a fayese 22 di november 1966, na su graf na Botelier ta tin apenas 20 hende tur miembro di PNP. E dekaida di e partido por keda di buk riba e falta di respet pa e idealnan di nan mes fundado e arkitekto di outonomia i katalisado politiko di emansipashon.
Tambe por tira falta riba tur e karanan nobo di PNP ku resien a organisa un foro ekonomiko den Banko Sentral bou di nan Fundashon Pro Inovashon Nashonal (PIN). Un foro kaminda mester a diskuti un vishon ekonomiko renoba den banko sentral ku ta un luga anti-pueblo pero mei mei den barionan popular margina pa mesun banko i su bankonan komersial. Un kontradikshon sin fin respalda pa sanger fresku di PNP pero sanger ku ta kore den venanan bjeew putri di antes. Te dia awe pueblo ta warda un resumen den un lenga komprendibel pa e klase trahado ,ku Doktor a bringa pe, pa sa kiko e konklushonan tabata na final dje foro ekonomiko harma pa e generashon nobo di Partido Nashonal.
E delastu elekshon PNP a gara 5130 voto sigurando un asiento den Parlamentu. Si un partido ku un trayektoria politiko asina grandi no por rindi honor na nan emblema heroiko Doktor Da Costa Gomez ku sikiera 1% di nan votado, komo partido bo tin un problema serio di kredebilidat. 50 persona no mester ta un kos difisil si PNP a respira e filosofia di Doktor di emansipashon di berde pero si bo organisashon ta tur dividi, plama pa interes i politikeria di kouchi boulo ta un potret tristu den korant bo ta hanja di mira di un partido ku antes tabata orguyo di un pueblo na kaminda.
Doktor su palabranan no por ta enbano: “Mi no por aseptá, ku nos mes no ta kapas pa uni forsa, sin distinshon di partido, pa protehá nos komunidat i tuma medida bon pensá, pa asina logra hustisia sosial pa mantenshon di nos bienestar relativo.” Emansipashon bo no ta logre den espasionan elite renobando trampanan ekonomiko pa un pueblo kai aden un bja mas. Ni ku portanan di bo sede sera. Tampoko ku konmemorashonnan mediokre pa un suidadano ilustre manera Doktor ku pa e motibu ei ainda no ta un inspirashon nashonal pa e pueblo aki.
Triunfo di Sablika 