Shartella Sintiago-Liberashon
Abrenunsia,
Awe Tisha no a kwe
su frei choka,
Chamo por a manda
su famia $50 San Dom,
Diandra a abstene di
plama pia karga
koka den para blou
ku’n kara krou.
Yunan no a hanja hala’i sota,
kana bai skol sin lembe
Black label i chukulati.
Machi por a paga su
2,3 heldu pa remedi,
despues di bai perde
pa dos siman polis
a hanja Sharinka na
Domi abou den kas di Betty.
Ora kos dushi ta dura un siglo
Rasta su kara no a sali
riba portada di Vigilante
awe mainta.
Makambanan no a huma
e base rasismo na trabou.
Vivendjely a bai solisita
sin mester a skonde ku
e ta biba na Ser’i Papaya.
Un boka sin kandal
papia di kurason.
Niun polbu,
ni un bala keda di los,
ni un gota di sanger
a mancha kaya.
Nad’i kwementu zumbi ku suku, piskando bou di brug Emma. Bochengu a drenta Brasami, Plu a kab’i sali e ku Ruella trahando riba nan sonjo di ta donjo di un truk di pan vegetariano na Salinja. Nacho mal fada di para dilanti fiskal kada 3 luna, ela kuminsa plug boltu tera den kura, planta berdura ku fruta.
Dushi pa mira Tantan bula feu rei di onderstant. Para traha serka Yvonne den su kushina despues huntu ku 3 amiga lanta nan mes banko koperativa. Tamika kier a kita su barika, dump e beibi den un kliko.
Rito di desperashon ken no a yega di tende di dje?
Hotel Kura Hulanda a dal den bankarota trahadonan sin salario.
Nan a buska abogado hiba tur konjo enbolbi dilanti wes gana claim miyonario. Zwarte Piet a senk abordo di un yola. Anto 7 muhe a hui for di Campo, Gibi despues di yoya stret riba farandula ta hodidu a kuminsa usa su don di kanto pa kanta un kambio.
Fabrika di Coca Cola no tei mas, e forsa laboral a tuma e manego bou di nan man awoki ta aw’i koko ta buta den boter. Studiantenan a kuminsa protesta. Tambu ta zona na radio henter anja awo. Spiritu di lucha na Santa Martha a borota. Politika ta kokocha, outornan intelektual ta kumpra ticket pa Bogota, na Hato nan a keda kologa. Hubilo tra’i hubilo.
Triunfo di Sablika 