Trinti Mei; Boltu Audi i Kia kolo’i oro

Shelu i tera a hasi huramentu ku nada di mundu no ta keda skondi. Tur kos ta sali na kla na su debido tempu pero wardando 44 anja despues ku un pueblo a sende e mecha dje bom rasial-laboral durante 30 di Mei 1969 ta di mas si. Sobadje e yunan dje revolushon Anthony i Mirna Godett ta bringa otro invita un popchi dje kapitalista ku a hanja ordu pa asesina e karakter di Anthony durante su tempu di gloria komo orado riba plenchi di Papa Godett na Punda. Di ayabanda e rumannan di Wiels ta pega pleitu despues dje desaparishon di Helmin Wiels. Tur dos drama ta buta e dia mas historiko di Korsou, 30 di Mei 1969 mane e titulo dje buki ta skibi pa Edward de Jongh. Te dia djawe no tin un buki of dokumentario visual of oudio ku splika na plaka chiki di tur angulo kiko e historia aki ta bal pa nos konta pa hende ku ta tei of esnan ku a tende di esnan ku no tei mas. Anto e holoshi ta sigi bati i mas hende ku por konta kiko nan a pasa den tin un edat basta avansa kaba.

Si bin un trint’i mei awoki lo ta difisil pa kere ku trahadonan ku awendia na anja 2013 ketu bai ta pasando ratunan duru yena ku abusu laboral lo welga i pega Punda, Otrobanda i sobra negoshi ku a kansa nan na kaminda na kandela. Pakusnan di Indio i Arabir lo no hole na kandela. Makambanan lo no mester tin muchu miedu ku si nan diskrimina, aktua den nan malchi rasista brutu of fini ku lo tin retaliashon di parti dje poblashon pretu. Yunan di tera ku ta eksplota otro yu di Korsou klase trahado lo no mester kana ront ku seguridat arma. Despues di 1969 e klase trahado a avansa si pero e mentalidat pa hustisia sosial den anjanan 1990 pa 2000 e lucha sindikal, e bataya pa derechinan laboral a wordu hala un kantu pa kumpli ku e evangelio di medidanan impone pa IMF i Ulanda. Kortamentu den presepuesto di gobiernu a laga Korsou kome hopi sla ekonomiko-finansiero. E trahado no a sigi hanja e edukashon laboral pa sigura su mes un bida na nivel lokwal e tin derechi riba dje.
No a sigi bedei, no a harma un struktura pe kaminda e tambe por bai un kurso pa subi den posishon na trabao. A hinka den su kabes ku bo si bo reklama muchu bo ta perde bo trabao dus miho kos ta pa keda ketu i kome lunch riba un pida karton bou di un palu of den sombra. 44 anja despues e sindikatonan no por wak nan mes den spil i bisa ku nan a harma e trahado ku herment pa e sali for di e sklabitut di un salario minimo. Awe e misa ku Anthony Godett a organisa pe okashon tabata mitar yen. Lidernan sindikal tiki, i nan miembronan of sigidonan di Frente Obrero no ta koi papia mes. E konsenshi di progreso laboral no tei mas strukturalmente i si tin ku tene hende responsable ta esnan dje hierarkia laboral, e donjonan di trabou, e sindikalistanan i gobiernu. Iglesia no mester menshona mes pasobra kitando un senjora direktor Martis ku tabata na kabes di St. Albertus college ta duna hende sufisiente prueba pa argumenta ku e direkshon ku obispu Secco ta kanando ta unu di dwalmentu.

Bankero Lio Capriles tin un buki di tur su speechnan, 400 pagina. Direktor di banko a dokumenta su historia pero unda e invershon ta pa dokumenta diskursonan di Ewald Ong-A-Kwie, historia di sindikalistanan mane Hubert ‘Bebe’ Rojer, Mac Alberto ku awoki ta den Ricardus tehuis? Oscar Semerel ku ketu bai ta laga su bos zona den media e no merese un biografia oudio-visual, skibi? Kiko e liderasgo sindikal awoki ta hasiendo pa salba e historia sindikal, unda tin ku bai si bo ta interesa den historia di luchanan laboral den pasado? Te ki dia ta warda, eksusa mane e mantra bjeew di tur tempu “No Tin Sen” no ta konta, no por tin balides nunka, e teknologia di awe ta duna tur chens pa dokumenta bida, eksperiensia di un historia riku sin muchu molester finansiero.

Laga hubentut i poblashon trahado sinti e sabor di resistensia, rebolishi di abusu laboral, sosial rasial pa nan fortifika nan kana den bida ku e sabiduria di pasado tesei te mishon ku mester inisia pero tin ku move si, mishi ku nan kurason pa nan hanja e kurashi pa defende nan mes. Te ainda ta masha normal ku bo ta traha pa un kompania pa 7 anja anto bo ta drei riba mesun salario ku ba kuminsa kune. Te ainda ta nada stranjo ku ora dunado di trabou purba di pasa man riba un trahado feminino e tin ku guli manda abou of si e reklama of denunsia e ta pafo mesora.
Sindikatonan ta usa e ekskus ku trahadonan no ta miembro di nan organisashon pesei no por defende nan pero bo kasa of abo mes si ta bai kalke tienda, supermerkado kumpra kos bo ta mira ku bo mes wowo e abusu, bo a train bo mes, bo sa lei laboral pero bo ta hasi net net nada.
Lider sindikal no ta kana rekluta talento den establisamentunan komersial pa nan sindikato, nan no ta traha strukturanan ku ta fasilita kalke empleado pa djoin un sindikato of sikiera hanja e kurashi pa interesa nan mes den kurso di leinan laboral. Tin un kaminda mei mei ku semper por wordu kana.

E desaroyonan aki ta presis lokwal a pasa despues di trinti mei. Gezaghebber pretu, gobernador, den negoshi hende di kolo por traha dilanti awo. E poder ekonomiko un parti ta den man di hende di desendensia Afrikano pero tog nan tambe a kopia e abusunan di nan opresor ekonomiko.
Kapitalismo a laga nan kere ku e bida di un hende no bal mas ku 1300 florin pa luna. Ku esei e tin ku wak numa kon ta sobrebibi. No tin niun estudio hasi kwantu hende mester pe biba un bida na drechi ku bista riba progreso sosial. Banko Sentral i CBS no ta tribi di hasi investigashon, gobiernu di e ta bai hasie pero esei ta speransa falsu. Niun por hasie tampoko paso si bo kalkula e minimo di eksistensia di bida pa hende e lo tin konsekwensia politiko mara na dje ankra den lei ku na e momentunan aki supuestamente no por karga niun oumentu di salario segun nan modelo kapitalista putri.

Adriaan Moen komo un dje tiki ku ta keda konsistente ta alerta ku bos duru ku niun hende ke papia riba ripartishon dje kapital i propiedat. Media, sindikalismo, sektor priva i gobiernu, politika, religion no ke hasi estudio riba kon e koriente dje plakanan di e komunidat aki ta reparti i ken tin kwantu propiedat. Tanten esaki no ta riba un agenda nashonal tur hende por rep kiko nan ke, romantisa e fecha aki, sinta komo lider politiko, intelektual, akademiko den iglesianan bashi

Na kas di burduga no sa falta strop, nomber largu di un grip ku mayoria di nos inkonsientemente ta sufri bou di dje pesei un dia nashonal pa 30 di Mei 1969 ta den un futuro leew aya pero no mag di stop di pusha promove e sonjo aki. Tanten no tin kambio bo por tin yen deseo riba ekonomia, turismo, produktividat pero mayoria di nos bida ta sigi mane e banda Goldy Locks a kante: “No tin kwenti nada, no tin kwenti di un kos, 30 di mei ’69 Korsou ta na kandela anto brantwer no tin awa pa page…. Nos a bira zonder berouw, seh swa, zonder berouw, si mi mati zonder berouw…”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s